بسم الله الرحمن الرحيم
وبه نستعين ،،،،،،،،
اسعد الله صباحكم يا زعماء كل صباح ،،،
الحقيقة انا مبطي عن كتابة المواضيع موب ثقل والله لكن بصراحة وبدون مجاملة اذا شفت بعض هالكتاب الي عندنا ولا ما نع من ذكر الاسماء مثل (( الصخرة )) الي مبطي ما شفناه ومثل (( مرور الكرام )) ومثل (( تابط سرا )) وغيرهم من المبدعين صراحة استحي اكتب واحس اني قلمي قزم قدام اقلامهم فهم مكسب للمنتدى ولن اطيل ،،،
بصراحة هارد لك لجميع الزعماء الخروج من كاس الملك انا ما اقول ما نقدر كل شي بيد الله لكن ما نبي نحمل اللاعبين فوق طاقتهم والا الثلاثة اهداف ميب شي اذا كان الزعيم في يومه ،،،

*** فرفش مع البلطان ***
في برنامج الجولة طلع علينا الرئيس الشبابي المحنك (( من جنبها )) وبداء بالدفاع عن لاعبينه المصارعين المحترفين وقام يقول امامنا مهمه وطنية وخلوا الكلام عن الايقاف بعدين الى ان اخطاء بحق جميع الزعما ء بعد الاساءة لرئيسهم عبد الرحمن وقال: (( انه قاعد يعمل مناحة وبكائية )) وهو و الله كذب فليس ابن مساعد من ((( يبكي وينوح ))) يا ابن بلطان .
وبعد كل ذيك الاتهامات جاب الرئيس المحنك العيد وقال كلمة (( الميدان يا حميدان )) يوم الاثنين ،،، هنا نبي نوقف ونفرفش مع البلطان اسمعو ايها االزعماء ،،،
يوم قال البلطان كلمته كنت مسوي براد الشاهي المنعنع وقاعد امخمخ عليه من سمعت كلمته وتحديه للهلال عادت بي الذاكرة 20 سنة للوراء .
وكنت وقتها بالابتدائي كان عندنا بالحارة (( ورع )) يجي يسير على عيال عمه يجي من حي ثاني يقعد عندهم كم يوم كنا نلعب معهم كورة ونرقعهم كان معنا محترف سوداني المهم كنا بعد ما نفوز كلن يهايط على الثاني ونجلدهم دايم ،،، الورع هذا كنت ما احبه واصطره اول ما يجي واذا جلدته اول يوم يركد باقي الايام ولا يناظرني بعينه حتى بالصلاة اذا كنت على يساره مثلا يسلم على اليمين وينحاش و العكس لاكن هذا (( الورع )) اذا جاء اخر يوم وقربت مشيتهم شاف نفسه وقام يرجم ويستهبل ويتحداني لانه واقف مع ابوه وابو جيرانا وانا ما اقدر اسوي له شي وعلى ذا الحالة اول يوم ينجلد واذا جا يمشي قام يهايط لين يطس هو وابوه الين كبرنا وتفرقنا وتوته توته ،،، خلصت الحتوته .
هنا انا وانا اشوف البلطان قاعد يتحدى الهلال ويقول الميدان يا حميدان لانه فايز بثلاثة وكاسر خشم لاعبنا رادوي والقناص غفر الله له مطرود والفريق يعاني الامرين ولن يكون هناك لقاء بين الفريقين الى الموسم الجاي يعني يمدي السالفة تبرد . قلت اييييييييييه يحق لك يالبلطان تتحدى اصلا هذي فرصتك انت وغيرك من الاقزام الذين يتطاولون على الاسياد ،،، لكن هيهات يالبلطان و الوعد قدام والايام بيننا دول ،،
حنا ما تعرضناك لكن جابك الله وان حطك الهلال براسه والله ان تضيع مثل الي ضاعوا وضار حتى فريق ابها يرقعهم ،،، لكن انتبه لنفسك .

عموما بالتوفيق للزعيم في كل مجال وعذرا للاطالة ‘‘‘‘‘


*** على الهامش ***
- اذا طاح الجمل كثرت سكاكينة .
- لا يضر السحاب ..................... .
- ياسر الاعتراف بالخطاء اول علامات الرجوع .
- مهاجم ناري بجانب ياسر يحل الكثير من القضايا والمشاكل .
- رادوي اضنك بتمشي لانهم ماتوا الي يلعبون بخطة دفاعية وبثلاثة محاور .
- يا فهد المفرج التفت على الزوري وناولها للهوساوي ويحبك الجمهور (( واللبيب يفهم )) .
- يا فهد المفرج رجع الكورة للدعيع بالكعب مرتين بيموتون فيك وتشوف كل التواقيع في المنتدى باسمك (( واللبيب يفهم )) .
- يا ماجد المرشدي اصحاب الكرة الذهبية في العالم وليس افضل لاعب بالخليج يدفون مقاعد الاحتياط في كبار الاندية وانت مصاب وتبي تلعب غصب . (( غريبة )) .
- يا ابن مساعد تبي ترتاح باذن الي ما تنام عينه بس اصبر .
- وليهامسون (( اقسم بالله انك لاعب كبير )) لكن الدنيا دوارة .
- اتحاد المصارعة (( SMACK DOWN )) يرحب بانظمام المولد والشمراني وبلال ضمن المصارعين المحترفين ، تهانينا لهم .
شكرا للجميع ،,،,،,،,
هلالي بالعقل ،,،,،,،,