ياسر القحطاني يسجل 7 أهداف ويضيع فرصة واحدة .. الفريدي يسجل هدفين من نص الملعب .. الهلال يفوز بـ 15 مقابل لاشي لصابا الايراني - نادي الهلال السعودي - شبكة الزعيم

كيان السعودية · #1 12/03/2009, 03:54 AM

السلام عليكم ورحمة الله وبركاته ...

بدون مقدمات ....

- ترى المفروض ياسر يكون لاعب سوبرمان .. ويسجل من الزاوية .. وبالراس .. ودبل كيك .. وعرضيات .. ويسحب بالفريق الايراني كامل ... والا تراه مايعرف يلعب من جنبها .. المفروض يجلس بالاحتياط ويلعب العنبر ...

- الفريدي .. إلى متى ياخي تراك مصختها ... ياناس أول مره أشوف لاعب تنقطع منه الكورة وهو مايضغط عليه الا 3 لاعبين بس ... ياخي العب خلص كورة ... اذا مافيه قدامك الا 4 دفاع .. عد فيهم .. وعد بالحارس وجبها قول .. ترى ابسط منها مافيه .. والله عالم ..

- سول .. ( أقول هذا وآخرتها معه .. ليه ليه ليه كل مباراه يلعب مايسجل ؟ اقول ياعبدالرحمن بن مساعد .. يا تجيب لنا كرستيانيو رونالدو .. والا لو سمحت مانبي لعيبه آسيوين ( طبعا المفروض الهلال يفكر وشلون يعطي كرستيانو جنسية تايلندية .. عشان يصير لاعب آسيوي ) ...

- كاتالين .. شوف انت بعد يالروماني ... ياتسوي لنا خطه ماتخرش المية .. ولا لاعاد تدرب .. نبي أي فريق نلعب معه يمسك دفاع عند مرماه .. مانبي علينا ولاهجمه .. ولا قول .. ولايتعدون نص ملعبهم حتى .. والا اسمح لي تراك مدرب فاشل فاشل فاشل ...

- عبدالرحمن بن مساعد ... ترى هذا مو عذر ان كل المدربين مرتبطين بانديتهم حاليا .. ياخي شف لك حل .. كلم فرجسون مدرب مانشستر يونايتد .. عطوه اللي يبي خلوه يجي .. ترى هو مره طلع في صدى الملاعب وقال أعجبني نادي الهلال ..

الزبدة .. علي الحرام .. لو أنا لاعب .. وأنتم جمهوري .. إني ما أعطيكم وجه ..

طايحين في اللعيبه .. والمدرب .. والإدارة ... اللي يشوفكم انهزمنا 10 / 0 ..... وانا ادري والله لو تعادل الاتحاد او انهزم .. كان حسيتوا ان التعادل خير وبركه .. والحمد لله ..

واخيرا ... اذا صرتوا مثل جمهور الاتحاد في المدرجات ... تعال انت واياه تكلم عن الروح الهلالية .. لأن بصراحه .. حنا جمهور فشيله وربي .. جمهو كل واحد مرسم وطاق الكوبرا .. وحاط رجل على رجل .. ومستانسين ..

وجايين تفردون عضلاتكم بالمنتدى .. أقول يارب مباريات الهلال مره ثانيه وقت الإختبارات ..

<--- اعذروني متنرفز من هالمواضيع اللي بالمنتدى ...

تحياتي ...