ديربي العاصمة بين خيتافي وريال مدريد... يعود اليكم من جديد
حيـــــــــــاكم
حسبي الله على بليسك يافهد الروقي 
من يوم قال هالكلمة في برنامج ( مع الحدث ) وانا اضحك حتى تاريخه 
ديربي الهلال والنصر مايختلف عن ديربي مدريد بين الريال وخيتافي 
قال له البكر :
منهو الريال ومنهو خيتافي ؟؟ 
قال :
الريال هو اللي ينافس على البطولات المحلية والقارية كل موسم 
وخيتافي هو اللي ينافس على الهبوط للدرجة الثانية لايجيني احد الحين ويقول احترم الخصم 
كل كلامنا هذا مزح ومن باب ( الحرب النفسية ) 
اكيد احترام الخصم واجب... وهالمباراة راح تاخذ حقها من الاهتمام 
وقدر هالديربي انه جاء بوقت غير مناسب لحبايبنا النصراويين 
لأن الزعيم يبي يصالح جماهيره الغاضبة والحزينة على ضياع الدوري
وصدقني يانصر انها راح تجي فوق راسك وعلى طاري الدوري
اشوف التباكي والغضب زاد عن حدّه
ياجماعة تراها بطولة محليّه فيه اللي اهم منها... بطولة اسيا 
الدوري اخذناه مليون مره وتشبعنا منه وآخرتها الموسم الماضي
لكن اسيا ياجماعة الخير.... لي سبع سنين وانا احلم بها فرق انك تقول بطل الدوري المحلي... او بطل اسيا وصراحة فيكم شي غريب يابعض الجماهير
بعد مباراة طاشقند طلعنا وانتقدنا الاداء السيئ للاعبين
وكانوا بالفعل يقدمون اسوأ مستوى من اكبرهم الى اصغرهم
ولقينا بالمقابل هجمة شرسة من الجميع لاتنتقدون ... لا تهدمون ... جمهور فوز وعلى طرف نقيض
في مباراة الاتحاد... الفريق سوّى اللي عليه وماقصّروا كلهم
بعشر لاعبين وقدام الاتحاد المتصدّر
وياسر يلعب وهو مصاب ومع ذلك قدّم مباراة طيبة وتسبب بالبلنتي رغم الرقابة
والدعيع تحمل عبء كبير في ظل انكشاف الدفاع بسبب ظروف المباراة
الصراحة شفنا جهد وشفنا محاولات وشفنا اداء طيب يشكرون عليه
ورغم كل هذا
الاغلبية من الجماهير طلعوا يسفّلون باللاعبين مع اني مقتنع قناعة تامة انه لولا تهور خالد عزيز كان شفتوا نتيجة ثانية
مانقول الا الله يسامحك ياعزيز... ومكتوبه لاخواننا الاتحاديين
العام الماضي اخذناها من بين جماهيرهم ووسط ملعبهم
وهالموسم اخذوها هم
والموسم الجاي نردها لهم بإذن الله... وهذا هو التنافس الشريف
وعلى فكره
ترى اللي طيّر الدوري علينا مو عزيز لحاله مباراة الوطني ( الهابط ) اللي ماقدرنا نفوز فيها على ارضنا وبين جماهيرنا في خاطري شي
اللي يحدث في المنتدى بعد المباريات شي مخجل بكل اسف
طبعا حنا كلنا بالملعب وماندري عن التفاهات اللي تصير بلا رقيب
ومانلوم المشرفين وادارة الموقع بكل صراحة... لأنهم مايقدرون يسيطرون على كل شاردة وواردة
لكن للاسف انا هنا احاكي عقول الناس اللي تفهم من الاعضاء
ارجع من الملعب والقى الاهل مصدومين من الكلام البذيء اللي شافوه بالمنتدى اثناء وبعد المباراة
( خنـ......) و ( جر.......) وغيرها من الفواحش اللي تحسسك انك داخل حوش بهايم
معقوله فيه ناس الى الآن بهالتربية وبهالعقليات ؟؟
ماتقدر تفرّق بين الكلمة اللي تقولها بالشارع او في منتدى يدخله الملايين ؟؟
ياجماعة خافوا ربكم.. "وهل يكب الناس في النار على وجوههم إلا حصائد ألسنتهم" أخرجه الترمذي
الوضع المتطور
