يوميــــات قسيـــس ][ تيماوياتي ][ - صفحة رقم 2 - نادي الهلال السعودي - شبكة الزعيم

عشقي تيماوي · #1 04/05/2009, 09:55 AM

عشقي تيماوي اليكم من جديد

مدخل

نسيتي اخر زباله نسيتي حبنا فيها ... نسيتي علبة التونه ضربتني واكلتيها

مقدمه

اول شئ وعشان ماطيح من عيونكم ترى اللي كات القصيده قطو يغازل له قطوه ودوري هنا لايتعدى دور المتذوق للشعر

كنت فاضي امس الصبح ومارست دور القسيس حق الكنيسه يعني صاروا حقين الماسنجر يجون ويعترفون لي بذنوبهم وانا ادعوا ان الله يبارك لهم ويمحوا خطايهم

المهم احد حقين الاعترافات كان ضايق صدره ياحبيله

وانا كنت فاضي وودي اسولف وقمت اخربط عليه الين ضاق صدره زياده وحرم انه يجي مره ثانيه يعترف لي

>> قسيس فاشل

قوه نطمر ونشوف وش عندي من خنبقه وهل تلومونه يوم حرم يجي يعترف بخطاياهـ مره ثانيه او لا

>> يسمع بالتشويق

قبلـــه بالوقت الغير مناسب

هذي اختي شوق الصغيره فيها قراده تتوزع على الشعب السعودي طبعا عشان فوقها اربع عيال الى درجه ان النعال المفضله عندها زبيريات

عمرها اربع سنين اللي يخليها لنا

اليوم حطتن بموقف محرج صراحه موقف محرج للغايه واكتشفت اني وسخ للاسف

طلعت اخر الليل اجيب عشاء ويوم جيت وشافت العشاء جت لمي بتحبن وقربت حطت وجهه قدام وجهي بالزبط وانا اترقب الموقف وتقرب زيادهـ

قلت لها حبين من هنا وعطيتها خدي وتجي وتقول لا وتلف وجهي انا استحيت حتى من امي

قلت لها لاعيب حبين من هنا واعطيها خدي مره ثانيه

وتجي وتقرب باذني وتتكلم بصوت عالي انتم خابرين البزارين يقولك سر وكلن يسمعه عن قولة انه سر

وتقول لي خشممممممك خشممممممممك وانا اقول ايييييييييييييييييييييه من اول قولي كذا

اثرها بتحبني مع خشمي طلعوا اخواني معلمينها حبة الخشم وانا على بالي انها انحرفت

حيل الله أقـــوى

مره وانا راجع من الكليه قطعت الاشارهـ ومير تمسكن الدوريات بالصدفه بعد لااشاره على طول وقالي وش عندك قاطع الاشاره قلت والله عندي حاله طارئه بالمستشفى

قال اجل راجعنا بالمرور بعد ماتخلص قلت يكون خير ان شاء الله وانا اطمر لم البيت والقى امي صاحيه قلت له اسمعي مابك شئ يوجعك ماودك تروحين للمستشفى تشيكيين تسويين فحص ترى الامراض الحين واجد يالله تعافينا بس

طبعا انا قلت لها كذا عشان يعطوني المستشفى ورقة مراجعه ومادخل الحجز

قالت الا بطني من الصبح بس ماهب واجد ودامك ملزم قوه ماهب ضارنا شئ شين بلاش ربحه بين

ويوم رحنا للمستشفى الا امي طولت عند الدكتوره وانا اروح وأسال وينها قالت جوا قلت وش فيها طولت ترى حنا جايبينها نكذب على المرور لاتصير صدقت ومرضت

قالت لا مدام حامل

وانا اللي ادق على ابوي واقوله وش مسوي انت يابن الذين وانا اقول ماهيب عاده صلاة الفجر اسبوع تصلي بالبيت

وادخل على امي اقول اجل بطنك هاهـ اجل ماعاد انتي جايبه عيال هاهـ كم تدفعين وماعلم خالتي منيرهـ

>> تخبرون الحريم مايبون احد يدري انها حامل قالت وشو قلت له مبرووووك يامدام انتي حامل واخمها ونتبادل التهاني والتبريكات

وضحكنا انا وامي ضحك قالت والله انه من غير تخطيط

..>> عاد اختي اللي هي شوق المقرودهـ الى الحين وانا اقولها ترى انتي جيتي بعد مخالفه مروريه

اللهم لاشماته

كان عندنا احد دكاترة علم النفس بالكليه وهو معقد جدا جدا الى درجه واحد من العيال يقول انا غاسل يدي منهم من يومنهم يشربون الشاهي بملاعق

هذا الدكتور دخل القاعه وكانت بايام حر وقلناله يادكتور بالله شغل لنا المكيف ترى الحر ذبحنا

قام ورسم لنا مكيف على السبوره وكمل شرح وقال هاه حسيتوا بالبرد قلنا اي برد الله يرحم والديك انهبلت انت

قال لا انا الحين بردان جدا انتم بس حاولوا تركزون احاسيسكم على المكيف وبتبردون صدقوني هذا علم

المهم والعيال يكملون ضحك واول ماسكتوا قلت له يادكتور بالله نزله شوي طيب ترى مايجينا هواء

احتيــال

جانا مدرس جديد بالكليه تخبرون المدرسين الجدد تقدر تهك عليهم على طول

ماهب مثل القديمين اللي لو تقوله السلام عليكم مايرد عليك السلام الا بخطاب موقع من وكيل شؤون الطلاب تجنبا للشبهات

مريته انا وخويي واول ماركب قال انا ابشتري جوال قلنا يالله مشينا ومير نسبقه انا وخويي ونلقى راعي المحل سعودي قلنا له اسمع الحين بيجيك مصري الجوال اللي بيشريه زود عليه 100 ريال وثمن بنكاسرك وانت خفض القيمه وقل عشان هالاثنين ذولا ابرخص لك

دخل المصري وقال بكم الجوال دا قاله راعي المحل بـ 900 المهم وحنا نكاسر ونكاسر ويخليه بـ 800 والمصري جاء وخمني وخم خويي تقل انهم مبشرينه بولد

بعد حركة الخصم هذي المصري صار ماعاد يشوف الا حنا حتى انه مره من المرات جايب لنا فاتورة الكهرباء يبينا نسوي له خصم

يوم عاشوراء ورمي الجمرات

عاد اذكر بيوم عاشوراء كان علينا اختبار وانا مدخل مذكره وقاعد اغش وهو يقول ياشباب اللي صايم مايصلح يغش صح او لا , قالو ايه صح وانا ابتل اغش

ويجي لمي قال ياعبدالرحمن اللي صايم مايغش قلت له انا ماصمت ياستاد

ومره بيوم رمي الجمرات >> ترى ادري انه مافيه علاقه بين الموقفين ولكن لو تفكرون تلقون كلهم يجون مره بالسنه

كنا نرمي بالجمرات وانا معي حصاهـ ورافع يدي الا واحد من العيال تقل ضاع ويتلفت يدورنا وانا اقوله باسمه ( سلطاااااان ) وبنفس الوقت رميت الجمرات وكان فيه بعثه حجاج هنود وكلهم يرمون الحصاهـ ويقولون سلطاااااان

>> يحسبونها سنه او شئ مستحب وش دراهم المساكيين

رقاصه في بيتنا

كنت مشغل الاغاني وجالس على الكمبيوتر ودخلت علي اختي شوق ماغيرها راعية المخالفه المروريه

وقالت لي " تشتري لي حلاوه من البقاله وارقصلك "

انا الصراحه تفاجأت وتنبأت لها بمستقبل مظلم واللي هذا اوله ينعاف تاليه اجل بترقص عشان حلاوهـ

واخذها مع علباتها لم امي واقول اشتري لها حجاب شرعي و مسواك وكتاب حصن المسلم والا ترى انا اخلي مسؤليتي التامه ان شفتيها بكرى بنادي ليلي

***

كل ماقرأتوه اعلاه كانت قصص من الواقع القاها عليكم فضيلة القسيس عشقي تيماوي

واذا اعجبتكم زين على زين وان ماعجبتكم ترى ماهيب واقفه بس ان شاء الله انكم اكبر من الحركات وبتعجبكم

لا اقصد يعني ان ماعجبتكم فترى موب شرط تكون القصه صدقيه يمكن اني انصب عليكم طيب

مخرج

ياعيوووون الكـون غضي بالنظر .. اتركينا اثنين عين تحكي لعيـــن

تيه نيه لكم