بعقلانيه و بلا فلسفه.... اسباب التدهور الهلالي ورساله لعبدالرحمن بن مساعد - نادي الهلال السعودي - شبكة الزعيم

طبيب فاهم · #1 01/05/2009, 11:00 PM

سلام للكل

بلافلسفه وببساطه اسباب التدهور الهلالي :

1- المدرب الفيلسوف وصاحب الاختراعات العجيبه اهم الاسباب :

* اللي يشوت يمين يلعبه يسار والعكس بالعكس ولايجي احد يقول
لكي يضعف مراكز القوى للخصم او غيره شفناه يتفلسف في كل المباريات اللي راحت لدرجه ان ويلي تضايق من اختراعات المدرب بعد الهدف الثالث وصار
يروح للجه اليمنى جمب سول

* المدرب منظر اكثر من انه عملي ولايملك انجازات او طموحات وحده التنظير بتأليف كتب او التحليل للمباريات اما
على ارض الواقع فتغيراته تبين انه من جمبها والمنظريين يختلفون عن اللي يملكون القدره على العمل والابداع وقت الجد
... اجل مهزوم بالثلاثه وتغيرهيكون محور بمحور ( الغنام بدال عزيز !!! )

شغل المدربين يبان عندما يواجه مدرب مدرب اخر تكتيكي وعلى مستوى عالي ويعرف يغير في خططه وسير المباره
فهنا يبان مستوى المدرب وللاسف ان مدربنا اخفق وبجداره.
فاافضل المدربين التكتيكيين حاليا في الدوري السعودي هم مدرب الشباب والنصر وهذا يوضح في مسار المباريات وللاسف ان مدربنا خسر وبجداره مقابلهم صحيح ان مهاره لاعبي النصر خذلت مدربهم ولكن مو كل مره تسلم الجره وهذا اللي صار في مباره الشباب
انشالله بس يجينا مدرب مرسيليا

2- ضعف شخصيه الاداره ومثاليتها في وسط للاسف ماينفع معه الاسلوب هذا

للاسف نحن في وسط ماينفع فيه الا رفع الصوت لكي تاخذ حقك وزود اما المثاليه
ماتنفع .............. الكل تكالب علينا وشافنا جدار قصير

* الاتحاد السعودي وعمايله معروفه

* لجنه الحكام مصختها بااختيار حكام اجانب ماعمرهم حكموا مباريات دوليه او
غير معروفيين او اصحاب مستويات الله بالخير .

* لجنه الانضباط تشوف المخالفات وتسكت لكن لو انها من الهلاليين كان القرارات
تصدر على طول .

* لاعبي الخصوم يتفننون بالتكسير واقرب الامثله اليوم ضربه الكوع على رداوي ورفسه زيد المولد على ويلي .

صاحب السمو الملكي عبدالرحمن بن مساعد تكفى واللي يرحم والديك ارفع الصوت واترك المثاليه ارفع صوتك واشتك ولايهمك احد وربي بس كلمه منك تنفض عالم مو واحد وتذكر يوم اشتكيت اغلاق البوابات ماامدى التصريح يطلع الا سلطان يطلع امر لفتحها للرؤساء ويوم يتبلانا وليد الفراج في قناته رد الامير نواف بن ساعد وفي ثواني غير وليد رايه 180 درجه واخر شي يوم تكلمت قبل ايام عن تنظيم استاد الملك فهد بعد المباره عدلووه اليوم.

صاحب السمو اسلوب رفع الصوت للاسف ناجح في وقتنا الحالي ولذلك نجد مطالب
النصراويين دايم تنفذ والسبب صوتهم العالي .

صاحب السمو ارفع صوتك بالحق مو مثل غيرك
وصدقني صرنا جدار قصير الكل يتطاول علينا والكل يظلمنا
ارفع الصوت ياطويل العمر بس نبي حقوقنا اذا احد غلط علينا
ومايهم من اللي يغلط علينا رد ولايهمونك والشعب الهلالي كله معك.

صاحب السمو انت لاتقل عن اي احد من مسؤولين اللي ماسكين رياضتنا
بل انت اعلى منهم في نظرنا
انت صاحب سمو ملكي وهم مثلك ...
اذا غلط سلطان بن فهد او نواف بن فيصل علينا فلا تسكت وتجامل
على حسابك وعلى حساب ناديك بل ارفع الصوت بل الحق وجادل
اجل ليه يطردون مدربنا ......... عشان الوليد بن طلال يقول انه غلط ؟

اذا تكلمت ياابو فيصل الكل يسمعك عشان مركزك وثقافتك وفلوسك وغيرها
واهمها لقبك صاحب سمو ملكي وللاسف انا عارف انه ماودك بالشي هذا لكن
هذا اللي صار الايام هذي .

صاحب السمو مانبيك مثل غيرك من باقي الامراء اللي يطلعون في التلفزيون ويغلطون على الناس ( سلطان بن فهد ... وكلامه عطني فلان
او فيصل بن تركي واهانته لااكثر من شخص وغيره من البلطان الى يقول يخسون ..!! والقافله كبيره وللاسف كلها ضدنا نحن الهلاليين)
نبيك ترفع صوتك وماتسكت اذا غلطوا على هلالنا............

وفي الاخير اللي يتفلسف ويقول اللاعبين هم السبب او غيره
فااقوله الاعبين اللي جابوا لكم البطولات هم نفسهم اللي يلعبون
ماتغير شي هم نفسهم اللي فرحوكم في السنوات اللي راحوا
لكن اللي تغير المدرب اللي يتفلسف ويغير المراكز وتغييرات من جمبها وخطه الله بالخير

واادعوا معي ان يجينا مدرب مرسيليا ويكون عقده على حساب سلطان بن فهد ( قويه صح )
تعويض عن اللي صار , يطرد كوزمين !! واحننا ندفع الشرط الجزائي والله مهزله ...........

طبيب فاهم · #2 02/05/2009, 05:05 PM

ماشالله الموضوع وصل للصفحه الخامسه مع ان نشره ماله الا ساعات بسيطه !!

شكل المنتدى بحاجه لقسم اخر للهلاليين وواحد مو مكفيهم

R.o.y · #3 02/05/2009, 05:15 PM

ماضيعتنا الا المثاليه الزايده

الطيااار · #4 02/05/2009, 05:18 PM

والله ماضيعنا الا التايب لاعب شايف نفسه

اجل فريقه مهزوم ويقعد يدخل كباريات والله هزلت

ALHLAL-20-15-14-9 · #5 02/05/2009, 05:22 PM

خبر حصري تم اقلاة لكنز
خبر حصري تم اقلاة لكنز
خبر حصري تم اقلاة لكنز

خالـ الشوق ـد · #6 02/05/2009, 05:23 PM

سامي الهلال بدونك مافيه رووووووووووووح الله الله على ايامك

طيار هلالي · #7 02/05/2009, 05:28 PM

عجزان أعيد كتابة رأيي مره ثانيه لكن حبيت انسخه لكم هنا

أسباب تدهور الهلال بالفترة الأخيرة هو إدارته وجهازه الفني الجبان والمدعي قوة الشخصية ولاعبينه المدافعين ما عدا هوساوي

اثنين منهم هم السبب تحديدا

المفرج ونامي

المفرج مارح أعلق عليه وأعذروني

لكن نامي هو فعلا نامي
وفعلا هالاعب له من اسم ابوه نصيب كبير جدا

هالاعب يمكن ياخذ جائزة افضل لاعب بالعالم لكن مع ذلك سيظل لاعب مرتبك

المفروض نسميه مرتبك نامي مو محمد نامي

المفروض لاتعليق استبشرنا خير بوجود المرشدي وهوساوي وكان التفاهم ممتاز وكان الدفاع مره قوي لكن رجع لنا الكريم فهد المفرج وياقلب لاتحزن

فترة رئاسة الامير عبدالرحمن بن مساعد للهلال لا تقل شأننا عن فترة رئاسة أخيه

كلهم بأول موسم جابوا بطولة كأس ولي العهد ويطلع الفريق من باقي المسابقات مقهور

والله يستر لا يكون الموسم الجاي موسم الخمسات وإن شاء الله لاتكون مباراه الاياب هي الخمسه

الله يذكرك بالخير يامحمد بن فيصل على الاقل كنت تعطي ملايينك على لاعبيين سعوديين مو على لاعبين اجانب والله ما يسوون نص قيمتهم وربي

باللهي هالمدرب لو ماقدموله هالعرض المغري بيجينا ...؟

عروض تكفى تعال ماتنفع يابوفيصل ..!

قدم عرضك واذا بغاك المدرب يجيك واذا ما بغاك دور لك مدربين الشنطه الي بالخليج يجي وهو فاهم الهلال ومارح يكلفك شي

مارح اتكلم زياده لأن ماني فاضي اوجع راسي بهالأدارة الي ماتعرف تتعامل مع الاعبين وخايفه تطالب بحقوقها

قال ايش قال اتمنى من المسئولين حماية لاعبينا << هذا الي الله قدرك عليه ..؟

النصراويين كل شي فيهم سيء حتى لسانهم لكن بسبب لسانهم الطويل مايضيع اي حق من حقوقهم

ممكن يعطونا لسانهم لو يوم واحد نرجع فيه هيبة الهلال ...؟

شبح15 · #8 02/05/2009, 05:29 PM

ياخي الكريم الهلال فيه لاعبين المفروض تنسيق اذا غاب لاعب مافيه بديل مثله

الهلال حاليا يعتمد على بعض العناصر والحلول اللي معهم الهلال يحتااااااج غربله

المفرج والعنبر والصويلح والذياب ونامي ماعندهم شي يقدمونه هاذي امكانياتهم والهلال فريق بطل نبي الاحتياط نفس الاساسي

والرديف بمستوى الاول صدقني راح تتغلب على كل شي يوقف في وجهك بلاضغوط بلاهم هات لعيبه صح ولاتخاف

alhilal in my heart · #9 02/05/2009, 05:34 PM

وعليكم السلام ورحمة الله وبركااته

هلا بك اخووي

ابدى بكلامك عن ميثالية عبدالرحمن بن مساعد فهذه ليست مثاليه كما يردد البعض وانما مايأمرنا به ديننا الحنيف

وهذه خير رساله لتوضيح تعاليم ديننا السمحه وان تطاول البعض فإنه سيؤجر

اما من ناحية المدرب فهو يعتمد على اللعب الحر وتبادل المراكز وهذا يحتاج الى لياقه كبيره

ولا يعتمد على تثبيت محور والمهاجمه بمحور اخر بل يعتمد على اندفاع خط الوسط على ملعب الخصم والضغط على حامل الكره

وبالتالي الفريق استنزف الليااقه اولا ومن ثم تبديل عزيز بالغناام بما يخدم خططه لأن عزيز ضعيف الامكانت هجوميا قوي الامكانات دفاعيا

لذلك هناك مدرب يساعد اللاعب على ظهوره بمستوى عالي ومدرب يهضم حق اللاعب

في كل امر خيره واسأل الله ان يكتب لنا الخيره في كل اموورنا

ولك كل الشكر

GLADIATOR__mx · #10 02/05/2009, 05:56 PM

وأنا أقول وبعقلانية وبلا فلسفة فريقك سيئ سيئ سيئ وإنسى الآسيوية إذا هذا مستواه وهؤلاء لاعبينه وعلى رأسهم المغرور ياسر الخاسر

اسيرالريانه · #11 02/05/2009, 05:58 PM

الوقت مو وقت محاسبه الحين الهلال محتاج ان نضع ايدينا مع بعض ونصبر على الفريق باقي شوط ثاني وباقي الاسيويه فقط وقفه رجل واحد

20 الكاسر ياسر 20 · #12 02/05/2009, 06:08 PM

يجب ان تتحرك الاداره وتقيل اللاعبين اللي " مالهم داعي " واعتقد معروفين تماماً

هلالي وضغطي عالي · #13 02/05/2009, 06:53 PM

إقتباس

الرسالة الأصلية كتبت بواسطة R.o.y


	ماضيعتنا الا المثاليه الزايده

ما ضيعنا الا الاتحاد السعودي باسباب كثيرة:
1- إقالة كوزمين.
2-ضغط المباريات.التي تواكب بطولة اسيا.
3- لجنة الانظباط وطقتها.

لو اعد الاسباب من اليوم لما بكرة ما بتنتهي

ما اقول الا حسبي الله على سلطان بن فهد

أســطورة الأســاطير9 · #14 02/05/2009, 07:17 PM

المجاملات سبب تدهور الهلال

ويلي+سيول

والله حرام هالاشكال يلعبون بالهلال