13/09/2009, 04:24 AM
|
المجلس العام | | تاريخ التسجيل: 28/04/2003 المكان: المجلس العام
مشاركات: 2,104
| |
((يوميات رمضانية "22" )) المتميز ( Blue Sun )--(واحدث الدروس في "فن الترويع" )...!!! فكرة - سندريلا الهلال اعداد ومتابعة - الهنوووف تصميم - عسيريه لنا من كل عام شهر فضيل .. أعاده الله علينا وعليكم وجميع المسلمين بالخير واليمن والبركات وكل عام وانتم بخير **][يوميات رمضانية 1430 هـ ♥][ ** لقد عدنا اليكم .. تحملنا الاشواق للقياكم .. ونسعد ان نعيش معكم . . في سلسلة تحمل بين طياتها يوميات الأعضاء الرمضانية من كل عام هذه السلسلة أنتم أهل بيتها ونحن ضيوفا في حضرتكم ،،، + +.........+ + أهلا وسهلا بكم أحبتنا .. ودعونا نرحب سوية بالمضيف " الثاني والعشرون " المتميز" Blue Sun.- " لك يحكي لنا احداث يومه مع شهر رمضان المبارك .. بسم الله الرحمن الرحيم .. السلام عليكم ورحمة الله وبركاته .. بداية استغل هالفرصة واسمحو لي اتفلسف عليكم شوي .. اليوم هو 22 من رمضان يعني ما بقى على نهاية رمضان الا 7 ايام اذا استثنينا اليوم هذا لانه صار امس .. ياليت نستغلها احسن استغلال لان ما في احد يضمن يعيش لرمضان الجاي .. واذكركم بافضل دعاء يقال في العشر الاواخر وليلة القدر وهو .. (( اللهم انك عفو تحب العفو فاعف عنا )) ولولا فضله لما وصى به الرسول صلى الله عليه وسلم عائشة رضوان الله عليها عندما سألته : " يا رسول الله أرأيت إن وافقت ليلة القدر ما أدعو قال (( تقولين اللهم إنك عفو تحب العفو فاعف عني )) " نبدأ على بركة الله .. الساعة 12 وانا وخويي رايحين للسوق ناخذ اغراض وهدايا للعيد .. وصلنا السوق كان زحمة جدا , تنقلنا بين المحلات واشترينا كم غرض .. لو احلف لكم ان ذاك الوقت مافي ولا انثى ببيتها من كثر اللي شفتهم بالسوق وما اخفيكم ان اغلب البنات بالسوق كان لبسهم وحركاتهم تشكك انك برمضان .. بعد ما تجرح صيامنا وتخدش حيائنا شوي .. قررنا الخروج من السوق ماله داعي صيامنا وتعبنا بـ 21 يوم يروح بليلة وحده .. وكانت الخطة اننا نروح نصلي بجامع الدخيل عند الشيخ ياسر الدوسري .. لكن كانت الساعة 2 تقريبا والوقت متاخر جدا .. لذلك تعدلت الخطة شوي وقررنا نتسحر , لكن اختلفنا على نوع السحور .. لان خويي حالف ما يتسحر الا بروستد من الطازج , وانا رافض .. لانه قبل اسبوعين متسحرين بروستد الطازج .. واليوم الثاني الساعة 10 الصباح متصل علي ومصحيني من احلى نومه يقول "سويتها" .. !! قلت له وش سويت الله لا يفضحنا .. قال " لا يروح فكرك بعيد قمت عطشان وافطرت" .. يقول قمت الساعة 9 وانا بموت من العطش حاولت اصارخ على اخواني حتى اقول لهم وصيتي ما طلع اي صوت , الاحبال الصوتيه جفت .. وطحت من السرير وقمت ازحف للمطبخ , ويوم وصلت للمطبخ وانا اشوف روحي بسقف المطبخ واشرب ويوم تطيح روحي علي .. قلت له للاسف عذر اقبح من ذنب .. وعطيته ذيك المحاضرة اللي من قوتها شك انه خرج من الملة .. المهم ما علينا من اللي فوق .. قررنا ان يكون سحورنا كودو واتجهنا على اقرب كودو .. ووجبتين كودو دجاج يحبها قلبك .. وبعد ان تناولنا طعام السحور توجهنا الى المنزل عنـ.. << سلامات وش تحس به .. وبعد ما تسحرنا وصلني للبيت تقريبا الساعة 3ونص << ايه خلك كذا .. واتفقنا انه يمرني الساعة 9 ونص صباحا اروح معه لانه بيسوي فحص زواج .. << باركوا له وعقبال لي .. دخلت البيت واذلف مباشرة لغرفتي مو ناقص صجة وازعاج .. لان كل اخواني وخواتي جايين هم وبزارينهم عندنا من بداية رمضان لذلك انسى طعم النوم والراحة في البيت .. وتابعت شوي من مسلسل بيني وبينك وبداية مصالة طاش ثم بدات دورية الماء بالبيت .. طبعا هالعادة في بيتنا من زمان .. مدري تعرفونها ولا لا .. كل بزارين البيت يطوفون الغرف كلها ومعهم مويا .. ومافي غرفة ما يمرونها يعنى انس تروح عليك نومة وما تشرب .. رحت اصلي وبعد الصلاة رجعت اشوف التلفزيون مع اخواني وبقية الشلة الى الساعة 7 صباحا .. وطلعت الغرفة وبغيت اخذ غفوة بس خفت تروح علي نومة واسحب على خويي وبعدين يكنسل زواجه بسببي .. والله ما درى عنك .. لذلك فتحت النت وقريت كم موضوع ورديت عليهم الى الساعة 8 واذا مو مصدقين ادخلوا ملفي الشخصي وشوفوا الردود .. وبعدها لا اراديا غفيت شوي وصحيت وتذكرت موعد خويي .. واناظر الوقت الا الساعة 10ونص .. واشوف الجوال الا فيه رسالة من خويي يقول "صاحي ؟".. اتصلت عليه قلت له اكيد صاحي انتظرك تمرني .. قال : "بدري انت ووجهك الرسالة من ساعتين مرسلها .. وانا الحين بالمستشفى وبعد دقايق بدخل اسوي الفحص" .. قلت طيب ليه ما اتصلت قال : "خفت تكون نايم وازعجك بالاتصال ".. قلت زين ما سويت .. << ماله خوي .. ونص ساعة وانا اكلمه طبعا هو مرتبك وقلت هذي فرصتي واعطيه من هالسوالف .. اعرف فلان خطب وسوى فحص زواج وما تطابقت النتايج والغوا الزواج . .. وفلان جهز كل شئ بس يوم فحص طلع فيه امراض وبلاوي ورفضوه .. ما خليت طريقة من طرق الترويع الا استخدمتها .. ومن هالكلام حتى جا موعده وانهينا الاتصال وهو تافل العافية .. الله يـوفقه و ييـسـر أمـره و يتمم له بـخير .. ولاتنسونه من الدعاء .. وعقبال ما نفرح فيكم كلكم يارب.. العزوبية بس .. المتزوجين يحمدون ربهم ويقضبون ارضهم .. ورجعت اكمل غفوتي وما صحيت الا الساعة 4ونص ولحقت اتابع نهاية مسلسل ام البنات وانقهرت شوي .. وبعدها تابعت برنامج رائع جدا جدا على قناة الوطن للشيخ نبيل العوضي .. وبعدها جلست اسولف مع الوالدة وشوي هستره مع البزارين الى اذان المغرب .. طبعا نظامنا فطور وعشا سوا لاني متعود ما تنفتح شهيتي الا اذا السفرة مليانة من اولها لاخرها .. والمشكلة اني ما ااكل الا 3 حبات تمر و5 حبات سمبوسة والسلطة وبس .. بعد الصلاة جلست اتابع طاش وبيني وبينك مع اخواني وبقية الشلة اللي جلست معهم بعد الفجر .. وبعدها صليت العشاء وما تيسر من التراويح ورجعت احضر لكتابة اليومية .. والساعة 10 زارونا ضيوف جلست معهم الى الساعة 11 واستاذنت وطلعت الغرفة حتى اكمل كتابة اليوميات .. واعذروني على الاطالة .. نهاية اشكر لكم رحابة صدركم وطولة بالكم علي وربي يسعدكم دنيا واخره .. واخص بالشكر الهنوووف على اتاحة الفرصة لي لاشارككم يومي .. وكذلك على جهودها الجلية بالمجلس الله يعطيها الصحة والقوة .. وما انسى اشكر صاحبة الفكرة سندريلا , والمصممة عسيرية ويعطيكم ربي الف عافية .. ودمتم بخير ,, كل الشكر لـ المتميز **][ " Blue Sun"♥][ ** وانتظرونا غداَ مع صاحب القلم المعطا ريكيلمي .- أرق التحايا وأطيبها من مشرفي واستشاري المجلس العام |