بسم الله الرحمن الرحيم

الحمد لله رب العالمين ، والصلاة والسلام على نبينا محمد ،،،، وبعد :

هارد لكم التعادل بطعم الخسارة


نامي: ماعنده سالفة

رادوي :ما عنده غير الباصات الخطأ

الفريدي : بارد يحب الإستعراض و ماعنده إلا الهياط على الحكم

ياسر: دكة البدلاء تشتاق لك ،،

هذه بعض العبارات التي أطلقها بعض جمهور الزعيم بعد المباراة،،

طيب ليش تتطلقون العبارات وأنتوا قاعدين في المقاهي أكثر من الملعب ،، ولا قدام الــ ِart ممكن سبب ؟؟

والله من حقك اللاعبين البارح التعادل ،، لأنكم غير جمهور غير عادل ،،

من حق اللاعبين التعادل يوم أن الجمهور أكثر من الصورة بقليل :



بالله هذولا جمهور ولا متفرجين ،،


خذوا العبرة بجمهور الإتحاد البارح ،، الملعب فل ،، جمهور نشيط ،، جمهور متحرك ،،

مو مثل جمهور الهلال نايمين ،،

أول 10 دقايق ما فيه زيهم ،، وبعدها يميدك تأخذ لك غفوة ،،

عيب والله ،، طارق يطالب الجمهور بالتفاعل ،، ولي يطالب والله عيب ،،


نقاط بدون مجاملة

* محمد غندر لك جزيل الشكر،، ممكن تفارق لأن هناك من هو أجدر منك ،، لأن لي فترة ما سمعت جمهور الهلال له صوت جماعي ،، كل المباراة وأنت قاعد تغني لحالك ،، وأتمنى أنك تعيد أهازيج قديمة مثل : حبيبكم مين ؟؟ صحب الملايين ؟؟ ... إلخ لأنها تحسس أن فيه هناك جمهور وفيه رئيس رابطة ،، مو كأنك مغني يغني لوحده ،،

* جمهور الهلال في الرياض ملينا والله منكم ، لأن وجودكم مثل عدمكم ، ما نحس بكم إلا في آخر المباراة إذا كان الهلال فايز ما نسمع منكم إلا : أوليــــــــه أوليه أوليه أوليــــه ... إلخ ،، وإذا كان تعادل ولا خسارة الدقيقة 80 ما تحصل إلا ( شالات زرقاء وبإختصار عدة تشجيع ) يعني أنكم جمهور سريع الإنسحاب من الملعب ،، وجمهور سريع فقد الأمل في فريقه ،،


همسات للاعبين :


* الدعيع ،،، ما أدري ليش كنت شبه مهزوز في بداية المباراة ؟ لكن بعد ربع ساعة رجعت لسابق عهدك مبدع ،،

* محمد نامي ،، أنت ممتاز وماصدق من قال إنك فاشل ،، بس ياليت لو تركز على الكنترول عندك ،،

* ماجد المرشدي ،، مبدع ومتألق كعادتك ،، لكن مشكلتك بعض الأحيان السرحان ،، حاول تتدارك الأمور ،،

* أسامة هوساوي ،، ما أدري وش أقول وش أخلي ؟؟ كنت الأميز في خط الدفاع ،، بس يعيبك بعض الأحيان أنك تجعلنا نضع أيدينا على قلوبنا ونقول الله يستر ،، لأنك تحاول تتقدم والكورة معك ،، أو تمرر للفريق المنافس ،،

* الزوري ،، أنت الأجدربحمل هذه المنطقة في النادي وفي المنتخب ،، لكن يعيبك أنك تبالغ في الهجموم على حساب الدفاع ،،

* رادوي ،، ممتاز ومقاتل بس ما أدري وش أصابك بعد رحيل كوزمين ؟؟ باصات خطأ ،، تركيزك ما هو الأول ؟؟ والله ما أدري ،،

* خالد عزيز ،، ما تكفيك كل هذي الكلمات ( مبدع - متميز - فنان - قاتوزو - مقاتل ) استمر يا غالي ولا يضرك حقد الحاقدين بإذن الله ،،

* الفريدي ،، بدايتك حلوة لكن ما أدري ليش خبرتها بالنهاية ناهيك عن النرفزة والأعتراض على الحكم ،، حاول تصحح وضع ولا الشلهوب هو الأجدر ،،

* التايب ،، عيني عليك باردة يا برنس ،، مبدع بعد ما خرجت وضح تأثر الفريق ،، أنا والله ما أعرف كيف سويت الحركة إلي سحبت فيها بثلاثة لاعبين إيرانيين ؟ ما شاء الله عليك ،، بس عندي ملاحظة بسيطة ،، وهي الكرات الثابتة ما أنت الأول فيها ،، حاول يا فنان ترجع مهارة طارق فيها ،،

* ولهامسون ،، آآآآآآآه يا كرستيان بس ،، أخذت قلوبنا والله عشقناك ،، كثر حسادك من أنديتنا وبدؤوا يحاولون إصابتك حتى لا تقدم الأكثر ،، لكن لا يضر السحاب نباح الكلاب ،، سر عالي الهمة ،، قوي العزيمة أيها السويدي الأشقر

* ياسر القحطاني ،، أنا أشوف إن المباراة البارح هي أكثر مباراة قدمت فيها مستوى في هذا الموسم ،، مقصيات ،، رأسيات ،، لكن ما يعيبك إن ما تتحرك بس قاعد وسط المدافعين ..


قبل الختام ملاحظة :

ما تلاحظون أن اللاعبين السعودين ينتظرون صافرة الحكم خصوصا في الهجمات الخطير واللعبات إلي فيها دربكة قدام مرمى الخصم ،، خصوصا الحالات التي يتوقع اللاعب أنه في تسلل لا ينطلق ويلعب إلى أن يسمع صافرة الحكم بل ينتظر حتى يسمعها ،، أو إذا الحكم ما أحتسب ضربة جزاء يقوم يعترض عليه ويترك الكورة ،،

ما تلاحظون هذا الشئ ؟؟


في الختام

إن أصبت في شئ فمن الله ،، وإن أخطأت فمن نفسي والشيطان

وأتمنى أن لا أكون قد أخطأت على أحد وإذا أخطأت على أحد أتمنى منه أن يسامحني ويحللني ،،

وأيضا أتمنى أنه لا ينتقدني أحد وهو لم يقرأ الموضوع كامل أو لم يقرأه أصلا ،،

بارك الله فيكم

دمتم بود وخير وسلامة ،،