مغاط في سكن جامعة الملك سعود ( ترا التوتـّر ماله سنع) !! - نادي الهلال السعودي - شبكة الزعيم

مغاط · #1 08/03/2009, 02:58 AM

اليوم جايني نشاط مال أمـّه داعي .. وحاس إن الموضوع فيه شي غلط .. حتى يوم قمت للدوام وأنا مار بالحوش .. ورفعت راسي للنخل !! وأنا أناظر العسبان اليابسات !! قلت يا ولد مشوهـّات شكل البيت .. ليه ما أرقى النخلة و أقصـّصّهن !! المهم إنـّي تعوذت من إبليس وطلعت !!

وتوني طالع من البيت .. إلا يوم لقيت أبو جيرانــّا .. صاك اللطمة .. و فاتح الكبوّت ويقول لي ( معك اشتراك) ؟! قلت أي اشتراك الله يرحم أمك سيارتك يبي لها دف !! قال لي يخوك (القير توماتيك) وشلون ندفـها ؟ .. وفعلا انحرجت وضاق صدري .. لكن إنما الأعمال بالنيات !! وعطيته اشتراك و مشينا !!

فاللي أحّب أقوله لكم .. إن الثالثة ثابثة !! وحطيّت حرتي في هالموضوع .. وتراي مقسمـّة لثلاث (زوايا) <-- كنب ملحق موب موضوع !! وتراه ( طول قريح ) !! فراعين التطمير يقدرون يتنقوّن لهم الزاوية اللي تعجبهم ويسحبون على الباقي !! واللي ودّه يجيب الدرجة كاملة .. يقراه كلـّه !!

----------------------------------------------------

الزاوية الأولى " منفرجة " :/

( التوتـّر الزايد ماله سنع ) !!

- مسكت غلط أيام الجامعة إنـّي أسكن بالسكن الجامعي حق الملك سعود !! بزعمي أبرفع معدلـّي وأبدفر صح !! والمشكلة إن بيتنا بالرياض و من صالتنا إلى القاعة ما تاخذ ولا ربع ساعة !! لا ومن زين الطبايع إذا جاء يوم الجمعة العصر ودعّت أهلي .. وقلت لهم : يالله نشوفكم على خير إن شاء الله الربوع .. واتجهّت للمحطة اللي وراء بيتنا .. وشريت حبّ وسفن أب وكيكة جبن وعبيّت فل ودقيت سلف للجامعة !! ما يمديني أعشـّق بالثالث إلا أنا واصل !! يا أخي ما أدري هي طفاقة هي سفاهه أو إني اسمع بالاستقلالية والاعتماد على الذات !! بس كانت أيام حلوة !! وكان السكن الجامعي بذيك السنة توّهم مفتتحينه لأنه كان مغلق بالسنوات اللي قبل .. وكانت المباني مابعد جهزت كلها لاستقبال الطلاب .. فنـصّ المباني فيها قطاوة .. والنص الثاني مخلينه سكن لنا !! وكنت آخذن غرفة مفردة بزعمي آباخذ راحتي .. وأبّركز صح !!
المهم مع الوقت .. ومن كثر ما نلاحق القطاوة سوا !! و كل يوم وحنـا حاجرين لنا ( داب) وإلا واطين لنا ( عقرب) .. صرنا نعرف وجيه بعض !!

وأول واحد تعرفت عليه بالسكن كان اسمه (منــّاع) من قرى الشرقية .. دبيبة وضروسه اللي تحت كلهن تركيبة !! يحلفون إنه بالجامعة من أيام الدولة العثمانية !! أكثر واحد حمل مواد من فتحوا الجامعة إلى وقتنا الحاضر!! و كل ترم وهو بكلية .. الظاهر إنه داخلن هندسة و فصلوه من الجامعة وهو يا لغة عربية يا علم نفس !!
حتى يوم دريت عن قصته أول الأيام .. نويت أزاعله لأنه يبي يثبط من عزيمتي !! و خفت أزحف معه !!

وكان بجنب غرفتي .. واحدن من شمال المملكة اسمه ( حويضر) .. كل ما لقيته بالأصنصير و إلا بالدرج وأثر معه أغراض ولافهـّن بفروته الرصاصية وإذا شافني تغيّر لون وجهه !! وصرت أشكّ به !! وقررت إنيّ أكشفه !!
لكن تبيـّن لي بعد فترة إن ما براسه .. وإن ذا اللي معه ( عزبة وعدّة الطبخ ) !! وكان راعي علوم عرب ومراجل !! ومضبـّط له سيكورتي عند البوابة وكان يعطيه رشوة ( شابورة سمسم ) وكان يخليه يدخل العزبة بس يقول ترا إن كفشوك جوّا أنت اللي تتحمل المسؤولية !! وكان فيه حرص على الدراسة !! لدرجة وهو يطبخ يذاكر !! وهو رايح للمسجد يذاكر .. وهو نايم براطمه يتحرّكن يذاكر !! حتى حاط له كنبل بسيارته وإذا مل من الغرفة راح للمواقف وقام يذاكر بصندوق الددسن !!

وثالث واحد تعرفنا عليه .. ( سمير ) من ينبع !! وكنــا تونــا طالعين من المسجد .. إلاّ ذا اللي خاطم من قدامنـا يمشي 180 ويقول ( سعبان سعبان ) !! وفيه الصيحة !! وأثر المبنى اللي بجنب المبنى اللي ساكن فيه (سمير) لاقين فيه (ثعبان على قولته = حيـّة ) .. وهو مع الروعة منحاش للبوابة !! المهم مسكناه وهديناه وقمنا نقرى عليه !! الين ركد !! ومع الوقت اكشتفنا إنه ذروق وأقوى حيوان شافه .. الحمامة !! حتى إذا جاء يمسكها غمـضّ يخاف تمخشه !! ويموت على لعبة ( واحد آونو ) ودايم معه بمخباته .. وأذانــّا بها آذى ذيك الأيام !! بس خل عنك والله يا معه حظ دايم تجيه ( أم ألوان وأم أربع ) <<-- أبزر من سمير !!

وعقبها بفترة تعرفنــا على ( سعدون) من سدير .. يا حليله مطوّع .. بس إنه منتهي ومركبّ كفرات عراض وجنوط سود و مزبرق كلمة ( TOYOTA) اللي على باب الصندوق بـ شطرطون أسود ينقاله مسوّي ظل !! و أي واحد من سدير جاي يخلصّ معاملة بالرياض وإلا عنده انتداب كان يجيبه ينوّمه بالسكن !! وكان ما شاء الله .. الأول على دفعته !! وكان مقاطع المنتجات الأمريكية بس إذا كان (حويضر مضبـّط لنا مشوي .. ( شرب كولا جغمتين ) !! لأنه يقول(عصير الربيع و شوي ما تركب ) !!

- المهم مالكم بالطويلة .. فكان السكن يخليّ الواحد يلتقي بعقليات كثيرة وطبايع مختلفة .. وبيئات متباينة !! ورغم اختلاف توجهاتنا وتخصصاتنا !! إلا إن الهدف واحد بغض النظر عن ( منـــّــاع الزاحف ) !! وكان كل واحد منـّا ودّه ينجح ويبيّض وجه أهله ويحقق طموحه !! فقررنا نجتمع أوقات الاختبارات ونذاكر مع بعض !!

فكان ( حويضر ) أول واحد يجي !! ويجيب معه زمزمية القهوة والشاهي والدارسين .. كننا رايحين نزور وحدة بالنفاس !! ويضيق صدره وحالته حالة !! وإذا شاف ( منـّاع يضحك ) تنرفز !! و أذكر مرّة قد قال ترا إن ما عقلت يا منــاع وذاكرت زين والله لا أقلع ضروسك الفوقية !! وأخليّ سنونك كلها (طقم) ياللي ما تستحي !! وفعلا ركد منــّاع شوي !! وكان سمير .. يجي يذاكر معنا وكان يموت على ( حلاو قطن ) و ( خدود البنات ) .. وكانوا أهله مواعدينه إذا نجح يشترون له ( سيكل ) وخالته تبي تعطيه هدية ( صلصال ) !!

فكنــّا نجلس حول بعض نذاكر !! ثم تحوم تسبدنا من ( حويضر) !! معرّق !! ومتنرفز .. كنه يبي يشوت بلنتي آخر الدقايق !! ووجهه أسود من الهم !! حتى يوم شفتهم تسذا .. بغيت أسحب على السكن وأرجع لم بيتنا آذاكر بالملحق !! وكان (سعدون) ما يجي يذاكر معنا إلا ( المغرب ) .. وإذا جاء .. وأثر ( بسمتــه ) شاقتن وجهه شق !! وقام يعلمنــا عن البوري الهواء اللي توّه مركبه !! و ( منــّاع ) خذ ولد في السوالف اللا منهجية !! و السوالف اللي تسنها وجهه !! لكن (حويضر) مستقعد له .. ويقول خلـّك في ( مذكرتك يالمهمل يالبليد) و يسّوي لي فيها منـاع إنه سمع النصيحة و يطلع يقبع له زقارة ويجي يفتـّش مذكرتـه كتؤدية واجب لا أكثر ولا أقل .. ويحتري عشاء (حويضر) يقضي .. وياخذ له بيالة ويسري !!

وكانت تطلع نتايج العيال :

* (منـــّاع) حامل مادتين!! وثنتين محروم !! ووحدة دافينــه !!
* (حويضر) رغم إنه مبهذلن عمره .. وحرصن زايد !! إلا إنه حمل مادة و الباقيات على الحافة !!
* (سعدون) مثل ما قلتكم من تميّز لتميز !!
* (سمير) حذف الترم لأن طاح على يده غطاء القدر وحويضر يطبخ وأنكسرت يده .. وودوّه لينبع عند أهله !!

مما يستفاد من السالفة :

1- سواءا كنـا ( لاعبين ) أو( مشجعيّن ) أو ( إداريّين ) !! ترا ارتباطنا بشخصيات مثل ( حويضر ) .. مالهم شغل إلا ( التحلطم ) و ( التشكـّي) و ( تهويل الأمور ) .. ما هو إلا ( إضعاف للإرادة و انحراف عن المسار السليم) !!

2- ما قد شفنا ( الأحزان ) جايبة نتايج !! والأدهى والأمر أن ( الاستسلام لها والركون لضغوطات الواقع .. هو بحد ذاته " أسوأ أنواع الفشل " ) !!

3- كل واحد يحاول يدوّر له مثل ( سعدون ) لأن من بيننا (أشخاص واقعيين) عقلاء !! حكماء !! ما يطيرون بالعجة ويحوقون السالفة ويضيّعون كل شي !! هذولا اللي تلقى من استشارتهم أو مجالستهم منفعة !!

4- يقول (مايكل كولنز) : كل إرادة لا تتغلب على ( العاطفة ) تنهار وتفشل !!
فمستحيل ينجح الإنسان ( العاطفي ) !! واللي يتأثر بـ توافه الأمور !!

5- الموازنة زينة !! فلا نصير بـ(صغر عقلية سمير) !! ولا بـ ( قوّة تطنيش منـّـاع ) ولا بـ ( سوداويـّة حويضر ) !!