إخواني الأعزاء : السلام عليكم

بعد غيبه عن هذا المنتدى العزيز ، تخللها كأس العالم (العجيب) ، عاد لكم حبيبنا (أبو فهد) ، وأبو فهد هذا يعرف بعضكم شخصيته من لقاءات سابقه معه ، واللي ما يعرفونه أختصر لهم وأقول ... أبو فهد رجل أسطوره (خيالي) هلالي حتى النخاع يعيش ويحيا بهلاله وهمومه ... المهم في الموضوع كنت قبل يومين أتمشى حول نادي الهلال ، وشفت أبو فهد بالصدفة (كنه يدور على شيء ضايع منه ) ... يتلفت حوله وشكله سارح ... سلمت عليه ودار بيني وبينه هالحوار المثير ... ويالله السلامه ...؟؟.

............................ الفصل الأول ( في الشارع) ...............................................

أبو محمد : السلام عليكم ... حيا الله أبو فهد ... وينك ياخوي مالك شوفه ... وش هالقطاعة وأنا أخوك ...؟؟؟

أبو فهد : وعليكم السلام ... يا هلا وغلا ومسهلا ... الله يحييك ... ومثل ما تعرف كاس العالم أخذ وقتنا وشغلنا ... الله لا يشغلنا بغير طاعته .

أبو محمد : سلامات وش هالنظارة اللي لابسها ... عسى ما شر ...؟؟؟

أبو فهد : الشر ما يجيك وأنا أخوك ... الظاهر إن الشوف صار شجر (لك عليه) والعمر يمضي ، والصراحة قصيت هالنظارة الخاصة ... علشان أدور لي على شي ما لقيته ...؟؟؟

أبو محمد : تدور على شيء ... علمني وش هو ... يمكن أحصله لك ...؟؟؟

أبو فهد : الله يهديك يابو محمد ... لو انا عرفت (وش هو) ... كان حصلته من زمان ... وما قصيت هالنظارة ؟؟؟

أبو محمد : وش هالحكي يأبو فهد ... أنت صاحي ... تدور على شيء ما تعرفه ... وقصيت نظاره علشانه ... أنت فيك شيء ... عسى ما خرفت ...؟؟؟

أبو فهد : لو إني مخرف كان على الأقل تكون الأمور واضحة ومعروفه ... بس المشكلة إني صاحي ... مثل ما تشوف ... ومع ذلك ما أعرف وش أبي ...؟؟؟

أبو محمد : أبو فهد أنت عادتك تحب تتفلسف ... وأنا أعرفك زين ... بس الله يرحم والديك ... لا ترقص بي ... مزاجي ماهوب رايق ... ضايق صدري عقب كاس العالم ... وأحس بكتمه وضيقة وقهر ... ليتنا ما تأهلنا ... كان ما تمرمطنا هالمرمطه ... ولا تفشلنا هالفشيله ... أرجوك لا تزيد جرحي ...؟؟؟

أبو فهد : ولو أنت على خبري فيك ... ما تغيرت ولا تطورت ... أنت مستغرب من النتيجه ... النتيجه فتاكه ... (أقصد طبيعية) ... ولا شفت فيها شيء غريب ... إلا في عقولكم ... وبعدين تراني ما رحت بعيد ... وأنت تعرف البير وغطاه ... واللي أدور عليه ماهوب بعيد ... يدور في فلك هالموضوع اللي تتكلم عنه ... بس إنه ماهوب واضح ...؟؟؟

أبو محمد : وشلون يعني ...؟؟؟

أبو فهد : يقولون المنتخب فشلنا ... ويبون يصلحون الأمور ... وأنا مشغل نفسي ... أدور على الأسباب والحلول ... تقول أبجيب رأس غليص ... لكن ذهني مشتت ... ما أدري منين أبدأ ...؟؟؟

أبو محمد : اسمح لي ما فهمتك أبو فهد ...؟؟؟

أبو فهد : أمس كنت أتسمع لعيالي ... يلعبون ومستانسين ... ويرددون نشيده أطفال قديمه ... وأنا سارح وأتسمع لهم ... تصدق هم ينشدون وأنا أفكر في المنتخب ... حسيت كنهم يتكلمون عن حالتنا مع المنتخب والرياضه ... وربطت نشيدتهم بالموضوع ... الغريب إنهم جابوا الحل ... اللي عجزوا عنه طوال الشوارب ...؟؟؟

أبو محمد : هاهاها ... من يوم طحت في هالانترنت يابو فهد ... وأنت متغير واجد ... نشيده أطفال ... حلت المشكلة ... وش هالنشيده ... الله يرحم والديك ... خل أسمعها ...؟؟؟

أبو فهد : يقولون (دوها يادوها ... والكعبه بنوها ......... المهم في النشيده الكلام اللي يقول ... الكعكه عند الخباز ... والخباز يبغي الحليب ... والحليب عند البقره ... والبقره تبغى الحشيش ... والحشيش يبغى المطر ... والمطر عند ربنا ... يا مطره حطي حطي ... ... وبعدين كلام واجد ...؟؟؟

فهمت المعنى اللي يدور ببالي يابو محمد ... والا تبيني أوضح لك ...؟؟؟

أبو محمد : إيوالله فهمتك ... يابو فهد أنت دايم تروح بعيد ... والله إنك صادق ... (والمطر عند ربنا ... يا مطره حطي حطي) ... صحيح كن هالنشيده تشخص الداء والدواء ...؟؟؟

بس أنا متأكد إن بعض الإخوان إذا قروا هالموضوع ... يبون توضيح أكثر ... وبيقولون وش تتكلم عنه ... وأقولهم يا إخوان ... أنتوا قريتوا موضوع قبل كم شهر بعنوان ... (الطاسه ضايعه) ... والإ لا ... علموني ... أحد لقاها ... أخبر واحد رد علي وقال ... فيه طاسه عند بيتهم يمكن تكون هي اللي ضاعت ... أقول عسى ولعل أحد لقاها ... علشان يستفيد على الأقل ...؟؟؟

ومشاكل المنتخب والرياضة عموما ماهي جديدة ... لكن الجديد إن المرض يستفحل والدواء غير متوفر ... والمطر عند ربنا ... ويامطره حطي حطي ؟؟؟

يأبو فهد شكل الموضوع قلب (أدبي) ... كله (أمثال وحكم) وما دام الموضوع صار كذا ... أبعطيك مجموعة أمثال ووزعها على كل من :

1 - رعاية الشباب ... 2- لجنة تطوير الرياضة ... 3 - الإتحاد اسعودي لكرة القدم ...
4 - الأندية الرياضية ... 5 - إدارات الأنديه ... 6- أعضاء الشرف ...
7 - الجهاز التدريبي ... 8 - الحكام ... 9- اللاعبين ...
10- الجماهير الرياضية ... 11- الصحافه السعودية ... 12 - النقاد الرياضيين ...
13- المنتديات الرياضية ... 14- الإحتراف ... 15- اللاعب الأجنبي ...
16- كأس العالم ... 17 - المنتخب السعودي ... 18- نادي الهلال ...
19- التلفزيون السعودي ... 20 - القنوات الفضائية ... 21 - التشفير ...
22 - الـ ......؟؟؟

أبو فهد : بس بس وقف ... إنهديت علي ... يكفي ياخوي وعطني أمثالك ....؟؟؟

أبو محمد : الأمثال هي :
1- ما طار طير وارتفع إلا كما طار وقع ...؟؟؟
2 - الغراب اللي قلد مشية الحمامة ، ضيع مشيته ومشية الحمامة ...؟؟؟
3 - من تقيوى عظيم كسره ...؟؟؟
4 - يقتل القتيل ويمشي في جنازته ...؟؟؟
5 - الطاسه ضايعه ...؟؟؟
6 - لقد أسمعت لو ناديت حيا ولكن لا حياة لمن تنادي ؟؟؟
7- مهيب تخر بس منشقه ؟؟؟
8- لا في العير ولا في النفير ...؟؟؟
9- القافلة تسير والكلاب تنبح ...؟؟؟
10- يامن شرا له من حلاله عله ...؟؟؟
11- مأكول مذموم ...؟؟؟
12- ما كل مجتهد مصيب ...؟؟؟
13- باب يجيك منه ريح سده وإستريح...؟؟؟
14- من لم ينفعك حضوره ... لم يسئك غيابه ...؟؟؟
15- لا تنظر الى الإبريق ولكن إنظر الى ما فيه ...؟؟؟
16- لاغابه بدون شجرة معوجه ... ؟؟؟
17- كل باب يغلق إلا باب الموت ...؟؟؟
18- من أطال الأمل أساء العمل ...؟؟؟
19- من قال ما لا ينبغي سمع ما لا يشتهي ...؟؟؟
20- ما كل ما يتمنى المرء يدركه تجري الرياح بما لا تشتهي السفن ...؟؟؟
21- الأعمى لا يرى نفسه ...؟؟؟
22- سعيد أخو مبارك ...؟؟؟

أبو فهد : لا لا لا يابو محمد هذي قويه شوي ... شكلك بتقلبها فوق راسي ... أمثالك أكثرها (حش) ... ما فيها اللي يفتح النفس ... يا أخي (تفاءلوا بالخير تجدوه) ... أمثالك هذي ما توكل عيش ... بلها واشرب مويتها ... لكن تدري ... اعرضها في المنتدى ... وخل الإخوان يتسلون فيها ... وكل واحد يوزعها على كيفه ... والصيف بأوله وأنا أخوك ...... وزيك عارف ... في الصيف تكثر السوالف ...؟؟؟

بالنسبة لي أخاف أحط المثل في غير مكانه الصحيح ... توديني في داهيه ... بعدين يا حبيبي خلني بعيد عن تسحيباتك ... وش رايك نروح نشوف تمرين الهلال ونكمل كلامنا ...؟؟؟

ورحت مع أبو فهد نشوف تمرين الهلال ... ودار بيني وبينه كلام كثير ... ودي أقوله لكم ... لكني عارف لو حطيته لكم في موضوع واحد ... بتملون من طوله ... ؟؟؟

انتهى الجزء الأول ... والجزء الثاني يوم الأحد القادم بإذن الله ... نصيحتي لكم ... لا يفوتكم ... تراه ساخن جداً جداً جداً ... أسخن من صيف الرياض ... وصراحة أنا في راسي مواضيع كثيره ودي أسولف فيها مع أبو فهد ... وهو وده يأخذ إجازة زيه زي غيره ... لكني ما راح أخليه ... أبنفض اللي في راسه... الصيف طويل مثل ما تعرفون ... وتونا في بدايته ... ؟؟؟

وتقبلوا تحيات أخوكم ..... أزرق هلالي ..... والسلام ختام .

يا هلا والله بأزرق هلالي ,,
مرحبا بك و بأبي فهد ,,

أي والله يا مطره حطي حطي
هذا هو الحال للأسف ,,

والأمثال راجع لها ..