مــالت علـى زويـد قـصــاب الـهـلايــم .. دخـيـلك إبـن عـمّـي - نادي الهلال السعودي - شبكة الزعيم

Fahad Al Sudais · #1 07/06/2009, 08:51 PM

حيــــــاكم

زويد شاب مملوح.. بس ( دردغانه ) << كلمة قصمنجية تعني ( سبك ) او ( عبيط )

يشتغل وراتبه 4 الاف ريال

بعد ثلاث سنوات من الوظيفة قرر يتزوج

طبعا كأغلب الشباب... دفع عنه ابوه ثلاث ارباع التكاليف.. وهو دفع الباقي

واختارت له اميمته ذيك البنت... وهـ وهـ بص

( بسكوته ) مهيب بنت... ( حبة ماكنتوشه وصارت عليها هوشه ) مثل مايقولون

وراح وضبّط اموره واستعد للعرس.. واشترى كراون فكتوريا استعمال امريكي

واستاجر له شقه وفصّل غرفة نوم وعلى التسريحة صف له 45 علبة عطر

وكلّم واحد من اخوياه يسلفه البشت حقه للعرس

وتم الزواج وكل شي على ماتحبون

بعد الزواج بكم شهر

بدت ( المطرسة ) واشتغل العناد وخربت الاخلاق بين الاثنين

هو مسوّي قوي و ( سي السيد ) :

اطبخي وانفخي ونظّفي واغسلي واكنسي

وليش هذا صاير كذا ؟؟ وليش هذا طايح هنا ؟؟ والله يلعن اليوم اللي اخذتك فيه

وهي لسانها يلوط اذانها وترد على الكلمة بعشر

:

انا ماجيت اشتغل عندك خدّامه

وابوي اللي هو ابوي ماعمره رفع صوته علي... وطول عمري بنت عز

وكل يوم على هالحال وانت ماشي

هو اربع وعشرين ساعة عند اخوياه في الاستراحة

وهي كل ماطرت لها فرصه قالت ودني لبيت اهلي

عيشه بتؤصف العمر يازلمه

زويد ذاك اليوم راح للاستراحة ومالقى احد من الشباب

فتح التلفزيون.. وهذا باب الحارة توّه بادي

قعد يتفرج وهو مروّق الى ابعد حد.... وطارت عيونه بـ :

( تسلم لي إبن عمي

... لك تؤبرني ان شاءالله

... دخيل عينك شو بحبك انا

)

بيني وبينكم... زويد انقلب لونه وصار عنده ثاني حال

وقام يهوجس ( انا الحين ورى ما اخربها واروح آخذ لي شاميّه تدلّعني )

وطقّت براسه فكره جهنمية :

ادبّر لها فيزة خياطة او كوافيرة في أي مشغل

ثم تذكرة بألف وخمس لسوريا... واروح واستاجر سيارة واوقف عند بوابة الجامعة بدمشق

واختار اجمل واحلى وحده من الصبايا

واوصّلها معي لبيتهم.. وادخل معها واخطبها على سنّة الله ورسوله

والمهر مايتعدى سبع او ثمان الاف... ثم آخذها ونرجع للرياض

واستاجر لها شقه بمنفوحه او الشميسي بسبع الاف في السنة

والله فلللللله... الزواج يكلفني عشر الاف بس

وخلها تدلعني وتستعرض مهاراتها... وخل غيرها يموت قهر

والله وسوّاها زويد

دبّر الفيزه وراح وتزوج وجابها معه

واستاجر لها الشقه وكل شي عال العال

طبعا زوجته الاولى ماتدري عن شي... لاهيه بأمها وخواتها وخرابيطها

مشت الامور... وبعد كم شهر بدت الاحوال ( تدوبر )

وشوي شوي بدأ زويد يشعر بالفارق

صار يحس بفوارق التفكير والمنطق بين هذي وذيك... وعرف الفرق بين البراءة والخبث

حتى الفوارق ( الذهنية ) بانت واتضحت لهالمسكين زويد

فرق شاسع بين الذهينة المفتّحه... وبين الرفلا

جاب لها عباة وقال البسي وتغطي... لبستها اول مره وتكرفست على وجهها

وطول النهار ماغير تبلع اكل تقل قربه مشقوقه

اذا دخل بيته الاول يشم ريحة الهيل

... واذا دخل شقّتها تصكّه ريحة الثوم

جابت له الصمرقع باخوها اللي تبي تجيبه بفيزة ميكانيكي

وخالها اللي تبي تجيبه بفيزة كهربائي

وعمها اللي تبي تجيبه بفيزة معلم فطاير وشاورما

وامها وخالتها اللي تبي تجيبهم زيارة وعمرة

وبسم الله الرحمن الرحيم... تقل ارنب ماغير تفرّخ

في سنتين جابت له ولدين وهذاها حامل بالثالث

وتنشب في حلقه تبي 2000 ريال مصروف شهري للبيت

وتبي تروح تزور امها واهلها كل ست شهور

وطبعا ماتروح ايدها فاضيه... إنقد المصاري تؤبرني

وزويد... عرف ان الله حق

وعرف ان ( ما حك جلدك مثل ظفرك )

وطلّقها وردّها لديرتها... وثلاث سنين من المشاكل اللي مالها حل

حتى بعد الطلاق مازالت تغرف فلوس... وتطلب انواع المصاريف

وزوجته الاولى... مهما صار بينهم... ماتبي اكثر من الستر

والله مالت عليك يازويد... ياقصاب الهلايم

.

.

لكن حتى اكون منصف... خلوني اعترف بحقيقة :

بناتنا مالهن مثيل... في كل شي

فرق شاسع عن الكل... ذوق وجمال وذكاء وخفة دم وطيبه وعفّة نفس

حتى في الصفات الوراثية والملامح الانثوية... انتصار ساحق

لكن... فيهن غباء عاطفي احياناً

المتزوجات خصوصاً.. ماتعرف تطلب الشي ( أي شي ) من زوجها باسلوب انثوي احترافي

مافيه الا ( إلحاح )... ثم ( صراخ )... ثم ( صياح )

رغم ان الطلب غالباً ( بسيط ) وغير معقد... لكن بسبب الإلحاح صار ( كايد )

وهالمشكلة موجودة عند 99% من بناتنا... بسبب طيبتهن وبراءتهن الزايدة

لكن هذا غلط... بعض الامور محتاجة شوية ذكاء... ( خلطة انوثة سرية )

مثل مايقولن الشاميات ( تؤبرني – يخلي لي ياك يارب )

انتم قولوا ( الله لا يخلين منك – الله يخليك لي ذخر – ياعساي ماذوق يومك ... الخ )

ثم تمتعوا برجل ( رايح وطي ) عند الكلام الحلو

لاتخلونه يسوي سواة زويد

بريماكس · #2 07/06/2009, 09:13 PM

لحظه تكل يوم ارد كان فيه رد فوقي لعضوه اول حرف من اسمه متابعه بصمت

متابعه وين ردك وراك حذفتيه

ترى مافيه شئ من شان تحذفينه

هلا بالصخــــــــــــــــــره

وش السالفه يعني ماتبيننا نفكر بالشاميات

يلموني فيهم ياشيخ ... خاصه لاشفتهم بشركة مكه من القهر المحل تدخله 10 مرات

كم واحد لا مرته مزيونه بعمر الزهور ....... ضاعت علومه والصواب الله يجيبك يالصواب

ايوالله الصواب الله يجيبك يالصواب

نجي للجد ... والله مامثل بنات ديرتي

حلا ودلع وجمال وكل اللي تبي وخاصه الحيااء وهذا الاهم

الصخره مشكور

وتراي قاري موووضوعك كامل وياليت الزوجات يطلعن عليه

وشكلي ابحطه بالمفضله

لين شيخه الزين · #3 07/06/2009, 09:15 PM

هلا بالصخره ...

إقتباس


	وهالمشكلة موجودة عند 99% من بناتنا... بسبب طيبتهن وبراءتهن الزايدة

ليش ماقلت في كل البنات هـ الطبع ..!!

أخالفكـ على التعميم فيهـ ناس كذا وفيهـ ناس مهب كذا ...

وأتوقع من ديرهـ لديرهـ ...

ولتكن منصف تكلم على مزاجية الرجال ...

ولا حاشا للهـ الرجال كاملين ...

بنت عبد العزيز @ · #4 07/06/2009, 09:22 PM

بداية الموضوع شمرت اكمامي وما امداني اصل للاخير الآآني فاشه

هنا ولا في الشام ولا اي مكان اكيد فيه مزايا وعيوب

بس حلاة الثوب رقعته منه وفيه

بس انا استغرب من الي يقولون لا الأجنبيه ما تجيك طامعه في فلوسك !!

طيب يعني جايه لايش !!
شهابة شعبنا ولا السمعه الطيبه الي عندهم ولا والله عرفتك زين وعرفو اخلاقك ومعدنك !

يعني واحد غريب عنها مو من مجتمعها وبيعيشها في غربه وغالبا ترجع مطلقه مع كومة عيال ليش بتاخذك ؟!
عشان نهر الفلوس الي تحسبه قدام بيتكم !!

مادرو انه حافي منتف ماجاهم الا يدور الرخص

الصخره الله لا يخليني منك

<<< خن بط على طول تطبق

يعطيك العافيه خيوو

.

@@almoreb@@ · #5 07/06/2009, 09:37 PM

بسم الله الرحمن الرحيم

يا هلا بالصخرة

والله هذي المشكلة اللي طرحتها أتوقع موجووودة في 50 % من بناتنا ولكن فعلا تعتمد على تربية البنت وعلى معاملة أم البنت ل أبو البنت << دوختك

يعني

اذا كانت أم البنت أم مثالية وتعرف تطلب من أب البنت راح تلاقي البنت من شاكلة تئبر شبدي

والعكس صحيح

بس فعلا بناات الخليج وبس والباقي كله جزر

وهذا بيت من تأليفي للتو اذا رأيت البنت الشامية باسمة فياما تحت السواااهي بلاااااوي

مشكووووووووووووور يالصخرة ونئبر سوا ان شاء الله في يوم واحد

>>>>>>>>>>> وردة

FINAL10 · #6 07/06/2009, 09:52 PM

آهلآ بآلآستشــآري

مآ شآء آلله عليك دآيم نشيط آلله لأ يضرك

إقتباس


	لكن حتى اكون منصف... خلوني اعترف بحقيقة : بناتنا مالهن مثيل... في كل شي فرق شاسع عن الكل... ذوق وجمال وذكاء وخفة دم وطيبه وعفّة نفس حتى في الصفات الوراثية والملامح الانثوية... انتصار ساحق لكن... فيهن غباء عاطفي احياناً المتزوجات خصوصاً.. ماتعرف تطلب الشي ( أي شي ) من زوجها باسلوب انثوي احترافي مافيه الا ( إلحاح )... ثم ( صراخ )... ثم ( صياح ) رغم ان الطلب غالباً ( بسيط ) وغير معقد... لكن بسبب الإلحاح صار ( كايد ) وهالمشكلة موجودة عند 99% من بناتنا... بسبب طيبتهن وبراءتهن الزايدة لكن هذا غلط... بعض الامور محتاجة شوية ذكاء... ( خلطة انوثة سرية ) مثل مايقولن الشاميات ( تؤبرني – يخلي لي ياك يارب ) انتم قولوا ( الله لا يخلين منك – الله يخليك لي ذخر – ياعساي ماذوق يومك ... الخ ) ثم تمتعوا برجل ( رايح وطي ) عند الكلام الحلو لاتخلونه يسوي سواة زويد

تصدق حسيت آنك دكتور نفسي

,

بس طريقه طرحك للمشكله دآئم مميز فيهآ

كلآم عآل آلعآل يآبو الفهود

شبوط · #7 07/06/2009, 10:19 PM

هلا بالدكتور النفسي

يقولك احصائيه في المحاكم الشرعيه تقول ان نسبه الطلاق في السنه الاولى

من الزواج بلغت 80 % هذا وهم في السنه الاولى لذلك لابد من الصبر على المدام

كان هنا · #8 07/06/2009, 10:23 PM

الله يعينك يابو صالح على بعض هالعقول .
يا تكون وجهة نظرك نسخة كربونية من أفكارنا وتوجهاتنا ومنطلقاتنا ،
وإلا أبشر بحربٍ ضروس .
/،
بس بيني وبينك ، وحدة ويالله عساها تجي ،
ضيعت تفكيري هالوحدة

، الله المستعان .

الا صحيح يابوصالح ، بما أنك فتحت موضوع التعدد ، وبما إنك توك طاق لك لبنانية وكالة من حزب تيار المستقبل
حدثنا عن تجربتك الحديثة ،
لعلنا نقتدي بك رعاك الله .

القيصر رهيب · #9 07/06/2009, 10:36 PM

إقتباس

الرسالة الأصلية كتبت بواسطة لين شيخه الزين


	هلا بالصخره ... ليش ماقلت في كل البنات هـ الطبع ..!! أخالفكـ على التعميم فيهـ ناس كذا وفيهـ ناس مهب كذا ... وأتوقع من ديرهـ لديرهـ ... ولتكن منصف تكلم على مزاجية الرجال ... ولا حاشا للهـ الرجال كاملين ...

فعلا مهما سويت لن ترضيهم

الحين طايح في بنات السعودية مدح وبالاخير تجي تهوش تقول لو فيك خير تكلم عن الرجال

يا أخي عالم تجبرك تعاملهم سيء << هندي

محب الجنه الخرج · #10 07/06/2009, 10:37 PM

هلا والله بالصخرة

والله وانا اخوك انا للحين عزوبي وكل ماسمعت ان بغيت تتزوج ماتروح تخطب وفي يدك اقل من خمسين وكل ماصارت المواصفات افضل كلما ارتفع السعر وهنا المشكلة

السوريات زينات اسعارهم رخيصة بس فيهم مشكلة ومني قايلها اخاف يشبون فيني بعض الناس ويتهموني بالعنصرية ومدري ايش

عشااان كذا خلك على بنت بلادك وتسلف لك كم عشرة الاف حق المهر والهرجة هاذي

تصدق عااااد ماهيب شينة انك لاصارت شايب مثل شياب هالزمن الله يهديهم تروح تطق لك سورية توسع صدرك اخر عمرك

متى بس نكبر ونتزوج ونفتك من العزوبية وقلقها

هلالي من ارض اليمن · #11 07/06/2009, 11:02 PM

لا يعرف احد اين يجد الخير .. هل الانتاج المحلي ام مثيلتها العربيه ام وفق المقاييس الامريكية

كل الناس خير وبركة ولا يسعنا سوى ان نسأل الله التوفيق ،،،

هنالك نساء من اوطاننا فيهن الخير والبركة وأخريات يجعلنك تندم ندما عظيما .. وهنالك نساء من اوطان اخرى فيهن ايضا الخير والبركة وأخريات يلقين بك من علي

يبقى الزواج توفيق بيد الرحمن الرحيم ،،،

شكرا يا فهد

والله يعطيك العافيه ،،،

برايفت ( واضح كقرص الشمس )

: ما شاء الله تبارك الله متى اسعفك الوقت لكتابة موضوع ؟

iRaied · #12 07/06/2009, 11:12 PM

.

شكل زويد ماخذ وحدة من حلب

=> إذن العيب في زويد مب في اللي بالي بالكـ

<= قام يتلفت

.

أحلـى هلاليه · #13 07/06/2009, 11:46 PM

هلا بك

والله انا معك بناتنا كل شي يتمنونه يبونه بنفس الحظه يصير
انا بصراحه حنانه حالي حال البنات بس بعض الاحيان اعرف شلون اخذ اللي ابيه بكل هدوء

الله يخليكم ويخلينا..

الغرناطي · #14 07/06/2009, 11:47 PM

العقلاء يعيشون في راحة

خذ لك وحده على قدك

الضحى · #15 08/06/2009, 12:37 AM

ماشاء الله تبارك الله موضوع جيد وظريف وعرض الداء و وضع الدواء

فقط كلمة ودي أهمس بها في إذن كل شاب مقبل على الزواج عامل زوجتك مثل ماتحب أن تعاملك

والفرس من الفارس ...ولا تكن لين فتعصر ولا يابس فتكسر ...

وأهم شيء مراقبة الله من الطرفين ...

الله يوفقك يا الصخرة ويسعد أيامك وجميع المسلمين ..