25/07/2009, 12:04 PM
|
زعيــم متواصــل | | تاريخ التسجيل: 01/12/2004 المكان: الولايات المتحدة الأمريكية
مشاركات: 64
| |
سااااااااااااالفة 911 .. معنا تمتعوا بالإثارة والمواقف الشيقة << لا يكثر Beautiful Laaaaaaaaaaaaaaaaaaaadies and dusty Gentlemen
والله ما كان طاري علي أحط سالفة 911 لأني قلت ابغى استر عليهم وكذا << انطم بس
مرتن من المرارير .. وهي أصلا أول مرة طبت ساقي الشهبا لأمريكا
جونا مندوبين من الملحقية يستلمونا ويوقعون اوراق في المطار على استلامنا << غدينا سريلانكيات
طبعا الشباب اللي استقبلونا جزاهم الله خير .. لو تقول لواحد منهم عمت مساءاً يا هذا .. قال لك على تراب ولا تسوي لي فيها مجتهد من الحين << الأخلاق السعودية أصيلة ومستحيل يغيرها الزمن
المهم وهم اللي يلقطونا في فان ابيض والظاهر انه ديزل .. لان صوت المكينة فيه تفتفه < ميكانيكي ؟
ويمسكون بنا الدايري حق واشنطن
طبعا وانا اخوكم في الله فاق خشتي على هالخضار والربيع اللي عندهم واقول ااااااااااالله يا زين (امريكيا)
وبعد قيادة دامت من الزمن ما يقارب النص ساعه او مايليها < لا تعليق
وصلنا لفندق .. قالوا لنا كل واحد ياخذ له غرفة .. وامرحوا واذا جا بكره الصبح الساعه 7 صباحا بنجي نقشكم للملحقية
قلنا لهم تم
طبعا كانت الساعه تقريبا 1 او 2 الظهر .. وكان عدد السعوديين اللي معي 12 تقريبا .. واحد منهم خويي جعله يسلم
قلنا لهم طيب واللي يبي ياكل وش يسوي ؟؟ قالوا عندكم مربع مطاعم مقابل للفندق رحوا كلوا فيه جعلكم الغصة
قلنا تم
المهم كل واحد منا دور له سعودي يشاركه في الغرفة .. وانا معي خويي .. رحنا ذبينا شنطنا وصلينا الظهر والعصر ... وجينا مدحدرين لـ اللوبي
وتجمعنا كلنا تقريبا .. وقررنا نروح ناكل
لقينا مطعم بيتزا .. دخلناه .. وطلبنا .. والله العظيم مدري وشلون طلبت انا .. لان ثقافتي يوم كنت في السعودية كانت فغنسية (يعني فرنسية للي ما يعرفون اللغة الفرنسية)
المهم يوم دقينا وشبعنا وما عاد قدرنا نشوف .. حاسبنا على قد الفاتورة وطلعنا
مااااااا أمدانا نطلع .. الا وذاك اللي طالع ورانا يزاعق علينا .. وحنا كل واحد منا طايرة بوهته
حسيت انه شرشح مندوبنا وحنا ما نفهم عليه .. وكل واحد منا طق الابتسامة في وجهه .. يوم قفلت مع الرجال .. تركنا ودخل المطعم
المهم قال واحد من العيال .. هذا عامل في المطعم .. ويقول الحين يالشهبان اللهبان .. اها وراكم طلعتوا ما عطيتوا الحرمة اللي خدمتكم بخشيش؟
المهم اننا كنا نطالع خوينا هاللي ترجم لنا وما علقنا على كلامه .. نحسبه مسوي فاهم .. وبيسوي علينا انه هو الولد اللي مقطوع سره في شيكاقو
المهم رجعنا للفندق بعد ما تمشينا وفرفرنا حول الفندق الين تشلخ الزفلت .. كنا وقتها ننتظر غروب الشمس عشان نصلي المغرب جميع .. بس جت الساعه 8 والشمس ما عندها نية تغيب
قالوا العيال حنا بنروح لغرفنا .. قلت أجل اذا غابت الشمس دقيت عليكم من تلفون غرفتي عشان نصلي جميع .. قالوا OK Ya Mutawa3
رحت انا وخويي لغرفتنا .. يوم غابت الشمس الساعه 9 تقريبا .. واقول ارفع السماعه واضغط رقم غرفة العيال القريبين من غرفتنا وكان رقم غرفتهم 614
دقيت أول مرة 614 .. وسمعت صوت صمت غريب << لا تتفلسف وقل انه ما رن التلفون
قلت يا ولد خلني اجرب #614 .. ونفس الشي ما فيه أي صوت
وقمت ضغطت *614 .. ورن .. نص رنه .. يعني كذا طووووووو .. وطلع صوت حرمة تقول 911can I help you ..
وانا اللي ابلع أوم العاااااااااااافية
ورجعت تقول ناين ون ون كان آي هلب يو
قلت .. آآآآآآآآآآآآآآآآآآآآآآآآآآآآآآآ .... آآآآآآآآآآآآآآآآآآآآآآآآآآآآ .. Wrong number sorry
قالت لي وش اللي رونق نمبر .. ما فيه احد يدق علينا بالغلط
قلت هذا اللي صار يا أخت الغجر
قالت اوكي ريلاكس اند كوم داون .. قلت اوكي باااااااااااااااي
واسكر السماعه
والله العظيم اني في لحظتها ما صرت افكر الا بشكلي انا وكراعيني الشهب ولابس برتقالي ومدخليني قوانتنامو
وبعد هواجيس أخذت مني مأخذها .. قال خويي وش فيييييييك ؟؟ قلت له دقيت على العيال وردوا علي الشرطة
ما امداني اكمل كلامي .. الا ورن تلفون الغرفة ..
رفعت السماعه .. والينه واحد من الرسبشن .. يقول .. اقول يالغلا في أحد داقن على 911
قلت لا يا غلاهم .. بالغلط قسم
قال اوكي
قفل السماعه
وبعدها بـ 56 ثانية << لأن قلبي كان يدق 1000 دقه في الثانيه
انطق علينا باب الغرفة
عااااااااااااااااااااااااااااااااااد هناااااااااااااااااااااااااااااااا تذكرت ابوي يوم كان يقول لي انت رجال يا ولدي .. وتمنيت ان ابوي يكون معي في هذيك اللحظة عشان يدري ان الشرطة اذا طقوا الباب في أمريكا .. تضيع المراجل كل ابووهاااااااااااااا
قلت لخويي تصرف طبيعي جدااا كاننا ما سوينا شي <<< من الخوف قمت اتكلم كأني ممثل في فيلم وثائقي رومنسي << لا تشرهون عليه
فتحت الباب .. وشفت قدامي سكرتي الفندق ومعه اثنين شرطه
قالوا لي انتوا متصلين على 911 ..
عاد الحين حلهااااااااااا .. اللغة رايحة في خرايط أمها .. والشكل يروع
وحاولت اشرح لهم بهالطريقة
telephone .. up .. dial 614 .. no sound .. then square 614 .. no sound .. then star 614 .. then woman said 911 can I help you
قال واحد من هالشرطه .. طيب معليش ندخل نشوف الغرفة .. قلت ايه .. دخلوا .. وشافوا خويي قاعد على الكنب .. ويتراعد من الخوف .. قرب من الشرطي وهمس له .. قال له خويي No
المهم قال الشرطي .. خلاص .. ما فيه شي صاير .. بس انتبهوا لا عاد تتصلون على 911
قلت شرهتك على اللي بيرفع السماعه اصلا .. لو تبي بعد خذ التلفون ما يغلى عليك
قال لا والله يابو فهد انت واضح انك كريم .. والعذر والسموحة على الازعاج .. قلت يا هلا ومرحبا وان ما شالتكم الأرض ترى الرقبة سداده << أولا يالنصاب انت كنت قامط العافية .. ثانيا يرحم أمك لا عاد تقول أمثال
المهم من بعدها يا طويلين العمر والسلامة وانا ما ادق على رقم الا انا عارفه مضبوط
حتى يوم طلعت لي جوال أمريكي .. جبت لي مفك .. وقلعت رقم 9 منه .. الله يستر يجي يوم أحلم اني ادق على 911 وما ادري الا وهم يصحوني من النوم .. وهو احنا نائصين يعني ...................................................................... السالفة بايخة جدا .. لكني ما كتبتها الا يوم طلبوها مني بعض الشباب
وبعدين عادي موضوعي واصير فيه بايخ << يا ثقل دمك
العذر عن الاطالة
تحيات أخوكم ابوفهد من (امريكيا) |