:
بسم الله الرحمن الرحيم
آخباركم يا اخوان ..؟
انا واحد المقدمات ما اعرفلها ولا احبها < وش دخلنا فيك
اليوم بقولكم قصه صارتلي انا
والوالد
الله يطول بعمره ويخليه
يوم من الايام الوالد الله يطول بعمره حجز لي انا وياه على ابها وكنا متجهين على تنومه ( محافظه بالجنوب )
وجا اليوم الي حجزنا فيه ورحنا للمطار والله وسوالف انا والوالد بالسياره والمهم وقفنا السياره بالباركنق ونزلنا ونزلنا شنطنا ودخلنا للمطار
ورحنا للكونترات ع شان ناخذ التذاكر المهم ورحنا انا والوالدللكونتر وعطيناه رقم الحجز وكل شي الا الكونتر يقول:
معليش تأجلت الرحله
الوالد : وشلون تأجلت
الي في الكونتر : ياخوي تأجلت ع شان سوء الاحوال الجويه بآبها
الوالد : ما في مشكله بس كم ننتظر < على نياته لبى قلبه
الكونتر : والله ما ندري انتظر ويحلها ربك
الوالد : طيب عادي نروح ونرجع ولا ما بيطول التأجيل
الكونتر : والله معليش اخوي لازم تننظر لان في اي وقت يمكن تجي الطياره
والوالد : اللهم طولك يا روح مشينا يا ولد
والله ونقعد ننتظر ساعه ساعتين ثلاث خمس الزبده الوالد عصب
خلاص قفلت معه والوالد قام للكونتر
وانا اتلقف والحقه ويروح للكونتر
الوالد : السلام عليكم
الكونتر : وعليكم السلام والرحمه
الوالد : لنا 5 ساعات ننتظر الطياره ولا قلتوا لنا شي
الكونتر : والله ذي مو مشكلتنا < عاد هو ما له خلقت يتكلم ونافخ خشمه على ايش مدري
الوالد : نعم وش الي مشكلتنا انا المطار ولا انتو
الكونتر : يا اخوي انتظر ولا يكثر هرجك
الوالد : وش الي لا يكثر هرجك لا بكثر هرج ملطعين لنا 5 ساعات وتقول لا يكثر هرجك يا خي اقسم بالله ان ما في وجهك سحا
الكونتر : احترم نفسك
الوالد : انا محترم لكن انت شايف نفسك مدري على وش هذا وانت ع الكونتر اجل لو انك مدير وش يتسوي
الكونتر : رح رح انتظر لاناديلك الشرطه < حليله ما يدري انه ظابط
الوالد : رح نادهم واذا تبي اناديهم ناديتهم
معك العميد ...............< نعتذر لازم نشفر الاسم
الكونتر : الا انت وين رايح
الوالد : الحين يوم عرفت اني ظابط
الكونتر : لا يا اخوي ابعد عن الشر وغنيلوه
الوالد : هههههههههههههههههه رايح لأبها
الكونتر : ابها مأجله
الوالد : جبت شي جديد وانا وش اقول من اول
الكونتر : اخوي امرني
الوالد : ابي اعرف كم نقعد ساعه ساعتين ثلاث
الكونتر : والله مو على كيفي انت انتظر ويصير خير
وانا امسك ابوي واقوله مشينا نقعد ورحنا قعدنا والله يا شباب ان الوالد الله يحفظه من الطفش نام
وقعدنا 11 ساعه يعني تخيلو من الساعه 3 العصر لـ الساعه 2 باليل
ورحت انا للكونتر ابي اكلمه برواق
اقوله : السلام عليكم
الكونتر : وعليكم السلام هلا اخوي
انا : والله يا اخوي لنا 11 ساعه هنا وانتو تقولون انتظر لان رحلة آبها تآجلت وع الاقل 5 ساعات واللحين لنا 11 ساعه
الكونتر : نص ساعه وبتجي الطياره ان شاء الله
انا : اكيد نص ساعه
< وانا اقول في نفسي وآخيرا
الكونتر : اكيدين < انا ما ادري ليه العالم لقلتلهم اكيد يقولون اكيدين
انا : زين ثواني بجيب الحجز
الكونتر : خذ راحتك
< لبى قلبه والله انه قمت الاحترام تراه غير الي فوق
وانا اروح طااااااااير للوالد واقوله الحجز الحجز
ابوي: لييييه
الطياره جايه بعد نص ساعه
ابوي : بالله
اي والله
ابوي خذ < يقصد الحجز >
وانا اروح واقص التذاكر واخلص اموري ورحنا للبوابه حقت الرحله
وننتظر 45 دقيقه الا وحنا بالطياره
ابوي يقولي ما بغينا نسافر
اول ما ركبنا الطياره قعدنا انا والوالد نسولف
وترى هـ السالفه مرت على عمامي كلهم
لين متى وحنا كذا يا اخي الناس تطورت الا حنا صارة العالم عندنا لسافرت تروح بالقطريه ولا بشركات الخطوط الامراتيه
الناس عافت الخطوط قحتنا بسبب دلاختهم وعدم حسن اخلاقهم ياخي الواحد يتكلم معك وهو يعطيك التذكره بطرف خشمه
مافي احترام للمسافر لا وجابو في برنامج 99 عن قصة تأجيل الرحلات بالاخص رحلات ابها والله يا عالم كل ما اقعد بمجلس الا ويقولون انا لطعوني 8 ساعات والثاني 10 الساعات و و و و و ما في ارتقاء في التعامل
صحيح اننا احسن من غيرنا بس حنا نطمح للأفضل والله كل ما اطالع برنامج خواطر استحي من نفسي ياخي شوف مع انهم غير مسلمين وآفضل مننا في التعامل مع الناس
ما ابي اطول عليكم لان عافت خاطري
وكل عام وانتم بخير
دمتم بود