"صباحكم" / "مساءكم" جمــال وعـذوبـة .. <<< مع هالرياح ما ظنيت
(( فكرة .. عمل ! ))
في آخر إختبار لي وبعد ما طلعنا من القاعة .. كانت الدنيا فوضى شوي .. الا تصحبني صديقتي وتقول "تعالي نفطر من د.كيف أنا ما فطرت اليوم " قلت لها اوووكي قدام ! * للي ما يعرفون .. فتحوا لنا د.كيف بالجامعة ومحلين بعد
يوم وصلنا وكالعادة طابور يسد النفس ! وقفت هي باللاين وانا جنبها اسولف معها .. الا تقولي "شوفي وش مكتوب بـ هالإعلان الكبير , ( بدأ التوظيف في هذا الفرع ) ..! قلت لها :وايش يعني ؟! انا شايفته مليون مرة وما لفتني بشيء , قالت : لا يا ذكية .. عندي فكرة .. وش رأيك نشتغل هنا بوقت البريكات ساعة أو ساعتين "
أنا ما صدقت ان صديقتي هذي بالذات تقول هالحكي ...
حسيتها شاربة شيء
قلت لها "وش الحكمة اللحين..؟" قالت "أمتع نفسي وأظيف تجربة جديدة ..أنا أخوي يدرس برى ويشتغل كل يوم شغلة بالساعات .. ترى الوضع اوووكي!"
المهم ... قمزت خطوتين وطلبت من المسئولة أوراق عن التوظيف وسألتها عن طريقتهم .. وخويتي واقفة باللاين ولا كنها تعرفني .. ( جاحدة )
(( ناقصك فلوس ! ))
بعد الفطور الرايق وكان عبارة عن "2 كرواسان , واحد بالزعتر و واحد بالشوكليت + هوت شوكليت و Cofe Of The Day " وكانت قهوة امريكية الله ياخذ العدو المشكلة ما احبها..
اجتمعنا بالبنات وصارت سواليف وهبال وضحك .. تعرفون آخر اختبار وكلن على همه سرى .. ذيك بتسافر بعد يومين والثانية عندها حفلة ثاني يوم ! ومالكم بالطويلة ...
وتطلع سوليدره من شنطتها ورقة التوظيف تبع د. كيف ! بس قبل لا أكشف عنها قلت للبنات :"وش تتوقعون بوريكم! " وتجي أنواع الاجابات قسم جاني إحباط .. الصدق عاد ما قهرني غير ذيك اللي تقول "دعوة عرسك ! " ودي لو كسرت الشنطة فوق راسها كان ازين ! قايلتن من سنة جدي .. مافي زواج قبل شهادة التخرج ع قولة خويتي امسك شهادتي بيد و عريسي
بيد
وأنا أطلع لهم الورقة وحست لوهلة أنهم مب مستوعبين ابددد ! عاد تعرفون وش أول كلمة سمعتها "ناقصك فلوس ؟!!"
(( مجرد رأي ))
بعيداً عن السيناريو الذي حصل , لم يكن يهمني اي ردة فعل بإستثناء رأي أهلي في عملي بالساعات بـ محل د. كيف , وكنت أعرف أن الموضوع مرفوض تماماً عند عائلة مثل هذه !
ظننت لوهلة أنني ساذجة بقدر غباء هذا المجتمع !
ولكنني أعرف ... لن أعمل في المحل ولكنني قررت تقمص ذلك الدور لأعرف الآراء والإنطباعات على حقيقتها , كنت أبحث عن مبرر واحد تجاه الرفض .. ( هل سأجد ؟؟!)
(( بنتي خدامة ! ))
وصلت البيت بعد ما رفضت دعوة صديقاتي بالغداء معهم في المطعم , كنت من جد تعبانة واحس جسمي يحتاج لإسترخاء واكيد ذهني يحتاج ايضاً لتصفية بعد ما هلكني الإختبار !
وكالعادة رميت العباية يمين و الطرحة يسار وشنطتي اختفت مدري وين .. تعرفون الغرفة مرتبة !
و طلعت برى الغرفة وتركتها كـ العادة مفتوحة للداخل والطالع , قسم احس ان غرفتي "لوبي" أو "دار ضيافة "على غفلة ! ويوم رجعت للغرفة الا القى اخوي الكبير ماسك بيده ورقة التوظيف ويناظر ويضحك !
سحبتها من يده وانا اقول .."خييييييييير شدخلك !! من سمح لك تفتش ؟!" طبعاً صارت هواشة بسيتة مب لازم تعرفونها ! منعاً لـ تخريب البريستيج اكثر <<< هو بقى بريستيج اصلاً
المشكلة مب هنا , المشكلة نذالته الي تسري بدمه , جلسنا ع الغداء ولا يقول ميد امي " يووووه يمه شفتي بنتك طموووحة جداً , تصدقين لقت لها وظيفة !" أمي ما صدقت قالت :"يؤ ... صدق ؟ وين ؟! " وانا اخش عرض ع الموضوع.. احاول تدراكه .
وصار نقاش طويل وعريض يكفي اقولكم ما يستفاد منه ..:
لكن لا يهمكم .. ظليت متقمصة شخصية "الفتاة الطموحة " , الى اللحين أهلي ما يدرون اني استهبل عليهم وابي اشوف ردة فعلهم .. لكني في الحقيقة موافقة وبقوة لمزاولة العمل حتى لو كانت بنت ناس .. يعني وش فيها لو وقفت ساعة خلف الكاشير واسدت خدمة للآخرين , وقضت فيها وقت ممتع ومفيد , واكتسبت فيها مهارة خاصة بالتعامل مع الزبائن !
من جد شيء حلو أن الإنسان يهتم بـ هالجانب اللي غفل عنه الكثير ..
ويقهرني شيء واحد بس , اذا قالوا لك .."انت ولد فلان معصي تشتغل هالشغلة ؟؟!" طب هالإنسان واثق من نفسه ولا يهمه احد وش فيها لو كسب رزقه! أو متع نفسه وضيع وقت ! وش فيها لو سوى شيء بباله ونفسه يجربه ويسويه ! وش فيها لو طور امكانياته و حط في رصيده كفاءة جديدة !
ياناس يا عالم يا هوووه .. اتركوا الواحد في حااااله ! ان شاءالله يسوق سيارة ليموزين و يركب اللي يسوى واللي ما يسوى ااييييش دخلكم !
(( من الواقع ))
× رسولنا صلى الله عليه وسلم , كان يرعى الغنم وهو صغير .. وكذلك نبينا موسى عليه السلام , أما ادريس عليه السلام فقد كان خياطاً !
×× بقي بن مخلد الأندلسي احد علماء الأمة , عمل في كل مدينة يقف فيها وهو مسافر من الأندلس الى العراق , قضى من عمره خمس سنوات ليصل الى العراق , لقد عمل من عرق جبينه ! فقط ليصل الى العراق ويطلب هناك العلم . لن أخوض أكثر في مسألة الأعمال التي زاولها يكفي أن احدها كان "حمالاً " لأمتعة الناس !
××× أما هنا .. فـ مثالي مختلف , لأنه لا يتحدث عن أشخاص يبحثون عن كسب رزق , بل يتحدث عن أشخاص زاولوا مهنةً احبوها وحاولوا تجربتها .. لقد قام عدد من الشخصيات الأرستقراطية في انكلترا قديماً بعمل مسرحية خاصة بهم , لقد كان مذهلاً أن يتنازل الـ "دوق" ليقف فوق خشبة المسرح أمام الناس ويؤدي ادواراً , كان من الممكن أن يؤديها ممثلٌ مسرحي
مغمور . ولكن .. كان الإلحاح والرغبة أقوى من اي شيء حتى من المستوى الطبقي.
(( قبل النهاية ))
أوجه اسألة اتمنى الإجابة عليها ::
× رأيك تجاه الموضوع , هل الفرد يقع ضحية ظلم المجتمع ؟ ×× ماهو العمل اللي حبيته ولكن صدمك الآخرين بمنعك من الخوض فيه ؟ ××× عمل تتمنى مزاولته ولكن هناك ما يُعيقك ؟
و هذي هي استمارة التوظيف .. وشوفوا بياناتي ان شاءالله تعجبكم ..
الأسم: سوليدره بنت الزعيم ! العنوان : المجلس العام , بجوار منزل رائدة الزعيم تماماً تاريخ الميلاد : Jun 2007 الجنس : طبعاً انثى ! الحالة الإجتماعية : عانس 100% الى اجل غير مسمى .. << اذا تزوجت بجي اعدل هالبيان الجنسية : مجلساوية رقم جواز السفر : ما يحتاج انا دايم بالمجلس ما ابعد كثير رقم الجوال : 0555555555 - تحويلة رقم 902 //أو // 05666666666- تحويلة رقم 1100 // وقريباً زين ان شاءالله
بالنسبه للفكره
صـرآآحه انا مع المجتمع بهذي بالذات مع اني دائما من اشد المعارضين لقرارات المجتمع
يعني بالعقل انا ناااقصـه هم وغثا اطلع من المحاظره ابي انسدح اروح اوقف واشتغل
يمكن انتي لسا بالمستويات الاولى حاسه انو في وقت فراغ كبير
بس اصبري شوي ويجيك الهم الصح
وبعدين غير عن التعب
شوفي البنات زميلاتك اي احد وش بيقول؟
لاتقولي ماهمني كلام الناس كلنااااا نقول كذا بس بالواااقع احنا نمشي تحت كلامهم
يعني ودي اجرب تجربه جديده مو لدافع مادي فقط لحب الفضول
بس الناس اللي حولك مستحيل يفهمون اللي انتي فاهمته
لو تفهمت وحده ثنتين الباقين لااااااا
بيفسرون لعملك هذا الف تفسير غير الاشاعات .........الخ
عاد وش يفكـنا من القيل والقال
موظوع روعة صراحة ,, بالنسبة لي ادور الفكة من الاختبارات وانتي بتشتغلين للآمانة ,, ما راح اوافق على ان اختي بتشتغل مثل هالشغلة ,, ماهو عيب ,, لكن ابي لها كل خير
الأسم: ذآيب بن التايب العنوان : في المجلس العام بعد , خلف بقالة المشاغب خان تماما تاريخ الميلاد : مانيب حافظه الجنس : زكــٌرٍ الحالة الإجتماعية : آعـــــــزب الجنسية : سعودي , واشجع كوريا رقم جواز السفر : ماني بحافظه بعد رقم الجوال : ما اقدر احطه ,, ماني ناقص ازعاج بنات ؛<_ هين البريد الالكتروني : نفس اللي فوق
اشكرك اختي سويرة على الموظوع الرائع
واتمنى اني ما كنت ظيف ثقيل على هالصفحة ,,
× رأيك تجاه الموضوع , هل الفرد يقع ضحية ظلم المجتمع ؟
الفرد في رأيي هو ضحية ( الاستيقاظ لاكل صحن الفول ثم العودة للانسداح )... والا المجتمع ماله دخل
×× ماهو العمل اللي حبيته ولكن صدمك الآخرين بمنعك من الخوض فيه ؟
هذا --> << ... لا عاد الصراحة ( كنت اتمنى افتح مطعم كبير... لأني طباخ ماهر جدا )
××× عمل تتمنى مزاولته ولكن هناك ما يُعيقك ؟
افتح ( كوفي شوب ) واشرف عليه بنفسي في الفترة المسائية.. خصوصا المشروبات اللي تحتاج مهارة خاصة في المكونات لتوازن الطعم والنكهة --> ( كابوتشينو - موكا - فرابي..... الخ )
الأسم: حصاة كبيرة العنوان : هذاي تاريخ الميلاد : بلا فزايح الجنس : بني آدم الحالة الإجتماعية : مستورة والحمدلله... من دول العالم الثالث الجنسية : قصيمي مولود في الرياض.. وعايش في الرياض.. وهايم في الرياض.. وباقي في الرياض رقم جواز السفر : اقسم بالله ماحفظته رقم الجوال : قلنا لكم بلا فزايح
نصيحة : دامك إنتي مقتنعة بأيه أمر ( يوافق الدين ) نفذيه ، ولا تنتظرين رأي المجتمع. صحيح إن الجميع مقيد بأحكام ( وضعيه ) ، لكن ما يمنع إننا نتمرد عليها إن كنا مقتنعين بجوازها.
الصدق عاد ما قهرني غير ذيك اللي تقول "دعوة عرسك ! " ودي لو كسرت الشنطة فوق راسها كان ازين !
نتمنى لك التوفيق بالجامعه وما بعد الجامعه والجميع ،،،
إقتباس
رأيك تجاه الموضوع , هل الفرد يقع ضحية ظلم المجتمع ؟
اعتقد انه يجب ان نحدد نوع الفرد هل هو ذكر ام انثى ،،،
لا اعتقد ان " الذكر " يمكن ان يكون ضحية المجتمع فليس هنالك ما يلزم عليه تبني قناعات او رؤى كما ان المساحة المتوفره لديه كبيرة جدا اضافة الى قدرته للحد من تدخلات الآخرين .. الفتاه الوضع مختلف تماما حتى اذا كان الشرع في جانبها فالتأثير الاجتماعي في كثير من الأحيان اقوى منها ومن الدين ،،،
إقتباس
×× ماهو العمل اللي حبيته ولكن صدمك الآخرين بمنعك من الخوض فيه ؟
لا ادري كيف يمكن لي الأجابة على هذا السؤال وانا اعمل منذ عمري 11 سنة الفائدة عظيمة .. ولا زلت اشكر والدي يحفظه الله على جرأته التربوية في هذا الخصوص ،،،
إقتباس
××× عمل تتمنى مزاولته ولكن هناك ما يُعيقك ؟
هذا السؤال ليس مناسب لي
شكرا سوليدره
كلام اخي العزيز مواصل رائع الا انه في حاجة الى شخصيات استثنائية خاصة في الجانب النسائي ... لا انصحك ان تكوني استثنائية ولكن تقبلي العادات الاجتماعية حتى تتمكني ايتها الفتاه ان تعيشي مستورة
هذا من اول العقباات وانا بزر ... الله يعين على القااادم ..
××× عمل تتمنى مزاولته ولكن هناك ما يُعيقك ؟
بصــراحة الافكار والاعمال كثيرررة ... لكن الدراسة عاائق رئيسي ...
متى ماخلصت منها ... نتفررغ للبزنس
الأسم: دقيــق فــاخر!
العنوان : شبكـة الزعيم ..
تاريخ الميلاد : 2008
الجنس : ذكــر
الحالة الإجتماعية : عززوربي ..
الجنسية : مشوار اشوف الجواز
رقم جواز السفر : ســري للغاية ..
رقم الجوال : بدون فضااايح ...
البريد الالكتروني : دقيق @ فاخر . كوم
ادررري ان الموضوع لايليق بردي ... لكن هذا الي قدرت عليه ...
أنا بس بقول سالفة غريبة حدث الصيق الماضي . دخلت مطعم ماكدونالز . وألقى واحد كاشير سعودي , أعرفه معرفه بسيطة . لكن الغريب في الموضوع أن هذا الشخص أبوه عنده محلات كبيرة للأدوات الكهربائية , وله كذا فرع ومعروف في السوق . وأمورهم المادية ممتازة جداً . ما إستحى الرجال وقال أنا ناقصن فلوس أو شي .. إشتغل زيه زي اي شخص ثاني وما ضره.
موضوعك رائع جدا و حرك فيني مشاعر الماضي القريب >> الله لا يعيده كنت ابحث عن وظيفه بأي طريقة >> حسبي الله على من قطع ارزاقنا دورت دورت لين طلعت عيوني ولا لقيت شيء ثم بعدها سافرت ادرو وظايف هنا في الرياض بعد عناء طويل و مرمطة مابين مكتب العمل و مكاتب التوظيف و هالشركات لقيت وظيفة محترمه جدا مسمى الوظيفة : موظف بيع ملابس نسائية خاصة المكان : برج المملكة جهة العمل : شركة ملابس نسائية خاصة الراتب : 2600 ريال صعودي
ماكان عندي اي مانع اني اشتغل عندهم لكن الي خرب الشغله كلها ان الشركة تجبرني البس بنطلون مكتوب عليه اسم الماركة يعني يشوفوني الناس ينادوني .. ياصديق هذي اخرتها يا وزارة التربية والتعليم المهم مالك بالطويلة دقيت على امي وقلت لها قال والله لو اشتغلت فيها اني لدق خشمك تعجبني امي حماسية
أعجبتني فكرة موضوعك وبساطة الأسلوب في عرضها فلا تحرمينا من هكذا مواضيع .. مجتمعنا من وعينا على الدنيا وفيه أمور مثل ما قال مواصل أحكام وضعية لكن تبقى وجهة نظر الشخص للشيء الذي يريد فعله ما دام ليس هناك تجاوز في الشريعة..
مبدأ الأعمال اليدوية أو البسيطة مثل عملك في د.كيف أو في ماك ....الخ فكرة يُحسب لها ألف رأي قبل أن تفعلها في مجتمعنا!
انا برأيي المتواضع فكرة الأعمال البسيطة مثل هذه قبل الإنتهاء من الحياة الدراسية تجربة مفيدة جداً ومثرية لشخصيتك بغض النظر عن المقابل المادي
ومادام الشغلة ما فيها عيب فليه تكون عيب على فلان لأنه ابن فلان الفلاني !
طبعاً الأمور نسبية من شخص لآخر
شكراً على الطرح وأتمنى أن نقرأ وجهات نظر باقي الاعضاء في الموضوع وأتمنى منك يا طارق أ نتحكي لنا عن فوائد عملك منذ صغرك على حسب قولك ومدى مساهمتها في صقل شخصيتك ..
اول شــي مبرووكـ عليك العطله والله يعطيك خيرهــأأأ ويكفيك شرهــاآ
امــآ ع طــآري توظيف د:كيف والله انــي من يوم شفت ذا اللوحـة اللي طول قريح ومكتوب عليهــآ بدأ التوظيف وانـآ غاسلتن يدي منهــم اجــل بدأ التوظيف ..؟! ويــن احنــآ فيــه .. يعني يبون اي وحــدهـ عاادي لو كــاان شغلهــآ اي كلااام ..’!
مــرة انــآآ وصديقتي كنــآ طالبين كروسان وموكــآآ بارد وموكــآ حــار .. تعرفيــــن عــاد صفينــا في ذا الطابور تقل طابور مقصف
وبعد شق الأنفس وصل لأيدينـــاا الطلب وجلسنــا في امــان الله ونبي ناكل هالكروسان مــافيه امــل مناَ منــاَ ابد حــالف ماينقطع قسم بالله يتفتت تفتت من قسيــه ولا عــاد الموكــاآ صاروا غلطاني فيه حاطين لنـا نـــحاويق ومطاريس جعلكم ماتذوقونهــأ .., رحنــا سألناهم مما يتألف هذا المزيج؟؟ قالوا اسفيــن لخبطنــا واذا مب عاجبك نعطيك موكا مجانــاآ !! بعديـن قلت لصديقتي اللتفتي يسار الا ذاك الأعلااان اللي رازينه تقل من سالفه ..؟! وعرفنــا وش سالفة هالنحاويق والمطاريس اجــل بدأ التوظيف ..!
أول شي مبرووووووكـ العطله وعقبالنا ، وبعدين وين فرع د.كيف الثاني؟
نرجع للموضوع مجتمعنا السعودي يحتقر الوظايف البسيطه زي الكاشير والسواق ووو وهذا اللي خلاا الأجانب يغزون بلادنا غزو ويعيثون فيها فسادا لأننا تركنا لهم أغلب الأماكن خاليه
بس أنا أقول دايما إننا حنا الجيل الشاب لازم نتمرد على هالتقاليد خاصة إن ديننا ضدها ونشتغل في كل شي ونكسب رزقنا بإيدينا
هلا وغلا فيك أختي.. قصتي حطيتها من باب ضرب المثال , وأنا ما اقصد هالعمل بالذات أنا اقصد اي عمل يعارضك عليه المجتمع.
لكن أنا الحمدالله محاضراتي توقيتها كويس بالنسبة لي وعندي ( يوم أوف ) , وعلى فكرة ترى هم يعطون على الساعة 50 ريال .. يعني السالفة مب سالفة راتب ولا شيء لأني اصلاً وش بستفيد من الـ 50 ؟! حتى لو بيعطون على الساعة 200 ريال مارح يكون همي اصلاً الراتب الحمدالله الخير واجد !
وغير كذا .. احنا متسدحين في بيوتنا ومرتاحين ليه ما نسوي شيء ينفعنا .
أعتقد الإنسان احياناً تكون قدامه فرص لكن ما ينتبه لها !
مارح يهمني كلام الناس وأنا قبل كذا سويت اشياء كانت محل اعتراضات ! <<< سوابق للتمرد يعطيك العافية على مداخلتك عزيزتي
العنوان : في المجلس العام بعد , خلف بقالة المشاغب خان تماما
اوخس المشاغب عنده بقالة .. ورى ما سوى افتتاح وعلمنا .. عساه يبيع فيها ويضرب مثل للرجل السعودي اللي يحاسب في بقالته
إقتباس
الجنسية : سعودي , واشجع كوريا
خيااااانة ! نحن لا نرضى بالخونة
(( الصخرة ))
اللحين وش فيه اسمي .. !! تبي تعرف معناه اسألني مب تقول كذا .. ترى معناه يجنن :$
إقتباس
الفرد في رأيي هو ضحية ( الاستيقاظ لاكل صحن الفول ثم العودة للانسداح )... والا المجتمع ماله دخل
ما ادري كيف تغفل عن ظلم المجتمع للفرد , وعن ظلم المجتمع لـ "حالات اجتماعية " منتشرة ! اهنيك ع راحة بالك
إقتباس
( كنت اتمنى افتح مطعم كبير... لأني طباخ ماهر جدا )
طيب وش اللي منعك ؟ وبالمناسبة ذوقنا شيء من طبخك وبعدها حنا بنحكم اذا انت ماهر ولالا ..
إقتباس
افتح ( كوفي شوب ) واشرف عليه بنفسي في الفترة المسائية.. خصوصا المشروبات اللي تحتاج مهارة خاصة في المكونات لتوازن الطعم والنكهة --> ( كابوتشينو - موكا - فرابي..... الخ )
شيء جميل .. بس ما اعرف وش يعيقك ؟ هل هو عامل الوقت , المادة , الظروف ..
إقتباس
البريد الالكتروني : najy majrashy @ cone zone.com
تصدق اسديت لي خدمة لما حطيت هالعنوان ..
مشكور اخوي الصخرة على مرورك
(( مواصل من عام 1413))
إقتباس
نصيحة :
دامك إنتي مقتنعة بأيه أمر ( يوافق الدين ) نفذيه ، ولا تنتظرين رأي المجتمع.
صحيح إن الجميع مقيد بأحكام ( وضعيه ) ، لكن ما يمنع إننا نتمرد عليها إن كنا مقتنعين بجوازها.
يا ســــلام .. برافوا عليك .. برافوا ..
من جد تفكيرك سليم , وكنت اتمنى صراحة لو يوجد جواري احد يفكر بهالطريقة ! دائماً المجتمع هنا يقف عقبة أمام إنتقالات الفرد اللي تخصه وحده .. يصير المجتمع متطفل عليها وفارض نفسه بقوة !
ياليت لو نحاول فك هالقيود المعقدة من ايدينا .. حتى نطير في سماء الحرية ونبدع .. ونعيش كما نريد دون تطفلات تخريبية .. <<< حاقدة عالمجتمع
يعطيك العافية اخوي مواصل .. ( أنت فعلاً موجود لأنك تفكر , ولكن يجب أن يكون وجودنا طاغياً عندما "نعمل " )!
(( جرح يشكي )) صراحة اخوي .. من لهجتك حسيت بأنك قوي !
كلامك صحيح , تماماً زيهم لما يقولون ... القائد الفلاني فتح الدولة الفلانية والفلانية , ولما تقولهم طيب اروح اجاهد يقولون لأ بإنتظار عودتك وأتوقع منك الكثير ..
عائدة بحول الله للرد من جديد .. ( تعرفون هلالي اليمن دائماً يحتاج له مخمخة .. حتى يمكن اخلي رده لوقت تفرغي الكامل لكن حابة اطلب منه مثل الأخ فياض انه يفيدنا بالأعمال اللي قام فيها )
فعلا مجتمعنا ما ادري وش يبي والا العمل لاهو عيب ولا حرام
أحنا ببيتنا عادي وما ينتقدون الآخرين على أعمالهم بس عيالهم ممنوع يشتغلون هالشغلات
بس في أهلي ميزة إذا نشبت لهم وافقوا لكن أنت تتحمل نتائج قراراتك ويدعمونك لو حسوا أن هذا اللي أنت تبي فعلاً
مثلاً أبوي رافض مبداء الشغل ولما أشتغلت أختي هو اللي يوديها ويجيبها لأن هذا قرارها
بالرغم أنه ما هو مقتنع ويحس أن هالشي يجرح رجولتة لأنه ما قصر علينا
عن نفسي أنا عاجبني الوضع كذا ولا فكرت أشتغل بس مخلية كرت الشغل إذا طلبت شي وتأخروا فية هددت بالسالفة
بس لفت نظري شغلة لو أخوي دخل غرفتي وقرا أوراقي ذبحتة لأن هذي خصوصيات
تصدقين في بيتنا شغلة مميزة على الرغم أن غرفتي دايم مفتوحة وأوراقي منثرة ومذكراتي فيها كل خصوصياتي
لما أوصي واحد من اخواني يجيب لي شي من الغرفة ما يقرون خصوصياتي
لأن أحنا نؤمن بالخصوصية وما ناخذ شي لأحد بدون إستئذان وعلى كثر ما أدخل غرفة أخوي وبالرغم أن الماسنجر حقة
مفتوح اربع وعشرين ساعة الا أن عمري ما قريت أو شفت العناوين اللي فية الا وهو موجود لازم أذب وجهي وأقراء
ومرة دخل من جهازي وتخزنت محادثاتة تصدقين أني مسحتها بدون ما أقرأها إحتراما لخصوصيته
مع أنه ما فية بيني وبينة أسرار بس ما أحب أتجسس على أحد بدون علمة
× رأيك تجاه الموضوع , هل الفرد يقع ضحية ظلم المجتمع ؟
أحيان كثيرة المرأة تتعرض لمثل هالأمور
×× ماهو العمل اللي حبيته ولكن صدمك الآخرين بمنعك من الخوض فيه ؟
تصدقين عاد أن ما عاد عندي طموح ونسيت طموحاتي
××× عمل تتمنى مزاولته ولكن هناك ما يُعيقك ؟
كنت بأتطوع في دار الأيتام ولكن لأن العمل يحتوي على مبيت هناك قوبلت بالرفض
ما عندنا بنات ينومون برا البيت طيب هذا أنا أنوم عند عمي وخواتي بيت عمانك وخواتك غير
هو لو أنا أصريت حصلت على العمل لكن أنا موب وجه شغل وأبي أحد يقول لي لاء عشان الزقها فية
والا ياما أشياء قالوا لاء وسويتها بس أنا اللي ما أحب أشتغل مادام كل شي ابيه احصل علية ليش أتعب مخي بالشغل
وجهة نظري خطأ وأقنع الآخرين بعكسها بس المصيبة ما فية أحد يقدر يقنعني لأني أعرف الصح بس ما أبي أسوية
الأسم: عريب عبدالله
العنوان : غرفتي وبين كتبي <<وبيتي الثاني اتواجد فية كثير حول بيت سوليدرة
تاريخ الميلاد : 26\6\1406 هـ <<أفضل الحساب بالهجري عشان أصير كبيرة
الجنس : يقولون أنثى وأنا أقول بنت
الحالة الإجتماعية : عانس مؤقتاً يازين العنوسة
الجنسية : أسبانية<<ترى فية جذور عربية هناك عندي أمل أكون منهم
رقم جواز السفر : ما حفظت الا تاريخ ميلادي ينفع أكتبة
رقم الجوال :ما حفظت الا رقم أبوي قبل ما نضيف صفر يعني حافظة تسعة ارقام منه أما رقمي ماقدر يتخزن بمخي
البريد الالكتروني : الذاكرة لك عليها وحتى لو ذكرته ما بقول
و واحد بالشوكليت + هوت شوكليت و Cofe Of The Day " وكانت قهوة امريكية الله ياخذ العدو المشكلة ما احبها..
" ودي لو كسرت الشنطة فوق راسها كان ازين !
قايلتن من سنة جدي .. مافي زواج قبل شهادة التخرج ع قولة خويتي امسك شهادتي بيد و عريسي
عاد تعرفون وش أول كلمة سمعتها "ناقصك فلوس 
؟!!" 
<< 
وأنا أقول بنت
الوضع العادي
