السلام عليكم
انا اسمي الدحمي يعني عبد الرحمن وبعضهم يناديني دحيم والدرح
وعايش في أحد مناطق نجد
وعيارتي العكلي – لاني مروبع ومدلقم
{
العكلي ذكر الحمامة }
المهم ....
ابقولكم عن عيد الضحية عندنا منول وش كنا نسوي فيه ...
عائلتنا مكونه من 3 عيال وبنتين وامي وابوي.
أكبر واحد أنا همن سليم يعني سليمان او السلمي
وبعدين صويلح يعني صالح او الصلحي
وهمن خواتي لطيفة.. ومزنه توها بزر..
ابوي اسمه حمد ابو دحيم
وامي مانيب قايل لكم وش اسمها
بس هي ام دحيم ..
ابوي حمد ابو دحيم شاري ذبيحتنا من اول العشر
من واحد بدوي صديقه .
.
وامي وخالاتي وحريم عماني من دخول العشر وهن مشغولات بخياط
ثيابناوثياب عيالهن البفت{
اسم لثياب الرجال
} وطواقينا الجنينه{
اسم لنوع من الطواقي }
وغير انهن متولمات للعيد كلهن ماشطات روسهن ومخضبات يدينهن بالحنا
وحتى اختي مزنه الصغيرة ماشطين راسها ومخضبينها .
ومزهبين ثيابهن الجديده عمايل التريك {
اسم من اسماء
فساتين الحريم منول }
وماننسى بعد الخروف نحني راسه ..
طبعا حنا يوم عرفة لازم كلنا نصوم .
كل اللي بالبيت حتى الغنم والدجاج والحمام
حتى اختي مزنه البزقه ..
وإذا افطرنا يوم عرفة رحنا صلينا المغرب انا وابوي
واخواني سليم وصويلح همن نكسنا للبيت ..
قعدنا نتقهوى ونسولف الى صلاة العشاء ...
بعد صلاة العشاء
يجون عماني لبيتنا ونجتمع ومعروف عندنا بكل ليلة العيد
شيء اسمه الجداع اللي هي القطة .
يتقاطون عماني وابوي همن يشترون اما عناناس{
يسمون الاناناس كذا } ومربى...... هذي حلوياتنا منول ..
أو نشتري ديك ونذبحة وناكله مع الموره .
الموره
اسم الرز منول
طبعا الرز كان مايوجد منول الا نادرا ..
بس حنا نذوقه بالعيد بس .....الله يخلف ..
والا أكلنا بالعاده اما قرصان والا جريش والا مرقوق ...يالله لك الحمد .
ونبدأ دبج بهالجداع الين نخلص عليه ..
ابوي وعماني يسولفون ويضحكون مع الشاهي والقهوة..
وانا واخوتي نلعب مع عيال عمي ...حبشة والا غميمة والا عظيم لاح .
طبعا مانسهر كل الليل على هالحال لازم نروح ننام يمكن قبل الفجر بست ساعات .
عاد كلن يروح لبيته ينام علشان يستعد للعيد باتسر ..
وحنا نطفي سراجنا التنك وننام على هالمطارح .
وإذا جاء من بكرا قمنا لصلاة الفجر .
والى امي مجهزة الشاهي والقهوة
والتميرات تطلعهن من الجصة {
الجصة مكان
على شكل صندوق يبنى من الجص يحفظ فيه التمر }.
رحنا وصلينا ورجعنا تقهوينا
وابوي بهالوقت مجهز السكاكين والساطور ويقعد يسنهن.
همن نلبس ثياب العيد ونروح لصلاة العيد ..
بعد الصلاة نقعد نعايد اللي بطريقنا وجيراننا ..
ونروح انا واخواني نجيب الضحية من الحوش
بس قبل نحتري عماني يجون ونجتمع كلنا لانه اصلا هالضحية
لأبوي وعماني داجين مايقدرون يضحون بس لازم نحتريهم ..
وأكثر الأعياد مانضحي يصير ابوي اما طفران والا مديون والا حاج ...
بس هالمرة حظنا نبي نضحي ..
وإذا جو عماني رحنا نجيب الضحية من الحوش انا واخواني وعيال عمي
وتلقانا عشرة مجتمعين علي الضحية
اللي ماسك قرونها
واللي يسحبها مع اذانها
واللي يدفها من ورا
واللي ساحب ايدها
واللي يسوي نفسه يساعدنا بس هو خايف من الخروف يعضه ..
همن نجيبها لأبوي .
.ونجيب للضحية طاسة ماء تشرب قبل الذبح .
بعد مايذبحها ابوي بمساعدة عماني يبدون يصلخون فيها ويعلقونها
وحنا نتفرج .. وونعاونهم بعد .
والحريم يصيرون جاهزين شابين النار من الجلة اللي عندهم {
الجلة عبارة عن بقايا
فضلات الغنم والبقر والبعارين الله يعزكم
تعجن مع قشاش الارض من عودان يابسة وتستخدم كحطب }
وحاطين القدور على المنصبة
المنصبة {
عبارة عن ثلاث احجار
توضع تحت القدر للطبخ }
وحالبين الغنم والبقر .
وابوي وعماني يصيرون بهالوقت خالصين من الضحية ..
الكبد مع قطيعات من اللحم أول شيء نعطيها الحريم علشان يسونها حميسه.
نمزمز عليها قبل الهبر .
والمصران والريه والمعلوق {
اللي هو القلب } تحط لحال مع الكرشة اللي تنظف وتمحض قبل .
والراس والكراعين تحسحس بالنار .
حتى الجلد مايجدع نستفيد منه ..
يعني بالعربي نحلل ام الضحية مانخلي فيها شيء الا استفدنا منها .
نرجع لباقي الذبيحة ..
لازم نعطي الجيران طعمه يعني نطعمهم من الضحية
بالعادة نعطيهم قزقوز {
القزقوز هو يد او رجل الذبيحة }
وبعد مانطعم الجيران من الذبيحة ...
يبدأ ابوي بتشريح اللحم الى شرائح ويحطها في وسط خيشة ويذر عليها الملح
وتلف بهالخيشة ويرص فوقها حصيان كبيرة وتترك لبكرا .
وإذا جاء بكرا يصير نشف اللحم من الماء اللي فيه همن بعدها نجيب حبل
ونربطه بالحوش.
وننشر شرائح اللحم بالشمس...هذي ثلاجتنا منول .
وهذا اللي يسمى القفر {
طريقة لحفظ اللحم منول }.
وعاد نبتل ناكل من هالقفر كل يوم حتى يخلص وبالعادة يخلص عقب اسبوع مايبطي .
بعد ماناكل الحميسة نلبس ثياب العيد الجديدة والطواقي مرة ثانية .
و نروح نعايد الاقارب.واللي مبطي ماشفناهم ... غالبا ناكل عند احد الاقارب
اللحم مع الجريش قبل الظهر .
والبزارين يدورون بالحارة يجمعون العيديه وهم يدورون يغنون :
{
قرقع قرقيعي عطونا الله يعطيكم بيت مكة يوديكم
نسوق الحمار والا نوقفه } بعضهم يقول وقفوه ويعطونهم .
والقعيطيه يقولون سوقوه ..عاد اللي يقولهم سوقوه ياويله
يبدون هالبزران يسبون فيه .
وفيه اغاني بعد مثل :{
ابي عيدي عادت عليكم
عسى الفقر مايجيكم ولا يكسر رجليكم }
هذا اللي أذكره عن عيدنا منول ..
وبعد ماتنتهي ايام العيد ترجع حياتنا مثل أول ..بدون لحم
حياتنا منول كلها كسافة و فقر .. بس أحسن من الحين ..
كم من واحد مايحس بالعيد ..تدرون ليه ؟؟؟
لانه مايحس ببساطة منول ..
.كل العيد تلقاه بالبيت متحرول
هالحين السواق هو اللي يشتري الذبيحة..
. والشغالة هي اللي تسوي الحميسة
والعيال والبنات نايمين .
.المغرب تلقاهم صاحين
.
والواحد منهم هرش.
.. من الاكل والتسدح في الفرش.
والابو شيب مايقدر يذبح المسكين .
.. جايب له قصاب أجنبي بخمسين .
ما اقول الا الله يخلف.
. على عيال الوقت عيال الترف ..
وهذي قصتي منول..:sad: :sad: . مع عيد الضحية .اللي تحول..
تحياتي ..
أخوكم /الدحمي أو العكلي ..
=====================================
ملاحظة :
كل ماورد في هذه القصة يعبر عن رأي الدحمي
وماورد من أسماء وشخصيات هي من نسج الخيال ..
أما ماورد من أحداث فهو بعض من واقع أبائنا وأجدادنا .
وعليكم مقارنة عيدكم الحالي بعيد الدحمي الماضي .
تحياتي
أخوكم / جمجمة الهلال
الدحمي وعيد الضحية منول ؟؟ 
يعني عندهم خير ..
)
الوضع العادي
