المكان : روضة التنهات

الزمان :غرة صفر من عام 1424 هـ {---- رقم مميز للبيع


في يوم مشمس وبينما الثلاثي : سعيدان وعليان وفهيد متسدحين تصلخهم شمس الرياض اللي ماهنا أزين منها

وصوت الكاتم يتشتش ( تش تش تش تش ) <== بزعمه يبي يخششكم جو القصة غصب

كسر ذلك السكون الذي كان مخيما إلا من صوت طقطقة الأصابع بواسطة الخشم

كسره توقف شاب في مقتبل العمر تبدو عليه آثار البؤس والإسقاط النفسي


وصرخ فيهم : صبحكم الله بالخير

الجميع : صبحه بالنور اقلط تقهو

هو : شكرا مستعجل


عليان بكل رقة : طيب وش تبي ؟؟

هو : أنا أخوكم في الله قدر الله علي وطلعت جوال وجت فاتورته تقصم الظهر وعندي بزارين أعيل أسرة كبيرة ومثلكم أجواد عيال أجواد

سعيدان : ايييييه الله يكون بعونك طيب وش تبي ؟؟؟؟

هو : أبد يا طويل العمر شوفة عينك الحال زي ما أنت شايف وهذي ورقة موقعة من المحكمة توضح إني معسر و على باب الله

فهيد : ياربيه والله قصتك تضيق الصدر بس على الحين ما قلت لنا وش تبي ؟؟

هو : شوفوا يا ملاعين الخير أنت وهو عندكم شي عطوني وإلا خلوني امشي اعنبو بليسكم لو بقعد عند كل واحد من هالجلسات كذا يبي لي أسبوعين


الجميع بصوت واحد : اييييييييييييييييه يعني أنت شحاذ


هو : الشحاذ جابته أمك أنت وهو أنا محتاج بس



علينا : طيب يا محتاج وشوله تقدم على الجوال وأنت حالك كذا


دحيم ( اسم الشحاذ ) : ايييييييييييييييييييييييه بلاكم ماتدرون .... ويجلس على الأرض ويغيم الجو عنده ويرجع اسود وابيض ( يعني جلس يتذكر للي ماقد ناظروا سالي وطقتها )


أنا يا جماعة الخير قصتي طويلة ذاك اليوم كنت جالس باستراحة شرق الرياض وكنت جالس بكل هدوء وروحانية في عالمي الخاص

ممتطيا صهوة شيشتي الموف واللي الموف والراس الموف وكل شي موف بموف حتى الأغاني موف

وذهب بي التفكير والأماني المعسولة حتى قلت : ايييييييييييه واحلالات من يطلع له مليون بس عشان يعرس ملينا من العزوبية وملاحق هناء وفلانة وعلانة

وأنا جالس أتمنى صارت يدي بحركة لاشعورية تحك بالشيشة وأنا اطلع الدخان فجأة ومن دون سابق إنذار ودون أدنى مسؤليه تجاه الغير ومن حيث لأعلم وبحركة متسارعة .... ( وبهاللحظة حانت من دحيّم التفاته للشباب وآلا الشباب متسدحين على بطونهم ورافعين رجلينهم وفاقين فمهم )

... خرج لي مارد تكون من دخان الشيشة

الثلاثي المرح : أأأأأأييييييييييييي <-- صرخة تعجب

دحيم : أي والله ياجماعة الخير وهو اللي يقول اوووووووووووووووووووف أخيرا طلعت اعنبو بليسك ست سنين وأنا هنا


قلت : وش تبي انت ومن انت شكلك من أهل ال ( بسم الله ) <-=-=-= حركات عجز

المارد : أي بسم الله خليت فيها بسم الله انت ووجهك

يا أخي خف ربك 6 سنين ولاعمرك حطيت ماء بارد أو ثلج حرام عليك ياشيخ حاسدنا لانتبرد يا اخوي

المهم مع انك ماتستاهل بس عاد الشكوى لله غصبن علي الحين لازم تتمنى 3 أمنيات أحققها لك عشان افتك منك ومن شيشتك



دحيم : اممممممممممم بس 3 مايحصل 4


المارد : احمد ربك يالحافي يالمنتف اللي جابي الله لك لأخصم الحين وحدة


دحيم : لا لا لا لا لا خلاص أهب ماينتحارش




اممممممممممم طيب اسمع


الأمنية الأولى : أبي تطلع لي جوال وماتجيني فواتير ابد ابد اكلم على راحتي خط الصداقة وخط كاس الاتحاد وخط الدوري ما أحد يقول لي شي و....


المارد : ... هييييييييييييييه وين يا أبو الشباب ماودك اجي أسوى لك مساج بعد ؟؟؟ (( والله ياشكل هالمارد من حقين الحلّة ملكع ))


شف يا أبو الشباب سالفة إني اطلع لك جوال وماتجيه فواتير اغسل يدك


آنا اقدر أقلد لك صوت بنت واشبّك واحد من حقين الاتصالات يبدى يحول فاتورتك على أحد هالضعوف


أو أقلد لك صوت بنت أجرجر لك واحد من الشباب يبدى يسدد فاتورتك



معقولة سهلة ذي لكن سالفة إني اطلع لك جوال من دون فواتير معليش معليش شف غيرها




دحيم : اممممممممممممممممم طيب امممممممممممممم أبى مليون ريال بعرس فيها وأثث بيت أتجهز للزواج



المارد : ولو يا أنت مآخذ مقلب فيني يا أنا مآخذ مقلب فيك


أول شي مافيه زواج هاليومين يكلف بس مليون مليون هذي هي مهر أو شقة أو فاتورة كهرب أو ماء أو تلفون أو مصروفات زوجة خلال شهر


وبعدين انت وعيونك ذا اللي كنها كور المونديال (( قايل لكم من الحلّة)) لو عندي مليون بجلس بشيشتك ذا المخيسة لي 6 سنوات




شف انت ما تنعطى وجه أنا بعطيك الأمنيات اللي عندي وأنت تختار ثلاث منها وغيرها لا يكثر


1/ اطلّعك من جسر البحرين من دون جواز بس ترى حساب الفندق والحركات عليك عاد مشفوح وطلع برى كم يبي يكفيك


2/ أباشر عليك بالريف اللبناني وأنا اختار لك العشاء مهوب تدج بنا

3/ أطق عباية ونتخاوى انا وإياك لما ينزل اللي اللي براسك من أماكن العوائل
4/ ارجع بك 1000 سنة ورى سياحة هناك أطلق يا شيخ من هالسفريات كلها


5/ اطلع لك جوال رقم مميز <-=-=-=-= تفكير سعودي




……. دحيم بعد برهة من الزمن وبعد مافكر حتى أتعبه التفكير قال مافيه اختيارات ؟؟؟؟


قال له المارد : لا مافيه اخلص جواب نهائي ويجلس يطير عيونه بدحيم بزعمه أبو قرد احي


قال دحيم : طيب لو اقل شي حط فاصل إعلاني وبعدها ارجع أجاوب


المارد : اها بس يالله عطيناك وجه اخلص وإلا رجعت للشيشة



بعد مافكر دحيم قرر على بركة الله انه يختار


الخيار الثالث والرابع والخامس


قال له المارد طيب خلاص الثالث اللي هو الدخول لاماكن العوائل اجله لي شوي وخذ هذا رقم مميز 055؟؟؟؟؟؟؟ <-=-=-=-= لو أحط الرقم الله من ملقوف وملقوف يبي يدق عليه ههههههههه


ويالله غمض عيونك عشان نروح للعصر الجاهلي






فجأة حس دحيم إن الدنيا تغيرت عليه ويناظر المارد وإلا يلقاه طاق لبس ولا الزير سالم وبيده بطل نبيذ (( وتلوموني لو قلت انه من الحلة الزم ما عليه يرتفع))


وصار يتكلم لغة عربية فصحى


دحيم : هاه يا المارد وين نروح الحين

المارد : سنذهب على قوم لم تطلع الشمس ولم تغرب على اكرم منهم

دحيم : أي والله تراني طاقني الجوع ومشيش على فراغ
المارد : حسنا لكن يجب أن تتكلم مثلي بلغتن عربيتن فصحى وإلا علقوك مع اذانك وحسبوك من الموالي عاد وش يفكك منهم


طلعت عيون دحيم وقال : أفأن (افا بالفصحى ) لا لا أشوى انك علمتني وإلا كنت سأروح في خرائطها


هيا بنا لكن يا يالمارد ما هو اسمك الحركي ؟؟

المارد : أنا اسمي المنتصر بالله وأنت ؟؟؟

دحيم : أنا أميرة الفضل خخخخخخخخخخخخخخخخخخخ .... وقطع ضحكات دحيم كف خلى ضروسه تصير كنها شارع من شوارع السويدي

واعتدل واخذ يتلفت عشان يشوف أحد شافه وإلا لا وقال : يا ثقل دمك يا هذا لقد كنت أداعبك أنا اسمي أبو القعقاع


المارد : ارووووووووووح ملح مع أبو القعقاع

دحيم : ماشفت شي تراني اعرف اعد من 1 إلى 10 بالانقليزي وأنا مغمض


المارد : اها بس امش ولا يكثر

......


مع غروب الشمس وصل أبو القعقاع والمنتصر بالله إلى ديار بني صعصعة ( تحداكم تعيدون الاسم عشر مرات ورى بعض بسرعة ) وقد أضناهم التعب حتى اصبح دحيم لايستطيع المشي


ولما وصلوا إلى مجلس شيخ تلك القبيلة وقفوا عندهم وسقط دحيم من التعب لايقوى حراكا وهو يتمتم : يامن شرى لهو من حلاله علّتون وإلا لو أنا جالسن أناظر يا ليل ياعين مهوب اصرف


هب من كان حاضرا عند الشيخ لنجدة هذا الشخص والشيخ اطقع ما يشوف دحيم حتى انه جالس يتقهوى ولاجاب خبره


حمل القوم دحيم وهم يهونون عليه واخذوا يقولون له : مم تشكو رحمك الله


وهو يجاوب عليهم وهو يالله يتكلم : آآه إن إنني طاقني الجوع طقنا عظيما ولقد لم أتعشى إلا نواشفن لاتذكر ومعدتي لها صوت كصوت صفير البلبل



القوم : لاعليك فقد وصلت إلى بني صعصعة من يقرون الضيف ومن كرمهم عرفه الداني والقاصي واللذين لم تجع وحوشهم في الفلا فكيف بضيوفهم وضيوف الرحمن

دحيم : ايه عاد منتب بعاقلين يا ظلال حاتم اخلصوا وشوفوا لنا شي يوكل وخلوا عنكم التميلح


يوم صرخ واحد من الشباب : لا أبا لك أو تتجرا أن تنعتنا بالمتميلحون

بعد بعد ( وحط يده على خصره ) لم يبق إلا تقول أن نسائنا سود الركب


دحيم : لاحوووووووول وأنا هالركب السود وراي وراي


لا يا أبو الشباب لم اقصد بنعتكم أنكم متميلحون لكنني جائع والقلم رفع عن النائم ((( آبو الاستشهاد يا شيخ )))

وفي الصباح الباكر استيقظ الشاب دحيم على فراش وثير واخذ يتمغط وفق فمه


وإذا بشاب في مقتبل العمر (( تبطي الدباب أنت وحقين الجادة كلهم تجيبون زي ذي )) داخلن ومعه تمر وحليب

وهو يقول : عمت صباحا يا أيها الرجل


دحيم : هلا والله وغلا ياجعلك تسلم بس الحليب وشو لايصير أمريكي تراي مقاطع


الشاب : أبيت اللعن هذا اللبن من الصهباء ناقة شيخ القوم



دحيم : حسنا ولكن لا أجد عندكم دناو إنني اجمع حتى أشارك بمسابقة الألوف


الشاب : إن الصهباء لبنها أطلق من ألف دناو وهو يشفي العليل

دحيم : طيبون طيبون يا أنت زرارون بعد .... أين القوم أجل ؟؟

الشاب : لقد ذهب المنتصر بالله مع سيد القوم في رحلة صيد وبما انك متعب لم نرد إزعاجك ولكي تأخذ قسطا من الراحة


دحيم : طيب خلاص دامك تدري إني أبرتاح جاي ترزز وجهك عندي من صبح الله وش تبي لا أذن الظهر قومني ويالله رح امسك اطناب الخيمة لاتطيح (( عندنا بهالوقت زي قولة رح امسك الباب))


الشاب : دعك من النوم يا هذا لنذهب أنا وأنت كي ما أعرفك على قبيلتنا لقد انفتح لك قلبي مذ رأيتك نهار البارحة (( اجل نهار البارحة عشان تدرون إن الحشيش معروف من زمان وماشي سوق أبو شد ))


دحيم :رجك الله رجا لم يصر هذا قلب بل مجمع تجاري من حضر حفل الافتتاح


الشاب : هاهاهااهاهاها مسوي تذبوا انتا ووجهك الذي كنّه خيلون فيه العادتو الشهرية


دحيم : اقطع واخس ويالله مشينا

الشاب : أول شيء سنذهب إلى شارع الدوران

دحيم : ويحك يا هذا أو أنتم سلاتيحون زينا تفرون بالأسواق

الشاب : اووووووووووهون (( أوه بالفصحى)) ما شفتا شيئون بس لو يفكنا الله من الحسبة كان وناستون

دحيم :لا عليك لاعليك مشينا بس خلنا نكحل عيوننا بدال مانصبح بخشتكا


الشاب : هيا بنا ....



....................




اصصصصصصصصصصصفففففففف ( صوت دحيم وهو يصفّر) انظر انظر ذيك إنها تطرح الطير من السماء هواءون أروح قربتن فوق رأسها ياشيخون


الشاب : ويحك يا هذا من يجروا على النظر لابنة سيد القبيلة اقصر الشرو شف لك وحدتن من الجواري وعسى بعد


دحيّم : يا عمي طيرون قال شف جاريتون المهم وش اسمها ذيك البنت

الشاب : عاتكة


.....

دحيم اخذ يقترب وهو ينشد :


يالعيون اللتي تصيب ولاتسمي ..... منك احب الجرح لو انه صعبون أن يتبارى


بالعقل سمّي وبالخفاق سمّي ..... كلمتان كلها نحوكم تتبارى


أي نعم احبك والغلاء يسري في اوصالي .......


عاتكة : انظروا انظروا هذا الشاب انه قديم اخبروه إن اعترف لك أطلق منها بألف مرررررة ( لاتسالون وش دراها المخرج عاوز كده)


دحيم : عاتكة لقد يوم شفتك وأنا غادين كشنة


أما حان وقت الوصال ( ما عنده وقت دحيم مهوب منه والله من التبطح عند الزير سالم )


عاتكة : ألست كنك مطيحون الميانة ومن تكون يافتى ؟؟



دحيم : أنا القعقاع أبو



الشاب يهمس في أذن دحيم : ويحك لماذا غيرت اسمك


دحيم : اقطع واخس تكفى وش عرفك بحركات الغزل

قالت : يؤ (( هي قالتها والله العظيم وش دخلني أنا ))

انت رفيق الشاب الظريف المنتصر بالله ؟؟؟


دحيم : ابن الكلللللللل.... اثاريه من أمس يلعب بذيله

لا لست خويه بل هو مولى عندي

عاتكة : وااااااااااو أحلى ياكشختون


دحيّم : المهم أنا سأذهب وهذا رقم جوالي



عاتكة : اصصصصصص ضعه ضعه بالقربة وأنا كأني ماشفتهو وإذا وصلت للخيمة دقيت وسكرت وأنت دق علي





خرج دحيم والأرض لاتسعه كيف لا وهو قد رقّم سيدة القوم وابنة سيد القوم


قال له الشاب : لماذا لاتذهب معي الآن إلى مشوارون قريبن فقد حان وقت عرض برنامج : خليك في الخيمة

... وهو سيكون مقابلة مع لبنى تلك الفتاة التي أسرت الجميع


ويشاع أنها ستلبس تايوراً سيطلع ركبتها اللتي طالما شغلت الشعراء بسوق عكاظ واختلفوا هل هي سوادء أم بيضاء



وأيضا نأخذ لنا رأسا من خلطة أبو المغيرة (يقولون والعهدة على الراوي انه زي أبو هيثم )


بعد أن مخمخ الشباب ودحيّم وجاء المغرب

عاد دحيّم إلى خيمته


وهو يهوجس بعاتكة ويقول بلاااااااا رزان مغربي بلا هم ذي يالله لك الحمد جمال طبيعي مهوب أصباغ ومكياج



والله وأخيرا ابتسم لك الحظ وصرت محطم قلوب العذارى

ايييييييييييه يا لدنيا من أول أم ركيبات سود يغسلن شراعك بالفيصلية والحين بنت سيد القوم جت على وجهه

إيه هذي اللي عندها نظر



قطع حبل أفكاره ( غسيل ذا مهوب أفكار ) صوت الجوال يرن



ناظر الرقم وابتسم بكل ثقة وكعادة الشاب السعودي لازم يستعرض عضلاته عند البنت قفل الخط عشان هو يدق عليها


واخذ بكل سرعة يذهب للمكالمات - المكالمات المستلمة - ..... الرقم

ويدق وهو يتنحنح له نص ساعة وأخيرا قال : هلا والله فيه أحد داق علي ؟؟؟؟



المتصل : هلا بالله عطني أبو مساعد


دحيم : يا جعلك ما تسعد لادنيا ولا آخرة غلطان بالرقم طرااااااااااااااااخ


جلس بضعة ثواني وإلا يرن جواله ويأخذ بشكل سريع وكله غضب : يا أخي قلنا لك مهوب جوال أبو مساعد لجيتونا الله يلجكم لا يعرف الواحد يرتاح ولا .....


- أووووووووه سوري شكلي غلطانة ...... وتقفل الخط



دحيم جلس لمدة خمس دقايق مايدري وش السالفة أي : منلخم بقوة


وأخيرا تدارك الوضع واتصل واعتذر ويوم أن انتهى من الاعتذار قال بكل رقة : أحد مرسل رسالة <-=-=-=-= يالعنبو ذا الرسايل قضينا من أحد داق طحنا بأحد مرسل



هي : اوووه شكلي مرسلتها بالغلط سوري لو أزعجتك <-=-= ياحب البنات للكاعة بعد


هو : لا أصلا هذي أحلى رسالة بالعالم (( ارووووووووح وطي مع الأسلوب ))


والشاعر يقول : رب صدفة خير من ألف ميعاد .... ورب أخ لك لم تلده أم جيرانكم


هي : يااااااااااي صح لسانك



..... واستمرت المكالمة بين الطرفين ونشأ حب أطلق من حب قيس وليلى



لكن في يوم مشاوم جاء المارد المنتصر بالله وقال يالله مشينا


دحيم : ياعمي طيرررررررررر رح انت أنا بقعد عند عتوكتي


المنتصر : أقووووووول قدامي بس أنا ما اقدر ارجع إلا مرجعك معي



وهو واياه آخر شي شاله بالقوة ورجعه للاستراحة

وصار دحيم كل يوم يدق عليها لما جته هالفاتورة اللي تقص الظهر


......


آآآآآآآآآه <-=-=-=-= آهات خرجت من صدور دحيم وعليان وسعيدان وفهيد



وجو دراماتيكي حزين قطعه صوت فهيد الذي قال وعبراته تسابق عباراته










طيب وش تبي ؟؟؟؟؟؟؟؟؟؟؟؟

ياشيخ يسلم لنا الكي بورد الذي جاب لنا هذه الطرافات واونسنا حتى توقفت مذربورداتنا وهارد ديسكاتنا عن العمل مذهولة من هذه البايتات العملاقه المدببه بكتل من الأبداع الزاحف على قمم الخيال ..

اتصالات ..

شباب ..

شابات ..

فيصليه ..

اسواق ..

رقم مميز..

رسايل ..

الحقيقه المره انها طموح بعض الشباب و(الشبابات ) ..


تحياتي

[movel]والله انا آسف انقطع الاتصال قبل مارد[/movel]
هههههههههههههههههههههههههههههههههههههه
الله يعطيك الف عافيه على هالموضوع اقصد المغامرة0....
وليش العجب !!!!!! هذا حال الكثير من الشباب .. من الجنسين..
ومشكوووووووووووووووووووووووووور

مشكورين على الردود

الف شكر للاخ لووووول 999 على هالموضوع الراائع !!!



الله يهديك...على الاقل ذكرت المصدر بس

ما شاء الله عليك يالفتى الذهبي سبقتني ;) ;)

مشكور اسير

مشكورين على الردود