#1  
قديم 16/09/2009, 08:59 PM
المجلس العام
تاريخ التسجيل: 28/04/2003
المكان: المجلس العام
مشاركات: 2,104
Talking تم التحديث :: ( كان هنا ) تأخر و ( ماجد مقبل ) تدخل :: (( دويتو عنيف في يوميات "25" الرمضانية 2×1 ))



فكرة - سندريلا الهلال
اعداد ومتابعة - الهنوووف
تصميم - عسيريه

لنا من كل عام شهر فضيل ..
أعاده الله علينا وعليكم وجميع المسلمين بالخير واليمن والبركات
وكل عام وانتم بخير

**][يوميات رمضانية 1430 هـ ♥][ **
لقد عدنا اليكم .. تحملنا الاشواق للقياكم .. ونسعد ان نعيش معكم .
. في سلسلة تحمل بين طياتها يوميات الأعضاء الرمضانية من كل عام ،
هذه السلسلة أنتم أهل بيتها ونحن ضيوفا في حضرتكم ،،،
+
+.........+
+
أهلا وسهلا بكم أحبتنا ..
ودعونا نرحب سوية بالضيف "الخامس والعشرون"
المبدع " كان هنا"
لكي يحكي لنا احداث يومه مع شهر رمضان المبارك ..


أحم أحم ..
هاه نعم ؟ شفيكم تقزون ؟
أعوذ بالله شكلكم تحسبوني متأخر بكتابة اليوميات .. لالا كل ما في الأمر أن فيه خطأ بتقويم أم القرى ، مقدم يوم على يوم ، ولا تخيلوا أنأ أسحب ع اليوميات ؟! مستحيل طبعاً ..

حقيقةً محدثكم يكتب هذه الأسطر وهو يتراعد ..
أول ما سجلت دخول أحس أن الهنوف طاقة عبايتها وواقفة عند باب المجلس ومعها جذع شجرة ومولعة براسه نار متأثرة بباب الحارة .
. هذا اللي أخذناه من إعلامنا المعاصر ..

مير الوكاد أن النت البارح ضربت فيوزاته L وأنا اللي أحاول فيه أحاول وماش ما يضبط ..
وأنا اللي ألف يمين يسار يابن الحلال تكفى طالبك اشتغل دقايق بس لا تفشلن مع اللحى الغانمة .. وهو راكب راسه يقول مافيه نت يعني مافيه نت وبيني وبينك المحاكم (6) !!
بيني وبينكم استسلمت للأمر الواقع .. وقررت أني أرضخ لأوامر طويل العمر .. وبيني وبينكو بعد .
. أحسن ، لأن يومي اللي مفروض ينكتب ماكان فيه أي أكشن والعياذ بالله ..
مما كان سيؤدي أني راح " أهك " عليكم وأستغفل عقولكم النيرة عياذاً بالله ،
فحمدت ربي أن اليوم فات ..
وقلت أزين ، أسولف لكم شصار باليوم اللي بعده ..
المهم .. شرايكم أسولف لكم من الليل ؟ يعني من بعد التراويح ..
دوووف << صوت دوي زبيرية حاذفها واحد .. يبدو لي انه ابوطلال .
.
يوم صارت الساعة تسع ونص بالليل
وأنا أذكر مباراة التشامبينز ( ريال مدريد X زيورخ )
.. وأنا اللي أتذكر أني ما جددت الاشتراك ، وأنقز طيران وآخذ رقم كرت الجزيرة وأدق على واحد من الشباب فالشرقية عنده محل إشتراكات ،
وأقول أبك عاني طالبك أباك تجدد لي إشتراكي .. قال لي تم ..
عطيته رقم الاشتراك وبيض الله وجهه جدد لي بوقتها .. مير الرسيفر ركب راسه وعيّــا يطلع قنوات الجزيرة ،
وأنا اللي أبتلش وأحوس اللين طلعتها على نهاية الشوط الأول ..


تكيت قدام الرائي .. وقعدت أشوف المطش .. ( إلا يا عيال كيف كريس .
. قسم بالله مهبول يا هو يمزع مزع .. يشوتها بالنص وتجي قول .. الله أكبر :s )!!
( سؤال ع الطاير : الرائي يقولونه للتلفزيون ولا الراديو ؟ >> يابثري ، اخلص خلنمشي )

ماعلينا .. قضت المباراة وجلست وتكيت
وأدق على أخي الأكبر ( ادعوا له بالتوفيق ويرد سالم غانم ) وأسولف معه ،
ثم ألتفت وآخذ لي برمة ولا العيال مشغلين الصونـ 3 ـي ، وأنا اللي أنبرش عليهم وأسحب اليد من عبود البطل ،
( نلفت عنايتكم أن عبود البطل هو صاحب هذه العضوية " كان هنا " ،
وكما زرفت منه يد الصوني فأنا من قبل زرفت منه يوزره وغيرت النك نيم ، للأهمية جرى التنويه ) ..
المهم أخذت اليد منه وطقطقت عليهم .. وألتفت ولا الساعة ثنتين وربع ،
فزيت توضيت ولبست ثوبي ورحت أصلي القيام ..
خلصنا تقريباً حول الثلاث .. رجعت بيت أبي ونفس الفلم اللي قبل شوي ، لعبت صوني وكسرت روسهم ..


جلست عند التلفاز إلى أذان الفجر ..
أذن قلت أستغل الوقت وأقرا وردي اليومي من القرآن ..
أي والله الحمدلله قرينا وخلصنا وصلينا ورجعنا البيت .. وتكيت قدام الجزيرة أشوف مباراة ريال مدريد وبرشلونة قبل أربع سنين الظاهر .. انتهت 4-2 ، مبروك للمدريدية ..
في غضون ذلك طب علينا الوالد K .. وهو اللي يقول خير ان شاء الله وش مصحيك ؟
قلت أبد طال عمرك قلت يمكن تحتاج شي ولا ماشيات اباشرك ..
قال أقول قم بس نم ورانا قومة الساعة وحدة الظهر ..
أنا : هاااه !!
بابا بكل حنية : بنروح نشتري أغراض العيد ،
بصراحة وقتها انغبنت كنت عاد نفسي رجال .. قلت سم طال عمرك
قال وان ما قمت الساعة وحدة ترام انب مشتري لك .
. ثم استدرك ولانب معطيك فلوس تشتري قلت أبشر هذان رايح أرقد هاللحين ^_^
طبعاً حدثت أفلام بعد هالمشهد الإحترازات الأمنية لا تسمح بالنشر ..
مير الوكاد أني نمت ولا قمت الا ثلاث العصر .. وألقى اتصال من ماجد مقبل .. قلت كفو هذا نذير من النذر الأولى !!
وأفز من الفراش وألقى أبوي قدامي قلت يا دا النهار المنيل بستين نيلة .
. قال أسمع عيدك ذا بتعيده بنفس لبسك قلت أن بغيت ما أعيد بس خلني أشوف المصيبة بالنت ..

وأدخل الشبكة وأشوف ثلاث رسايل .. وحدة من شذى والثانية من ماجد
والثالثة من الهنووف ..
قلت كفو .. عز الله رحنا زلطة L ..

وأفتح الرسايل وأنا أتراعد مثل ما ذكرت آنفاً ،
وماجد يهدد ويتوعد يقول ان ما أرسلتها فمصيرك سجن أبو غريب حق المنتدى وينحطك أنت وذآيب بزنزانة وحدة ( ذآيب محد يقصد أنك ماصل أبد ترى ) .
. والهنوووف بكل قسوة تقول يا ترسل اليوميات ولا ترا برش عليك موية ،
قلت اللهم الطف الطف .. باقي شذى ..

يوم أفتح الرسالة ،
ولاهي ولله الحمد ما تدري وش صاير بالعالم ورسالتها مالها شغل باليوميات .. >> تسنّي أشوف بعض الأوادم مبققة عيونها تبي تعرف وش بالرسالة .. حامض على بوزكم مانب معلم ..

دوكم اليوميات ولا عاد تبلشوني بيوميات ومدري وشو .. ووو يحظكم رسمت الابتسامة على براطمكم

للتنويه :
( ترا صدق صدق أنا ما تأخرت ، المنتدى الاستشاري تأخروا باستلام الإرسالية ولا هي موجودة من الفجر )
وو .. آسييف :$


كل الشكر

للعضو المتميز* *][ " كان هنا"♥][ **





+.........+
+
أهلا وسهلا بكم أحبتنا ..
ودعونا نرحب سوية بالضيف "الخامس والعشرون"مكرر
الخنفشاري " ماجد مقبل "
لكي يحكي لنا احداث يومه مع شهر رمضان المبارك ..


السلام عليكم ورحمة الله وبركاته ,,,

يا الله .. ما أشبه الليلة بالبارحة ..

مازلت اذكر تلك الرسالة من سندريلا الهلال بتاريخ 17/09/2006



إقتباس
الرسالة الأصلية كتبت بواسطة سندريلا الهلال
العضو الكريم : ماجد مقبل


بعطر المحبة نرسم دعوتنا ...
وبأمل التفاؤل نطرزها ..
دعوة مختلفة من _ المجلس الاستشاري _ ترسمها القلوب قبل الحروف
وتخطها بعبير المحبة
ندعوك - نطالبك - برسم حرف من حروفك الذهبية وبعزف لحن منفرد من حروفك على أوتار الكلمات في مجلسنا الاستشاري ،،
تقف كلماتنا على أبواب حروفكم مطالبة ،،
وتقف كلماتنا وكلها شوق وأمل بتلبية دعوتنا
الجميع يتطلع لحرف ذهبي من حروفك فهل يكون لنا الشرف في ذلك عبر مجلسنا

نطالبك بيومك الرمضاني الكامل والحافل أن تحكي لنا يومك الذي عشته كي نعيشه معك نريده بأسلوبك وان تحكي لنا كل ماصادفك في يومك وسيصادف يومك يوم الثالث من شهر رمضان واتمنى ان يكون الموضوع مرسل لي عند الساعه 11 ليلا من نفس اليوم ..
آملين منك موافاتنا بالموافقه او الرفض..

شاكرين لك تعاونكم من اجل رقي شبكتنا والمجلس الاستشاري،،
دعواتنا الخالصة بالتوفيق والنجاح لك وللجميع..

وتقبل أعذب التحيات من اعضاء المجلس الاستشاري

إشراف & المجلس الاستشاري

كم كانت فرحتي بهذه الرسالة كبيرة .. وكم تشرفت بهذه الدعوة كثيراً حيث كنت ثالث عضو يشارك في هذه اليوميات ولذلك مازلت احتفظ بها في بريدي فهي تعني لي الكثير ..

وشاركت تلك السنة بيومياتي وكانت بعنوان " مــاجد مقبــل يصــلي التراويح في سطــح ....!! "

المهم هذي المقدمة رسالة غير مباشرة لكان هنا اللي سحب علينا اليوم وورطني بكتابة اليومياتوهذا من حسن حظكم

يومي يومي يومي ... !!

حقيقة لست ادري في أي وقت يبدأ يومي في رمضان لكني سأبدأ معكم مع بداية الدوام ..
ومن حسن حظي وحظكم إني أمس قمت الى الدوام بدري ووصلت للمكتب الساعة 10 ونص تقريباً ..
وكالعادة أول ما ادخل أحط النظارة على الطاولة >>> باللهي
طبعاً نظارة شمسية لان النظر الحمد لله تمام والدليل نتيجة اختبارفحص العيون في موضوع الاخ / كبير يا ((هلال))
المهم فتحت الجهاز وشيكت على الاوت لوك >> ياحبي له
وخلصت كم شغلة بعدين على طول على شبكة الزعيم اشيك على المواضيع و الحمد لله ما في ضغط برمضان
يعني يمديك تطقطق على النت بعكس بعض الايام الاخرى ما تقدر تحك راسك ...
الزبدة مدري وش سويت أمس بالضبط بس أكيد كم إنذار وكم إغلاق وكم حذف ..

وعلى طاري ها الأمور اذكر العضو الغالي هلالي 88 ارسل يسألني عندك صلاحية تفعيل قلت له لا بعد فترة ارسلي وقال طيب عندك صلاحية تغيير اليوزر قلت لا قال ياخي انتم ما عندكم إلا اغلاق وحذف وإنذارات بس ..

نعود للموضوع ..

صليت الظهر وطلعت بنك الراجحي اشيك على دراهمي قبل الاجازة وخلصت كم شغلة ورجعت للمكتب فتحت المسن من المكتب "اون لاين" وكان لي فترة ما فتحته " اون لاين " وهذا برضوا من حسن حظكم ولقيت صديقي روسي999 وسولفت معه سواليف خاصة جدا جدا حول موضوع ".... "
واهداني قصيدة لاحمد مطر

وبعد لقيت الكناري الازرق وتجاذبت معه أطراف الحديث وكان لي عنه فترة ..
وتناقشنا عن الطفرة الانترنية وقالي ان الفتن كثرت وانه خايف على نفسه وانه ماهو معطي الفتن وجه والى اخره من الكلام اللي مدري من وين يطلعه ..
طبعا في أعضاء سولفت معهم على بعد وهم اياد وصالح وإبراهيم وفي واحد سبحان الله سامج بقوة كل ما ادخل القاه بس من حسن حظكم انه ما كان متصل أمس >>>ابد ما اقصد دمي ازرق واحب الابيض >>بعد عليه يوزر
وكان معي على الخط ولد أختي عبودي بخامس ابتدائي وناشب لي صاحي الظهر وكل بزارين العائلة نايمين ومالقى الا خالو ماجد يطقطق عليه وكل شوي يرسل اشارة تنبيه ويقول شخبارك وان ارسله فيس خاص بالتسليك
الى ان طفش وقال لا ترسلي ها الفيس مرة ثانية

المهم الساعة 4 ينتهي الدوام بس ما طلعت من المكتب إلى حدود الساعة 5 لاني اخذت راحتي بالمسن ويوم جيت بطلع لقيت كم شغله واخلصها وادحدرعلى البيت

دخلت البيت وجلست مع الاهل وسواليف إلى اذان المغرب وافطرت وبعد الصلاة حطيت راسي الى اذان العشاء ..

قبل صلاة العشاء جات اختي صحتني لاني مواعدهم اوديهم لمسجد الشيخ عبد العزيز الاحمد لكني هونت لانه بعيد وما في وقت فقالت ودنا لمسجد اللحيدان قلت بشرط ماني مرجعكم قالوا عادي بنجلس الى القيام قلت حلو بس لازم تدعون لي وبعد القيام ترجعون معي ان شاء لله ..

ورحت لجامع اللحيدان صليت العشاء وتسليمة طبعا التسليمة الواحدة نص ساعة لانه يصلي تسليمتين في التراويح .. وبعدين وانا طالع لقيت احد أعضاء شبكة الزعيم وهو صديقي ميتو (نايف ) وهذا ايضاً من حسن حظكم طبعا نصحته وقلت له ليه تطلع كمل الصلاة >> تعرفون مشرف لازم يوجه الاعضاء
المهم سولفنا شوي الى ان وصلنا لمفترق الطريق وكل واحد راح لسيارته .

بعد التراويح رحت خلصت كم شغلة وحجزت لي لمكة على يوم الخميس ان شاء الله .. بعدين دق علي واحد من العيال قال تعال نشوف مباراة النصر المستوى عال العال .. طبعاً قلت له إن شاء الله مابقى الا النصر .. وأروح النادي اخذ لي شوط سباحة ومعي خوي وهو عضو لكني نسيت يوزره و حرام فيه العضوية لانه ما قد شارك واذكر اني يوم كنت عضو مميز كلمت الغالي تيماوي يفعله وما قصر ... المهم تهوشنا في المسبح انا واياه هو برشلوني وانا مدريدي ويبينا نشوف مباراة برشلونه مع ميلان ليلة 27..وقلت له معصي

طلعت من النادي ورحت البيت وليقيت ولد اخوي يلعب كورة بالشارع اخذته ورجعته معي البيت وجلست ابو نص ساعة شيكت فيها على المنتدى ... >>> كن ذايب يقول وش ذا النشبة

ثم رحت لجامع اللحيدان وصليت القيام وبعد الصلاة قرأت ما تيسر من القران واخذت اخواتي الثنتين ورجعنا البيت .. وكان واحد من اخواني ماسكه معه يتسحر بروستد من اول رمضان عاد اليوم عطيناه جوه وقلنا له نتسحر بروستد ولا يصير في خاطرك الا طيب يا الثور وجاب لنا بروستد من الفطيرة الشامية مع بعض الاطباق الخفيفة .. طبعاً الحين احس بانواع العطش والله ييسر ونكمل الصيام الى المغرب

بعدين صليت الفجر وبعد الصلاة شيكت على المنتدى لمدة نص ساعة تقريباً ثم بعد ذلك خلدت الى النوم ...
ومن حسن حظكم >> ذليتنا بيومياتك لا عمرك تكتب يوميات
اني قمت بدري اليوم بعد ووصلت المكتب على الساعة 10وللاسف مالقيت كان هنا كاتب اليوميات

فكتبت لكم هذه اليوميات بعد مناقشة بعد ما سحب علينا كن كن وطال الانتظار

وحبيت من خلالها اقول الله يتقبل من ومنكم الصيام والقيام ..
وان يجعلنا من عتقائه من النيران ..

وكل عام وانتم بخير


كل الشكر
* لمشرفنا *][ " ماجد مقبل "♥][ **


وانتظرونا غداَ
مع العضو المتميز .-السمسار الهلالي


أرق التحايا وأطيبها من
مشرفي واستشاري

المجلس العام

اخر تعديل كان بواسطة » الهلالي دائماً في يوم » 17/09/2009 عند الساعة » 05:35 AM
  #2  
قديم 16/09/2009, 09:06 PM
الصورة الرمزية الخاصة بـ ‏Mr.RęLǻҗ
زعيــم نشيــط
تاريخ التسجيل: 14/04/2009
المكان: ! . . ( × " in your Heart "
مشاركات: 769
,,

دقيقه يالدوحمي قبل مانرد

إقتباس
خلنمشي



بأي قاموس هالكلمه

/ ,

المهم عبدالرحمن يوميات حيلوة , توشششكر ياقلبي = $

,,

اخر تعديل كان بواسطة » ‏Mr.RęLǻҗ في يوم » 16/09/2009 عند الساعة » 11:57 PM
  #3  
قديم 16/09/2009, 09:13 PM
الصورة الرمزية الخاصة بـ شوق الكويت
زعيــم مميــز
تاريخ التسجيل: 04/07/2008
المكان: KUWAIT
مشاركات: 5,948
يوميات حلوه وخفيفه بس ليلحين مافهمت انت متأخر ولا الاستشاريين

عالعموم يعطيك العافيه اخوي ماقصرت

وبانتظار ماجد ويومياته اللي اتوقع بعد مافيها اكشن مثلك
  #4  
قديم 16/09/2009, 09:23 PM
الصورة الرمزية الخاصة بـ الهنوووف
عضو استشاري للمجلس العام
وعضو تحرير مجلة الزعيم
تاريخ التسجيل: 18/01/2005
المكان: زاوية ارى الناس ولايروني
مشاركات: 11,542
احم احم - - ->

هلا والله بك اخوي كان هنا

تدري اني مانمت الا الساعه 11 ونصف احتري يومياتك - - -> بتوهقه
وخرب زر التحديث من كثر ماحدث وارتفع معدل المشاهدين لملفك الشخصي
اثاريك نايم
يالله حصل خير سامحتك - - -> تكفين

تراك حست راسي الحين عبود البطل شخص ثاني وسرقت يوزره
طيب مين يكون اخوك يعني

الله يخلي لك ابوك احس انه برد خاطري شوي

\

/
يومك انقلب كله خوف وترقب
يعطيك العافيه وكل ماكتب اعلاه مزح
اهم شي ارسلت يومياتك وتشرفنا بقراءتها - - -> تريش به
والف شكر لك ع قبول الدعوه وحنا الي نعتذر لو سببنا لك ربكه
والله يسامح الاتصالات الي حرمتنا من روعه قلمك
- - -> مازالت تريش

بانتظار ماجدونا
الهنوووف
كانت

هنا

ورحلت
  #5  
قديم 16/09/2009, 09:34 PM
الصورة الرمزية الخاصة بـ R D H
زعيــم مميــز
تاريخ التسجيل: 10/11/2005
المكان: ماوراء الكلاويس :D
مشاركات: 1,791



يكفيني أنك " مدريدي "

ويكفي " مدريد " فخراً أنك تحبها .

وهذا يكفيك لأن أحبك ..


<< ياشين اللي يبي يمدح وما عرف وشلون !


إلا صحيح مبروك عليك الفوز أمس ..


وبالنسبة لشذى .. أسألني أنا .. عايشه بعالم ثاني مع نفسها خخخخخ .. الله يحفظها !



الله يعطيك العافيه وسعت صدري .. توني اكتشف أنك خفيف دم ..


والظاهر أنك انت نفسك توك اليوم تكتشف .. من المدهش فعلاً أن يكتشف الشخص ( خفة دمه ) وهو في هذا السن ..

ربي يحفظك .. وعقبال ماتكتشف أنك شاعر عقب عمر طويل




كن كما أنت أيها المدريدي


أحبك


<< ها ؟




برب مباراة برشلونه ( فيس يستفرغ من الإشمئزاز )



  #6  
قديم 16/09/2009, 09:46 PM
الصورة الرمزية الخاصة بـ حتى ظلالي هلالي
زعيــم مميــز
تاريخ التسجيل: 03/01/2007
المكان: { .. مسآفر في سما النسيان ~
مشاركات: 2,500
^
بالتوفيق للانتر ق1 ض1

كن كن لي باكـ :$
ومايهون ماجدونا
  #7  
قديم 16/09/2009, 09:57 PM
زعيــم مميــز
تاريخ التسجيل: 31/03/2005
المكان: جـدة
مشاركات: 3,627
اهليين يااا وع
والله شلت هم اكثر من الهنوووف وانا كل شوي ها ايش صار ارسل
طيب شوفي الشباب يمكن احد يعرف وينه يتصل عليه

الله يخلي لك ابوك خليك ولد مطيع واسمع الكلام
يوميات خفيفه اووي يعطيك العافيه

وبانتظار الحكوومه
  #8  
قديم 16/09/2009, 10:40 PM
الصورة الرمزية الخاصة بـ Fahad Al Sudais
مشرف سابق في منتدى الجمهور الهلالي
تاريخ التسجيل: 21/02/2008
المكان: مدريــدي / ارسنــالي
مشاركات: 13,119
ماشاءالله

كان ( بذأ ) وصل

الحمدلله على السلامه.. لابأس طهور ان شاءالله

وشلون بطنك الحين

عساهم صلحوا لك غسيل معده بصابون بونكس ( نظافه ريحه توفير )

عاد هماه انتبه مره ثانيه لاعاد تاكل في مطاعم مشبوهه

من الصبح وانا ارقع لك وادربي العالم... الله مير يصلحك يالدحمي

الله يعيننا على الاخطاء الاملائيه باكر مع ماجد سيبويه
  #9  
قديم 16/09/2009, 10:42 PM
زعيــم مميــز
تاريخ التسجيل: 11/07/2005
المكان: حيثُ يعيشُ الأملْ
مشاركات: 3,080

.
.

هلآ والله كآن هنآ المدريدي على حسب روآية ابرآهيم < -- مدريديه

اجل سحبت على الحكومه
من جد امس كلنآ شآيلين هم الهنوووف والله وهقه
يالله تعيش وتآكل غيرهآ أو هم يعيشون ويآكلون غيرهآ , مآندري
من اللي انكرش فيكم

الله يخليلك الوآلد ان شالله
كآن هنآ قلم مميز بالمجلس العآم ..

الله يعطيك العآفيه ..

وبنتظآر الأديب الخنفشآري

.
.
  #10  
قديم 16/09/2009, 11:55 PM
الصورة الرمزية الخاصة بـ السمسار الهلالــي
زعيــم مميــز
تاريخ التسجيل: 11/08/2007
المكان: صفّر لي و أنزلك :P
مشاركات: 3,240
السلام عليكم ورحمة الله وبركاته

إقتباس
وأقول أبك عاني طالبك أباك تجدد لي إشتراكي .. قال لي تم ..


" أبك " مشاء الله كلن صار يقولها ترآهآ كلمة [ محتكرة ]

حبيب أسجل حظوري في يوميات كان هنا صديقي الغالي ..
كل عام وأنت بخير قدااام الزحمة ..


  #11  
قديم 17/09/2009, 12:12 AM
الصورة الرمزية الخاصة بـ Mr.Scrub
زعيــم مميــز
تاريخ التسجيل: 04/02/2008
المكان: حولك حوليك
مشاركات: 2,284
يوم كله سحبآت في سحبآت
وإذا على العيد , لاتشششتري أبد
يعطيك العافيــه على اليوم اللي مدري وش يبي
لاهنت
,
يآحظنآ بكره مآجد بيشرفنآ
ننتظر
  #12  
قديم 17/09/2009, 12:13 AM
زعيــم نشيــط
تاريخ التسجيل: 17/05/2008
مشاركات: 552
وعليكم السلام ورحمة الله وبركاته


ماكنت أظن اني بافقد اليوميات لهالدرجة.. ..دايم اقول انها مصالة اعضاء .. بس الحين عرفت قيمتها تهي .. تهي .. كذا حنا مانعرف قيمة الشيء الا اذا فقدناه ..
ـــــــــــــــــــــ
لا الصدق اني معلقة على f5 من الفجر وقريت مواضيع المجلس كلها وهي ما نزلت
.. ويئست بالضبط عند الساعة 11.24 دقيقة << خـــراطــــة


مشكورين يااستشاريين المجلس

بانتظار
ماجدونا




_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _


الشوط الثاني ..


الحين ماعرفنا لكم تقولون كنكنكنكن سحب عليكم وهو يقول انا مسكين الاستشاريين مافتحوا رسالتي ..
وضحوا الامر ياقماعة .. .. اعترفوا .. مين اللي عمل كده .. .. لانه مطالب بـ زر تحديت جديد للهنوووف



ماعليكم من اللي فوق..

استغل هذا المنبر وقد قاربنا على توديع هذا الشهر الفضيل وانقضت الاجازة الصيفية .. الا اذا كان خبرWOLF SAMI صحيح.. ان اشكركم على جهودكم المبذولة للرقي بالمجلس والتي نعجز حقيقة عن شكركم على جهدكم المبذول والواضح فيها ,, فلكم منا يامشرفي المجلس واستشارييه كل الدعاء بالتوفيق واسأل الله ان يجزل لكم المثوبة .. ويوفقكم لما فيه صلاح الدنيا والآخرة ..

اخر تعديل كان بواسطة » ومضات في آفاق التميز في يوم » 17/09/2009 عند الساعة » 07:10 AM
  #13  
قديم 17/09/2009, 12:21 AM
الصورة الرمزية الخاصة بـ ع ـشقهــا هـلالـي
زعيــم مميــز
تاريخ التسجيل: 18/11/2007
مشاركات: 4,488
Arrow

يوميـآت حلـوه آهم شي آنهـآ نزلت .. استمتعت بقرآئتهآآ
وآلله يرد لكم اخوك سآلم غآنـم ..
شكرآآ للمشرفين ع آليوميـآت بنتظآر آلآخ مآجد مقبل
..


بآك بعد مآقريت يوم آلآخ مآجد مقبل ..
كل يوميآته من حسن حظكم بس يوميآتك حلوه ليش
مآعطيت ولد آختك وجه حرآم عليك جزآته يسلم يعني ويتطمن
عليك وانت تسلك ..
وشسمووه يومك رآئع وتشكر عليه استمتعت بقرآئته ..
سيـآآآ

اخر تعديل كان بواسطة » ع ـشقهــا هـلالـي في يوم » 17/09/2009 عند الساعة » 05:55 AM
  #14  
قديم 17/09/2009, 12:29 AM
الصورة الرمزية الخاصة بـ Z ! Z OO
زعيــم مميــز
تاريخ التسجيل: 21/08/2007
المكان: Alriyadh , KSA
مشاركات: 2,006
Post

هلا والله كان هنا ;
أبارك لك الفوز أمس ,, وأستغرب كيف تنسى المبارة << تكفى يالي متابعها
عساك شريت للعيد شى ,,

يعطيك العافية على اليوميات
لو بغيت كان سحبت عليهم ترا ماعندك مشكلة ,,
وننتطر أبو مقبل ,, ونشوف وش عنده

..||

  #15  
قديم 17/09/2009, 12:43 AM
الصورة الرمزية الخاصة بـ إحساس خالد
زعيــم مميــز
تاريخ التسجيل: 02/08/2007
المكان: عاصمه الكآبه & بلاد العم سام
مشاركات: 3,811
كان هنا

والله آويت لك عن جد وش هاليوميه ياشيخ قلق X قلق

مافيك اعصاب

ابد تعال وعازمك عند 50 فاكهه ...

اذبح لك عصير (ليمون بالنعناع )

ريلاكس ياكود تريح اعصابك

وبعدها للاستراحه تسدح بالثيل ...

//

آخر كلامي :

مبارك عليك العيد مقدماً ومن العايدين الفايزين يارب

ابو عسل
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 01:43 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube