السلام عليكم ورحمة الله وبركاته ..

أول شي الحمدلله خلصت أختبارات والله يوفقني في النتائج ..

ثانياً يوم السبت كنت راجعة من جامعة الملك سعود الصباح وأشتهيت كوفي ..

قلت يابنت خلي السواق يمر على ( يوم القهوه ) يمدحون قهوته ..

مريت عليه وطلبت لي موكا فرابي ( مشروبي المفضل ) وحسيت أني جوعاااانه قلت خليني أطلب منهم ساندوتش بعد وطلبت لي ساندوتش مرتديلا بالجبن ( طبعاً بعد ما سألت هالفلبيني قلت لك وش أحسن شي عندكم قالي هالمرتديلا ) ..

المهم عطاني عفشي وحاسبته ودحدرنا ..

وعطاني جريدة الجزيرة هدية ( يدهن سيري فيها للتعاسة اللي حصلت ) ..



وأول ما وصلت للبيت وأسحب الكيس وأنا كلي حمااااس من الجوع ..



وأجي أطل في اللي بوسطه وأشوف هالكرتون ..



وأطلعه وأنا أقول يمي يمي حركاات بكرتون وشي ..



وأجي وأفتح الكرتون وأنا سعابيلي تقوطر وأشوف هالساندوتش اللي شكله وش زينه <<< الجوع كااافر ..
****
ملاحظة اللي جالس ياكل يوقف هنا لا ينزل تحت لين يخلص نصيحة ..




وما دريت إلا وتفووووووووح علي ذيييييييك الريحه اللي تصرع المييت ريحه من قوتها دقوا علي زميلاتي اللي في تبوك يقولون لي يابنت وش هالريحه اللي فاحت وأقوم وأفتح الساندوتش وأشووووووف التالي ..




المرتديلاااااااااااا معفنه وصاير لونهاااا أخضرررررررررررررر ( شكلها تشجع المنتخب هع ) والجبنه ناااااشفه وجايبه العيييييييييييييد ..

عليكم من الله ما تستحقون أيها القليلون الأدب <<< أقول كيف الحال ياسيبويه ..

وأروح وأدق على الرقم الموجود ورد علي فلبيني حق المركز الرئيسي ولا يفهم لي ولا أفهم له في الأخير سكرها بوجي << أبد ما طاح وجهي بس شوي وأصيح ..

المهم قلت فرصة مير أصور وأطلع فضايحهم وأفوز بسبق صحفي ( تسمع بالسبق الصحفي ) يالله أترككم مع باقي الصور لحومة الكبد واللي عنده رقم المدير ولا شي يعطيني إياه لأنه ودي أسفل في أبو اللي جابهم ..








وبس هذا اللي بغيت أقوله ..

ونصيحة للكل وبالذات البنات ( لأنهم ما يسوقون ولا راح يرجعون للمحل يهزأونه ):

إذا شريتوا شي أفتحهوه وشوفوه إذا زين أو لا ما فيه شي ينظمن من الحقارير هالعمال ..

ويالله سي يووووو مع سبق صحفي آخر هع هع ..

عاد انا ما احب المرتديلا خلقة والحين كرهتهااكثر
اجل زين سلمتي وماكلتيها

بالنسبه للنظافه بالصيف حدث ولا حرج

قبل كم يوم شفت عضو هنا نسيت اسمه

منزل موضوع عن مطعم مشهور مغلق من قبل البلديه

عموما لقيت رقم للتبيغ وهذا نص الخبر

"

الرقم المجاني

8001241616


و اذا شفت مخالفة


لا تسكت عنها


انا مجرب الرقم و متفاهمين جدا


ويسجلون المكالمه



كيفية الإبلاغ عن مخالفة تجارية


بالمملكه العربيه السعوديه




و تعنى زيادة الأسعار / انتهاء تاريخ الصلاحيه


الأمتناع عن البيع / قذارة المحلات


عدم نظافة الأطعمه / و اى شئ مشابه




المملكة العربية السعودية


مكافحة الغش التجاري


الإبلاغ عن مخالفة تجارية


هناك طريقتين


الأولى الاتصال على الرقم المجاني 8001241616


أو تعبئة نموذج على الرابط التالي

http://wwwcommercegovsa/mok2/formasp


الرجاء تعميم هذه المعلومة لكل من تعرف


ليوصل كل مستهلك متضرر صوته


لجهة الاختصاص الحالية


ونتطلع لتفعيل جمعية حماية المستهلك في القريب العاجل


الرجاء تعميم الرقم ونشره "

-----

قبل لا انسى عساك افطرتي

إقتباس الرسالة الأصلية كتبت بواسطة مواصل من عام 1413هـ مالقيتي عاد إلا ( المرتديلا ) الله يديم النعمه!!.

هو أنت اللي بتأكل ولا هي يا خالي .. ؟

صمت الكباري

طيب تأكدي يمكنه مرتديلا بالفستق

عالعموم هذا درس لتس عشان تتركين حركات البرستيج وما البرستيج عنك

وش فيها الفلافل ولا الكبده جبن .. ؟

شوفي المرتديلا مع الجبن جناااااااااااااااااااان
بس اللي أنتي خذتيها شيء ثااااني
لا يُحتمل
لو منك كان رجعت لهم وخذت فلوسي مع وجبة فررِش مجانا


انتبهي مره ثانيه

مثـل مـآقـآل اخوي مواصل من عام 1413هـ

وقـفي عـند بـوفـية واطلبي واحد كبـدهـ ووآحـد شـكشـوكة مـع شـآهي بـ الحـليب ويصـلحها قـدآمك بـعد !! وبـ 7 ريـآل

يـعطيك العـآفية ع السـبق الصـحفي

وعليكم السلام ورحمة الله وبركاته

والله شهيتيني بالمرتديلا من زمااااااااان عنها..

وبعدين دامك بسعود ليش ماأخذتي من الكلوب اللي عندهم

تراه أحلى وأوفر

وإلا لازم تمشورين عشانك معطلة

على قولة مواصل ,
الله يديم النعمه ..

إقتباس وقـفي عـند بـوفـية واطلبي واحد كبـدهـ ووآحـد شـكشـوكة مـع شـآهي بـ الحـليب ويصـلحها قـدآمك بـعد !! وبـ 7 ريـآل

غالي غالي ,
ياخي عندنا بوفيه ولا أحسسن منه , كبده بالجبن بريالين ,
وشاهي حليب ولا أحسسن منه , ونفس الحكايه للشكشوكه ,
يعني تاخذ شكشوكه وكبده وشاهي حليب بـ 5 ريال , ,
الله يديم الرخص ,

هلا أختي صمت ..

مبروك الإجازة الله يهنيك فيها ..

..
..



بالنسبة للي حصل لك , شيء مؤلم

شوفي لو أني منك أرجع للمحل وأشرشح أم أمهم

ودام أنه كوفي داي , السالفة سهلة خليها علي

وماعليك بس من اللي يقولون كبده ومدري ايش كلها نعمة رب العالمين

وش الفرق بين المرتديلا و غيرها ؟

وكل ناس لهم ذوقهم

..
..


يسلمو خيتو

إقتباس الرسالة الأصلية كتبت بواسطة عقد الياسمين شوفي لو أني منك أرجع للمحل وأشرشح أم أمهم

لا و يقولون البنات ناعمات

أنا أشهد

^^^^

وعليكم السلام
امس شطبنا على الفخار واليوم شكلنا على يوم القهوه
وكل يوم نشطب على شيء إلى ما يخلص الصيف ..!!
ومافي مطعم ولاكوفي نروحله
والله على قول الي هنا الصيف تزداد الوساخه وعدم الاهتمام بالنظافه
والمشكله احنا نقبل اكثر واكثر
والنزلات المعويه تزداد اكثر فاكثر

المحلات بتتوب لاشافات تشهير بالمجلس

بعدين يمكن جريده الجزيره عطاك اياها موب عشان دهن السير .. يمكن قصده تقرينها وانتي على سرير الباطنيه
لاكلتيهآ ,,

المرتديلا لونها غريب يصلح لـ فستآن ,,