عديت مرقاب تقانب ذيابه * مافوقة إلا الغيم تلفح به النود

ما كل من هازته نفسه رقابه * دربه عسير وكله سنود بسنود

لكني أنا عديت عالي هضابه * من ضيقتة بالصدر ماجاني قعود

أخيل برق مايطمن سحابه * هتان تسمع له مع العاصفه رعود

ولازال مجروح الفؤاد يهذابه * والآدمي مخلوق مشقي ومسعود

عـزاه يـاقلب زمـان رمابه * تـقل يتفجر داخله مـلح بارود

لا واعذاب القلب لا وعذابه * على زمان راح ماظنه يعود

كل ماذكرته هيض القلب مابه * هموم على هموم رست مالها حدود

من لا يجمل موقفه في شبابه * لاشاب لاترجى منه عقبها فود

رجل على الطولات طالت شنانه * حطه على يمناك لاصرت محدود

من خلقته درب الردى مامشابه * يدرى على نفسه خطر كل منقود

فيصل عليه الدمع زاد انسكابه * مرحوم ياحر وقف وقفه الطود

يالله عسى الجنه جزاه وثوابه * جنه نعيم وجعله بظل وبرود

بعض العرب لا مات مايندرابه * يموت ولكنه من الناس مفقود

يزعل عليه الاجنبي والقرابه * وتلبس عليه البيض من حقها السود

يابنت شومي عن خطاه الزلابه * ان كثر ماله وان نقص مابه سعود

عليك بالطيب عريب النسابه * لاخيروك اختاري النقص بالزود

رجل تقدره الرجال وتهابه * كساب وهاب وله باع ممدود

هذاك قال ونعم من طق بابه * وله ماقف عند المواجيب مشهود

وترى الرجال جمال يوم المجابه * وعن الجمل لا يمكن ينوب مفرود

والهرج عن كثره يجمل صوابه * خذ الصحيح وراعي الكذب مردود

واختم بذكر الذي من لجابه * ماخاب وغيره مالنا رب معبود

وصلو على الهادي النبي والصحابه * نبي نصره الله على كل حاسود