حــبــل الــكـذب قـصـيــر ..! - نادي الهلال السعودي - شبكة الزعيم

الشانزليزيه · #1 05/02/2009, 07:17 PM

بسم الله الرحمن الرحيم
السلام عليكم ورحمة الله وبركاته

الأكيد حاليًا أعزائنا الطلاب والطالبات يتجهزون للإختبارات

الله يوفقهم وينجحهم وينجحني

,’

الموضوع يتكلم عن مشكلة اصبحت ظااهرة بيننا ..
وهي ( الكذب )
الكذااب مهما يكذب هو شخص في نظر البعض شخص داهية ذكي خطير يهب يااوجهه

>>وعند البعض الاخر عكس ما قلن أنفاً

!!

انا اشبه الكذب بالاشاعات .. مصدرها وااحد الشخص يكذب وفي نفس الوقن ينقل اشاعه هي كااذبه وغرضها التضليل في الاغلب .. والكذب ربما لتبااهي بأمر ما او مجرد مرض وعاادة يصااب بها الشخص الكااذب !!

خلوني أذكر لكم أهم الأسباب اللي تؤدي للكذب :

1- قلة الخوف من الله و عدم مراقبته في السراء و الضراء .

2- لفت الانظار و مسايرة المجالس بروايات كاذبه .

3- التباهي بالكذب على انه من سرعة البديهه و الفطنه .

4-عدم الثقة بالنفس و تحمل المسؤوليه .

5-التعود على الكذب منذ الصغر .

6-الهروب من الواقع و الخوف من مواجهة الحقيقه.

7- قد يكون يعاني من نقص ما .

على سبيل المثاال .. شخصة اعرفها عز المعرفه صديقة عزيزة ولكن عيبها الكذب المتوااصل .. في اي موضوع تطلع لك بسالفه وقسم لو الفها يمين يساارارجعها ما تمشي قوويه يااناااس قووووووووويه

!!

وللاسف اصبحت عاادة سيئة بالنسبه لها .. فـ من نااحية إنك توااجه مثل هالاشكاال .. مو كل الشخصياات الكااذبه تقدر تقولها في وجهه انت كذااب !!

بأذكر لكم سالفه صاارت لي مع نفس الشخصة المذكورة في الاعلى
كل يوم كذبه كل يوم موقف كل يوم قصة واغلبها إن لم تكن كلها خرااااط وكلاام فااضي !! في إحدى الاياام وتحديدا الصبااح السااعه 11 ونص عند د.كيف اللي توهم فاتحينه بالجامعة

شطحت أختنا بالله بكذبة ورب الكعبة ما قدرت امشيها قووويه ياانااس .. حاولت اتغااضى عنها صرفت فكري وعقلي التهيت بوحدة من البنات << كل ذاا وما قدرت انسى الكذبه

!!

اولا قالت درجة حراارتها اليوم 41

.. الشخص الطبيعي لما توصل لـ40 اقول عليه السلاام شخص على الاقل مغمى عليه إذا ماامات .. الحرمة تسولف وكأنها عندها بس زكمة !!
تفلـّت ومسكتها قداام البنات

وكل ما داار بينا في ال3سنين الي راحت سدحتها لها من كذب ونصب

قلت يمكن لما اعلمها وافهمها إنها كذاابة .. يمكن تستحي تحس بالذنب تشعر بتأنيب الضمير .. بعدها بيومين بالظبط سدحت لنا قصة من قصصها المبدعه ’’ كأني ما قلت شيء ولا كأني تكلمت وعلمتها إننا ندري إن كلاامك كذب في كذب يعني إنسانة مثل ذي من جد قوية عين

فـ هذا النوع ما ينفع تقول في وجهه أنت كذاابـ/ـة !!

بس أذكر ابوي أول يــوم إني بالابتدائي كان يقوللي أنتبهي يابنتي من بنات المتوسط تراهم يـــكذبون.!
قلــت يكذبون ؟! قال ايه يابنتي لاتصدقين أي شي يقولونه لك تراه أغلبه خراط ؟
قلت كيف يكذبون بالعكس البنت كل ماتكبر تصير صادقه وماتكذب كثير ..!

قال بالعكس الحين البنات اللي بتقابلينهم
بالمتوسط بعضهم بيخرط عليك وبيقولون حنا سوينا وحطينا وصار لنا ويمكن يضحكون عليك ويجرونك لأشياء موب زينه

عشانك صدقتيهم ....

؟! أنا صار وجهي كذا

+

.. مافهمت قصده .! لـنّه طرى على بالي كذب الابتدائي وحسبت

أنه يقصد هالنوع من الكذب ..أبوي تفكيره طلــع أكبر وأنا ماأدري ...؟

قلــت بنفسي وش هالكذب اللي بيجرني

لأشياء موب زينه ؟؟ .. ألحين لاقلت إن سامي الجابر يقرب لي ولا إذا قلت إني سافرت أمريكا ولا اذا قلت إن راشد
المــاجد صديق خالي يصير كذب موبزين ويجر لأشياء موب زينه !!

>> كيف الأسلوب ماشي معكم

؟

وبهالفتره (المتوسط).. (يوم كان كل البنات خالهم نواف التمياط

)كنت أشوف بنت عمي قدوتي بكل شي وكنت أناظر فيها على اساس انها الفاهمه والعاقله

وانها متخرجه من الجامعه وكنت أقول لها .. أحس البنت كل ماتكبر يصير كلامها كله صدق وماتصير كذابه مثل أول ,,؟ نــاظرت فيني ...!!وقامت تضحك .. قالت ايه مره

.. قلت ليه .. وكيف

..قالت بالعكس كل ماتكبر كل مايزيد فيها الكذب
ويتــأصل بعد .. أنا صارت عيوني كذا

ويوم دخلت الثانوي ( يوم إن كل البنات يقب لهم واحد مشهور

)

شفت اشياء ماعمري شفتها شفت النفاق والكذب اللي على أصول والخبث .. وقتها فهمت وش اللي كانت بنت عمي تقول لي عنه ..!

كنـــت بريئه << ايه مره

الكذب بصراحه مبدأي اذا بضطر للكذب بتهرب من الاجابه ’ لان الكذاب مصيره بينكشف ومااحب احط نفسي بها الموقف ’ اخذها من اقرب طريق وافضل السكوت احسن

لما كنت باولى ثانوي كنا تونا لمنطقه ثانيه وماكنت اعرف احد من البنات تعرفت على وحده كانت تسولف عن حسين عبدالغني

تقول انه ولد خالتها والله انى كنت مصدقتها

بعد فتره لما خذت على البنات قالو لى ترها تكذب عليك

فـ الكذاب يخدع نفسه قبل مايخدع غيره وينطبق عليه مقولة _ كذب الكذبه وصدقها _

ووحدة ثانية بالثانوي تقول إن جواد صديق ولد عمها روح بالروح

وإنهه قد جاهم بالبيت ووقع على جبهة أختها وأنا ساكتة وأسلك وأقول بنفسي عساه مادبج عند باب بيكم بس

مــــابعد الثانوي ....

أشوف بنات بكامل قواهم العقليه والحسيه والإدراكيه وكل شي ... و يكــذبون

ليه ؟؟! ليه بكبرك هذا قاعده تكذبين وتكذبين ولاهمك أحد ؟! وش بتستفيدين غير ان كل اللي حولك بيسمونك الكذابه (طبعا من وراك)..!

ماتخافين أحد يكشفك يوم من الايام ؟ وجهك مغسول بوشو ..؟؟ أنا اكتشفت إكتشاف عظيم

ان الكذابه فيها قوة عين موب طبيعيه ؟؟ يعني ليتها تكذب على زميلاتها وبس (إذا كان عندها زميلات) لا !! وتكذب

على أستاذتها ودكاترتها بعد ماعندها مشكله ؟كــنت أول اذا قاعده تسولف معي كذابه اسوي نفسي اني مصدقتها
ولا احاول المح لصديقاتي او لها إني كاشفتك بالعكس كنت اجاريها واسوي نفسي مصدقه بس لمتى

إختي كانت تنصحني تقول الكذابه خشي بعينها وماعليك منها وفشليها بعد ؟ قلت لا حرام بتزعل بعدين ممكن ابين لها

اني اشك بكلامها لكن أفشلها لا.. قالت اختي أنتي غبيه ..؟ ماتعرفينهم كثري ذول ماينفع معاهم الا كذا أصلا مايحسون ولا يتفشلون ماعليك منهم وجههم مغسول بكلوركس وتراهم تعودوا على طيحة الوجه ..

أجل وحدة بالجامعة تقول عندنا منصة هليوكوبتر بسطح بيتنا

يختي لو حنا بسنة رابع ابتدائي ماصدقنا , جامعة يالظالمة

أنا توني أدري ان فيه بعض البنات الكذب عندهم هوايه !!

ويكذبون بسبب وبدون سبب ..!

مرة الصبح على ام بي سي اف ام

دقت وحدة من هالطعوس تقول اهدي أغنية واحشني موت لخطيبي يااسر

<<

استغفر الله بس

برضو قبل فترة وحدة جتنا تسولف

وش تقول تقول إن خالها مدري عمها يقولها تكفين لاتلدعين ترى أروح وطي

بالله عليكم ياعالم هذا كلام خال مدري عم

يعني بظنها اننا صدقناها

عندي وحدة بالماسنجر دايم تنسخ لي كلام وحدة عندها فقاشة

اجل تقول يوم اروح لندن وانا اتمشى بسيكلي وطاقة الكاب شفت مساري ووقفت اصور معه ولاصدق اني سعودية

احتريها بس تقول وصحيت من النوم

بس ماعندها نية
آخر شي قلت قولي لها لاتقعد عند روتانا كليب واجد

وبالشفا ان شاء الله

واللي تقول بسافر تركيـا وتصقعك بلوك بعدين تقول سووري كنت مسافـرهـ ..

وتشيل البلوك شووي بس عـ أنها داخله تشييك

,’

أخر شيء عشان مايجيني أحد ويقول نبعد عن المثالية شوي ومن هالحكي

صحيح كلنا كذبنا أنا كذبت إنت وإنتِ كذبتوا بس أنا هنا أتكلم عن الكذب اللي مايخش المخ ولا يدخله والكذب المبالغ فيه لأن كلنا كذبنا يمكن للهروب من شي او مسوين شي ونكذب ونقول مهب حنا بس تراه يسمى كذب

بالأخير مافيه أحد منزهـ

""""ْ~ْ~""""

[رأى رسول الله امرأة تقول لولدها تعال أعطك فقال الرسول :ما تعطيه قالت :تمرا فقال أرأيت إن لم تعطه كتبت عليك كذبة ]

""""ْ~ْ~""""

قال صلى الله عليه وسلم :

(( إن الصدق يهدي إلى البر وإن البر يهدي إلى الجنة وإن الرجل ليصدق ويتحرى الصدق حتى يكتب عند الله صديقا ، وأن الكذب يهدي إلى الفجور وإن الفجور يهدي إلى النار ولا يزال الرجل يكذب ويتحرى الكذب حتى يكتب عند الله كذابا))

الله يجعلنا من الصادقين ويكفينا شر الكذب والكذابين

* مزمزة أخيرة :

عطلت اليوم

أختكم