كيف تكون داشراً ..قصدي ناجحاً (فيس يضحك ) - نادي الهلال السعودي - شبكة الزعيم

رساوي برساوي · #1 19/06/2009, 11:16 PM

انا والله مبطي لي يوم ونص ماكتبت موضوع بهالمنتدى اللي كله ملح

المهم انا جاي عشان الاختبارات
لاحظت ان العيال واجدين اللي يدرسون ,,بس السؤال وشوله يدرسون ؟؟

يعني بالعقل أوباما هاللي صار رئيس امريكا .. تتوقعون انه قد درس كتبكم ؟؟

ولا قد شافها

طيب كرستيانو رونالدو -وانتم بكرامه

- اللي أخذ أكبر صفقة بالتاريخ
قد درس كتابنا الجغرافيا ولا التاريخ .. ولا قد درس الأدب العربي والنصوص ؟؟

و(رساوي برساوي) هاللي تشوفونه ..تتوقعون انه درس مثل دروسكم ؟؟لا والله تبطون عظم يدرس مثلكم

وأوباما و(رساوي برساوي) وكرستيانو ناجحين بمجالاتهم

وانتم اذا بتصيرون ناجحين لازم تقتدون بالناجحين
عشان تسذا لحد يفتح دروسه بعد اليوم

وانا ابعطيكم عدة طرق للتلهي عن الدراسه
وانصحكم باتباعها وعدم تفويت أي خطوة

وعلى قولة المثل.. طريق الألف ميل يبدأ بخطوة

<< ماله دخل بس عشان به كلمة خطوة

الأولى : التغذيه مهمه في حياة الإنسان
لذلك اذا جلست مع أهلك على العشاء ولا الغداء لاتقوم الا بعد ساعه ونص
ترا ان قمت بدري يمكن يجيك نقص تغذيه ثمن تمرض علينا .. وش بتنفعك دراستك اذا مرضت ؟

ثاني شي : الرياضه وما أدراك مالرياضه
البدن يحتاج الى ممارسة الرياضه يوميا والا يصاب بالسمنه والأمراض والبلاوي
لذلك اذا رحت تصلي
شف لك أبعد طريق واللي ياخذ وقت طويل .. عشان صحتك طبعاَ

اذا كنت جالس تذاكر وسمعت اخوك يطقطق بالكورة,, اطلع العب معه
منها تمارس الرياضه وتزيد صحتك , ومنها تونس أخوك وتاخذ أجره

ثالث شي : السنن الرواتب
هذي اللي مايحتاج اوصيكم عليها.. ومايخفاكم أجرها
لذلك احرصوا عليها كلها ولا تفوتون ولا سنه
طبعا خلو هدفكم الأجر مهب عشان الدراسه ولا شي

ولاتنسون صلاة الوتر
طبعا الأفضل انها تصلى بالثلث الأخير من الليل
وفيه ناس يصلونها بعد العشاء وهذا يجوز
لكن انت احرص على الأجرين
اذا جاء بعد العشاء صل عشر ركعات
ثمن اذا قمت بتراجع قبل الفجر صل لك 11 ركعه أو 13
وأول مايذن الفجر أطلع للمسجد أكثر للأجر

رابع شي : قضاء حوائج الأهل
اذا أخوك الصغير يبي حلاوه ولا شي احرص انك تلبي طلبه
اطلع للبقاله وجب اللي يبي .. أخوك سندك ,, أهم من الدراسه

خامس شي : العبادات وقراءة القرآن
وهذي ان شاء الله انكم تحرصون عليها
لكن اللي مايحرص عليها لا أوصيه بأيام الاختبارات
ولاينسى أذكار الصباح والمساء والخروج من المنزل وركوب السيارة
وكل الأدعيه
واحرص انك تاخذ الأدعيه الطويله أكثر للأجر

سادس شي : لا تضع جدول لتنظيم وقتك ودراستك
التخطيط للجدول وكتابته تضيع عليك وقت ماكان المفروض تضيعه
خل وقتك بدون تنظيم أحسن لك

سابع شي : صلة الرحم
وطبعا غير متوقع ان العمان والعمات والخوال والخالات بيستقبلون زياراتك بالاختبارات
لذلك دور لك ولد عم ولا ولد خال داج مهب راعي دراسه واحرص انك تصل الرحم معه

ثامن شيء : كل يوم اذا طلعت من اختبارك اذا رحت للبيت لا تبدا تدرس على طول
احرص انك تراجع اختبارك اللي قبل وتراجع اجاباتك .. عشان تعرف انت مجاوب ولا لا

تاسع شي : يجب انك تريح عيونك من الدراسه بمشاهدة التلفاز ودخول النت
خاصه الأخبار لا تفوتك ولا نشرة اخباريه
والله الله بالنشره الجويه ياشباب .. اذكر ماكانت تزين واحرص على الامطار ودرجات الحراره الا بالاختبارات

العاشره والأخيره : النوم المبكر
من أهم أسباب إبعاد القلق والإرهاق بالاختبار
وسبب من اسباب التركيز بالاختبار (هذا اذا صار عندك معلومات

)

عموما هذي العشر خطوات لو اتبعتها ممكن يبقالك ساعه وشوي للدراسه
والظاهر علي بن ابي طالب يقول "ساعة وساعه"
يعني هالساعه اللي بقت للدراسه اقسمها نص ساعه دراسه والنص الثاني بلاي ستيشن

يعني اذا مشيت على نصايحي بهالموضوع أنا أضمن لك تصير ناجح "باللعب والدجه"
وأضمن لك شهادتك كلها بتصير مطبوعه بخط أحمر .. والأحمر هو لون الحب
وأضمن لك ماعاد يتلفظ عليك ولا واحد بفصلك << لأنك بتسقط وتصير أكبر واحد بالفصل محد يهرج عليك

هذي نصايحي اللي ما أتمنى تمشون عليها عشان ما تنجحون و لا تاخذون من المراتب الأولى على الصف

واعذروني على اني كثرت القرق

واعتذر ان موضوعي موجه للشباب

لأنه بصراحة البنات دوافيييير الله لايضرهن

وماينفع بهن نصح الله يهديهن بس

يعني الدوفره بهن بهن نصحتهن ولا مانصحتهن

وشكرا على حسن انصاتكم
اتمنى اني أضعت وقت دراستكم بقراءة هالموضوع

وبرب أنا أبكمل دراستي بعد ماضيعتوا وقتي

وانتم يالموظفين والمدرسين واللي ماعندهم دراسه

عطونا من خبراتكم

على أيامكم وشلون كنتو تلهون عن الدراسه

خاصة الصخره وماجد مقبل هالأثنين هذولا ودي أعرف أيامكم وش كنتو تسوون

Hilalih 4ever · #2 20/06/2009, 12:42 AM

تبي طريقه بعد علشان تلهي نفسك من المذاكره قابل شبكة الزعيم

بتوفيق للجميع إن شاء الله ....

الغلى كله · #3 20/06/2009, 12:56 AM

[رساوي برساوي]

ثالث شي : السنن الرواتب
هذي اللي مايحتاج اوصيكم عليها.. ومايخفاكم أجرها
لذلك احرصوا عليها كلها ولا تفوتون ولا سنه
طبعا خلو هدفكم الأجر مهب عشان الدراسه ولا شي

ولاتنسون صلاة الوتر
طبعا الأفضل انها تصلى بالثلث الأخير من الليل
وفيه ناس يصلونها بعد العشاء وهذا يجوز
لكن انت احرص على الأجرين
اذا جاء بعد العشاء صل عشر ركعات
ثمن اذا قمت بتراجع قبل الفجر صل لك 11 ركعه أو 13
وأول مايذن الفجر أطلع للمسجد أكثر للأجر

هذي وأنا أخوك اهم شيء

واحرص انك تاخذ الأدعيه الطويله أكثر للأجر

ربطـه و شبـاصه · #4 20/06/2009, 09:34 PM

ههههههههههههههههههههههههههههههههه
ههههههههههههههههههههههههههههههههههههه
موضوع توووحفه يحكي الواقع الأليييم

إقتباس


	الأولى : التغذيه مهمه في حياة الإنسان لذلك اذا جلست مع أهلك على العشاء ولا الغداء لاتقوم الا بعد ساعه ونص ترا ان قمت بدري يمكن يجيك نقص تغذيه ثمن تمرض علينا .. وش بتنفعك دراستك اذا مرضت ؟

صحيح صحيح

بكرا لاهلكت من الجوع ومتّ عشان الدراسه بيصير انتحار والانتحار حرام

أنا أول، كنت آخر من يجلس على العشاء وأول من يقوم ، الحين أول من يجلس وآخر من يقوم ، وعندي استعداد أخدم الكل وأجيب لهم اللي يبون أهم شي أضيّع وقت

إقتباس


	ثالث شي : السنن الرواتب هذي اللي مايحتاج اوصيكم عليها.. ومايخفاكم أجرها لذلك احرصوا عليها كلها ولا تفوتون ولا سنه طبعا خلو هدفكم الأجر مهب عشان الدراسه ولا شي ولاتنسون صلاة الوتر طبعا الأفضل انها تصلى بالثلث الأخير من الليل وفيه ناس يصلونها بعد العشاء وهذا يجوز لكن انت احرص على الأجرين اذا جاء بعد العشاء صل عشر ركعات ثمن اذا قمت بتراجع قبل الفجر صل لك 11 ركعه أو 13 وأول مايذن الفجر أطلع للمسجد أكثر للأجر

ههههههههههههههههههههههههههههههه الله يرجك

الواحد لازم يستغلّ وقته ويتقرب إلى الله ، محدن ميّت ومعه شهادته،
بكرا العمل الصالح اللي راح ينفعك بالقبر

إقتباس


	رابع شي : قضاء حوائج الأهل اذا أخوك الصغير يبي حلاوه ولا شي احرص انك تلبي طلبه اطلع للبقاله وجب اللي يبي .. أخوك سندك ,, أهم من الدراسه

أنا لها أنا لها

ينزل السنع على البنات سبحان الله بأيام الامتحانات ، وكأني بلسان الأمهات يقول : ليت كل أيامكم اختبارات

وحتى السواق مايسلم مني ، إذا راح للعثيم يجيب أغراض رحت معاه عشان أشيّك ع المصروفات < طسي بس

من جد من جد ، عليك نصايح مره بطله

إقتباس


	والظاهر علي بن ابي طالب يقول "ساعة وساعه" يعني هالساعه اللي بقت للدراسه اقسمها نص ساعه دراسه والنص الثاني بلاي ستيشن

خخخخخخخخخخخخخخخخخخخخخخخخ أنت إنسان موب صاحي أبدن أبدن

كلامك كله درر وحكم

إقتباس


	واعتذر ان موضوعي موجه للشباب لأنه بصراحة البنات دوافيييير الله لايضرهن وماينفع بهن نصح الله يهديهن بس يعني الدوفره بهن بهن نصحتهن ولا مانصحتهن

سجّل عندك إلا أنا ، لازم نكون وسطيه لاضرر ولا ضرار

الله من العيارة بأهل الرس

[ تراي وحده منهم لااحد ينط ]
رح ادرس وخل نصايحك لنا احنا بنطبقها بحذافيرها ان شاء الله

مع إن أحساسي يقول إنك دافور وقاعد تذاكر وانت تكتب الموضوع بس يالله

الله يوسّع صدرك بالعافية وبالتوفيق للجميع بالاختبارات

الضحى · #5 20/06/2009, 10:07 PM

هذه فسحة المذاكرة ..

أظنك موظف ومبسوط الله يوفقك ..

نسيت الله يهديك زيارة المرضى في المستشفيات تزيد الأجر وتكثر الحسنات ..

وغفلت عن ضيقة صدر الأم والأب عندما يكون أبنهم في أخر قائمة الناجحين

أو في أو ل قائمة الراسبين الفاشلين ...يجب أن تفكر في قلوب

من يحب لك الخير ويفتخر بك أمام الأهل والأصحاب ...

لا تكن سبب شقاء لهما أنت الشمعة التي تتجه لها أنظارهما ويدارون عليها

حتى تحقق حلمهما ....وكما تزرع يابني تحصد والدنيا سلف ودين ...

لا تغضب من التعقيب الجاد ثقيل الدم ولكن أعذرني

أنا أم وأعاني من بعض هذه التصرفات البريئة أيام الأمتحانات ...

الله يعطيك العافية ...

Fahad Al Sudais · #6 20/06/2009, 10:37 PM

امتحانات... امتحانات... انا متأكد قد مرّت علي هالكلمة

متى بس متى متى

أووووووهـ قصدك هذيك الايام حقت المذاكرة والخربط بربط

شف ياراعي الحبحر

هي بكل امانة.. مرتين اللي احس اني عصرت ليمونة مخي وذاكرت صح

اول مره سويت نفسي من هالعباقرة اللي يذاكرون على ضوء شمعة

ورحت زبنت لي كرسي تحت لمبه بطريق النهضة

لكن الله يهديهم هالعوايل الشوام.. مايفلّونها مشويات الا ايام الاختبارات

والله ما انساها ذيك الليلة

عيوني بالكتاب... وخشمي وتفكيري وكل ابو حواسّي مع ريحة دخنة المنقل

المره الثانية

مسكت معي غلط ... كان معي ألتيما توّي فاكّها وكاله

وامسك الخط ولا ردّني الا كورنيش البدايع << مدخل المدينة نسميه كورنيش... بكيفنا ديرتنا

وافرش زوليّتي وانسدح اذاكر الى اذان الفجر

وبعد الصلاة حطّيت رجلي وماردّني الا باب المدرسة << ترى الدعوى كلها ساعة ونص لا احد يقول نصاب

ترى كل هالموقفين قبل اكثر من 15 سنة

~SaKaB · #7 20/06/2009, 10:41 PM

^^^^^^
الصخرة , وخر بس

يا ناس شوفو نظرة الأم لأولادها كيف ؟!

وأنا اللي كنت أقول لأمي : تكفين خليني بحالي

الله يسامحني بس !

رساوي برساوي ,

شكرًا لأنّك ضيّعت وقت مذاكرتي

أحساس نمله · #8 21/06/2009, 01:44 AM

ياحرام اللي يذاكرون <<الحمدلله اللي خلصنـــــــــــا

ازين مافي جامعتنا اننا نخلص اختبارات قبل تبداء المدارسـ

اووووه اخوي اليوم رفع ضغطنا مااقد شفنا رقعة وجهه الا اليومـ وماقد تغداء وتعشاء معنا الا اليوم ومن زود الشطاره اليومـ بس مرابط بالمطبخـ مااغير يقلي بالبيضـ خلص البيض كلهـ بيضه شكشوكهـ بيضهـ قلي بيضهـ مسلوقهـ

واذا كلف على نفسهـ ومسكـ الكتابـ جلس يوقع ويتدربـ على التوقيعـ <<كل صفحه فيه تسع وتسعين توقيعـ

ماشاء الله مطبقـ الخطواتكـ بدونـ مايقراءه شلون لو يقراءه

نصيحهـ دحدروا ذاكرو وشدو حيلكمـ كله كم يومـ ومنتهيـــــــن وبالقت هذا مانفعكمـ غير شهادتكمـ <<اخص من يحكي

إقتباس


	واعتذر ان موضوعي موجه للشباب لأنه بصراحة البنات دوافيييير الله لايضرهن وماينفع بهن نصح الله يهديهن بس يعني الدوفره بهن بهن نصحتهن ولا مانصحتهن

صدقت ماقد شفت ولد دافور

الله يعطيك العافيهـ

BaRcaAaWey · #9 21/06/2009, 10:15 AM

يا لبيه يا جامعتنا

جامعة الملك عبدالعزيز

( كازينو عزوز

)

أحسن جامعة بالعالم

تدرون ليش

لأننا مخلصين قبل أسبوعين مدري أسبوع ونص والناس توها تبدأ اختبارات

بصراحة عليك نصايح يحبها قلبك

وياما طبقناها

وتراك نسيت شي

انتظار الصلاة بعد الصلاة

<<< دايم يسويها بين المغرب والعشاء أيام الثانوية العامة

<<< نصاب يجلس عند المسجد يسولف

hilali-arsenali · #10 21/06/2009, 01:03 PM

خلصت اختباراتي قبل اسبوع
اقسم بالله اني احس باكتئاب شديد
احلى شيء في الحياه الدراسه
و خاصة قلق الاختبارات
لكن احلى منها لما تطلع النتيجه ناجح

B A R H O OM · #11 21/06/2009, 01:36 PM

إقتباس

الرسالة الأصلية كتبت بواسطة الـصـخـرة


	امتحانات... امتحانات... انا متأكد قد مرّت علي هالكلمة متى بس متى متى أووووووهـ قصدك هذيك الايام حقت المذاكرة والخربط بربط شف ياراعي الحبحر هي بكل امانة.. مرتين اللي احس اني عصرت ليمونة مخي وذاكرت صح اول مره سويت نفسي من هالعباقرة اللي يذاكرون على ضوء شمعة ورحت زبنت لي كرسي تحت لمبه بطريق النهضة لكن الله يهديهم هالعوايل الشوام.. مايفلّونها مشويات الا ايام الاختبارات والله ما انساها ذيك الليلة عيوني بالكتاب... وخشمي وتفكيري وكل ابو حواسّي مع ريحة دخنة المنقل المره الثانية مسكت معي غلط ... كان معي ألتيما توّي فاكّها وكاله وامسك الخط ولا ردّني الا كورنيش البدايع << مدخل المدينة نسميه كورنيش... بكيفنا ديرتنا وافرش زوليّتي وانسدح اذاكر الى اذان الفجر وبعد الصلاة حطّيت رجلي وماردّني الا باب المدرسة << ترى الدعوى كلها ساعة ونص لا احد يقول نصاب ترى كل هالموقفين قبل اكثر من 15 سنة

يالبيه يالبدايع متى تجي العطله بس الكورنيش الي وينهوبه

شكلك رايح للمحفل الي مايدخلون شباب

رسااااوي نصاايح ولا اروووع مشكوور يالغلا

ماسك كتاب القواعد واشوف موضوعك

رساوي برساوي · #12 21/06/2009, 06:47 PM

إقتباس

الرسالة الأصلية كتبت بواسطة ربطـه و شبـاصه


	ههههههههههههههههههههههههههههههههه ههههههههههههههههههههههههههههههههههههه موضوع توووحفه يحكي الواقع الأليييم صحيح صحيح بكرا لاهلكت من الجوع ومتّ عشان الدراسه بيصير انتحار والانتحار حرام أنا أول، كنت آخر من يجلس على العشاء وأول من يقوم ، الحين أول من يجلس وآخر من يقوم ، وعندي استعداد أخدم الكل وأجيب لهم اللي يبون أهم شي أضيّع وقت ههههههههههههههههههههههههههههههه الله يرجك الواحد لازم يستغلّ وقته ويتقرب إلى الله ، محدن ميّت ومعه شهادته، بكرا العمل الصالح اللي راح ينفعك بالقبر أنا لها أنا لها ينزل السنع على البنات سبحان الله بأيام الامتحانات ، وكأني بلسان الأمهات يقول : ليت كل أيامكم اختبارات وحتى السواق مايسلم مني ، إذا راح للعثيم يجيب أغراض رحت معاه عشان أشيّك ع المصروفات < طسي بس من جد من جد ، عليك نصايح مره بطله خخخخخخخخخخخخخخخخخخخخخخخخ أنت إنسان موب صاحي أبدن أبدن كلامك كله درر وحكم سجّل عندك إلا أنا ، لازم نكون وسطيه لاضرر ولا ضرار الله من العيارة بأهل الرس [ تراي وحده منهم لااحد ينط ] رح ادرس وخل نصايحك لنا احنا بنطبقها بحذافيرها ان شاء الله مع إن أحساسي يقول إنك دافور وقاعد تذاكر وانت تكتب الموضوع بس يالله الله يوسّع صدرك بالعافية وبالتوفيق للجميع بالاختبارات

بديت أشك انا اللي كاتب الموضوع ولا أنتي

كل هذا رد

امزح امزح خوذي راحتس

وبعدين هل عندك شك ان كلامي كله درر وحكم ؟؟

أجل رساويه

يالحبحر

وبعدين لاتصيرين مخفه انتي صدقتي النصايح

أشوفتس تقولين انتس منتب دافوره

ادرسي بس
والله اذا سقطتي باتسر ماينفعتس رساوي برساوي .. ولا مجلس الجمهور الهلالي
ماجد مقبل بكبره والله ماينفعك

وبالتوفيدز

رساوي برساوي · #13 21/06/2009, 06:51 PM

إقتباس

الرسالة الأصلية كتبت بواسطة الضحى


	هذه فسحة المذاكرة .. أظنك موظف ومبسوط الله يوفقك .. نسيت الله يهديك زيارة المرضى في المستشفيات تزيد الأجر وتكثر الحسنات .. وغفلت عن ضيقة صدر الأم والأب عندما يكون أبنهم في أخر قائمة الناجحين أو في أو ل قائمة الراسبين الفاشلين ...يجب أن تفكر في قلوب من يحب لك الخير ويفتخر بك أمام الأهل والأصحاب ... لا تكن سبب شقاء لهما أنت الشمعة التي تتجه لها أنظارهما ويدارون عليها حتى تحقق حلمهما ....وكما تزرع يابني تحصد والدنيا سلف ودين ... لا تغضب من التعقيب الجاد ثقيل الدم ولكن أعذرني أنا أم وأعاني من بعض هذه التصرفات البريئة أيام الأمتحانات ... الله يعطيك العافية ...

أول شي لا والله مانب موظف
طالب جامعي ولاعنين جدفه بالدراسه

وبخصوص زيارة المرضى تضاف للنصائح

لكن ترا الموضوع هزآر .. ودعابه << ذليـــت

وان شاء الله ان شاء الله عيالتس ماراح يقرون الموضوع

والله يوفقنا ونفرح والدينا

مشكوره على التعقيب وبالتوفيق لتس ولعيالتس

فهد الهلالي 2002 · #14 21/06/2009, 06:53 PM

إقتباس

الرسالة الأصلية كتبت بواسطة hilali-arsenali


	خلصت اختباراتي قبل اسبوع اقسم بالله اني احس باكتئاب شديد احلى شيء في الحياه الدراسه و خاصة قلق الاختبارات لكن احلى منها لما تطلع النتيجه ناجح

لا والله الا احلى من الشهاده هي لما تخلص اخر يوم يا انت بتشعر بالحريه

رساوي برساوي · #15 21/06/2009, 06:55 PM

إقتباس

الرسالة الأصلية كتبت بواسطة الـصـخـرة


	امتحانات... امتحانات... انا متأكد قد مرّت علي هالكلمة متى بس متى متى أووووووهـ قصدك هذيك الايام حقت المذاكرة والخربط بربط شف ياراعي الحبحر هي بكل امانة.. مرتين اللي احس اني عصرت ليمونة مخي وذاكرت صح اول مره سويت نفسي من هالعباقرة اللي يذاكرون على ضوء شمعة ورحت زبنت لي كرسي تحت لمبه بطريق النهضة لكن الله يهديهم هالعوايل الشوام.. مايفلّونها مشويات الا ايام الاختبارات والله ما انساها ذيك الليلة عيوني بالكتاب... وخشمي وتفكيري وكل ابو حواسّي مع ريحة دخنة المنقل المره الثانية مسكت معي غلط ... كان معي ألتيما توّي فاكّها وكاله وامسك الخط ولا ردّني الا كورنيش البدايع << مدخل المدينة نسميه كورنيش... بكيفنا ديرتنا وافرش زوليّتي وانسدح اذاكر الى اذان الفجر وبعد الصلاة حطّيت رجلي وماردّني الا باب المدرسة << ترى الدعوى كلها ساعة ونص لا احد يقول نصاب ترى كل هالموقفين قبل اكثر من 15 سنة