السلام عليكم ورحمة الله وبركاته...

سبق وان تحدثت عن مشاكل المصيبيح والمسعد وقبل النهائي الذي خسرناه شر خسارة.. شوهت تاريخ الزعيم امام فريق رديف باربعة عشر لاعبا فقط
يطرد منهم اثنان ؟؟؟؟؟

مشاكل المصيبيح والمسعد ليس لها اول من اخر ..

وسبق ان تحدثت عن الاثنين في موضوعين منفصلين قبل السوبر

عبر الرابط في الاسفل..

@@المؤامرة التي ستحيل الهلال الي اطلال@@

وفيه تحدثت عن مشاكل المصيبيح..مع اكثر من لاعب..في الفترة الاخيرة فقط ..

الثنيان..التمياط..الجمعان.. وبشكل موجز عن الشريدة وخليل وابوثنين

@@@@@

ثم تطرقت الي مشاكل المسعد وعرضت تناقضاته الشهيرة وفي نفس التصريح
بالاضافة الي تحدثه باسلوب غير لائق وغير مؤدب لايمثل عضو ادارة في نادي عريق مثل الزعيم...

@@ فواز المسعد ..واكتمال المؤامرة وسياسة الكيل بميكالين@@

=====

الان وبكل صراحة صاحب السمو الملكي الامير هذلول بن عبدالعزيز ..
رئيس مجلس اعضاء الشرف.. (( ابو الهلاليين ))

يصرح ويشخص مشكلة الفريق في شخصين لا ثالث لهما كما قال...

@ فهد المصيبيح...&&&...فواز المسعد @


اترككم مع حديث ابو الهلاليين وغيرته وحرصه الشديد على كشف (( علل )) الفريق...


http://www.yousif15.com/dr/pic/hthlool/f1.jpg

إقتباس اشخاص لا يستحقون الثقة

هاهو ابو الهلاليين قالها وبصريح العبارة انهم لايستحقون الثقة

اكمل بقية التصريح حتى تعرف منهم

انظر ماذا فعلوا ؟؟؟؟؟؟؟؟؟؟ في هذا المقطع


http://www.yousif15.com/dr/pic/hthlool/f2.jpg

إقتباس هروب خميس العويران

إقتباس ابتعاد خالد التيماوي

إقتباس وفيصل ابوثنين

إقتباس لابعاد الشريدة

إقتباس واحمد خليل

إقتباس وعبدالله الجمعان

خمس نجوم دوليون ومن اكفأ لاعبي المملكة ... يخسرهم الزعيم

لاجل سواد عيون فهد وسياساته ...

اكمل بقية التصريح...وانظر ماذا يقول عنهما الامير هذلول


http://www.yousif15.com/dr/pic/hthlool/f3.jpg

إقتباس فواز المسعد امين عام النادي

إقتباس فهد المصيبيح مدير الكرة

إقتباس وهما السبب في ابتعاد الكثير من اعضاء شرف النادي الاوفياء اعتراضا على سياستهما وتصفيتهما لنجوم الفريق

تحدثنا كثيرا وتحدث غيري الكثير...
طالبنا بابعادهم .. طالبنا بتغيير سياستهم
والتي لم ولن تكن ابدا في مصلحة الزعيم الاسيوي..

هاهو الامير هذلول يعلنها صراحة

@ فهد المصيبيح.و.فواز المسعد @

وللاسف وصل الحال الي ماهو اسؤا
فليس وجودهما اصبح غير مرغوب فيه فقط ...
وانما الابتعاد عن الجو المحيط بهم اصبح مطلب ..
والبعد عن سمومهم اصبح ضرورة..

انظروا اضافة الي تطفيش اللاعبين والي تطفيش اعضاء الشرف
الامير هذلول يعلن ابتعاده عن النادي حتى يتم التخلص من هذين العابثين بالزعيم وابناؤه


http://www.yousif15.com/dr/pic/hthlool/f4.jpg

كل يوم نرى عزيزا علينا ومن ابناء الزعيم يفقده الزعيم
من اجل هذين الشخصين..

الي متى .. الزعيم في خطر.. الزعيم سيهوي الي القاع
من ينقذ الزعيم ..ومن يعيد له بطولاته..

ماذا نريد من رئيس السفر وسعة الصدر عنده اهم من الهلال
ماذا ننتظر من ادارة عابثة...
ماذا ننتظر من هواة المجد الشخصي ..
ماذا ننتظر من هواة الفلاشات..
ماذا ننتظر من المصيبيح وهو يطفش النجوم..هل تطفيش النجوم سيجلب البطولات ؟؟؟؟؟؟؟؟؟ انظروا اخر بطولة ماذا فعلنا فيها
ماذا ننتظر من فواز المسعد وهو يناقض نفسه بنفسه ويتفوه بتصريح غير لائق يمس لاعب ورمز هلالي خدم الهلال اكثر منه بمليون مرة ؟؟؟

لم يصدق الكثير حقيقة هذا المصيبيح والسبب التظلليل الاعلامي والانترنتي لراي الجمهور...

اتمنى ان لايخرج علينا احد ويقول ان الامير هذلول يظلل الجمهور الهلالي
وانه حاقد على المصيبيح والمسعد

كما اتهمت به سابقا

لماذا لم يتحرك المصيبيح ويحتوي مشكلة الجمعان او حتى يناقشه او يطلب منه الانتظار لولو لمصلحة الهلال (( ام يكون عيبا ان يفعل هذا ))
ام تعامل بسياسة (( الحمدلله الي جت منه ))
ام اقتنع ان (( سياسة الدلال))لتي مارسها معه قبل النهائي هي السبب..

لماذا لم يتحرك المسعد ...... ام لازال يمسك جواله ويصرح هنا وهناك
وصورته ((ترز)) في كل الصحف...


للاسف يامصيبيح كثرت المشاكل والعامل المشترك انت...

اللاعبين (( ابوثنين..العويران..التيماوي.. الثنيان..احمد خليل.. عبدالله شريدة.. عبدالله الجمان..))((السبب المصيبيح والمسعد))

اعضاء الشرف ..(( مابقى الا كم واحد من مئات الاعضاء )) وخروج رئيس مجلس اعضاء الشرف ادعى لخروج البقية ((والسبب المصيبيح والمسعد))

الجمهور (( انقسم وزادت حدة الخلافات والسبب المصيبيح والمسعد))

الي متى....

الي متى نرضى بوجود التفاحتين الفاسدتين (( هل لتجهز السوسة على الزعيم )) ان (( ليسوس بقية اعضاء الادارة ))


شكرا فهد المصيبيح ... شكرا فواز المسعد...

حاولتم خدمة الزعيم ولم تستطيعوا ..اتركوا المجال لمن يستحقه من ابناء الزعيم المخلصين والغيورين على الزعيم بعيدا عن (( دفتر العلامات)) والمدرس الدكتاتوري

لقد تشعبت الامور ..وزادت المشاكل.. واصبح الزعيم مثل الجسد المريض
واصبح الورم الخبيث اكثر شدة وقسوة.. ولم تنفع معه جميع الحلول

ولم يتبقى الا الحل الامثل والاكمل في هذا الوقت

وقبل بداية الموسم القادم واستمرار مسلسل الضياع

وكما قيل في الامثال (( اخر العلاج الكي))

فنقول الان.....

لابد من استئصال هذا الورم الخبيث من جسد الزعيم

اطالب بابعاد هذين الافتين وفورا من الزعيم.. حتى تعود لنا البطولات ويعود لنا ابناء الزعيم المخلصين.. ويكتمل عقد الافراح

نتمنى ان تعود لنا الفرحة كما كانت

=======

يمكنكم العودة الي نص الحوار في جريدة الرياضي وفيه تكلم عن
اسباب ابتعاد الوليد بن طلال اكبر داعم للرياضة السعودية عن الهلال
وعن مطالبته باجتماع لوضع رئيس بدل الامير سعود..والكثير عن مشاكل البيت الهلالي... والتي لم يسعفني الوقت على طرحها

تحياتي لجميع ابناء الهلال والمخلصين له دوما

لماذا لم يتحرك المصيبيح ويحتوي مشكلة الجمعان او حتى يناقشه او يطلب منه الانتظار لولو لمصلحة الهلال (( ام يكون عيبا ان يفعل هذا ))


انا اجاوبك :

لان الجمعان مبيت النيه وشف موضوع سفره مع البلوي لدبي اليوم

وصدقني ان السوسه العويران والحرامي البلوي بيخربون الهلال

يا ناس لا تغالطون الحقائق وتجعلون المخلصين كبش فداء

يجب تغيير ادارة الهلال كاااااااااااامله .. ابتداءا بالرئيس ونائبه ووو ... الخ

اخوي ياقاهرهم ياهلال..

الجمعان مابيت النية والا ماتدرب.. والبلوي استغل ظروفه

اما كلامك عن المخلصين انظر لتصريح الامير هذلول واقراه كامل..شكلك مستعجل

رئيس مجلس اعضاء الشرف وابوالهلاليين يطالب بابعاده
ماظن دفاع التظليل بينفع الحين


====
اخوي عز الهلال ... صدقت لابد من تغييرها كاملة


وشكرا لكم

والله اني اضحك عليكم يالهلالين الحين ماضيع التيماوي وأبو اثنين الى المصيبيح والله ماادري وش جاكم يالهلالين صارة عقولكم مدري وشهي
الحين أعضاء الشرف هم الي يبعدون الأعبين ويلصقونها في المصيبيح وانتم على الريحه تصدقون أي تصريح ..

والله ماضيعنا الى هذلول .....

سوق المقاصيص :

مصلحة الهلال وتصحيح الاخطاء اهم من تظليل الاراء
واعضاء الشرف اللي تقول عليهم لو هم اللي ابعدوا اللاعبين
ليه ماابعدوا المصيبيح معهم ...

هلا بعاشق الثنيان ,,,

خير ان شاء الله وش الجديد ؟؟ الامير هذلول يصرح بأنه مبتعد عن النادي وانه ما يبي المصيبيح , وهذا الامر (( مكرر )) ليست مره ولا اثنتان ولا اربع ولن يتوقف ابدا !!

للاسف الشديد ان الامير هذلول اطال الله في عمره وابقاه , اعلن ابتعاده عن النادي ونفذ هذا الاعلان من فتره طويله وليس له علاقه بأي شيء ابدا , ولهذا فلا ارى ان هناك داعي لأن يؤخذ رأي من ابتعد وترك الهلال وشأنه معلنا هذا الكلام امام كل الناس !!

كلامه عن المصيبيح فعلا مضحك جدا وما عليك سوى الانتظار للغد او بعده لترى تصريحا اخر مغاير لما قرأت اليوم ( تعودنا على تصاريح الليل ) ,,,

إقتباس مشاكل المصيبيح والمسعد ليس لها اول من اخر ..

اوووووف ياساتر , لها اول ولا لها اخر !!؟؟ طيب وش هي مشاكله ؟؟

إقتباس وفيه تحدثت عن مشاكل المصيبيح..مع اكثر من لاعب..في الفترة الاخيرة فقط .. الثنيان..التمياط..الجمعان.. وبشكل موجز عن الشريدة وخليل وابوثنين

الثنيان : ياخي قل غير هالكلام !! قلت ان فيه محاربه وانهم مايبون الثنيان يشارك وكلام كثير نفاه مدرب الفريق وتابعنا المحاربه على الواقع واكتشفنا انها ( خياليه ) لا اكثر , وإلا علشان الثنيان خلاص المطلوب منه الان يودع تبون تجددون سيرة الحرب المشؤمه

التمياط : عسى ماقال شيء هو بعد ؟؟ وإلا الدعوى خيال بس ؟؟ وترانا نعرف مشكلة التمياط ومتأكدين انها ماهي من المصيبيح ولا المسعد , مشكلة التمياط يبي حقوقه من رئيس النادي وإلا اعضاء الشرف ( اللي مو منهم الامير هذلول ) يعني ترى حرام تركبون المصيبيح مصايب غيره , وظلم انكم تتجنون على المصيبيح !!!

الجمعان : وش فيه ؟؟ رجال يبي يلعب اساسي والمدرب يقول لا تلعب احتياط , قام الجمعان وقضب الباب وهو زعلان , وش تبي المصيبيح يسوي ؟؟ تبيه يسكر عليه الباب ويقول والله ما تطلع !!؟؟ ليه وين حنا فيه ياعاشق الجمعان ولوحده يتحمل نتائج اخطاءه فلا تحملو المصيبيح ماليس له به علاقه !!

الشريده واحمد خليل : انا ابي اعرف وش سوى لهم ؟؟ ومن وين جبت ان المصيبيح هو سبب ابعادهم ( ياليت يكون برهانك مؤكد ) مانبي خيال

ابوثنين : انتهينا من سيرته الله يسمح دربه ويسهل اموره ( الرجال مايبي احتراف ) يقول عاداتنا وتقاليدنا ما تسمح

إقتباس هروب خميس العويران

ياخي والله عيب وحرام التجني !! خميس له مطالب ( ماديه ) وعده الرئيس بتنفيذها واليوم الثاني وقع للاتحاد ( وش دخل المصيبيح ) ؟؟ يعني اذا فيه اصرار على لوم احد لازم يتوجه اللوم للرئيس ( ليش المصيبيح بالذات ؟؟ ) ما تشوف ان هذا ظلم وان الساكت عن الحق شيطان اخرس ؟؟

إقتباس ابتعاد خالد التيماوي

التيماوي ياحبي له , بصراحه راح ضحية الاصابات , وراح ضحية انه ماله مكان بوجود هالنجوم , واخذها من قاصرها وودع بطوعه واختياره ( هذا كلامه بلسانه ) ,,

إقتباس وهما السبب في ابتعاد الكثير من اعضاء شرف النادي الاوفياء اعتراضا على سياستهما وتصفيتهما لنجوم الفريق

ههههههههههه اما هالفقره ياعاشق الثنيان , فعلا غريبه وعجيبه جدا !!!! وش ضنك في المسعد والمصيبيح ؟؟ رامبو ورفيقه !! يعني بالله عليك هل معقول ان هالاثنين بيقدرون على اعضاء شرف الهلال وبيطردونهم او يتسببون في ابتعادهم اوابعادهم ؟؟ يعني ماتخش المخ ابد هذي !! لأننا نعرف اعضاء شرف الهلال ومن يكونون ومن يكون المصيبيح وخويه يعني خلو عنكم الخيال واخذو من كلام ( ابو الهلاليين ) المعقول بس .

إقتباس انظروا اضافة الي تطفيش اللاعبين والي تطفيش اعضاء الشرف الامير هذلول يعلن ابتعاده عن النادي حتى يتم التخلص من هذين العابثين بالزعيم وابناؤه

ههههههه ياساتر !! اجل ( اعلن ) ابو الهلاليين الابتعاد عن النادي الين يتم التخلص من المصيبيح والمسعد ؟؟ طيب وين راح تصريحه السابق اللي اعلن فيه ابتعاده عن الهلال ككل واعتزاله للمجال الرياضي ورئاسة اعضاء شرف الهلال ؟؟ وإلا الدعوى تذكير وخبر صيفي ( الله يهدي الجميع )

تحياتي ,,,

موضوع جرئ ياعاشق الثنيان...


والله يعينكم على المصيبيح والمسعد...صراحة شوهوا سمعة الزعيم..



ومشكوووور على هالموضوع..الذي اتمناة ان يقراة المصيبيح والمسعد..

هلا بالعوام،،،،;)

الكلام هذا قاله رئيس مجلس اعضاء شرف الهلال

اما بالنسبة لكلامك...

إقتباس هل معقول ان هالاثنين بيقدرون على اعضاء شرف الهلال وبيطردونهم او يتسببون في ابتعادهم اوابعادهم ؟؟

اعضاء الشرف هم اللي قالوا هالكلام ماحد جاء من الشارع وقاله ؟؟؟؟

ولو ترجع لنص الحوار في جريدة الرياضي ...

تجد فيه مطالبة باستقالة سعود بن تركي

وتجد فيه اسباب ابتعاد الوليد بن طلال اكبر داعمين الرياضة السعودية

...

واعتقد ان ماحد يتدخل بعمل رئيس الهلال ... حتى يشيلون المصيبيح والمسعد...

(( ولاتحط بذمتك ;) تصريح في الصبح في الليل حنا اكبر من هالامور ))

تحياتي لك

يجب القصاص من ويجب ويجب
كل هذا من تحت راس المصيبيح كونو عاقلين شوي المصيبيح معروف منهو ولده وتاريخه واخلاصة للنادي ولايمكن ان يكون بهذه الاوصاف واذا كان ((( هذلول بن عبدالعزيز ال سعود ))) شوفو الاسم قبل الحديث ولد عبدالعزيز لم يقدر على فك طلاسم المصيبيح وانه هو العامل المشترك في كل الامور فماذا عساكم فاعلين
وسؤال موجه لـ هذلول اين انت من النادي ياكبير الهلاليين ام ان المصيبيح قام بحركة وابعدك عن بيتك الثاني
ولكن الذي يزيدهم ضغط وغلايان هو ان الاستاذ فهد المصيبيح لايعير لهذه الاحاديث اي بال حتى لايفقد صوابه ويترك ناديه ويتفرغ للردود فأهل الخراب واجد لكيان الهلال

هلا بعاشق الثنيان ,,,

إقتباس الكلام هذا قاله رئيس مجلس اعضاء شرف الهلال

ليه هو تراجع عن قراره بترك الهلال ؟؟ وبعدين هو صرّح بأنه ليس رئيس اعضاء شرف الهلال وانه سيبتعد عن الهلال ونفذ هذا الامر فإبتعاده الكل يعرف عنه ومن فتره ليست بالقصيره ,,,,

إقتباس اعضاء الشرف هم اللي قالوا هالكلام ماحد جاء من الشارع وقاله ؟؟؟؟

ياخي وش هالكلام , قبل فتره بسيطه قرأنا حوارا لخالد ابن الوليد ولعبدالله ابن مساعد وما قالو عن المصيبيح إلا كل خير , وهذولا اعضاء شرف هلاليين وواحد منهم موجود مع النادي بشكل شبه مستمر ويعرف كل صغيره وكبيره ,,

إقتباس ولو ترجع لنص الحوار في جريدة الرياضي ... تجد فيه مطالبة باستقالة سعود بن تركي وتجد فيه اسباب ابتعاد الوليد بن طلال اكبر داعمين الرياضة السعودية

هالجريده ما اقرأها ابدا لكن وش دخل المطالبه بإستقالة الامير سعود بموضوعك هذا ؟؟ ووش دخّل ابتعاد الامير الوليد بهالموضوع ؟؟ وإلا تبي تقول ان المصيبيح هو اللي فارض الرئيس على الهلال وهو اللي طارد الوليد ابن طلال !!!!!!!!!! شيئا من المنطقيه ياغالي !!

إقتباس واعتقد ان ماحد يتدخل بعمل رئيس الهلال ... حتى يشيلون المصيبيح والمسعد...

ياخي الاعضاء الداعمين للهلال هم ,الوليد ابن طلال وابنه , واعتقد اننا قرأنا تصريح الامير خالد ابن الوليد وامتداحه لعمل المصيبيح ,,

وابناء الامير محمد ابن سعود , واعتقد اننا نتابع ان الامير بندر ابن محمد يشيد بفهد وبجهده , يعني كفا من اختلاق اشياء لاوجود لها ,,,

إقتباس (( ولاتحط بذمتك تصريح في الصبح في الليل حنا اكبر من هالامور ))

خير لاتروح بعيد يالطيب انا قصدي انه يتحسف على كلامه ويرجع يصرح تصريح ثاني غير ( تعودنا على كذا )

ما عمري شفت اختلاف في الهلال مثل هالمره !!
والله الأمر غريب فعلا ..

والى الان لا نعرف وين الصدق ووين ابن عمه !!

وين هالادارة تكشف اللي تبي تكشفه والا يريحونا ترى ياجماعه ملينا من كثر هالتصاريح ى في اللي ولا في النهار ..

قرأت الموضوع وردوده ولكني مازلت موقن بأن الانتظار حتى نعرف من سعود بن تركي شخصيا ما يجري ..
ضروري أن تتكلم الادارة حتى لا تصل الامور الى أكثر مما وصلت الى الان ..

انا لست مع أو ضد حتى تبان الأمور على حقيقتها ولكن فعلا لم يمر على الهلال فترة تباعد لأعضاء الشرف وهزة قوية في النادي مثل ما يجري حاليا ..

نرجو تدارك الوضع .. ياليت احد يسمعنا من اعضاء الشرف ..
يا أعضاء الشرف .. يا أصحاب الرأي ..
ارحمونا الله يرحمكم ..
كفاية ..
لا نريد رؤية هلالنا يتدهور ..
ولا نريد نجومنا تتهرب وتتسرب من النادي واحدا تلو الآخر ..
تكفووووووووون ..

هلا وغلا فيكم

العنود(سمي الظبي ) :-

إقتباس والله يعينكم على المصيبيح والمسعد...صراحة شوهوا سمعة الزعيم..

صادقة مافضحنا ولا فشلنا غيرهم
اول مرة اشوف امين عام نادي ...يكذب على لسان لاعب

الممنوع :-

إقتباس ولد عبدالعزيز لم يقدر على فك طلاسم المصيبيح

اخي الكريم ... الامير هذلول يعرف معنى الديموقراطية ويعلم ان هناك رئيس وهو لن يتدخل في اعضاء الادارة ويبعد من يشاء
وهذا ردا عليك لان لو الخلاف شخصي لكان ابعده ... لكن الامير هذلول وباقي اعضاء الشرف يحترمون وجود الرئيس ويعلمون دورهم جيدا
وهذا ديدن اعضاء شرف الهلال...والا لماذا وجد الرئيس؟؟؟

ولعلمك الامير هذلول طالب بتعيين الامير بندر بن محمد رئيسا
والامير خالد بن محمد مشرفا عاما.. واتمنى من كل قلبي ان يتفق جميع الهلاليين على هذين الاسمين لما فيه من مصلحة جمة لنادي الهلال .

إقتباس الاستاذ فهد المصيبيح لايعير لهذه الاحاديث

المصيبيح ليس لديه مايتفوه به !!! فاللاعبين اشتكوا منه واعضاء الشرف
حتى من الجمهور يلقى لوما

====

العوام :-

إقتباس وإلا تبي تقول ان المصيبيح هو اللي فارض الرئيس على الهلال وهو اللي طارد الوليد ابن طلال !!!!!!!!!! شيئا من المنطقيه ياغالي !!

لاتقول على لساني شي
والمنطقية اللي تتكلم عنها بتلاقيها في الاقتباس اللي فوق هذا !!!

إقتباس قرأنا تصريح الامير خالد ابن الوليد وامتداحه لعمل المصيبيح ,,

الحين تعتب على هذلول تقول مايتابع وماتبي تاخذ بتصريحه
وانت بردك الاول اشرت انه خالد بن الوليد مايتابع ..شلون تاخذ بتصريحه

تاخذ برأي اللي يساند المصيبيح اهم شي

إقتباس يصرح تصريح ثاني غير

اها قصدك كذا (( عيني بعينك )) <<-- الحقوق محفوظة للغانم

وارجع اكرر هذا (( كلام رئيس مجلس اعضاء شرف الهلال))
==========

الغانم :-

إقتباس ابيك يا مجودي تروح للارشيف

مايحتاج اروح التصريح امامي .. والماضي له اسبابه والحاضر اكيد غير

إقتباس نكته الموسم!!!!

كبيرة بحق صاحب السمو الملكي الامير هذلول

إقتباس اتمنى ان لايخرج علينا احد ويقول ان الامير هذلول يظلل الجمهور الهلالي

جاوب على هالجملة

حبيبي الغانم
(((( عندي ملاحظة :- ليه ماتعلق على كلام الامير هذلول ولا حقائق ماتقدر تغيرها...ترا التصريح هو اساس الموضوع ))))


==========

الهلالي الهادي :-

إقتباس ما عمري شفت اختلاف في الهلال مثل هالمره !!

ولا انا

إقتباس حتى نعرف من سعود بن تركي شخصيا

السفرات وسعة الصدر اهم مني ومنك ومن الهلال بكبره

إقتباس نرجو تدارك الوضع .. ياليت احد يسمعنا من اعضاء الشرف ..

هذا امامك كلام رئيس مجلس اعضاء الشرف وشخص عاصر الهلال من بداياته الي يومنا الحاضر..

إقتباس لا نريد رؤية هلالنا يتدهور .. ولا نريد نجومنا تتهرب وتتسرب من النادي واحدا تلو الآخر ..

والقادم مؤسف اكثر طالما وجد هذين الشخصين


وانا متأكد ومثلي الكثير ان الهلال سيعود اقوى مماكان لو ذهبا عن الفريق...

=========================

اضافة للموضوع

إقتباس الامير هذلول عند سؤاله عن عدم ذهاب المصيبح ضمن جهاز ادارة المنتخب

ذكر بأن المصيبيح يتقاضى مرتب هائل من ادارة الهلال اكثر من

ثلاثين الف ريال (( مرتب اكثر من اللاعبين الذين يتصببون عرقا ويتمرنون ويتعبون في المباريات ))....