الجو ( نار ) ياجماعة الخير

قسم بالله شي غير طبيعي

وش هالحر ؟؟

اذا انت مسوّي قوي اطلع للحوش الساعة 2 الظهر.. وقّف ثلاث دقايق بس

وهذا وجهي اذا ما خربت اخلاقك

لأن الاخلاق مثل مايقول سعيد صالح ( تنصهر بالحراره وتتبربر بالبروره )

الحين بالدوام ماعاد اطلع في الـ( BREAK ) حق الغداء

أتّصل على أي مطعم واخلّيه يوصّل لي الطلب

واذا وصل يوقف تحت عند البوابه وانواع الهواش انا وايّاه

هو يقول انزل او ارسل احد ياخذ الطلب.. وانا اقول له معصي.. انت تعال فوق

كله من شيلة الهم للنزول في الشمس

ياخي والله بعذري.... والله الجو حااااار مررره

عاد المشكلة ماهيب هنا.. في الدوام تجي وتلقى كل المكيفات تشتغل من بدري

المشكلة في البيت اذا رجعت بعد الدوام

تدخل غرفتك وتلقاها نااااااااار... تطبخ طبخ

وتشغل المكيف وتطلع وتصك الباب وراك.. تحتريها تبرد شوي... أقل شي ربع ساعة

تروح هالوقت تقعد في الصالة عند التلفزيون.. وماتدري الا وانت نايم على الكنب

تعال للطامه الكبرى

اذا بغيت تتروّش... الماء ( يغلي )... والله كأننا دجاج توّه مذبوح ومحطوط في مكينة التنتيف

انواع سلخ الجلد... والله الماء ينزل من الخزان حاااااار من جد

واللي دابل كبدي وفاقع مرارتي... هالنصاب حق النشرة الجوية

مدري اصدقه او اصدق المؤشر اللي عندي في السيارة

ماتجي الساعة عشر ونص الصبح الا والمؤشر طاق الـ 48

والساعة وحده الظهر يطق الـ 50 ويفصل ( خلاص مايجيب شي فوق الـ 50 )

يعني يمكن توصل الدرجة 60 او 65... والمؤشر معلّق على 50

لكن هالخراط حق النشرة.. هذاك اللي من سنة جدي وهو يقول ( مع احلى الاماني )

يشلخها واااكبرها عند ربي... اكبر من كرشة البلوي

يطق ذيك الابتسامة ويقول :

في الرياض العظمى 42

أي 42 ياعمي... اطلع من راسي الله يرحم والديك

والله لو اننا بهايم ومانفهم

اذا ماهي 60 والله مانيب وجه رجال

ياشيخ اركب السيارة بعد الظهر كأنك داخل فقّاسه بشريه

حط شريط كاسيت فوق الطبلون واتركه ساعة وحده بس

ارجع وشف وش صار فيه... كنّك تشوفه بمرايا الابعاد الثلاثة

اذا الشريط المصنوع من البلاستيك المقوى يتعفط بهالشكل من حرارة الجو... وشلون اجل الانسان ؟؟

اقول ياحبّي للشتاء بس

يالبّييييه يالبرد... وهـ بس يا تحت الصفر.. طق الفروة وشاهي زنجبيل وتمتع بحياتك

ماهوب هالصيف الغثيث... صرنا مشويات متنقله

الله يكفينا شر حرارة جنهم





رومانسيات صخراويات


حبّيتك في الصيف.. حبّيتك في الشّتي

والصيف ضيعت اللبن

وانتي احلى من اللبن... خصوصا لبن محطة العتش اللي على طريق القصيم

وعلى طاريها... فيها مطعم يصلح بروستد خقق

وش رايك اعزمك فيها لنا يوم.. ناخذ بروستد ونزبن ورى المسجد

ومهوب لازم تغسلين عقب الاكل... مسحي ايديك بالكلينكس

وطول الطريق وحنا راجعين شمّي زفرة الدجاج في ايدك وتذكري الغداء الرومنسي

وهـ بص