أي ( درة ملاعـب ) وأي خرابيـط.. ليـالي ( المـلز ) ما مثلـها ليـالي.. خلّـوها تملّـز - نادي الهلال السعودي - شبكة الزعيم

Fahad Al Sudais · #1 23/06/2009, 12:16 PM

حيـــــــــاكم

ياهلا بالزعماء

صراحة.. مباريات الهلال في ملعب الملز لها طعم

مدري هالشي عندي انا بس او فيه احد غيري يحس بهالشعور ؟؟

يمكن لأني تعودت من يوم كنت صغير على هالملعب

وعشت في مدرجاته عمر مو بسيط

اجمل مباريات الهلال كانت على ملعب الملز

وأسوأ مبارياته ( مستوى ونتيجة ) كانت على ارض ستاد الملك فهد

وهالكلام مو من باب التشاؤم او التطيّر .. حاشا لله

لكنها حقائق تاريخية عشتها والكثير منكم عاشها

بكل صراحة ما اذكر اني قد طلعت من ملعب الملز وانا موطّي راسي ومقهور

لكن ( درة الملاعب )... لاتشكي لي ابكي لك

صحيح ان ملعب الملز قديم وأثري

لكن ميزة مدرجاته انها تمتليء وقريبة من ارض الملعب

يعني لو تصوّت لأي لاعب يسمعك بسهولة

علشان كذا نجوم الهلال اول كانوا يتطورون بسرعة

... يسمعون توجيهات الجمهور <<

لكن في الاستاد... لو يطلع بلعومك مايسمعك الا اللي حولك من الصجّة

وازيدكم من الشعر بيت

في ملعب الملز لو تنادي احد اللاعبين يلتفت عليك ويقدر يميّزك بين الجماهير

اذكر اكثر من مرة يوسف الثنيان يرد على الجماهير ونموت من الضحك

منهم واحد مره قعد يصارخ ( يوووووسسسسسف... يووووووسسسسسسف )

إلتفت عليه ابويعقوب وهو حاط اصبعه على إذنه << يعني تراك صجّيتنا

وكان فيه حارس اسمه منصور الحلوة

( اخو الشيخ ابراهيم اللي كان حارس الشباب والمنتخب.. وحالياً مغسّل الموتى )

منصور كان بحارتنا بالملز... وكانت معيارته ( بلجرشي )

اللي اعرفه ان بلجرشي اسم مدينة... ومدري ليش صارت لقب له

المهم انه شارك في احد المواسم كم مباراة... وكنا نستقعد له مع بعض عيال الحارة

اذا مسك الكورة نصارخ في المدرج ( احلى بلجرشي .. منتب عاقل )

ويلتفت علينا في المدرج وهو فاطس ضحك

واللي كانوا مبسوطين من جد.. فيصل ابوثنين وعبدالرحمن الرومي

مابين بيوتهم والملعب الا ( قطع الشارع )

علشان كذا فيصل قبل بعض المباريات مايروح للنادي علشان يجي بالباص مع الفريق

اذا وصل الباص.. يطلع من باب بيتهم و ( يمد ) رجله اليمين ويلقى نفسه في الملعب

مع ان البعض كانوا يلومون فيصل على عدم مرافقة الباص

والبعض يعتبرونه شايف نفسه ويعتبر نفسه ولد شيوخ ومايتنزّل ومن هالحكي الفاضي

لكن هذي هي الحقيقة... وحتى الرومي نفس الكلام ماكان يضرب مشوار

وطبعا مادام اننا في سيرة ملعب الملز

لازم نتذكر احلى الظواهر الهلالية في تاريخ هالملعب

صالح النعيمة

اشتهر في الملز واعتزل في الملز

وما اظن فيه احد يحب ملعب الملز اكثر من ابو فهد

شال كل الكؤوس وصنع تاريخه كقائد فذ في ارض الملز

والنقطة السوداء الوحيدة في تاريخه كانت في ارض الاستاد يوم هدف خميس الملغي

ويارباه على مهرجان اعتزال النعيمة في ملعب الملز

ويا تل قلبي على هدف سامي في ذيك المباراة... الحارس نكونو قام يزحف كأنّه طفل

ومن ينسى ثنائي الملز الشهير ( صفوق ومحمد التمياط )

حتى ( عبده صبياني ) << نامي هذاك الوقت

ومن ينسى ديربيات الملز بعد العصر.. وتسحيبات الثنيان بحسن حمران

ومن ينسى هدف موسى نضاو ( المبروم ) في مرمى شاكر العليان

احلى شي انك تفوز على النصر بوجود ماجد والهريفي ( تكرمون ) في ملعب الملز

وتطلع من الملعب بعد المغرب ولا ترجع بيتكم الا تالي الليل

وتبقى الظاهرة الأهم والاجمل..

عبدالله بن سعد

.. الله يتغمده بواسع رحمته

اسألوا منصة الملز عنه الله يرحمه.. وهي تعلمكم من يكون

هو باختصار اكثر واحد كان مع ذيك المنصة ( طالع نازل ) شايل كأس أو رافع درع

يازين ايام الملز ونجوم ملعب الملز...

نجوم الروح.. نجوم الاخلاص.. نجوم الشعار....................... تبّاً للمادة

.

.

عيسى المحياني

متفائل فيك كثير يا ابن حي ( الغسالة )... ترجّع لنا حماس وعطاء نجوم ( الملز )

شخصياً..

اعتقد انك ستكون المنافس الاول للاسد اسامة في انتزاع حب الجماهير الموسم القادم

والمكتوب باين من عنوانه.. صمودك التاريخي من اجل الزعيم لن ينساه أي هلالي

بالتوفيق لك يابطل.. وانت قدّها وقدود

عاشق الهلال 79 · #2 23/06/2009, 12:23 PM

من زمان بصراحة وأنا ملاحظ هذا الشئ ملعب الملز دائما

نحقق عليه الإنتصارات بعكس ملعب الفهد ..

وكنت أتمنى مباراة أم صلال تلعب بالملز ولكن صعبة ..

لكن لا اود ان نتشائم من ملعب معين او نتطير بملعب معين

نرجع ونقول إن الفرق بين أيام الملز والحين إنهم أيام الملز

كانت تلعب روح الهلال .. أما الآن فإنها قمصان الهلال فقط ...

ولقد خرجت آخر انفاس الهلال مع سامي و الدعيع .. فرحل

سامي وبقي نفس واحد هو الذي أبقانا على هذا المشوار

وهو الأسطورة محمد الدعيع أمده الله بالصحة و العافية ...

وما أقول إلا :

يازين ايام الملز ونجوم ملعب الملز...

نجوم الروح.. نجوم الاخلاص.. نجوم الشعار....................... تبّاً للمادة

موضوعك رائع وهو إمتداد لقلم مبدع ينحت على الصخر ..

تقبل مروري

أخوك : عاشق الهلال 79

14هلال السماء20 · #3 23/06/2009, 12:24 PM

وربي موووضوع فلللللله سلمت يدااااكـ

والله انكـ صادق ملعب الملز فللله وصغير وحلو

هلالي الجنوب 07 · #4 23/06/2009, 12:24 PM

والله صدقة ياخوي

دائماً بالملزتكون نتائج الهلال مفرحه لاكن مشكلته المدرجات

سن كولا · #5 23/06/2009, 12:24 PM

والله انا قلتها اول في احد مواضيعي

لان الهجمه في ملعب الملز تكون سريعه بعكس درو الملاعب

والله الموفق... انا اطالب ان تكون مباراة الهلال والاتحاد اللي في الدوري ان تكون

على هذا الملعب ...

خواتم · #6 23/06/2009, 12:25 PM

الملز له ذكريات جميلة بطولات و اهداف تاريخ وله تميز لدي

هلالي وهبي · #7 23/06/2009, 12:27 PM

الله يرجك يا شيخ اجل الملز وصباته واستاد الملك فهد ماتشوف اللاعبين الا بدربيل
الملز عاد يبي تطوير من عقب هالصبات البرتقالية وانا غاسل يدي من الخطط المدروسة
اما سالفة الحلوة

والثنيان وحسن حمران والترقيص الي بالمباراة

انا باسألك انت هالحين حاضرن مباراة 1413 يوم بغى يهبط النصر وصاروخ موسى نضاوعلى اطول حارس بالتاريخ شاكر العليان يوم انتهت 3/0 >>>طحت بك يالعرد

ازرق ابيض 9 · #8 25/06/2009, 05:53 PM

إقتباس

الرسالة الأصلية كتبت بواسطة هلالي وهبي


	الله يرجك يا شيخ اجل الملز وصباته واستاد الملك فهد ماتشوف اللاعبين الا بدربيل الملز عاد يبي تطوير من عقب هالصبات البرتقالية وانا غاسل يدي من الخطط المدروسة اما سالفة الحلوة والثنيان وحسن حمران والترقيص الي بالمباراة انا باسألك انت هالحين حاضرن مباراة 1413 يوم بغى يهبط النصر وصاروخ موسى نضاوعلى اطول حارس بالتاريخ شاكر العليان يوم انتهت 3/0 >>>طحت بك يالعرد

اي 3 -0 ومسوي عارف المباراه بعد كانت 3-2

أبو الطواري · #9 23/06/2009, 12:32 PM

يوووووووووووووه...
هزتني ذكرياتك وفضفضتك..

وعشان تكتمل ذكرياتك تفضل:
http://www.youtube.com/watch?v=_YQ4o...eature=related

محب الجنه الخرج · #10 23/06/2009, 12:36 PM

والله ياخوي وانت صادق مباريات الهلال بالملز لها طعم مدري وش مع ان شكل الاستاد احلى بس الاستاد مدري تحس ماله طعم مثل الملز مدري عشان تاريخ الهلال بالملز غيييير

عالعموم عساهم يصدقون وينفذون وعدهم من السنة الماضية ماتنفذ اللي هو الكراسي لان الصبة مررض

ونحن بانتظار عيسى المحياني على احر من الجمر وان شاء الله ينافس هوساوي بحب الجماهير

فارس العمري18 · #11 23/06/2009, 12:37 PM

والله زماااااان .............

عاشق الموهوب 10 · #12 23/06/2009, 12:39 PM

بس احنا اللي برا الرياض استاد الملك بالنسبه لنا افضل ..
لأن المباره لما تكون في الملز ومنقوله تحس انهم يلعبون في ملعب حارتنا

ملعب صغير وحتى التغطيه والكاميرات احيان تكون مش ولا بد ..
اما الأستاد

ملعب كبير وتشوف اللاعبين وكل شي واضح

..

شكراً ايها المشجع المخضرم

filippo inzaghi · #13 23/06/2009, 12:44 PM

الصخرة يا لبى قلبك ..

ما شاءالله عليك شكلك من الجماهير المخضرمة .. ولا تخليني أحسدك لأنك لحقت ع أيام يوسف والغشيان والجيل الذهبي ..

.......

بالنسبة لملعب الملز تجد جمهور نادي وليس جمهور يقضي وقتة في الملعب ..

جمهور الملز متقاربون جداٌ والأجمل الرابطة تجد لها صوت وتفاعل من الأندية ..

تجد الي جنبك يحلل والي وراك يحلل والي قدامك يشجع غير جمهور الدرة ما ودي أقوول شي عشان ما أحد يزعل من المنتدى ..

شاكر لك يابطل

ابن الرافدين · #14 23/06/2009, 12:45 PM

ابو فهد الللللللللللللللللللللللللللللله ابكيتني يا اخي مين ينسى ابو فهد الامبراطور

زعيم القحطاني · #15 23/06/2009, 12:47 PM

خلوها تملزحلووه ذي وابشركم فيه موضوع مفرح لرواد الملز اقروه في جريدة الجزيره