12/03/2009, 02:57 AM
|
| زعيــم مميــز | | تاريخ التسجيل: 30/09/2005 المكان: أمريكا_ ولاية بقالة شكور ض1
مشاركات: 20,922
| |
شي ماشفتوه جديد + نقد لاعبينا .. وياجماهيرنا إركدو تكفون
السلام عليكم
قسم بالله ماصدع راسي كثر هالمباراة مادري ليش !!
اللي مايعرفونه بعض جماهير الرياض اللي ماحضرو اني انا جاي من 500 كيلو عشان الهلال وتأجلت المباراة وأجلت كذا شغل وجلست الى الأربعاء
صداع وتعب وقل نوم وتشتت في وقت المباراة
يوم الغبار انا رحت للملعب حول الساعة اربع والجو غبار وغير صحي
لكن هذا الهلال وشو أسوي حبه بقلبي كبير  
والله ثم والله ثم والله ان صدري كان يوجعني ليلة الأربعاء ( الثالاثاء بالليل )
وماقدرت انام من الوجع 
وادق على دكتوري الخاص  قال من الخبال والهبال والهلال
وش مخليك تطامر ورا الهلال والجو غبار
قلت يادكتور سبق السيف العذل ولو جا تسونامي راح اجي للهلال
شطحة
دكتور ماعندك دوا للحب ,, اللي شباك الحب صادنه 
المهم تذكرة وقطعتها ودفعت تذكرة من جديد
وغبار ماله اول ولاتالي وجلست اتروش 7 مرات إحداها بالتراب
وجا الأربعاء صحيت الساعة 12 ونص غسلت صليت طلعت لسامبا أحول فلوس
خلصت دقيت على واحد من الشباب قلت يالله انا رايح للمعب قال يامجنون الساعة 2 وين نروح
قلت مع السلامة
رجع دق قال طيب مرني <<خاف اروح واخليه
وصلت الملعب 2وخمسين دقيقة
فتحو البوابات بالضبط 28 و3
قصيت تذكرة جديدة والباقي تعرفونه من خلال الموضوع اللي كنت اتواصل مع واحد من الشباب عشان نحمس الجمهور للحضور
لكن والله ياانها غبنة وشي يرفع الظغط
المباراة آسيوية , والهلال محتاجنا , وشبيه الريح ماقصر معنا ,, واللاعبين جابو لنا بطولة ولي العهد ,والاجواء مناسبة ويوم ربوع
مادري بعض الشباب وش يحسبه << على قولة شباب الرياض
والله ثم والله ثم والله اني الآن تعشيت وانا مأكلت من امس الثلاثاء( آخر وجبة كانت يوم الثلاثاء الساعة 1ونص ليلاً )
والآن يوم الأربعاء الساعة وحدة ونص ليلاً أكلت يعني 24 ساعة ماكليت شي عشان الهلال
طبعا شربت ماء وشوية فصفص بالملعب
المهم والله اني الوم كل من لم يحضر لهالمباراة
عموما المباراة راحت بخيرها وشرها لكن انا دخلت المنتدى شفت العجب العجاب
طايحين بياسر والفريدي ونامي
ياجمهورنا الغالي
الخسارة واردة والتعادل وارد وهذي كرة القدم
يعني بالله في لاعب ماوده يفوز والا ماهمته المباراة
على فكرة حب الهلال لايأتي من خلال النقد وقت الخسارة
والله اني اجلس على شبكة الزعيم من 6 الى 10 ساعات يومياً
معرفات جديدة تتكلم عن لاعبين الهلال والله اني اعرف غالبية الأعضاء وأعرف معرفات تكتب بشكل اسبوعي ويومي
لكن وقت الخسارة تطلع معرفات مادري وينها يوم نفوز بالبطولة ويوم يبدع ياسر ويوم يتفنن الفريدي ويوم يتكاتف الفريق ويوم نحتاج للنقد اللي يفيد الفريق .
النقد ينقسم إلى :
1. نقد هادف .... وهذا هو الذي نطمح إليه ونتطلع من الجميع ان يسيروا به ..
2. نقد للتجريح ..... وهذا النوع من اقذر انواع النقد .. وصاحبه تجدهـ فاشل في حياته
لانقول اوقفوا النقد
ولكن ان تفتح موضوع وتكتب كلمة فلان فاشل وتقفل موضوعك هذا مو نقد أبدا
اكتب خطا اللاعب بين مافعله بالضبط واذكر الصح الذي من المفترض ان يكون بدال الخطأ الذي ارتكبه اللاعب
اذكر حسنات اللاعب وسلبياته بشكل واضح حتى تحصل الفائدة للاعب الذي من المفترض انك تحبه وتبحث عن مصلحته ومصلحة فريقك
لكن تكتب موضوع والاعضاء الله يهديهم يكتب كلمتين تحطيم ويروح لموضوع ثاني وعلى هالحال
هذا ماصار نقد ولا صار تقييم آداء لاعبينا ماودي اطول بالكلام لأن البعض مايحب المواضيع الطويلة , اي بعضهم مشغول في بحوث إسلامية مو فاضي يقرا
عندي كلام كثير لكن ماودي تقولون وش هالبثر 
بكتب لكم شوي من شي ماشفتوه بالملعب
جاني واحد قال هالكرسي اللي جنبك محجوز قلت ايه محجوز لبيكهام جاي يشوف سيول قلت لا تفضل جلس قال تصدق ماحضرت مباراة لهلال وفاز الهلال قلت قم قم اطلع من المدرجات قال وش دعوة مو بكيفي قلت دامك وجه نحس ورا ماتروح تشجع الإتحاد عشان نفوز بالدوري قال جدة بعيدة قلت اجل رح مع جمهور الفريق الإيراني يمكن يخسرون اذا شجعتهم وماراح وفعلاً تعادلنا تعادل اشبه بالخسارة .
واحد ثاني جا وضربني على كتفي قال انت كل مباراة موجود قلت انت اللي كل مباراة موجود لانك اذا شفتني يعني جيت واذا ماشفتني يعني ماجيت قال ها وش تقول << المشجع انلحس من كلامي
واحد ثالث جا وضربني قمت انا ضربته كف لاني صرت ملطشة كل من جا ضربني << امزح 
دخل الدعيع للملعب عشان يسخن والظاهر احترق من كثر مايسخن , المهم اني وقفت وصفقت له قال اللي جنبي ليش تصفق تراه مايسمعك قلت تراها يديني ماهي يدينك , حتى تشجيع متعاجزين والله بعضهم يرفع الظغط .
دخلو الحكام عشان يشوفون أرضية الملعب وكانو مرسمين بالبدلة الرسمية واول مادخلو صفق لهم الجمهور بعدها دخلو وطلعو بلباس الحكام قام الجمهور يقول اوووووو << بعض الجمهور من جنبها هع هع
كنت خارج المدرج اشرب مويه وجاني أفغاني من اللي يبيعون المشروبات الغازية قال صديق قلت ايس يبغى
قال ليش نفر يجي كتير قلت اليوم مباراة يالدلخ قال أمس مباراة مو هادا يوم قلت والله يابو حامد قرضاي امس اجلوها قال ليش امس ميا ميا هوا قلت ماشاءالله انت ماياثر فيك لو يحفرون حفرة ويدفنونك تقول وش هالربيع والامطار
طارق التايب كان كل عشر دقايق يجي ويطالب الجماهير بالتشجيع والمؤازرة وقدم مستوى خرافي بالمباراة .
من خلال مشاهدتي للاعبين عن قرب وضح عليهم التشتت الذهني والسرحان بعض أوقات المباراة ويجب مضاعفة الجهد الإداري والفني والجماهيري للوقوف اكثر معهم .
’’
يالله نلقاكم في مباراة قادمة وان شاءالله نفوز بإذن الله << أول مرة أحس بإحساس النصراويين
اللهم لاشماته
كتبه وحرره حمـ(الهلالي)ــد اكثر إنسان واجه إرهاق هاليومين  |
.. 
.. 
..
.. 
الوضع المتطور
