بسم الله الرحمن الرحيم

كيفكم حبايبي أعضاء ومشرفين

المهم ندخل على طول بالموضوع ياجماعة الخير زادت حالات أنفلونزا الخنازير

بالسعوديه والسبب ضعف الرقابه....

المهم أنا مالي كم يوم جاي من مصر يوم وصلت السعوديه مطار المدينه مافي

أي اجراء طبي غير فاتحين غرفه صغيره حاطين فيها ممرضه والدكتور عند الباب

بسجاره والله فلته بالمطار لاعنايه ولا شي من أسباب الوقايه أنا جاي عن طريق

الطيران المصري واللي معي طول الرحله اللي يكح واللي مرتفعه درجة حرارته

بس الحمدلله ربي سلمني من المرض....

المطلوب من وزير الصحه تكون في رقابه على جميع المطارات في مطار القاهره

ماتخرج من المطار الين ماتمر بجهاز يكشف عن حالتك لو فيك انفلونزا عاديه

ماتخرج من المطار....

عندنا بس يبون الحالات تزيد عشان يقولون لقد شفي 95%وهذي مجهودات

وزارة الصحه وش نستفيد كذا لابد من معالجة الوضع......

معليش ع الاطاله بس الواحد وش يقول غير حسبنا الله ونعم الوكيل

تحياتي

الله يكفينا شر هالمرض وكل الأمراض

من جد يعني مدري ليش هاذا وزير قاعد ما يدري وش الطبخه

يا عالم وزير الصحه بالدول الثانيه ينزل بنفسه للمطار وللمستشفيات حتى مستشفيات عاديه ويدقق على اشياء مالها اي معنى بنظرنا

طيب وش الفايده نمنع بعض الناس الي اعمارهم تترواهم من 25 وفيها من العمره ولا الحج وحنا اصلن عندنا هنا ناس مصابين وش الفايده نمنعهم وندري ان المطارات عندنا هنا حدث ولا حرج

صحيح والله

المفروض في كل مطار يجرى كشف لكل من يدخل ، يعني المرض منتشر بشكل كبير
وبصراحه سهل الانتقال من شخص الى آخر بسبب انه عبر التنفس !

يعني سهل جدا ولازم تكون رقابه شديده اذا نبغى نحد من المرض

الف شكر لك

والله انك جبتها على الجرح

معليش بس الربيعه طبيب فصل توائم وحقق انجازات وهوايل ولكن مش شرط انه لازم يكون وزير يعني اول ماشطح نطح الربيعه لايمتلك الخبره في العمل الوزاري ولا الاداري حده غرفة العمليات لان ها تخصصه ثاني شي منظرك الي انت شفت في المطار هذا يكلف الدوله الملاين

لانهم كمثال مبسط : بيت مفتوح بابه يجيه الحرامي ويسرق ويخرب ويقوم راعي البيت ويقعد يصلح ولا يتوقف عن التصليح تدري ليه لان الباب مفتوح


وهذي البوبات الي هي الحدود والمطارات يجب عليها انها تكون تحت الرقابه واصلا الشعب السعودي ليس مثقف طبي وانا احدد هنا طبي يجب تكون هنالك حملات تلفيزونيه واذاعيه وايضأ مقروئه

تبي الجد لازم يكون هنالك خطه قويه تتطبق بالفعل ماهوب مثل الربيعه خطط ولا شفنا نتائج لان هذي الاشياء ماهوب يمها

اخوي انا الوالد بيجي في نص رمضان من واشنطن مدري كيف استقبله هل استقبله بكمامه والله شيء محرج دام المطارات كذا تخيل واحد من الي في الطياره الي فيها الوالد مصاب وعطس وش يكون وهو 13 ساعه في الجو اقسم باللله ان تصاب جميع الطياره ويمكن يموتون وهم ماوصلوا


ما أقول الا الله يعين


( تراني اتقبل النقد بصدر رحب )

ايه و الله ضعف رقابه يوم اجي من بيروت قسم بالله لا فحص و ولاهم يحزنون

مغير تاكين في مكتب و جايبين ممرضين"ليس دكاتره" و يسولفون مع بعض و الثاني يوري الي جنبه رساله من خويته ولا شي

و الله هنا الوضع حرج جداً فيه ناس تقول من مصادر موثوقه ان عدد المصابين بالمرض اكثر من 4000 شخص و الاعلام صرح فقط بأقل من 200 حاله

لكن ما نقول غير حسبنا الله و نعم الوكيل

ابسـألكـ سؤال
هل وزارة الصحه لها دخـل في تطوير المطار..؟

المفروض إدارة المـطار هـي من تطالب بهذا الجـهاز للحفاظ أولاً على صحة موظفيها
كان الله بعون الربيعه فمن سوء حظه إستلآمه للمنصب وقت ظهور هذا الوباء
ويجونكـ الأخوان مايدري وش السالفه نايم ببيته ويقول الربيعه مايدري وش الطبخه
طيب وراكـ ماتروح أنت تمسكـ المنصب وتورينا التطور على أصوله


بعد ماتبون الربيعه يجي ببيت كــل وآحد ويعلمه وش يسوي عشان مايصيبه شي....!

الشخص يتكلم بعقل ومنطق أو يصمت ولآيطير بالعجه وهو مايدري وين ربي حاطه<<أقصد بعض الردود اللي معاهم معاهم عليهم عليهم

لو أنزل موضوع أمدح فيه الربيعه تحصل نفس الأشخـاص يمدحونه وهم تو كانوا يقولون شطح ونطح.........!!!!!!!!!!!!!!!!!!!!!!

وزارة الصحة فشلت في مواجهة المرض ..

أخبرني أحد الأقرباء بأن المرض قد تفشى بشكل

فضيع في مكة المكرمة ... ولاحول ولاقوة إلا بالله

عزيزي السعوديه لم تفشل في الوقوف ضد المــرض

95%من الحـالات تم شفاؤهـا والحمد لله

مو ذنب الوزارهـ إنها تذكر الإحصائيات الصحيحه بعكس بعض الدول المتكتمه

البعض يحس بالأعراض وهم مايدري وش فيه ولآ منه طاح الفاس بالراس قالوا والله وزارة الصحه....!!!!!

اللحين ورآكـ ماتحط كمام وإلآ عيب...؟

يجيكـ الواحد مثل البهيمه يدربق برآسه ويتنفس بخشمه وبفمه تشوف فمه مفتوح من بعد كيلوا ويقول والله فشلنا في مواجهة المرض...!!


نقد نقد نقد ويذكر السلبيات وإلآ الإيجابيات طنش تعش وعيش الحيـاهـ

لا حياة لمن تنادي........

تدرون أن أغلبية حالات الوفات الي صارت

يقولون أنهم راجعوا مستشفى وقالوا لهم حرارة عادية

وبالتالي المرض يصير له فتره مع الشخص وبعدين يصعب علاجه

لكن إذ أكتشف المرض بدري إن شاء الله ما فيه خطر

لكن ما عند أحد !!!

***على العموم يمكن في كلامي خطاء فياليت تنوروني***

طيب وزارة الصحه هي المسؤولة يافهد مب ادارة المطَار !َ
هي اللي لازم تغلق جميع المنافذ اللي ممكن المرض يتفشّى من خلالها !
لأن هالمرض يعتبر طارئ صحّي ملزومة تتعامل معاه ..
ومو ذنب المواطنين اذا كانت الوزارة ماعرّفتهم بالمرض وأعراضه وخطورته
بالعكس ، هي اللي حطّت الفكره براس الناس ان المرض أقل خطورة من الانفلونزا العاديه
الناس فيه منهم الأمّي والجاهل والصغير واللي مايدري عن الوضع..!
والتثقيف والتوعية من مسؤولياتها !
ووزارة الصحّه هي بالذات لازم تبذل مجهود مضاعف عن كل الوزارات
الأخطاء فيها ماتُغتفر ..
الله يحمي الجميع ويبعدهم عن الشر ّ ويشفي جميع المرضى

إقتباس يجيكـ الواحد مثل البهيمه

الله كرّم الإنسان عن البهائِم .!!