((يوميات رمضانية "16" )) المتألقة (مَاهِينُورْ ) {تشمر عن ساعديها بـ "اسطوانه الغاز" و "قطف التمر" ولسان حالها يردد - "ياحيف على الرجال "- .}...!!!
فكرة - سندريلا الهلال اعداد ومتابعة - الهنوووف تصميم - عسيريه لنا من كل عام شهر فضيل .. أعاده الله علينا وعليكم وجميع المسلمين بالخير واليمن والبركات وكل عام وانتم بخير
**][يوميات رمضانية 1430 هـ ♥][ ** لقد عدنا اليكم .. تحملنا الاشواق للقياكم .. ونسعد ان نعيش معكم . . في سلسلة تحمل بين طياتها يوميات الأعضاء الرمضانية من كل عام ، هذه السلسلة أنتم أهل بيتها ونحن ضيوفا في حضرتكم ،،، + +.........+ + أهلا وسهلا بكم أحبتنا .. ودعونا نرحب سوية بالمضيف "السادس عشر" العضوة المتألقة " مَاهِينُورْ .- " لك تحكي لنا احداث يومها مع شهر رمضان المبارك ..
بسم الله الرحمن الرحيم
الحمد لله وحده والصلآة والسلام على من لا نبي بعده
السلام عليكم ورحمة الله وبركاته أسعد الله صباحكم ومسائكم بكل خير
{ أسأل الله الذي تفضل علينا ببلوغ رمضان ‘ أن يبلغنا وإياكم رضاه
ويجعلنا من أهل تقاه , وكل عام وأنتم إلى الله أقرب
}~
أهلاً وسهلاً بكم في يومي
اليوم السادس عشر كما هو ظاهر أمامكم , لكن أحداث اليوم الذي سأكتبه هو لـ يوم سابق من شهر رمضان وسبب التقديم هو خوفي من عدم توفر النت في اليوم المطلوب مني , فـ إقترحت عليّ الهنوووف الله يجزها خير أن أكتب أي يوم وإرساله
وبما إني وجدت نفسي متفرغة في أحد الأيام كتبت يومي البسيط وأيامي قد تكون متشابهة تقريباً في رمضان إلاّ ما نَدَر
..! # قبل البدء أحب أقوول أعانكم على القراءة , مرّةً بالفصحى ومرّةً باللهجة العامية وبالتفصيل الممل حتى نلتزم بالشروط
..! وأيضاً لا يخفى عليكم ان يوم البنت يختلف كثيراً عن الجنس الآخر, لذلك جميع الأحداث في البيت بسم الله أبدأ يومي من الساعة الثانية ليلاً ..
في هذا الوقت من كل يوم يبدأ الإستعداد للسحور بالتشمير عن ساعدي والبدء بتجهيزه
كانت النية إني أطبخ رُز باللحم لكن بعد ضياع الوقت تحوّل الطبق من رُز باللحم إلى مكرونة باللحم
شَبّيت على اللحم وعلى بال ماينضج , يحتاج ساعة أو أكثر خرجت لإحتساء القهوة المُعدّة سابقاً
الساعة الثاثة إلاّ قليلاً أَمرتُ أختي الصغيرة بالذهاب لإيقاض أبي , ثم عُدتُ للمطبخ لـ تسخين شوربة لوالدي وبعد تقديمها له , عُدتُ مرة أخرى للإكمال عمل المكرونة , ولكن تفاجئت إن الفرن طافي , يعني الغاز مخلّص
~> هذا وقتك ؟!
بسرعة صوّتت لأخوي فلآآآن أنقذني ماانتظرته يجي ,, طلعت بسرعة وحرّكت الإستطوانه لقيتها خفيفة
, فـ مالنا إلاّ إنا نبدّل لَيّ الغاز لوحدة جديدة
طبعاً لأني ماانتظرت أخوي يجي والوقت يمر بسرعة , حاولت أطلّع اللّي ماقدرت , فـ جبت سكين وقصيته وشبكته بـ اسطونة جديدة .. والحمد لله رحمةً من ربي تم العمل بسرعة حتى مفتاح الغاز صار سهل بالحيييييل وانفتح معي على طوول يا ربّ لك الحمد والشكر .. رجعت وشبّيت على المكرونه من جديد , وبهالوقت دخل المحروس أخوي ..! قال : هاه وش تبين ؟
قلت : خلآص إنحلت المشكلة كثّر الله خيرك
بعدها إستودعت ربي السحور وطلعت أصحّي أمي وأصلي لله ما يتيسر لي
دخلت على أمي لقيتها صاحية بس رِجْلينها متعبتها
قالت : همّزيهن لي كُودهن يليننْ وأقدر أقوم
همّزتهن لها وأنا أناظر الساعة كل شويّ مابقي إلا أربعين دقيقة على الأذان ..! إرتاحت أمي الحمد لله شويّ ودعت لي وقامت ~> الله لايحرمني من دعواتك يالغالية ويرزقنا برّك ورضاتس
..
بعدها طلعت سريعاً للمطبخ , بطريقي ناداني أخي يقول تعالي , أشَرت له بيدي إن ماعندي وقت .. غَرفت السحور وقدّمته , ما أصبرت واستأذنت منهم وبدأت بالأكل , وتفاجئت إن سحوري ماااااااالح
~> رفلأ
خِفت يهزأوني بسبب الملوحة الزايدة بس ماقالوا شي كبير تهزيء بسيط يحدث دائماً .. قلت لهم عليكم بالماء والجحة " البطيخ " ينسيكم الملح .. سألت أخوي : وش يبي لما ناداني ؟ قال: أبيك تشوفين مقطع فيديو لـ القذافي حق فتوى الكعبة ~> هذا وقته الله يصلحك ؟! وبسبب سؤالي دار نقاشنا على المائدة حول ليبيا والقذافي ودخلنا بالسياسة حاولت أتذكر موضوع للأخ أبو طلال حول هالموضوع عشان أتفلسف عليهم بس للأسف الذاكرة خانتني
~> أصلاً هالموضوع بهالوقت ماله داعي أبد ,, الملائكة تستغفر للمتسحرين وحنا نغتاب هالليبي ..! قفّلنا الموضوع بسبب قرب الأذان , فـ أمسّكْنا بعد شُرب الكثييير من الماء ,, بسبب المكرونة المنحوسة أذّن الفجر وتفرّق الجميع , ورجعت لسيء الذِكر المطبخ وقمت بالواجب من غسل الأواني والترتيب بمساعدة أمي طبعاً
الله لا يحرمني منها لازم تكون وراي بكل صغيرة كبيرة عشان ما أخرّب بعد ماانتهيت صلّيت ونمت بعد يوم شاق ..
الساعة 8:30 تقريباً إستيقضت كالعادة
حاولت أرجع أنام لكن ماقدرت صحيت شبعانه نووم وأنا مانمت إلا ساعتين ماحبيت أطوّل أكثر من نصف ساعة وأنا أترجى النووم يرجع , فـ قمت ..!
فتحت النت , وأكيد أول مادخلت المجلس وقرأت وردّيت على بعض المواضيع ~> المثبتة فقط مرّ الوقت سريعاً ودخل وقت صلاة الظهر , و خرجت .. قبل البدء بالصلاة جائتني أمي تقوول : أبوك يسأل عنك , قلت لها : وش يبي ؟ قالت : يقول في رِجلي شوك تعالي طلّعيهن ~> الله يرضى عليك يبه وشوله تمشي حافي ؟ " طبعاً الوالد الله يحفظه يهوى الفلآحَه ما شاء الله من يومه صغير " يعني فلاّح بالفطرة "أكيد بما إنه قصيمي , وأكيد بيضطر لرمي حذائه " تكرمون" ويمشي حافي يقولون أصّح له بالطب الصيني أعتقد " نعود لمحور حديثنا وحواري مع أمي قلت لها : بصلي وأروح له .. صلّيت وأخذ العِدّة وطلعت للوالد , دخلت عليه لقيته نايم أو كنت أظنه نايم ..! إستحيت أكلمه ورجعت
, قلت فرصة آخذ لي غفوة وقبلها قرأت وِردي من القرآن
وبعد ذلك نمت بالصالة تحسُباً لعودة أبي ما أخذت دقيقتين من أول مانمت إلا وأبوي رااجع , إستيقضت أول ماسمعت صوته , رحت له وبدأت بعملية الحفر والتنقيب عن الشوك وطلّعت كم شوكه ولله الحمد
طبعاً دائماً كل ما أطلع شوكة أعطيها أبوي يشوفها ~> يقالي مسويّة إنجاز ..! يعلّق الوالد و يقول : ماهي بشي يابنتي , شوفي شلون إبن آدم ضعييييف هالشوكة تأثر فيه وماتخلّيه يقدر يمشي !! إذا الشوكة تعذّبنا كل هالعذاب كيف بيكون عذاب نار جهنّم ؟! وأخف الناس عذاباً يوم القيامة ينتعل بنعلين يغلي منهما دماغه ..! نسأل الله العفو والعافية بعدها بدأ يشكو لي حال شباب الحارة وتأخرهم عن صلاة الجماعة هداهم الله .. ومع هالنصائح والسواليف تأثرت أو نعست وماحسّيت إلا بصرخة من الوالد كنت أطلّع الشوكة الأخيرة و أخطأت وجرحت قدم أبوي وهاوشني ~> أستاهل بس والله معذورة نصّي نووم بعد ماانتهيت قال لي أبوي : خلآص عافاتس الله بس إمشي معي أبيك بشغله بالحديقة " أو المزرعة كما نسميها " يبيني
" طيّب حرر وشمس والساعة 2ونصف ونطلع للحوش ؟!!" ~> ماقلت له هالكلآم , ماعطاني فرصة قال لي إمشي وراي ياحياة الشِقى يوم من بدايته أعمال شاقه , الفجر أشبك إسطوانه والظهر أخرف تمر !! ياااحييييييف ع الرجال الي تاركين إختهم تشتغل هالشغلات الصعبة بس وش نقوول مالقى غيري أنا يالضعيّفة بهالقايلة ~> أمزح يالغالي كم عندي أبّ أنا ؟! تذكرت حريم زماان سواءاً من كانت في البادية أو في المدينة وأعمالهن بنهار رمضان أكيد يتعبن أكثر مننا وهذا اللي خلاّني أشتغل مع الوالد وأنا شبه مرتاحة .. المهم لبست مايقيني من حرّ الشمس اللتي لم أخرج لها منذ سنة تقريباً وصلت للمكان المطلوب وجلست تحت ظل النخل وتفاجئت بالبرااااد يهفهف ما شاء الله , ياالله برااد الجنة ياا ربّ .. طبعاً ما شاء الله النخلة قصيرة أقطف وأنا جالسة .. عبئت لي كرتون صغير بوقت قياسي الحمد لله وإنطلقت سريعاً لداخل البيت كنت مُتعبة وعطشاانة لا شعورياً رجعت لمكاني في الصالة وخلدت للنوم ~> على إني بقوم أسويّ كذا شغلة وأستعد لصلاة العصر واجهّز الفطوور لكن ..!
الساعة الخامسة وخمسين دقيقة تقريباً قوّمتني أمي , قمت مرعوبة , صلّيت العصر متأخرة الله يغفر لي وعلى طوول للمطبخ بحاول ألحق أسويّ شي , لكن مافي وقت أقل من نصف ساعة وش بتسويّ !! أذّن المغرب وأفطرنا والفطور كان عبارة عن تمر قهوة والقشطة ولقيمات أمي اللذيذة و الأهم الماء والماء والماء ~> عطش قويّ نسأل الله شربة ماء من حوض النبي لا نضمأ بعدها أبداً .. على الفطور إعتذرت منهم لعدم عمل شيء دسم للإفطار ردّوا علي بأن لا مشكلة حلو الفطور الخفيف تفرقنا لأداء الصلاة بعد أن وعدتهم بعشاء ينسيهم فطورهم بإذن الله
بعد الصلاة رجعت للمطبخ من جديد , وقمت ببعض الأعمال اللازمة ومنها التجهيز للعشاء وعمل شاي للي جالسين عند التلفاز وعملت لأمي مشروب البردقوش .. ودّيت الشاي وجلست مدة قليلة عندهم وشاهدت جزء بسيييط من أحد المسلسلات السامجة وغثّيتهم بكثرة الأسئلة ووش سالفة هالمسلسل وليش وليش ؟ ماحبيّت الجلسة قدام التلفزيون وحسّيت إن وجودي بينهم غلط ولو بقعد أكثر بتجين بيالة شاهي بسبب كثرة الإستفسارات رجعت أكمّل شغلي إلى أن خرجوا من صلاة التراويح .. ~> طبعاً شيّ أساسي مع الشغل تواجد الراديو في المطبخ والإستماع إلى صلاة تراويح مكة والمدينة وغيرها
في هالليلة ولأول مرّة من دخوول رمضان كثروا الزوّر إلى بيتنا .. منهم من سلّم وخرج ومنهم من جلس إلى الساعة الواحدة , وهالفترة قضيتها بأعمال كثيرة قد لا تستحق الذكر لكن منها جلوسي مع الضيوف , ومع بزارين الجيران المزعجييين ومحاولة طردهم من البيت بطريقة تليق بأهاليهم عند الساعة الواحدة والنصف تقريباً قدّمت العشاء المتأخر أو السحور المبكر .. ودقّت الساعة الثانية ليلاً معلنةً إنتهاء يومي الذي كتبته لكم من غير زياادة والكثير النقصان أسأل الله أن يغفر لي ولكم ويتقبل مني ومنكم ماقدمنا ويعفوا ويتجاوز عنّا ويبارك لنا في أيامنا ويجمعنا بكم في جناته .. واعذروني على الإطالة و رداءة الكتابة والوصف ~> أول مرّة تكتب بحياتها النتية كلام كثير شبيه بالمواضيع .. أعلم أن هناك من هم أحق مني بكتابة يومياتهم , لكن ماحبّيت أرفض المشاركة هذه السنة أيضاً
..
فـ عُذراً عُذراً إن رأيتم أن مشاركتي لا تستحق ..! إن أعجبكم يومي فقولوا ما شاء الله تبارك الله وإن لم يعجبكم فقولوا الحمد لله الذي عافانا مما ابتلاها به وفضلنا على كثير من خلقة
شكراً لكل من قرأ يومي , شُكراً الهنوووف عاااجزة عن شكرك والله واعذريني ماحطّيت صور ماكنت عارفة إني بكتب هاليووم شكراً للمصممة الرائعة عسيرية , ولا أنسى صاحبة الفكرة الحاضرة الغائبة سندريلا الهلال ..
\ /
وصلى الله وسلّم على نبينا محمد
أختكم / مَاهِينُورْ
كل الشكر للمتميزة **][ " مَاهِينُورْ "♥][ ** وصدق من قال مالها الا بناتها
وانتظرونا غداَ مع المشرف المتميز M O H A N A D .-
أرق التحايا وأطيبها من مشرفي واستشاري المجلس العام
الله يعيطك العافيه يا ماهينور صراحة يوم شاق جداً , خاصه التمر بالظهر والشمس الله يكتب لك أجر كل من أفطر على التمر بذآك اليوم إذا احتسبنا الأجر بكل عمل نسويه برمضان والله بنرتاح ونستانس
يوم جميل جداً والله يخلي لك أبوك وأمك ويرزقك برّهم , شكرا ماهينور +
وعليكم السلام ورحمة الله وبركاته هلا وغلا ومرحبا بحنين نورتي الحتة ماشاء الله عليك يومك حافل بالعمل لو اسوي نص الي انتي سويتيه بقعد شهرين اسولف عنه من جد يوميات سنعه الله يحفظ لك امك وابوك ويرزقك برهم
ماعآد فيه نظآم كل العالم تحجز وأنا بعد لي عـوده , مَاهِينُورْ حيآك الله , ماشآء الله عليك سنعه < ليه ماحطيتي هالفيس
إقتباس
فـ جبت سكين وقصيته وشبكته بـ اسطونة جديدة ..
أجل تقصينه , وش ذآ العجله عليك , صدق أن ماعندك وقت ماتعرفين تفكينه طيب , على كذآ يبي لكم لي لفه كآمله كل شهر لا الجد سنعه ماشاء الله عليك , بس من جد فقدنآ هالفيس , يمكن كلام البرنس في يوميآت أبرآهيم له تأثير عليك
يعطيك العافيه , والله يخلي لك الوالد والوالده وأخوآنك والعآئله الكريمه كلهآ وكل الشكر للهنوف هذآ الرد برعآية [ ]
ماشاء الله للحين تحسين انك رفلا اجل حنا وش نسمي روحنا
سبحان الله الامهات مهما عرفتي وتعلمتي تحس انك ماتعرفين شي احيانا البنت تتزوج وتجيب اطفال وماتزال بعين امها وابوها بنوته الله يخليهم لنا ولايحرمنا منهم ويرزقنا رضاهم وبرهم والله ان شوفتهم مبسوطين وحولك تسوى الدنيا __> ليتني اقوله بوجههم
ماشاء الله يومك متعب من اسطوانه غاز لـ التمر مير انا مانلام لو سويت كذا ماعندي اخوان البلى من اخوانتس والله البنات نعمه من ربي وياشين بيت مافيه بنات والبنت سبحان الله حنونه على اهلها وبعضهم اسنع من اخوانها احس اني بديت افضفض مواقفك مع ابوك ذكرتيني في ابوي خصوصا بـ العزايم ياكثر مايضيق صدري واتمنى اني ولد علشان اوقف مع ابوي واصب عنه
\ / يعطيك العافيه ماهينور يومياتك غير اكيد لانها منك والتفاصيل احلى واحلى واثبتي ان البنات قدها وقدود ومافي شي صعب علينا والله يخليك لاهلك ويرزقك ولد الحلال والبنت الي تهمز رجولك والولد الي يطلع الشوك من رجولك شاكرهـ حرصك
السلام عليكم ورحمة الله وبركاته أسعد الله صباحكم ومسائكم بكل خير
وعليكم السلام ورحمه الله وبركاته ,,
ويسعد صباحك .. أهلاً وسهلاً بكم في يومي واهلاً بك .. وأهلاً بعوده حتسي من جديد ..>> اني قايله يومتس غير عن الكل .. ربي يحفظك ويخليك لعيون ترجيكِ.. أخرِف " أقطِف " تمر .. الله ذكرتيني بمزرعتنا اللي بديره وايام الخوالي .. وشقى خرف التمر والمسراح؛ الذهاب؛ مبكر ..
فـ عُذراً عُذراً إن رأيتم أن مشاركتي لا تستحق ..! إن أعجبكم يومي فقولوا ما شاء الله تبارك الله وإن لم يعجبكم فقولوا الحمد لله الذي عافانا مما ابتلاها به وفضلنا على كثير من خلقة قلنا الحمد لله الذي عافانا مما ابتلاها به وفضلنا على كثير من خلقة ..
^ ^ امزح طيب غصب يعجبنا آجل نورالشمس يومها مايعجبنا .. ما شاء الله تبارك الله >>> من الطائف للرس ,,
عافاك ربي .. وحماكِ.. لك .. وشكراً لمن خلف الكواليس ..
هلا وغلا ومية مليون مرحبا بالغلا كله
بالله من اللي أطلق على هالبنت ( ملح المجلس ) ؟ انا اشهد انه جابها وصح لسانه
ماهينور انا من قبل ادري انتس سنعه ومن زماان داريه إنتس ملتزمه الله يزيدتس
بس أوّل مره أدري إن اللي يزيّن اليوميّات الأسلوب مو الأحداث ولا حتى الأكشن
من هالمنطلق أقول ان يومك خقق ..
ألاحظ الكل يحبك ماشاء الله تستاهلين ياحيي
على قولة الشاعر :
ماينفتح قلبي لبعض الأوادم ... والبعض من قبل يتكلم أحبه
يشهد الله إني احبتس فيه
هاه استانستي ؟ مع اني عتبانه عليتس
اللحين تقولين يومياتي الساعه عشر الصبح وتنزل اللحين : (
بس زين انها نزلت اللحين لأني الساعه عشر بكون بـ سابع نومه
يوم طويل وحلو وممتع وطريقة سردك لأحداث بسيطه كان مشوّق ويعجب الملاقيف اللي مثلي
عواافي قلبوو وعواافي هنوو
وبإنتظار مهند
((يوميات رمضانية "16" )) المتألقة (مَاهِينُورْ ) {تشمر عن ساعديها بـ "اسطوانه الغاز" و "قطف التمر" ولسان حالها يردد - "ياحيف على الرجال "- .}...!!! 
.- "
}
~ 
, لكن أحداث اليوم الذي سأكتبه 
..! 
..! 
, ثم عُدتُ للمطبخ لـ تسخين شوربة لوالدي 
, فـ جبت سكين وقصيته وشبكته بـ اسطونة جديدة 
..
..
..!
..
~> رفلأ 
..
..
..!
~> يقالي مسويّة إنجاز 
!!
وهاوشني 
" 
الوضع العادي
