بسم الله الرحمن الرحيم ,,
السلام عليكم ورحمة الله وبرركاته ,,
بصراحه كتبت الموضوع ويوم بغيت اعتمد المشاركه للأسف بعد ماتقطعت يدياتي وجاني شد عضلي في رقبتي ماراحت
بس وش نسوي نحتسب الأجر
المهم بدون مقدمات وغيرها ومالكم بالطويله الموضوع كما هو موضوح اعلاه:
@@ انا و هو وطباته في ( العلماء والمشائخ) ؟؟ حوار ناري ( ارض جو ) @@
بتكلم بالعاميه افضل
( وسأدع الفصحى جانبا ولن اعيرها اي اهتمام
)
وقبل ما ابدأ الحوار اللي بصيغة ( انا و هو ) اتمنى اننا نتفق على ان الدين اهم شي وان راح دين الواحد منا ماراح يتعوض وغيره يهون وينتعوض والله سبحانه خلقنا لعبادته وطاعته فقط الله يرحمنا برحمته ,,
الرجال اللي اعرفه اتناقش معه احيانا في بعض الأمور ومن حين يجي طاري العلماء والمشائخ مايصدق خبر ويبدأ يطب ويتنقص منهم ويدور زلاتهم ( ويتصيد في الماء العكر كما يقال
) واليكم الحوار :
هو : ماسمعت فتوى الشيخ فلان خربها ؟
انا : سمعت وقريت عنها مثلك وسواء الكلام صحيح او غير صحيح فالشيخ مجتهد وهو بشر وليس معصوم من الخطأ واتمنى ان كان عندك توجيه او نقد اتمنى انك تراسل الشيخ او تقابله شخصيا لأنه من الخطأ نشر مثل هالأمور وتصيد زلات المشائخ او التنقص منهم في المجالس او على النت لأن الناس فيهم الصغير والجاهل وضعيف الايمان ومن علمه قليل والمترصدين للدين من الكفار والمنافقين والروافض كثر فيتمنون نشر مثل تلك الأمور لتشكيك الناس في معتقداتهم وافكارهم واضعاف الايمان في قلوبهم وليشتتوا بين المسلمين وعلمائهم بدل ان يوحدوا صفوفهم بل جعلوا هناك فجوه بين الناس وبينهم ووجدوا للأسف ارض خصبه لبث سمومهم وتوجهاتهم المنحرفه والمضلله التي تزعزع الثوابت والمعتقدات الاسلاميه الصحيحه ,, فان كنت تود النصيحه والتوجيه فناصحهم سرا وان كان قصدك لحاجه في نفسك فالله حسيبك وانتبه على نفسك وخل عنك هالافكار اللي تبعدك عن ربك وتزيد اثامك ,,
هو : ههههه على طول جاهز للدفاع عنهم ولو انه وزير او رئيس دائره حكوميه انتقدتوه وطبيتوا فيه وبعدين وينهم عن الدش اول ماطلع افتوا بتحريمه بعدين صارو يطلعون في القنوات ويسافرون لبعض الدول لمقابلة رؤساء بعض الدول وامراءها يدورون الدراهم
انا : لالا اهم شي الدين ( مثل ماقلت لكم في بداية الموضوع ) لأن التنقص في الدين وأهله مصيبه وتغضب رب العالمين واثرها على الفرد والمجتمع كبير وان راح الدين مايتعوض اما غيره يتعوض وفيه بدائل وبدل الوزير وزير وبدل المدير مدير والدين ثابت في النفوس ولم يتغير ولله الحمد اما التعرض للدين فلا والف لا
اما بالنسبه للدش اللي تقول انهم افتوا في تحريمه اول ماطلع فانا اقول ان فتواهم مبنيه على شر الدش اكثر من خيره ودرء المفاسد مقدم على جلب المصالح_ حتى ولو كان فيها بعض الخير_ لوجود منكرات مثل صور النساء والموسيقى والأغاني ولكن للأسف بعد ماانتشرت بطريقه أو بأخرى وكثرت القنوات وفتنها وافكارها وتوجهاتها الخبيثه ( الأغلبيه طبعا ) صار لابد انهم يظهرون فيها لدعوة الناس طبعا وتصحيح كثير من المفاهيم الخاطئه عن الاسلام وتوضيح مايخفى على الناس من امور دينهم فلو ان كل واحد من المشائخ جلس في بيته وفي المسجد وتركوا الناس ودعوتهم لزاد الشر وانتشر الضلال ووجودهم وظهورهم في هالوقت ضروري ومهم في نظر كل عاقل لكثرة الفتن ولاتنسى ان الرسول صلى الله عليه وسلم كان يخالط الكفار ويروح لهم في انديتهم ويغشاهم في مجالسهم لدعوتهم للأسلام بالرغم ان في وقته الاسلام قوي والايمان كبير في النفوس كيف عاد وقتنا ؟؟
اما مسألة انهم يدورون الدراهم في الدول الثانيه ويقبلون دعوة رؤسائها ماعليش ياحبيبي احسن الظن والنيه صدقني لو الود ودهم كان مااستجابوا للدعوات لالقاء المحاضرات وغيرها واجزم بأنهم لايريدون التقرب من السلاطين والحكام( نحسبهم كدلك ولانزكي على الله احدا ) ولكن من باب (صلاح الرعيه والشعب من صلاح الحاكم ) تقبلوا الدعوات لنشر الخير والدعوه الى الله فبصلاح رئيس الدوله او اي جمهوريه ينعكس ايجابا على شعوبهم ومواطنيهم
انتهى الحوار بانتقالنا الى موضوع اخر واتمنى ان يكون صاحبي قد تغيرت قناعاته وافكاره ,,
ورده صباحيه للجميع
واتمنى لكم وقتا ممتعا وقراءه مفيده ولا تنسوني من دعواتكم
ملاحظه : حرف الدال ابو نقطه لايعمل عندي واتمنى ان اي واحد متناشط وفاضي يعدل فيه
ورده مكرره للجميع
انا و هو وطباته في ( العلماء والمشائخ) ؟؟ حوار ناري ( ارض جو ) 
!
صعب نحكم عليهم بهاالكلام والنوايا ومافي القلوب 
الوضع العادي
