مساكم الله بالخير جميعاً
من زمان ما كتبت هنا و الصراحة حنيت لأيقونة موضوع جديد 
اليوم الصراحة جايب لكم قصة حدثت لي شخصياً هي للعبرة أكثر منها للتسلية 
القصة
بعد عيد الفطر الماضي اتصل علي واحد من عيال عمي يتطلبني أروح معه لمدينة شقراء
( شمال الرياض 200 كيلو )
لحضور زواج بنت خالته , وافقت بحكم أنه كم مرة طلب مني و أرده , قلت يا ولد لا تردها بخاطره هالمرة
<----<< ليتني رديته 
تجهزت على المغرب و رحت معه , صلينا العشاء على الطريق
وصلنا شقراء و لله الحمد و حضرنا الزواج
بعد الزواج
( هنا مربط الفرس )
كنا بنرجع للرياض
( و شقراء لمن لا يعرفها ألغوا فيها جميع الاشارات و بدلوها بدوارات ) <-----<< يحتكون بجدة
المهم عند أحد الدوارات دخل علينا واحد صدمنا الا شوي <---- كعادة السعوديين الأفضلية ليست لمن بداخل الدوار
المهم ضرب له ولد عمي بوري و تعداه فما كان من السائق الآخر الا ان كبس بنور السيارة
( بمعنى خير ان شاء الله )
فحدث شد و جذب بين ولد عمي و الرجل الآخر بحركات الأيدي
( مشفر )
لحقنا الرجال و تطور النقاش بكلمات بذيئة بين الاثنين
و كنت أقول له يا رجال امش و خله و للأسف ما رضى
الرجل في السيارة الأخرى قال كلمة قوية و حط رجله
ولد عمي ما عجبته الكلمة راح حد الرجال على الرصيف و عينك ما تشوف الا ولد عمي يسوي فيلم بوليسي و
يبعد بالسيارة يمين ثم لف يسار بقوة و صدم الرجال و طاح صدامه
نزل العصبي بيطق الرجال نزلت و مسكته المهم ركبنا السيارة و رحنا قسم الشرطة
ليش ؟؟
ولد عمي بيشتكي الرجال
( صدمني و بكى , و سبقني و اشتكى )
لحقنا الرجال الثاني لقسم الشرطة و هناك بدأت الملاسنة و صار ولد عمي اللي صادم الرجال
يبي تعويض
هذاك الرجال قال انت كذاب و اذا تبي شي باعطيك بس اذا انت اللي مخطي
( و انت راجع للرياض ) جعلك تحت بعير و الا تريله
أنا هنا بدا يوقف قلبي
أقول لولد عمي تراك مخطي , قال أبداً
المهم طلعنا من القسم موجهين للرياض , و كل ما جاء يتكلم قلت له اسكت
صرت منتبه للطريق اكثر منه من الخوف
يوم وصلنا القدية
( طلعة القدية اللي على طريق مكة )
قلت في نفسي الحمد لله وصلنا الرياض
<------<< يا حليلي
جلست اسولف معه و فجأة التفت قدام الا و اشوف سرا بعارين تقطع الخط
صرخت : بعاااااااارررريييييييين
لفينا عنها شوي و صدمنا اخر واحد فيهم طاح على السيارة
لحظات ويوم شفت اننا سالمين ضحكت انا و اياه و نزلنا من السيارة نسجد شكر
جت الدوريات و أمن الطرق و الحوسة العالم سكروا الخط
بعدها قلت لولد عمي الحين لو تمشي للرياض مطفي النور و مغمض ما عاد بيصير لنا شي
ما يستفاد منه 1- انتبه لا أحد يدعي عليك 2- اياني و اياكم الحركات اللي مالها داعي ( حركات او لفظ )
ووووو بس
الوضع الشجري
