السلام عليكم ورحمة الله وبركاته

كيف حالكم يا شباب ... بخير ... دوووم إن شاء الله ..

القهوة يا ولـــــــــد ...





اليوم بحكـــي لكم وش اللي جرى لـــي ... واللي كدر خاطـــري ... وخلانــــي .. اسدح لكم هذا المقال أرضاً طبعاُ على حلبة ساحات طيبة <<<متأثر بالمصارعة الأخ >>>

المهم مالكم بالطويلة ... لأنـــي عارف إنكم ما تحبون اللي يطول بالهرج ... مثلي...


اليوم كنت ماشي مع واحد من أصدقائي... خخخ حلوه أصدقائــي أحس اني اقرأ في كتاب المطالعة

نتمشى ...

ويوم جينا عند ذيك اللفة القشرا ... ولاحظ خويي زميل له من زمان عنه ...

المهم خويي ذا نشبــه ... يوم شاف خوية وقف ... وقعد يسلم علية ... ونص ساعة وهو وإياه كيف حالكم ... وذاك يرد بخير ... وكيف حالكم ... بخير ,,,وشلونكم ..بنفسجي مائل للكستنائـــي المموج بالذهبـــي ..خخخخ ... امزح

المهم ... وهذا يقولك كيف حالك وذاك يرد والعكس ...
طفشت لنا نص ساعة نفس الكلام ...

المهم ... صديق خويي عزمنا نتقهوى عنده المهم أنا تورطت عندي مشيوير خاص ... بس خووي ذا نشبه وما يصدق على طــــــــــول وافــــق ...

واللي قاهرني بزيادة إن الرجال يوم عزم خووي مستحي قالها بالفطرة وذا نشب له ... وأنا اشــد خوووي مع سمعه اقوووله ... يا فلان بنمشي ... ويقووولي وش فيك الرجال عازمنا ...


أخيرا رضخت للأمـــر الواقع ورحت معه يوم بيت خويه ...
المهم يوم دخلنا مجلسهم ... وهو يقعد يرحب فينا ...


مع انه من الداخل وده يقووول .. انتم وش الله بلاني فيكم الليلة ... خخخ أحسن خل تقهـــوى عندنا تنفعك الحين ...

المهم ... ويروح داخل بيتهم ... وأنا استغليت الفرصة ودي اقووووم واتوطا في كبد خويي ... بس شفت الرجال جاء ... تعوذت من بليس ...


المهم بدوا يتسولفون مع بعض ... وأنا جالس اقلب ... في جوالي ... ادور شبكــة واير لس ... خخخ ... من جد منتهــي .. الأخ ...

المهم ... بعد شوية رن الجرس ... أنا بغيت اقوووم أفك الباب احسب إني في بيتنا ...خخخخ... غير خويي مسكنـــي ... والله احـــراج ..

قام الرجال ... طلع الجرس من داخل البيت وجاب لنا القهوة ...
وهو يقووول دله وفنجال وعلوم رجال ...

المهم صب لخويي ... وخويي ذا ما يوفر شي على طول مد يده ... صب لي من الدله اللي الله لايوريكم تقال لها 100 سنة تحت التراب مدفووونه ...



المهم إنا قلت له ما اشربها ... ما أحبها ... المهم لازم علي ... واستحيت منه وقلت بس فنجال ...



واخذت الفنجال قلت خلني أجرب ... القهوة ذي اللي رجونا فيها ...

واشرب منها


يا ربي لك الحمد ... وربـــي تقول ماء غسيل الصحون حقهم ... شكل أخته مسوية القهوة بدون ... نفس ...

لانـــي سمعته يوم يكوووش عليها يقووولها قووومـــي سوي لي قهوة عندي ... رجال ...

وهي تقووول ... الرجال ... أي رجال ... ما عاد فيه رجال ...

وانا يوم سمعتها ... طارات علوووومي ... ووعيوونـــي صارت كبــــر الريال ... مستغرب ... شوووف بنت اللذين ... قويــــة عين بعد ... تسمعنا ... الكلام ... زي اللي تقووول انقلعوا ...


المهم ... أنا طنشت ... وخويي جالس ... يتفرج في مجلسهم ... ويقووولي ... مجلسهم حلووو...

وأنا أطالـــع فيه ...

ودي أخنقه ... يستخف دمــــه ... <<<طبعا هذا الكلام بعد ما راح الرجال داخل البيت بيجيب لنا تمر >>>...




وانا جلست أشرب من القهـــوة ...
... وععععععععع ... قهوة قليلة ,,, وطعمـــها مــــر يلوع الكبد .... وحارة... لا ..وبعد يصبونها في فنجال صغيــــر ...

بالله هذا قدر الضيف عندكم فنجال صغيرون ... ما يكفي بــــزر ... تصبون للضيوف فيه ...

وانا اشرب منها ودي ابجها من فمي ... أحس ... بالكتمه ...
ما هي بزينة قهوة مــــرة بالحيل ...

المهم خلصت الفنجال واحس إني ســـويت انجاز عالمـــي ... ويم خلصت حسيت انا جالسين تحت خط الاستواء وأشعة الشمس ... عاموديـــة ... خخخ >>> لســـع تأثيــــر اختبار العلوم ما راح من مخـــي من جد دافووور ....

...تدوون ... ليه ...
حسيت بالحرارة ...

كله من القهوة الحارة ... ومجلسهم الي حاطين فيه مكيف ماركة sanyo... والرَّيش مكسرة ... ويقووولي اقرب جاي يـــم الهواء ...

الله يرحم والدينـــك اية هواء ... حـــر ونار كبرى ... والله انه لو يطفي المكيف أحسن له بدل صرف الكهرباء على الفاضي ...


ويوم شافني كذا جالس قالي خذ فنجان وعلوم الرجال ... وانا اقوووله لا الله يبارك فيك ...

ومن داخلي ودي اقوووله أيـــة علوم الرجال الله يصلحك ... ترى علوم الرجال ... في حفظ القران ... مو في شرب القهوة اللي طعمها مــر ...


لا أحـــد الحين يطلع لــي ويقولــي هو صادق ... أقدر اصب لك خل أسود في فنجال ... وأقووولك خذ فنجال وعلوم رجال ... خخخخ ...

جلسنا شوووية ... وبعدين قعد يقـــول لخويي والله ذي الساعة المباركة اللي شفنها فيكم ..

المهم أنا على طـــول فهمتها على الطاير انه يبغى يقول ... خلاص قووموا روحوا ... خابــــرنــــي حركات نص الكم ذي البايـــخة ...


المهم قلت لخـويي يا لله مشينا أنا مشغــول ...
وهو يوم سمعني اقـــول لخويي ذا الكلام وده يقـــوم يحب خشمي إني فكيته من الذبيحة اللي كان بيذبحها لنا .... خخخخخ ايه هين ... والله ما عنده غير الخرطـــي ...

ادري إني طولت عليكم ...

لكن اللي أبي أوصله لكـــم ...
يرحم والديكم ... غيــــرو القهــــوة حقتـــــكم ... تـــرى التغـــير .. مطلوب ...


ولا تدرون اذا جاكم ضيف قدموا له عصيـــر بارد .. برتقال .. ليمون ... فراولة .. >> اتحدى اذا عندكم عصير فراولة أنت واياه ...خخخخ ماعندكم غيرعصير منقـــا ... والربيع بعد أبو ريال ....

المهم قدموا له عصير وخصوصاً اذا جاكم في الصيف ...

يعنـــي بالعربـــي الدنيا قيض ... وحر ... وتقــــهون الرجال ... قهوة حااارة ... ومكيفكم ... بعد ... حار زي التنور حق
الفرن ... أحسن انه استقبال بايــــخ ...خخخخخ !!!!!


ولا تدرون اذا احد جاكم ... قولو له وش تشــــرب ... يمكن ... يكون عطشان ويبغى ماء ...
ترا الدنيا ماهي غصب ... قهوة ... قهوة ... ترى والله مصختوتها ... بزيادة ...>> واضــــح إنــي معصب ...

لا واللي قاهرنــــي إنها غالية سعرها غالـــي ... وطعمها ... مــــر ...
أما والله شعـــب فاضي ... يشرب شيء مـــرة ...


في النهاية ... يرحـــــــم والديكم ... لا احد يطلع لــــي ويقووولي هذا تقـــاليدنا ... ومدري وشوووى ....وما تتغير ... اذا ما تتغير لا تغير شكلة الدلة القديمة ...

والحين صارو يحطـــون القهوة في ثــــلاجـــة ...



وجرب اشرب في هالنوع من الدلال ... اذا كنت صادق ... وما تحب التغيــــير




يقــــولون طعم القهوة فيها غيــــــــر ... خخخخ أتحدى اكبر كييف فيكم يشربــــها ...

أرق المنى اتمناها لكم ...

dohme2000