الزعيم .... يحقق احلامك
(( ابي اصور مع ياسر القحطاني تكفى يبه ))
هذي العبارة دائما يرددها ابني عبدلله حفظه الله
وانا بدوري ارد عليه واقول (( حتى انا بعد ودي اصور مع ياسر ))
بس المشكلة اننا في السعودية لا نعرف التنظيم الرياضي وكل شي بالواسطة
ولا بالصدفة راح تصور مع احد اللاعبين وانت وحظك .
وعلى طاري الحظ مرة لقيت باص نادي الزعيم متعطل في القصيم وكان الفريق
جاي للقصيم من اجل مباراة الحزم والهلال كاس فيصل والحمدلله توقفت ولقيت كوزمين وسلمت عليه وركب معي الاستاذ سامي بوخضير والمدرب عبداللطيف الحسيني ومدرب الحراس منصور القاسم واخصائي العلاج الطبيعي
وصلتهم للفندق المقيمين فيه من اجل المباراة بس مثل ماقلت هذي صدفة ومتى تحصل .
تخيل ان احد اصحابك مسافر الى اسبانيا وبعد مارجع قال لك انا مصور مع احد نجوم نادي ريال مدريد او برشلونة ومصور بالملعب بعد اكيد راح ترد عليه وبتقول حنا ماصورن مع لاعبين السعودية وانت تبي تصور مع لاعبين ريال مدريد اقول (( تلعب على مين )) والحقيقة ان التصوير مع لاعبين اوروبيين يكن يصير اسهل من التصوير مع احد لاعبي السعودية لماذا ؟؟؟
طبعا الاندية الاوروبية كل شي احتراف حتى بالتصوير يستفيدون من الجمهور يعني ادفع مبلغ محدد وصور مع اللي تبي
وهنا نقول ياليت والله ياليت صوتنا يوصل للادارة الهلالية ويطبقون الطريقة
طبعا الزعيم دائما عودنا انه النادي الاول في كل شي وليت يكون الزعيم هو الاول في تطبيق هذ الفكرة لتحقيق احلام كثير من الجماهير
طبعا صعب على اللاعبين التصوير بعد التمارين كل يوم ولكن يتم تحديد ايام للتصوير
يتم تحديد الايام بعد الانتهاء من الدوري والمسابقات الرياضية
(( الزعيم يحقق احلامك ))
الوضع المتطور
