السلام عليكم ورحمة الله وبركاته
صباح ومساء الخير لكل الزعماء والزعيمات
موضوعي مباشر وصريح ومافيه عناوين مفبركة للفت الأنظار
يوم الجمعة 15/5/2009 قبل يومين من الان
وقت مباراة النهائي بين الاتحاد والشباب كنت أتجول في أحد المجمعات مع صديقي لشراء بعض الأغراض
فجأة وأنا ماشي شفت واحد طالع من الدرج على يساري طالعت فيه ومشيت لكنه لفت انتباهي فوقفت فجأة
ورجعت أطالع فيه وجالس احاول اركز في وجهه المألوف وهو يبادلني بإبتسامة أكدت لي بأن هذا الوجه مألوف جدا
لكني كملت طريقي إلين ما قدرت استوعب بأنه نواف العابد
شوي الا هو يمر من قدامي مرة ثانية فوقفته بكلمة السلام عليكم ومديت يدي له ورد السلام
فقلت له: ياخي وجهك مو غريب!!
فأبتسم وقال لي: نواف العابد.
أنا طبعا ما عرفت ايش اقول فأكتفيت بــ: هلا نواف تشرفنا هع هع لسه ماني مستوعب
المهم خويي كان يكلم جوال وأنا انقز فوق راسه يبوي شفت مين هذا؟ هذا نواف العابد وخويي الله بالخير
المهم انا قلت والله ماني مضيعه لازم اشوفه واتصور معاه لأني قبل 2 او 3 اسابيع شفت عبدالرحمن القحطاني نجم الاتفاق ولا سلمت عليه أو تصورت معاه وكان لابس كاب ونظارة Ray ban مسوي نفسه متخفي
فقلت ما يروح مني وبالفعل جلست ادور له إلين ما لقيته
فشفته ماشي من بعيد وهو انتبهلي ولف وطالع فيني
فأشرت له بيدي تعال وأنا كنت رايح له وما قصر والله نواف جاني
بكل تواضع رغم أن المسافة كانت بعيدة
فقلت له: معليش بس أبغى صورة للذكرى فقال لي عادي
وخويي جالس يصورني قلت له هذا بتشوفه بعدين نجم السعودية الأول
فكان رد نواف العابد بكل تواضع: إن شاء الله
سألته: بالله محد عرفك؟ قال بإبتسامته المعروفة: عادي أو مشي حالك
قلت له: ما عليك لسه بدري كمان قدام شوية وبتطفش منهم
المهم تصورنا واللي عليه بالخير وهو ماشي قلت له ها نواف متى نشوفك في الفريق الأول
فقال لي بالحرف الواحد السنة الجاية إن شاء الله)
سألته: يعني هم قالوا لك كذا؟
رد: ايه
وانتهى الحوار
هذا هو الخبر الحصري لموقع الزعيم من المصدر نفسه نواف العابد بأنه سيدعم هجوم الهلال من الموسم القادم
وعشان أأكد لكم بأني صادق وأن هذا الحوار ليس من نسج الخيال حرصت على وضع الصورة في المنتدى
وهذا أنا مشخبط على وجهي تعرفون ما ابغى الشهرة
كان يمديني اقص الصورة بس كذا بتكون أكثر قابلية للتصديق
والله على ما أقول شهيد والله يا شباب اني صادق بكل كلمة قلتها وأعذروني على طول الموضوع لكني حاولت انقل لكم الموقف كما صار مع بعض الاختصارات عشان يكون موضوي واضح وصادق
إضافات ( نواف العابد كان معاه أحد اصداقائه وواضح بأنهم كانوا يتسوقون لكثرة الأكياس معاهم, , وفي نفس اليوم تواجد الدوسري رئيس نادي الاتفاق في المجمع مع عائلته , وملاحظة أخيرة نواف ما شاف مباراة النهائي
)
شباب لو سمحتوا اللي ما عجبه الموضوع لا يجرح في الكلام , إما أنه يكتفي برد محترم أو يمتنع عن المشاركة
ولو تعرفون قد ايش ترددت اني انزل الموضوع عشان أكتفي شر الانتقادات بتعذروني
لكني في الأخير قلت لازم ينزل هالخبر عشان يفرح جماهير الزعيم شوية وتعرف بأن مستقبل الهجوم في الهلال بخير بوجود ياسر والمحياني ونيفيز والعابد وغيرهم
تقبلوا تحياتي
روقــــــــــــــــــــــــــــان
لقائي مع نــــــواف الـــعـــابـــد !! وخبر حصري على موقع الزعيم .... وصورة للمصدر 
الوضع العادي
