سواليف أبو فهد ... الجزء الثاني .. (الشق أكبر من الرقعه) ...؟؟؟؟

في البداية أعتذر للإخوان اللي يقولون حنا في عصر السرعة ... ويعترضون على طول هذا الجزء ... لأن أبو فهد (دقه قديمه) ... وهالموضوع لا يقبل القسمه على إثنين ... علشان كذا أبيكم توسعون صدوركم شوي ... وتقرون هالموضوع وأنتم (رايقين) ... والله يعينكم ... يمكن ترتفع عندكم الحرارة شوي مثل أبو فهد ... إذا ما عندكم صبر... ؟؟؟

ذكرت في الجزء الأول عن مقابلتي لحبيبنا الهلالي (المجهول) أبو فهد... وتبينت لنا بعض الأمور اللي يفكر فيها ... واليوم أستكمل حديثي معه... وأنا قلت لكم إنه ساخن أكثر من سخونه صيف الرياض ... واليكم بعض مما دار بيننا ونحن نتابع تمرين نادي الهلال ...

http://alzaeem.com/vb/showthread.php?threadid=72144

........................... الفصل الثاني ( في النادي) ...............................................

وبعد هذا النقاش الجميل والساخن انطلقت مع أبو فهد إلى النادي ... وأنا ودي أسحب فيه شوي ... لأن بصراحة أفكاره تعجبني ... لكن أبو فهد مثل السيارة القديمة ... ما يمشي إلا إذا (سخن)... يبي له من (يحميه) شوي ... صحيح إنه حساس ... لكنه ثقيل بعد ... يبي واحد يعرف له ... واللي يمون عليهم ... يفضفض لهم ... ويطلع اللي في قلبه ... بصراحه أبو فهد مثال للمشجع الرياضي اللي ودك إن كل الناس يصيرون مثله ... عنده مساحه حب للناس وللكوره وللهلال ... وأبو فهد ما يكره أحد ... ولا يحقد على أحد ... يوم شفت الثنيان يتمرن ... وهو عاد يموت في أبو يعقوب ... تشقق (أبو فهد) وإنبسط ... قمت وسألته على طول ... على بالي أبسوي له مثل تسحيبات الثنيان ...؟؟؟

أبو محمد : تظن يابو فهد لو أبو يعقوب في المنتخب ... كان إنهزمنا بالثمانيه ...؟؟؟

........................... اسباب فشل المنتخب .............................................


أبو فهد : ياخوي مشكلتنا كل ما لعب المنتخب ... طلعوا لنا النقاد والمنظرين وغربان الفضائيات وهات يا فلسفة ... المنتخب فايز ما سلم منهم ... وشلون وهو مهزوم ... التشكيله والمدرب ... ولو صار كذا ... لو سوى المدرب ... لو لعب فلان ... انت من يوم تسمع هالكلام ... إعرف إن ما عندك أحد ...؟؟؟؟

المشكله ياخوي أكبر من كذا ... المشكله إن (الشق أكبر من الرقعه) ... والله لو لعب أبو يعقوب وهو في عزه ... وحنا في نفس وضعنا هذا ... كان نبي ننهزم بنفس الطريقة والنتيجة ... لأن المشكله ما هي في المدرب أو التشكيله ... ولا في الخطه ... المشكله أكبر وأبعد من كذا بكثير ...؟؟؟

أبو محمد : وضح لي اكثر يابو فهد ... ما فهمتك ...؟؟؟

أبو فهد : شف أنا ماكنت معهم علشان أعلمك بالتفاصيل ... أنا أتوقع مثلي مثل غيري ... الإشاعات ذبحتنا ... وزادت عن حدها ... وأنت تعرف المثل اللي يقول ( لا دخان بلا نار) ... والسؤال ماهو عن صحة هالإشاعات ... السؤال ليش تطلع هالاشاعات ... وفي هالوقت ...؟؟؟

وش اللي فرق الجمهور السعودي ... خل نتكلم بصراحه ... ليش إنعدمت الوطنيه عند بعض الناس ... أنت حط يدك على الجرح وبعدين إبحث عن السبب ...؟؟؟

وتوقف أبو فهد قليلا وأخذ نفسا عميقا وأطلق زفره قويه مصحوبه بآهات ... وعرفت إن الأمبير عنده بدأ يرتفع ... قلت تمام (أكيد) هالحين بينطلق ...الله يحفظه ويخليه ...؟؟؟

وتابع كلامه وهو يقول ... المشكلة في اللي (يقتل القتيل ويمشي في جنازته) ... المشكله في المجتمع الرياضي (بكامله) اللي يبي له غربله وتنظيف وإعادة بناء من أساسه ... وهذي صعبة ومهمه شبة مستحيله ...؟؟؟

أبو محمد : أنت كلامك دايم فيه غموض ... وضح لي أكثر ... بصراحة ما فهمتك ...؟؟؟

أبو فهد : الله أكبر عليك ، أنت نسيت النشيدة الحلوة ... (يا مطره حطي حطي) ... وتقول لي عرفت قصدك ... وهالحين تسألني وش الحل ... أخوي ببساطه الموضوع كبير وخطير ... و(الشق أكبر من الرقعه بكثير) ... وحنا ننتظر المطر الله يجيبه ... وآخر الدواء (الكي) ... والحل اللي أشوفه بصراحة وببساطه ... (في الحل) ...؟؟؟

أبو محمد : وشو حله ... وش اللي بتحله ... كلامك يا أخي ألغاز ... وش تبي تحل وش تبي تربط ... شكل حر الصيف أثر عليك ... تتكلم بالمطر ... والحل (بالحل) ... أشوفك قمت ما تجمع وأنا أخوك ... ما شفنا (المطر) في الربيع ... تبيه يجي هالحين ... (يا مطره حطي حطي) ... ؟؟؟

طالعني أبو فهد بعيون حاده ... كنه يقول (أنت ما فهمت) ... وبعدين قال وهو (حمقان)...؟؟؟

أبو فهد : أشوفك قمت تتفلسف يابو محمد ... اسمع الكلام اللي يجمد على الشارب ... إذا بغينا الأمور تمشي صح ... لازم نبتعد عن الحبوب المسكنة ... والإبر المهدئة ... والتخدير الموضعي ... والارتجال اللي ذبحنا ... ونظرية شد لي أقطع لك ... وتفضيل زيد على عبيد ... والشور شورك يا يبه ... وقبل كل شي لازم نعرف نوعية الأرض اللي حنا واقفين عليها ... ونحدد الهدف اللي نبغاه ... ونعرف قدر أنفسنا زين ... وبعد كذا نقدر ننطلق بخطوات واثقة ... وإستراتيجية واضحة المعالم ... وخلك عاقل ... (مد لحافك على قد رجليك) ... فهمت القصد ...؟؟؟

أبو محمد : شكل الأمور بتتحسن ... مواريها خير إنشاء الله ... وهاللجنة اللي شكلوها بتعدل الوضع ...؟؟؟

أبو فهد : أخوي المشكلة ما هي في اللجان ... المشكلة إنها تخر مع كل مكان ... والله لو سووا عشرين لجنه ... ما راح يتغير الحال ... إذا ما طلعوا بنتيجة لدراسة شاملة عن مسببات الحالة اللي وصلنا لها ... الأندية تشتكي ... والإدارات تشتكي ... وأعضاء الشرف يشتكون ... والجهاز التدريبي يشتكي ... واللاعبين يشتكون ... والحكام يشتكون ... والجماهير يشتكون ... والإعلام يشتكي ... من بقي مبسوط علمني ...؟؟؟

وسكت شوي علشان (يلتقط الأنفاس) ... وهدأ من إنفعاله شوي وقال بنبرات فيها آهات وحزن ...؟؟؟

يا أخي ... هالترسبات اللي عشعشت في هالعقول المريضة ما جت من فراغ ... يبي لها تنظيف من أساسها ... أخوي المشكلة فينا حنا ... معظمنا فاهمين مبدأ الرياضة عموما والكرة خصوصا بشكل عكسي ... دائما نتعامل بالمبدأ القائل (إن لم تكن معي فأنت ضدي) ... ببساطه ... مجتمعنا الرياضي مجتمع (مريض جدا جدا) ... ويحتاج لأطباء متخصصين ومحترفين في عملهم يشخصون الداء والدواء ... والعلاج يبي له وقت وصبر ... وأطبائنا الموجودين أكثرهم (عليميه) ... يتعلمون فينا ... وهذا اللي ذابحنا ...؟؟؟

أبو محمد : وش تقصد يابو فهد ...؟؟؟

أبو فهد : أقصد وأنا أخوك إن دراساتنا دائما ما تكون مبتوره وحلولنا وقتيه ... قبل ما نبدأ لازم نكون واقعيين ... مع أنفسنا قبل كل شيء ... ونبتعد عن الإرتجال اللي ما ذبحنا غيره ... والا ... الشور شورك يايبه ... والراي رايك يايبه... المفروض نستفيد من تجارب الآخرين اللي سبقونا ... ياخوي شف اليابان وأمريكا وش سووا ... وشف التخطيط اللي مشوا عليه ... وشف ربعنا وش قاعدين يسوون ... وتعرف الفرق ...؟؟؟

أبو محمد : والله يابو فهد كنك تتكلم بلغة ثانيه ... ياخوي أنت تروح بعيد ... قصدك ما هوب واضح ... كلامك مشتت وفيه غموض ... وضح لي أكثر وعطني أمثله ... فهمني ...؟؟؟

أبو فهد : اليابان قبل كم سنه ... سوت أندية جديده من الصفر ... أندية كرة قدم فقط ... وسوت دوري جديد ... وتصدرت آسيا ... وشفنا منتخبهم للناشئين في بطولة العالم تصدر العالم ... ومستوى منتخبهم الأول في كأس العالم اللي (يشرف) ... وشفنا جماهيرهم في الدوحة قبل كم سنه وهم يكنسون مدرجات الملعب ومنتخبهم خاسر ... الجماعة جو من ورانا ووسعوا الفارق بيننا وبينهم في أقل من عشر سنوات ... صاروا عالميين ... لأن مستوى الوعي عندهم (مختلف) ... أنت تصدق إن فريق جابيليو وفريق شيميزوا ... حديثة ما لها 7 سنوات ... وشف كم بطولة آسيوية جابوها... أما أمريكا فموضوعها شكل ثاني ... مختلف تماما وطويل ويبي له نقاش لحاله ...؟؟؟

أبو محمد : إيه ياخوي لكن اليابان وأمريكا عندهم إمكانيات وحنا ما عندنا ... خلك واقعي ...؟؟؟

أبو فهد : أنا واقعي أكثر منك ... إذا ما عندك إمكانيات لا تحط رأسك بروسهم ... بعدين تغرق وأنا أخوك ... يا أخي شف وشلون تدار الأندية ... ومستوى تفكير الإداريين واللاعبين ... ووعي الجماهير ... وقارن معنا ... ما قلت لك لازم تعرف قدر نفسك ... وبعدين تحدد هدفك ... ومد لحافك على قد رجليك ... ومن كبر اللقمة غص ... ؟؟؟

أبو محمد : والله يابو فهد ما أدري وش أقول حيرتني ...؟؟؟

........................... اسباب عزوف الجماهير ...........................................


أبو فهد : أبعطيك مثال بسيط ... خذ مثلا قبل شهرين ... الربع درسوا نظرية عزوف الجماهير عن الحضور للمباريات ... وهات اجتماعات ولجان ... وفي النهاية كما هي العادة ... ظهرنا بقرار غريب وعجيب ... ويقولون إنه في صالح الأندية ... (الله يخلف) ... تصدق إنهم درسوا (القشور) وتركوا (الزبده) ...

أبو محمد : وشلون درسوا القشور وتركوا الزبده ...؟؟؟

أبو فهد : يا أخي دراستهم تبين إنها ما تعمقت في أسباب العزوف الجماهيري ... أنت إذا بغيت تدرس حاله معينه (حط نفسك) في المكان الصحيح وإسأل المعنيين ... وبعدين إدرس الحاله ... ماهوب تطالعهم من برج عاجي ... وبعدين تصدر الحكم ... أنت حط في المنتدى سؤال عن أسباب العزوف الجماهيري ... وشف الإجابات ... وقارنها مع القرارات اللي طلعت ... وبتعرف قصدي ...؟؟؟

أبو محمد : يعني برايك يابو فهد ... وش هي أسباب العزوف الجماهيري ...؟؟؟

أبو فهد : أنا أبعطيك بعضها من اللي ببالي ... ومتأكد إن عند الإخوان كثير منها ... لأن كل واحد ينظر من زاويه مختلفة ... المهم من الأسباب اللي ببالي :

1- وش تتوقع من دوري يحسم في مباراتين بس ... يعني باقي المباريات ثانويه ما تستاهل الحضور.
2- وشلون تبي الجمهور يحضر وأنت ماخذ اللعيبه للمنتخب طول الموسم .
3- رح للملعب – خصوصا ً إستاد الملك فهد ... وشف المرمطه والحوسه اللي تصير لك حتى توصل ... وبعدين شف الحوسه اللي تصير بعد ما تطلع ...
4- حوالي 80 % من الحضور من الطلبه ... والمباريات القويه تبدأ بعد صلاه العشاء في مكه ... يعنى على ما تخلص المباراة وترجع بيتكم تكون الساعه واحده بالليل .
5- التلفزيون ينقل مباراة قويه ... وفي نفس الوقت تكون فيه مباريات ثانية بالملاعب المختلفة ... أكيد الجماهير بيطالعون اللي بالتلفزيون وقدامهم (براد الشاهي) ... أريح لهم وأقل كلافه ...
6- والغريب كنهم مانين على الهلال ... يقولون إن جمهور الإتحاد الأكثر حضوراً في الثلاث سنوات الماضيه ... شفت وشلون دراساتهم مبتوره ... وإنهم (يلفون) الأمور على كيفهم ... هالحين تأخذ اللعيبه مني طول الدوري ... وتنقل بالتلفزيون مباريات الهلال أكثر من غيره ... وتخلى النهائيات في جده ... وتقول جمهور الإتحاد أكثر ... الجماعة ما يشوفون إستاد الملك فهد في البطولات الخارجية ... ما أدري (نسوا) أو (يتنيسون) ...؟؟؟

أبو محمد : والله يابو فهد ... كلامك درر ... ولي طلب من الإخوان في المنتدى ... (ياليت كل واحد منكم يذكر اللي يعرفه من أسباب العزوف الجماهيري) ... غير اللي ذكرها أبو فهد ...؟؟؟

لكن يابو فهد يقولون إن فيه شركة أخذت تذاكر المباريات وتبي تدفع مبلغ مقطوع ... وإن الأندية تبي تكسب ودخلها راح يزداد ...؟؟؟

أبو فهد : أخوي علمني وش راح تسوي الشركة إذا أخذ المنتخب اللاعبين اللي يجيبون الجماهير ... إذا صارت محطات مثل أوربت تنقل المباريات ... أكيد الشركة تبي تتدخل بالنقل التلفزيوني ... وبأوقات المباريات ... وفوق هذا ... الدوري كله مباراتين بس ... راح تشوف الشركة تتدخل وتطالب بتغيير الدوري وأعادته الى (سباق النقطه) زي العالم ... وبتطالب بمشاركة اللاعبين الدوليين ... وإلا أكيد بتفلس الشركة ... والموضوع ما راح ينتهي على خير ... دعاوي ومشاكل ومطالبات ... ؟؟؟

وبعدين وشلون تبي جمهور الهلال يدعم خزينه النصر مثلا والعكس صحيح ... وشلون تعطي نادي من حضور جماهير نادي ثاني ... أنا أتحدى لو طبقوا النظام الصحيح ... إن أي نادي يجيب دخل أكثر من الهلال ... وأكيد الهلال بيجيب (دبل) على اللي بعده ... ياخوي حدث العاقل بما لا يليق .. فإن صدق فلا عقل له ...؟؟؟

أبو محمد : بديت (أحتر) وأتضايق يابو فهد ... وش تشرب خل نبرد على قلوبنا ...؟؟؟

وبعدين يابو فهد ... أكيد هالكلام مأخوذ بعين الإعتبار ... وحنا هنا نتسائل ... لكن أكيد مثل هالأمور ما تفوت على المسئولين ...؟؟؟

أبو فهد : أقول عسى ولعل كلامك يصير صحيح ... وأكون أنا مخطيء ... هذا اللي أتمناه ...لكن اللي يشوف الطريقة اللي وزع فيها دخل المباريات ... يحس إن الكوره في (وادي) واللجنه في (نهر)... , وإن الجماعة طلعوا بدراسه ملخصها ... لا تزعلون (الكبار) ... وبعدين الجماعة (وزعوا) دخل المباريات حسب نسب معينه ... والأندية إلى فئات عجيبة ... والفلوس على الأندية حسب موقعها في البطولات ... وهذي الطريقة ما فيها أي عدل أو منطق ... ؟؟؟

والعجيب إنهم يقولون ... بعد دراسة وافية ومستفيضة ... مشكلتنا إننا (نبتكر) من بنات أفكارنا ... علشان نقول للناس شفتوا وش سوينا ... يمكن عندنا عقده الشعور بالنقص ... ما أدري ... الله أعلم ...؟؟؟

أبو محمد : وشلون يابو فهد ... يعني هالموضوع والدراسه ماهي عاجبتك ...؟؟؟

أبو فهد : المفروض نبدأ من حيث توقف الآخرون ... ونستفيد من تجاربهم ... مشكلتنا حب العمل (الإرتجالي) يمشي في عروقنا ... أنا أقول رأيي اللي يحتمل الصواب أو الخطأ ... وأنا مقتنع فيه ... حنا نعرف إن (1 + 1 = 2) ... لكن الجماعة حطوا نظريتهم الخاصة ... واللي تشخص الواقع اللي حنا فيه ... وبعدين أنت شفت أحد ناقش هالموضوع ... الصحافة يا غافل لك الله ... الكتاب والنقاد بين أمرين ... بعضهم يقول (في فمي ماء) ... والقسم الثاني (الشور شورك يا يبه) ... أو فاضين يشرشحون في الضعيف (أبو زنده) إلى يومك ... مسكين أكلوه لحم وعظم ... ما بقوا فيه شيء ... و(يا مطره حطي حطي) ...؟؟؟

أبو محمد : طيب يابو فهد ما تظن هالقرار فيه فايده للأنديه والجماهير مثل ما يقولون ...؟؟؟

أبو فهد : والله اللي أظنه إن الرئاسة فيها موظفين متخصصين في علم الإحصاء ... وحنا نعرف إن الإحصاء أحد أهم عناصر تطور الأمم ... علشان كذا طلعت لنا نظريات النسبة والتناسب ... 30% حقت لاعبين المنتخب ... وبعدين نسبة توزيع الدخل ... ونسبة نقل المباريات ... واللي أشوفه إن هالنسب الجديده ... تفتقد لأبسط قواعد (العدل والمنطق) ... وهذا غيض من فيض ؟؟؟

ملاحظة : توزيع النسبة موجود على هذا الرابط بجريدة الجزيرة : بقلم الأستاذ طارق العبودي

http://www.suhuf.net.sa/2002jaz/may/16/sp5.htm

أبو محمد : وشلون غيض من فيض

أبو فهد : حنا تركنا اللي يسوونه العالم كلهم ... وطلعنا بعادتنا المعروفة (خالف تعرف) ... عندك مثلا ...؟؟؟

1 - المربع الذهبي اللي أثبت فشله وجاب لنا المشاكل ... وتبديله بالسلم الماسي،
2 - النقل التلفزيوني ... (توقيع عقد نقل المباريات غير المنقولة ... لاحظوا (غير المنقولة) في التلفزيون السعودي ... ما أحد سواها قبلنا ...؟؟؟
3- لعب الأندية بدون نجومها طوال الموسم ... الأندية تدفع الفلوس ... والمنتخب يرجع اللعيبه مصابين ... ورؤوسهم منتفخة على أنديتهم بعد ... ؟؟؟
4 - نسبة الـ 30% ... يوزع لعيبه الأندية عليهم بالقطاره ... والنقاد ينتقدون الأندية إذا طالبت بحقوقها ...؟؟؟
5- السماح بسرقه اللاعبين من أنديتهم وتسجيلهم في منتصف الموسم ... مع عدم تسديد الحقوق للاعبين إعتزلوا
6- شراء مكان لعب المباريات بالمادة ... ما أدري أي نظام يجيز هالكلام ... ياخوي خلهم يشترون المباراة كلها أحسن وأستر لهم ...؟؟؟
7- ترشيحات الأندية في المسابقات الخارجية ... ما فيه قاعدة ثابته وواضحه ... حسب قوتك ...وعلو صوتك ... يصير النظام ...؟؟؟
8- الاعتداء على الحكام ... والشتم والتهم العلنيه عليهم ... من الإداريين والصحافة دون رادع ... وإيقاف الحكام ... وترك المعتدي حراً طليقا ... يعيث في الأرض فساداً...؟؟؟

وأشياء كثيره ماهي على بالي هالحين ... إلا على فكرة يابو محمد... أشوفك تحب الأمثال ... وراك ما توزع كم مثل يناسب هالمواضيع اللي ذكرتها لك ... ؟؟؟

أبو محمد : الله يرحم والديك فكنا من الأمثال ... شغلتها متعبه ... والسوالف معك ساخنه يابو فهد ... بس والله الحر طقنا في ... والتمرين خلص ... وحنا ما تكلمنا عن الهلال وإستعداده للسوبر... وأنت في راسك كلام كثير وأفكار... ودي توضح لي بعضها... وش رايك نروح نكمل الدردشه والسواليف في البيت ؟؟؟

........................... الهلال والبطولة الآسيوية .............................................


أبو فهد : المواضيع ما تخلص ... وأنا وراي مشوار ضروري هالحين ... وبالنسبه لأأفكاري ... أنا عود من عرض حزمه ... وكل واحد في راسه أفكار يتصور إنها صح ... والمشكلة إن كل واحد فينا متعب حاله ... شايل هم و(يقرقر) وصوته ما هوب مسموع ... حتى المنتديات ... صارت حلقة تنفيس للواحد بس ... لكن ما فيها غير التعب ... والصوت فيها ما يوصل بعيد ... وآخرتها كنك يابو زيد ما غزيت ... ما راح يتفاعل معك إلا القليل ... وكثيرين ما هم حولك ... ؟؟؟

أما بالنسبة لإستعداد الهلال للبطولة الآسيوية ... وش تبيني أقول (هذا البير وهذا غطاه) ... والسكوت أرحم وأنا أخوك ...؟؟؟

أبو محمد : وشلون السكوت أرحم ...؟؟؟

أبو فهد : أنت تذكر بطولة مجلس التعاون اللي صارت في الرياض 1405هـ ...

أبو محمد : أكيد أذكرها يابو فهد ... أحد ينسى ... المطر يهل ... والناس جالسه في الملعب ما تحركت ... وهات يا تشجيع على كيفك ... إلين حسمها سعد مبارك ... الله يذكر ذيك الأيام بالخير ...

أبو فهد : تذكر هذيك البطوله جت بعد ما فشلنا المنتخب في كأس الخليج ... وبعدين المسؤولين والإعلام والصحافة ... حملوا الهلال مسؤولية رد الإعتبار ... وسووا لهم ضغط نفسي ... وشحن جماهيري ... وكان الجميع واقف مع الفريق ... رعاية الشباب والمسؤولين وأعضاء الشرف والصحافة بأشكالها ... وطبعاً الجماهير الهلاليه ... كانت بطوله مميزة حتى النهايه ... ولا تنسى إنها على مستوى الخليج بس ...؟؟؟

أبو محمد : وش تهدف له يابو فهد ...؟؟؟

أبو فهد : أقول ما أشبه اليوم بالبارحة ... تذكر ذيك الوقفة مع النادي ... وشف هالحين والهلال يلعب على السوبر الآسيوي ... لا بعد وآخر بطوله قاريه من هالنوع ... والجميع ياغافل لك الله ... حتى إدارة النادي واللاعبين ...؟؟؟

أبو محمد : يعني وش تتوقع ... الهلال بيجيب البطوله ...؟؟؟

أبو فهد : وش بطولته ...والله موايها ما تبشر بالخير ... والله يكون في العون ... ما فيه دعم ...أو إستعداد ... أو إدارة .. أو لاعبين ... وشلون بتجيب البطوله ... ما قلت لك شغلنا كله يعتمد على (الإرتجال) ... مع إننا تعودنا بعد كل إخفاق للمنتخب ... تتجه الأنظار للهلال علشان يعيد لنا الهيبه والكرامة المفقودة ... لكن هالمره ما أدري وش أقول لك (الله يستر لا تكون كبيره بس) ...؟؟؟

أبو محمد : لكن يابو فهد الظروف ما تساعد ...؟؟؟

أبو فهد : وش هي ظروفه ... فريق يتمرن له شهر ... ما لعب مباراة تجريبية ...؟؟؟

أبو محمد : طيب يابو فهد ما فيه أندية تلعب معهم ... وبعدين تعرف ثلاثة أرباع اللاعبين في المنتخب ...؟؟؟

أبو فهد : هذا ما هوب عذر ... الفريق بحاجة لدعم قوي نفسي وبدني وعلى أعلى المستويات ... لكن وش تشوف هالحين ... الإدارة (كيف الحال) ... والمدرب (معطيهم أشكل) ... واللاعبين يسحبون رجليهم كنهم (مغصوبين) ... والجماهير كان الله في عونهم ... أما بالنسبة إنه ما فيه أندية ... أنت ما شفت أندية الخليج اللي تلعب نهائيات هالأيام ... كل واحد منها يتمنى يلعب مع الهلال ... بس ينتظرون الإشارة ... وبعدين أخبر الجرايد تقول إنهم (ناوين) يروحون ماليزيا ويعسكرون هناك ... وش غير رايهم ...؟؟؟

أبو محمد : يقولون ما لقوا حجز ...؟؟؟

أبو فهد : انت تصدق هالكلام ... كل همهم يطمعون اللاعبين ... ويخلونهم يحرصون على الحضور ... يخافون إن الإعتذارات تكثر ... قالوا ماليزيا ... ما كن فيه إحتراف يحكم اللاعب ... الظاهر إنهم خايفين العيبة ما ينتظمون ... قالوا ماليزيا ...؟؟؟

أبو محمد : والمعنى يابو فهد وش تظن الهلال بيسوي ...؟؟؟

أبو فهد : أقول خلني ساكت أحسن ... لأن في قلبي حرة ... وفي حلقي غصة ... وفي فمي ماء .........؟؟؟؟؟

أبو محمد : والله يابو فهد ... رأيك مطلوب ... وصوتك بإذن الله مسموع ويوصل ... وأنت شخصية محبوبة ... والإخوان بالمنتدى يبون رأيك ... لا تبخل عليهم ... والعيار اللي ما يصيب يدوش ... وأكيد إن بعض آرائك بتفتح دروب ومواضيع جديده ... الناس تعجبهم الصراحة ويبونها ...؟؟؟

أبو فهد : بعض الأحيان الشجاعة والصراحة تصير (ثواره) ... والسكوت أرحم ... وبعدين لا تنفخ راسي ... قال إيش قال يبون رأيك ... الله يرحم والديك خلني بحالي ...؟؟؟

أبو محمد : طيب يابو فهد شف ردود الفعل على هالموضوع ... وبعدين إحكم ... أنا متأكد من كلامي إنك شخصية محبوبة ومرغوبه في المنتدى ...؟؟؟

أبو فهد : يقولون المويه تكذب الغطاس ... والصيف بأوله ... أنت نزل موضوعك هذا وشف ردود الفعل عليه ... وبعدين حدد إذا بغيت تستمر أو لا ... ليش تتعب نفسك ياخوي وتكتب ... بالنسبة لي أنا ما عندي مانع أسولف وياك ... لكن ما ودي نصير ثقيلين طينه ... يمكن الربع ما يبون كلامنا ... وبعدين لا تجتهد وتحط كل اللي في راسك ... الناس في إجازه ... عن إذنك وراي مشوار ضروري ... مع السلامه ؟؟؟

أبو محمد : مكانك محفوظ يابو فهد ... والوعد بعد ثلاثة أيام في النادي نحضر التمرين ونكمل الدردشة حقتنا ... وخلنا نحدد موضوعنا اللي نبي نتكلم فيه المره الجايه ... وش رايك يكون عن الصحافة ... ؟؟؟

أبو فهد : وهو كذلك والوعد بعد ثلاثة أيام ... مع السلامه ...؟؟؟

ودعت أبو فهد وأنا في ذهني أشياء كثيرة ... ودي يكلمني فيها ... وأبو فهد إنسان زيه زينا ... قد يحتمل رأيه الصواب وقد يحتمل الخطأ ... ولكن اللي ما عندي فيه شك ... هو مساحة الحب والطيبة في قلب أبو فهد للجميع ... ويتمنى الخير وقلبه أبيض ناصع لا مكان فيه للحقد أو الحسد لأي إنسان ... ولكنه أولا وأخيرا إنســـــــــان ...؟؟؟
.................................................................................................... .............

انتهى الجزء الثاني ... والجزء الثالث قريباً بإذن الله وراح يكون عن وجهة نظر أبو فهد في الصحافة ...
وصراحة المواضيع كثيره بس الله يقدرني على أبو فهد ... وهو وده يأخذ إجازة زيه زي غيره ... لكني ما راح أخليه ... الصيف طويل مثل ما تعرفون ... وتونا في أوله ... ما أدري عنكم إخواني ... وش رايكم تبوني (أنخله لكم) ... وأطلع اللي بقلبه ... وإلا تحسون إنه ضيف ثقيل ... وسواليفه مالها سنع ... ؟؟؟

وتقبلوا تحيات أخوكم ..... أزرق هلالي ..... والسلام ختام .

مقالة رائعة جدا ؟؟؟؟
وااكد ان من اسباب عزوف الجماهير غياب اللاعب الجماهيري ....
وارتفاع قيمة التذكرة ...
ونظام الدوري ..؟