في غرفتي مراهقة :( - نادي الهلال السعودي - شبكة الزعيم

DR.KHALID · #1 18/04/2009, 08:05 PM

السلام عليكم ..

اخباركم ؟

الحين الواحد م يقدر ياخذ راحته حتى في بيته ؟
سبحان الله

..

اليوم راد من الدوام .. وقافلة الاخلاق .. وم اشوف الـ1 من الـ 2

..

الموهيم خشيت البيت قبل المغرب ..

قلت بنام لي شوي الين الصلاة ..

رحت للغرفة حقت المذاكرة وطقيت المكيف وسدحتها نومة ..

طبعا تعرفون الواحد اذا كان تعبان ينام وهو نازل قبل يوصل المخدة

عاد محاتسيكم سدحها نومة قبل يشغل المكيف

الموهيم م علينا
بعد م اخذت لي دقيقة او دقيقتين
طبعا مستحيل انام على طول .. لازم اقعد افكر في المشاريع حقتي

.. نفس المشاريع افكر فيها كل يوم قبل النوم .. ادري انها موب صاير منها شيء عالحقيقة بس عاد الاحلام ببلاش

..

الموهيم وانا قاعد افكر

شوي .. الا احس شيء يحتك فيني

..

قلت لا هين موسوس انت

.. شكله من الكرف اليوم صرت تتوهم اشياء

رجعت وحطيت راسي 2 مرة ..

شوي الا بدا هالشيء يقل ادبه ويحتك من جد

...
أنا هنا قلت .. بسم الله .. لا يكون هالشيء صدق ..
قلت خلني اشغل النور ..

عاد من العجز م قدرت اقوم

.. فقلت خلني أتأكد بيدي .. لو كان فيه شيء اكيد اني بلقاه ..

يوم مديت يدي .. الا قسم بالله انه شيء صدقي

. احسبه شعر راس

طبعا بعدها م انتبهت الا وانا فاتح الباب ومشغل نور الغرفة وم حسييت بعمري الا وانا في الحوش < ابد م خاف

يوم رجعت الغرفة .. سميت سبطعشر مرة وقعدت اقراء اية الكرسي ابي اشوف بيختفي هالشيء ول لا

..
عاد قلت شكلها مكينة امي حاطتها في الغرفة عندي .. والزئبق الي فيها جاب هالجني

وش تتوقعون طلع هالشيء ..

قطوة ماجد مقبل المفقودة

الظاهر انها هي

عاد شلون وصلت الغرفة .. ل تسألوني اسالوها

..

الموهيم تورطت فيها .. شكلها كيوت وموب حقت الشوارع الي انواع الزحف والدشرة .. حتى اني فتشتها زين زين .. ول لقيت معها دخان ول اي شيء يخل بالشرف

خفت ارجعها الشارع يصير لها شيء ول يجيها قطو من قطاوة الشارع م يخاف الله يهتك عرضها

.. ويصير هالشيء بسببي واتحمل ذنبها المسيكينة.

.

الموهيم قعدت اناظر فيها ربع ساعة وطار النوم بعد الخوف الي قبل شوي .. << بعذرك م قد شفت شيء كذا

اخر شيء قررت اتركها هي وضميرها ..
رحت فتحت الباب حق الشارع قلت خلني اشوف وش بتسوي ..

يوم شافت الباب مفتوح .. ديورت وردت الغرفة ونامت عالسرير

..

لاقيتها الي م تستحي على وجهها .. سرير ومكيف

وقتها حسيت اني ودي اخمها من قوة الاخلاص

..

فخليتها محلها ورحت ..

الموهيم يا ماجد اذا هي قطوتك اعترف

...

العلامات الفارقة :
1- التي شيرت حقها متشقق من فوق < قال شدراك انها كذبه قال من كبرها

2- مركبة سن ذهب
3- ما تتكلم الا شيرازي << يسمع بالفقش

4- يوم جيت اسبحها .. عيت الين جبت لها شامبو كلير

5- ايه نسيت شيء .. هالقطوة نباتية م تحب تاكل اللحم

الموهيم ي الربع ..

الي فيه شدة يتبناها يقول لي

.. ول افتحوا عليها مزاد لأعلى سعر
لاني صراحة موب رايق لها مع هالاختبارات ..
والله لو تقعد معي يومين .. بعد اسبوع بتلقونها طاقة نظارات طبية ومعاها كتاب جراحة

شوفوا صورة المحروسة

..
بسم الله عليها تهبل

صحيح انها كيوتة

.. وتهبل

بس موب على كيفها تتعدى على حرمات الاخرين وتخش الغرفة فجأتن

فوتكون بعافيي

Blue Sun · #2 18/04/2009, 08:10 PM

الحين نمت معها ولا قلنا لك شئ ..
لكن تفضحها وتنشر صورها هذي ماينسكت عليها ..
اتمنى من المشرفين اغلاق الموضوع وحذف معرف العضو ,,
ـــــــــــــــــــــــــــــــــــ
^
^
بعد قراءة نص الموضوع ..

بعد قراءة الموضوع كامل ..
هلا وغلا دكتور خالد ..

وينك ما تنشاف .. لاتكون عايش قصة حب مع هالمراهقة ..

وعلى طاري المراهقة :
اولا :كيف تقول انها مو حقة شوارع وهي نايمة معك على السرير .. !!
ثانيا : ما اتوقع انا قطوة ماجد لان هذي واضح عليها العز والدلال ..

ثالثا :حتى لو انها قطوة ابو مقبل ما اتوقع رح يعترف فيها بعد ما انتشرت صورها ..

رابعا : اذا ما تبيها عطني رقمها وانا بتصرف ..

خامسا : اذا تبي واحد يتبناها طلع اشاعة ان احد اسنانها يحتوى على الزئبق الاحمر وسعرها رح يصك 100 الف وانت واقف ..

يعطيك الف عافية على الموضوع الرائع ..

‏Mr.RęLǻҗ · #3 18/04/2009, 08:20 PM

.

.

خالد بكم سيمت .. راحت بـ150 ريال

,,

بس شف انت دكتور لو طلع فيها بلا باشتكيك بوزارة الصحه

,

بانتظار ماجد مقبل بكم يسومها

وتوصل لكم لاني رجال شاري دخلت قلبي من اول نظره

؛

خالد .. دوك ,

شوق الكويت · #4 18/04/2009, 08:26 PM

بسم الله الرحمن الرحيم

اشلون ادخلت البيت ؟؟؟؟

يمممممممممممممممممممه والله والله لو انا صراخي يوصل اخر المنطقه ماشاءلله عليك تمسح عليها وتصورها والله بالك وسيع

يارب يارب مااالقى مثلها بغرفتي

مشكوور دكتور خالد

عاشقة الزعيم15 · #5 18/04/2009, 08:31 PM

يمممممممه وقسم لو تصير لي لأقلب الدونيااا

اصلا قبل اقلب الدنيا بفقد حياااتي

وربي شكلهاا يخوووووف باينه بسه بنت ناس

بس دشرت في الشارع شووي وجاتك

لا وعلى سررريرك الي ماتستحي .. والله بسس اخر زمن عشنا وشفنااا

ماجد اعترف اذا هي لك

مابيدفعك غرامه دخولها يبغى اعتراف فقط

بنت فهد · #6 18/04/2009, 08:49 PM

يمممممممممممااااااااااااااااااااااااااااااااااي يووه كيف خليتها معاااك

والله أخاف منها

أخواتي مزعجين أبوي يبوون قطوه عاد أنا قلت لهم ان شريتوها ودخلت في البيت
ماراح تشوفون كشرت وجهي

يانا ياهي في البيت

والله خواتي بدو يدعون لي متى تتزوجين ونرتااح منك يالنشبه

بس والله جد شي يخوف انا لما القاها بالشارع أغمض عيني عاد كيف
لو انا بنام وهي جمبي بستخف

إقتباس

الرسالة الأصلية كتبت بواسطة DR.KHALID

الوجه مو غريب علي كأني قد شفتها

حركاااات تبي تعلمنا انك بشرتك بيضا ومطلع يدك <<برا

ع العموم مشكوور ع الموضوع

تقبل مروري بنت فهد

عريب عبدالله · #7 18/04/2009, 09:25 PM

إن ما خانتني الذاكرة فقطوة ماجد بهالشكل

أو بهالشكل

المهم أنها لاتمت بشكل قطوتك بصلة

بس يادكتور خالد مالك حق تفضحها بين القطاوة وتنشر صورتها

عيب عليك ما يكفي باعت عمرها عشانك وضحت بالغالي والنفيس عشان تدخل غرفتك

ثقافة الفضايح عندكم يالسعوديين ببلاش

والله يهني سعيد بسعيده أقصد خالد بقطوة العمر

هذي الهدية تقاسموها

بالحب والإشراق

هلالية بحتَهـ · #8 18/04/2009, 09:36 PM

ههههههههههههههههههـ ~
لآ لآ لآ فيهًـآ قبـآآآيـل هذيْ ..
فيهـآ قًصصص رقًـآب !
آجَل خلوة شرعيـة <~ فآهمـة غلط هع

جد تووووووووحفـة وقصصم
آخ لو كنت فيهـ
ببلشـك بآلهئيـة هع ^^"
<~ نذلـة !
حمًـآسْ وآللهـ .. فيهـ آكششن !
لو آنهآ عندنـآ .. آخوآني بيلعبُوآ فيهـآ كورهـ هًع !
لآ وآحلى شًي جآي فرحآن فيهآ

نـآشر صورهـآإ ..
يـلآإ خليهآ عبرة لـ غيرهآ من البسس !
جد عآإد قلـة حيًـآ ..
لو آنك بتحآكمهآ عليهآ كًم قضية /
1- آقتحآم البيت !
2- التسلل آلى الغرفًـة .!
3- النوم عً السرير بدون وجهـ حق ~

لـكن آعرفك متنـًـآزل لـ وجه اللهـ تعآلى

وآنك مآتبغى تفضحهآ وتجرجرهآ بالمحآكم !
آللهـ يقوويـك عند ربنـآ مآيضيـع خخخخخ

يسلمـووو خيوو
جد طرح حلووو وضحكني مرررة
خخخ !
لآعدمنآك يارب

nawaly · #9 18/04/2009, 10:59 PM

هههه خلاص مصخت الحيا وبسريرك بعد

الله يفضحك شلون تجلسها عندك والله لو نا بمكانك
كان شعري قلب شيب والله لو بس ابلغ عنك اقول هو وياها مختلين
تعال عاد رقعها وبغرفتك بعد ياسلام يمسكونك الهيئة ههههه

هذي شكلها متعودة تقزقز من بيت لبيت لو اجيها القاها متشرشحة ههه .

(((أخلاق سامي))) · #10 18/04/2009, 11:36 PM

المشكلة اني ما احب ولا حيوان الا انت

..

اخوي .. اذا ما تبيها بعها في اقرب محل ولا ترميها في الشارع..

بس بصراحه عليها عيون

.. والله تروع .

لك خالص تحياتي

الهلالي دائماً · #11 19/04/2009, 12:10 AM

ـههههههههههههههههههههههههههههههههههههههههههههههههـ

الله يهديك دكتور خالد

فتحت جروح توها ألتئمت

أه يا قطوتي

الصدق قطوتك احلى واشيك وشكلها بنت ناس

اما قطوتي واضح انها حق شوارع

تقريبا شكلها مثل اللي في رد رائدة

اماقطوتك انا اسومها بـ 160

طبعاً تقسيط على 6شهور

ولو رسى علي السوم بهديها لـ‏Mr.RęLǻҗ

الصدق مافيني حيل ادخل قصة حب مع قطوة جديدة

شكرا ابو خلود على الموضوع الجميل والخفيف وبصراحة العنوان .....

دمت بخير ,,,

سعودي أصيل · #12 19/04/2009, 12:34 AM

الحين أنا بعرف ..

معقوووولة فيه بسوس عندنا مثل هالحلا ؟؟!

وناوي ترميها في الشارع أنت ووجهك

تتركها للغادي والرايح من البسوس .. مالك حق ..

ياشيخ راحت بمكافأة الشهر الجاي ..

840 ريال ..... ريال ينطح أخوه ..

لكن تعال ..

ماتحس إن العين اليمنى لونها رمادي .. واليسرى أخضر

لا يكون الزئبق اللي يطرونه

تأكد لي من هالشيء وراح أحط جنب الثمانية 4 أصفار ..

تحياتي