يــــ(STC )ــا كــــرهيلك يالإتصالات .. تن تن تن - نادي الهلال السعودي - شبكة الزعيم

ابو طـــــلال · #1 29/08/2009, 12:14 AM

الإتصالات السعودية ... إسم أول ماتذكرة تحط إيدك على مخابيك !!

لأنك تتحدث عن ( لص ) مختص لسرقة المواطن بطرق كثيرة ...

الإتصالات السعودية وفواتيرها تشبة إلى حد كبير ( البطاقات الإئتمانية ) وإذا خلصت تسديد بطاقة بتخلص من تسديد فاتورة !!

مبالغ البطاقة تزيد بشكل غريب وماتخلص !!! وفواتير شركة الإتصالات تزيد بشكل أغرب وماتخلص !!

تخيل تحصل على عرض منهم ( مجاني ) وتجي تستعمل عرضهم وإلاهم صافقينك بثلاثمية ...

تستخدم إحدى ( سرقاتهم ) = أقصد خدماتهم تلقى مسجلين عليك مبالغ مع الخدمة بالأساس ماتجي على تلفون ثابت .. هالخدمات المضافة فقط للجوال !! والموظف يدري .. ويعلمك بس مايدري شلون جت هالمبالغ علي !! أقوله طيب شلها .. يقول مااقدر .. !!

المهم شفت مقطع قبل شوي .. مهوب جازلي .. إلا أسمية مقطع الموسم .. وياليت أحد يرسلها للمهندس سعود الدويش وجماعتة بالإتصالات .. لأنه لاهي بالتصوير بالزواجات وتارك هالموظفين يسرقون وينهبون العالم من خلال الفواتير والزيادات والخدمات اللى تضاف من غير علم المواطن !!

هذا المقطع لمتضرري شركة الإتصالات .. على الأقل الواحد يتنفس ويظحك عليهم خصوصاً إنهم ( حالفين مايردون المبالغ لأصحابها ) لأنه مستحيل يعترفون إنهم نصابين !!

أخليكم مع المقطع ..

>>> برد كبدي اللى مسوية

أخوكم الصغير ابو طلال

شبوط · #2 29/08/2009, 12:19 AM

يا هلا ياهلا بالعم ابو طلال

والله يالغالي مدري وش اقولك دعاية stc تقول حياة اسهل

يارجال خل عنك هم وكذابهم تقطيع + عدم الاهتمام بخدمة العملاء

دمت بخير ,,

أحد المشجعين · #3 29/08/2009, 12:31 AM

شفتوا هذا المشهد من فيلم الماني عن هتلر...

هذا المشهد ياما ركبوا عليه بكل اللغات ترجمة على كيف كيفك

مع تمنياتي انهم يسوون حركات حش اكثر علشان شركة العصابات السعودية تتعدل شوي

ما انسى يا انكويت منهم

ولين تجيت تشتكي على اي فاتورة نفس الرد الازلي

سدد الاول بعدين قدم شكوى

بس الفيديو حلوه

و يستاهلون

السمسار الهلالــي · #4 29/08/2009, 12:34 AM

//

كفو كفو يبو طلال عليك فيهم

شرشرح فيهم و أهجوهم بـ قصايد بعد

!

//

لي عوودة وكفشات عليهم رهيييبة

!

أحد المشجعين · #5 29/08/2009, 12:35 AM

قسم بالله اني رديت الرد الي فوق قبل ما اشوف المقطع

هتلر نفس الشي قالو له سدد بعدين قدم شكوى

يعلن ام الحاله حتى هتلر ما سلم

شمـ v.i.p ـوخ · #6 29/08/2009, 12:38 AM

,,

شركة الانفصالات مسلسل تركي

كل ماقلنا اخر حلقه من مهازلهم
فاجاونا بشي جديد ..

,,
نصابين درجه اولى ..
مرى جاتنا فاتورة الثابت بالالووف .. وفترة اجازه ماكنا بالبيت لو شوو يسير ماتوصل كذا ..
ودفعناها عشان بس لا يفصلون الخط ..
الشهر اللي بعده بعد الوف وازود عن اللي قبل

يعني ماادري لو شو كنا نتكلم مايوصل كذا ابدا ..
ولمى تسال انواع التبريرات .. طيب اذا مو قد انكم تكونون قد اسمكم وعملكم وتعالجون الاخطاء على الاقل .. لا تسوون دعايه واسهل ومدري ايش ..
اسكتو اهون ..

,,

وتبقى حياه اسهل في النصب

..

,,

يعطيك العافيه ابو طلال ...

" أَبُو لارا " · #7 29/08/2009, 12:42 AM

شركة الإنفصالات .. حياة أصعب !!

أنا مشترك في أفاق وكل يوم الإتصال منفصل عفواً كل ساعة
يا أخوي تعبت مع الشركة
وإذا ما أنقطع النت يسير عيد عندي !!!!!!!!

أبو طـلال .. كل عام وأنت بخير

Fahad Al Sudais · #8 29/08/2009, 12:46 AM

ذآيب · #9 29/08/2009, 12:59 AM

كفـٌوٍ يآ هتلـٌرٍ ,,

شـٌد عليهـٌم ,,

يعـٌطيك آلعـٌآفية آبـٌوٍ طـٌلآل ,,

مـٌوٍدتيّ ,,

قرقاص · #10 29/08/2009, 01:31 AM

هلا وغلا بابوطلال

الأتصالات السعودية لو بنتكلم عنها يبي لنا سيرفر كامل عشان نكتب فيه من الفضايح والنصب والأحتيال واذلال خلق الله

من ايام ماكانت تتبع لوزارة البرق والبريد والهاتف ومصايبها ماتخلص وشعارها سدد وبعيدن اعترض

تتذكر البيجر لما وصل سعره 7000 ريال في عام 1414 هـ

ولا الجوال اول مانزل ب 10000 ريال في عام 1416 هـ والدقيقه ب 1,60

ولا اشتراك الجوال 60 ريال شهريا على لاشي

والحين خفضوه ل 45 ريال ومقابل لاشي ايضا

تصدق رغم كل اللي تسويه الا ان جوالي وجوال المدام والدي اس ال واشتراك النت من عندهم

على قولة المثل القطو مايحب الا خناقه

حتى ظلالي هلالي · #11 29/08/2009, 01:59 AM

ابو طلال انا لو بتكلم على الاحتيالات كان من زود الحماس
اخلص من الكلام من جهه ويشيلوني على المستشفى من جهه ثانيه

بيرتفع عندي الضغط والسكر والقولون

لذالكـ خلني ساكتهـ احسن لصحتي

بس للمعلوميهـ

ياجتهم دعاوي هم والكهرب على هالرمضان مو طبيعيه

الله يستجيب منا ان شاء الله

بو فهد عم جواهر · #12 29/08/2009, 02:01 AM

ابو طلال

شوووهد ما كتبت

مقطع جميل

صراحه انا استعمل الاتصالات بالاتصال
وموبايلي بالنت

تقبل خالص احترامي
@

ابو طـــــلال · #13 29/08/2009, 02:30 AM

إقتباس

الرسالة الأصلية كتبت بواسطة شبوط


	يا هلا ياهلا بالعم ابو طلال والله يالغالي مدري وش اقولك دعاية stc تقول حياة اسهل يارجال خل عنك هم وكذابهم تقطيع + عدم الاهتمام بخدمة العملاء دمت بخير ,,

شبوط قلبي ... هلابك والله

تكفى حللّني يالغالي .. البارح حشيت فيك

تذكر يوم تحلف إنك طالب بالإستراحة !؟

ويوم أشغلك كل شوي واقولك .. إسكت أشغلتنا !!؟ وإنت ساكت ماتكلمت !!

تراني دايم وواحد من الأعضاء أضحك على هالموقف مع مواقف أخرى ..

بس إنت الوحيد اللى رحمتة .. حسيت إنك تستحي .. منتب مثل هالتماسيح ترد الكلمة بعشر

تحياتي لك يالسمي .. وسعيد بتواجدك يالغالي

!. مجنون في زمن العُقلاء .! · #14 29/08/2009, 02:42 AM

هلا فيك ابو طلال
تدري وش آخر عروض النصب والاحتيال عندهم
عرض جود بلس برودباند
يقولون تكلم لما تشبع مكالمات بلا حدود وبسعر شهري ثابت
فقط 399 ريال
وبالاخير تشترك وتكلم باليوم كمثال 4 ساعات او 5 ساعات
جا يوم من الايام وتحمست وعزمت كل اخوانك يكلمون خ خ خ خ خ
شوي الا جايه فاتوره عليك اضافيه فوق سعر الاشتراك الشهري
تقول ليه ؟ موب تقولون مكالمات بلا حدود والسعر ثابت
يقولون لاحظنا فيه سوء استخدام للخط ههههههههههههههههههههه
بالله وين تنصرف هذي
سألت ولد خالتي وهو موظف بالاتصالات السعوديه
وانا مسئول عن كلامي هذا قدام ربي
قال هم معتمدين اصلا باليوم لك من 3 الى 4 ساعات
اذا زاد عنها يبدا يحسب عليك
يعني ليه هالنصب ليه هالاحتيال
المشكله ماعندنا حماية مستهلك
يعني كذب عيني عينك
واعلانات ماليه الدنيا
بالتلفزيون وبالراديو
وحتى بالشوارع
بكل زاويه شارع تلقى هالاعلان
مكالمات بلا حدود
حسبي الله ونعم الوكيل

المهندس الهلالي 999 · #15 29/08/2009, 02:42 AM

شركة الإنفصالات .. حياة أصعب

!!

قــرف يقرفهـــــم
أنا قبل سنة صكوني بفاتورة قيمتها 4000 ريال ظلم واحتيال حسبي الله عليهم..

ومنذ ذلك اليوم وأنا بموبايلي مرتاح ولا عمري فكرت بالفواتير من كثر ماهي رخيصة..

لكن مدري حكم عدم تسديد الاتصالات وهل هي بالذمة لأني انظلمت فيها والله العالم..
كنت مشترك بالانترنت للجوال بحجم 1 غيغا بقيمة 100 ريال للشهر وانتهى الاشتراك ولا جتني رسالة
بانتهاء 1 غيغا ولا فصلوا الانترنت وظليت اشتغل على الانترنت بكل برائة
وبالاخير يوم وصلت الفاتورة الى 4000 فصلوا الجوال ؟؟

بالله وش رايكم بذا الظلم ؟؟