®©™سلااااااااااااااااااااااااام ™©®


حياكم الله جميعاً


والله حالة

ريفو البرازيلي يسولف عن الضبان


هذي طال عمركم من سوالف خذ وخل ولا تدقق بالحيل

يعني اسمع ووسع صدرك

الهدف زرع الضحكة على خششكم الشينة فقط



روى لنا اخونا نقلاً عن خاله ابو براهيم

( دايم يسند عليه في مثل هالقصص .... يقولون اذا كذبت فــ سنّد )

يقول ان خاله كان رايح يتمشى في الصمان مع صديق له اسمه ابو حمد

جلسوا بهاك المحل يستريحون يوم طب عليهم واحدن من اهل الشمال

قلط وتقهوى ثم قال ماعندكم سوالف او علوم؟

قالوا : لا .... عطنا كان عندك

قال الشمالي : كنت طالع قبل كم سنة اتقنص واصيد ضبان

ومسكت لي كم ضب ... وانا اللي اربطهم بهاك الخيشة واحط الخيشة بحوض الونيت

وامسك الطريق ابي الديرة ... ويوم وصلت حول المزفلت وقفت شوي ... ونزلت من الموتر

يوم سمعت صوت آذان !!! يا ولد من وين الصوت ؟؟ مافي المكان احدن غيري !!

وانا اتلفت وادور من وين الصوت ؟ اثاريه من حوض الونيت

شوي واشوف يد الضب طالعه من الخيشة

فتحت الخيشة وطلع واحدن من الضببة

قلت له انت اللي تذن ؟؟؟!!!

قال الضب : ايه وودي انزل انا واخوياي اللي في الخيشة علشان نصلي

قلت ابشرررررر ..... وانا اللي انزلهم من حوض الونيت

ويصفون الضببه يصلون .... وقال لي الضب تقدم خلك امام لنا

قلت له : ابدددددد والله ما يصلي بنا غيرك ... انت شكلك راعي طاعة وتوك مذن

ويتقدم الضب ويصلي بنا

وعقب الصلاة والتسبيح والتهليل قال لي الامام (الضب) : رجعنا للخيشة هالحين

قلت : ابددد ما يصير .... وشلون ارجعك للخيشة وانت توك مصلي(ن) بنا

وانا اللي افكهم بالبر واقول لهم ارجعوا لبيوتكم تراكم عتيقين


( لا تستعجلون الجاااااااااي ادهى وأمرررررررررر )


قال ابو حمد : معقولة الضب يتكلم ويصلي بكم ؟؟؟!!!

رد الشمالي : يعني قصدك اني اكذب ؟؟؟

طمر خوينا ابو براهيم ورد علي خويه ابو حمد وقال : يبو حمد ترى الرجال صااااااااادز وما كذب

اسمع هالسالفة اللي صارت لي

كنت مره اتمشى بالصمان

واشوف هاك الضب المنطلق .... وانا اللي اجيب البندق وامدها ابرمي الضب

شوي ويوقف الضب ويرفع يده ويقول : تكفى يبو براهيم مهيب هي

تكفى لاترميني

قعد الضب يناظرني وهو رافع(ن) يده

حتى اني شفت الشعر في ابط يده

يوم شفت ان الضب عرفني وقال لي تكفى وانا اللي اتركه يروح



قال الشمالي : هالحين الضب عرفك ورفع يده ؟؟؟!!!!!

قال ابو براهيم : يعني عادي يذن ويصلي بك الضب؟؟

قال الشمالي : انا اشهد انك ما كذبت يبو براهيم




صورة للي يكذبون هالسالفة





®©™وسلااااااااااااااااااااااااام ™©®