. بسم الله الرحمن الرحيم ليس حرفي ذلك الحرف الذي قُدّ من جنون ! انما هو حرفٌ متواضع ! يأمل في مشاهدة تلك الاعين التوّاقه ! للبساطه في الطرح . هنا ! في هذه الصفحه ! أحملُ لكم أشياءً ! لشخصٍ شاركنا زخمنا ـ عشقنا ـ حبنا ! هُنا ! أحملكم بعيداً عن الروتين الممل ! للمنتديات حيثُ القراءه و الكتابه ! بعيداً ـ بعيداً ! ربما إلى إتجاهٍ معاكس ! س / عرف بنفسك ؟ قل كل ما تريد أن تقوله ؟ ج / باسم الفوزان ولدت ونشاة وترعرعت ببريدة .. أدرس بجامعة القصيم قسم إدارة وإقتصاد سيارتي جيب ايسوزو << عسى الله يجيب الشرراي اللي ياخذه .. أحب ربي والرسول وامي وابوي .. واكره الكفار س / بدايتك باللجنه الاعلاميه ! كيف و متى ؟ ج / امممممممم .. أبد جتني إضافة ع الايميل .. من أحد أعضاء اللجنة .. اللي هو ماجد ( مشرف العالمية حاليّن ) قبل بداية الموسم الماضي .. عرض علي إني أكون مصمم للكالتشيو .. ووافقت وانضميت .. ! ** س / ماذا قدمت للجنة وماذا أخذتَ منها ؟ ج / اول شي انا اعتبر نفسي مقصّر جدن مع اللجنة .. لذلك مااعتبر نفسي معطيهم شي .. ألا ممكن شي بسيط جدن .. مع إني كنت متحمس بالبداية .. لكن الظروف ما تسمح إني أتفررغ وآخذ راحتي بالشغل فيها أخذت منها صداقة الأعضاء وتكوين العلاقات معهم وهذا اهم شي .. والشي الثاني استفدت من فوايد من ناحية التصاميم ** س / بما أنك لا تجد فراغاً كافياً في وقتك ! لما تترك الفرصه لغيرك مثلاً ؟ ج / بالعكس .. لا ان شاء الله مااخذت مكان غيري .. متى ما صار فيه أحد عنده إستعداد يقدّم الجولات راح يضمّونه مباشرة .. والشي الثاني هو إني تصدف أحيانن أبقدّم جولة أو جولتين أحصّلها محجوزة .. ! س / نعم ـ لكنك تقول بأنك مقصر ! ولا تملك فراغاً في وقتك حتى تقوم بواجبك ؟ ج / هو انا صحيح مقصّر .. لكن بالنّسبة للفضاوة .. التقديم ما ياخذ أكثر من ربع ساعة .. يعني حتى لو مثلن عندي إختبار أقدر أقدّم .. لكن مثل ما قلت لك .. إذا مسكت معي تقديم مثلن .. ألقى فيه أحد غيري حاجزها والشي الثاني .. هالموسم مسوين اللجنة .. جولة علينا وجولة على أحد الروابط . ** س / { اذا مسكت معي تقديم مثلن .. القى فيه احد غيري حاجزها } !! معليش يعني ! اجل انت ما تقدم الا اذا مسكت معك ؟ اسمح لي اقول { مهنيه مزيفه } ؟ ج / انا اقول اذا مسكت معي اقدم [ مثلن ] .. احيانن يجيني اتصال يقول قدّم الجولة الفلانيّة اقدمها وانا مااشوف الجادّة .. س / هل سبق أن اُتهمتَ بالتقصير ! من شخصٍ ما ! او اتهمت نفسك انت ؟ ج / لا هذا شي واضح .. ملاحظه على نفسي كثير .. وفيه واحد من الشباب لمح لي بشكل عفوي . س / باسم او كما يُطلق عليك { جُحا الرياضه العالميه } ! ردودك تعج باللهجه القصيميه البحته ! هل هو اعتزاز بذلك ! او فشل في فصل شخصيتك الحقيقه عن شخصيتك النتيه ؟ ج / لا ابد .. لا هو اللي اعتزاز ولا هو اللي فشل .. اللهم إني مااحب أكتب بلهجه .. واتكلّم بلهجه ثانية .. ليش التقلّب باللهجات !؟ .. اتكلم بلهجتي بكل مكان ويالله لك الحمد مفهومه وهذا اهم شي . س / رأيك بلقب جحا العالميه ؟ ج / هههههههههههههههههههههههههه مالي إلا اضحك .. لأنه صراحة اللقب لي لذلك موب انا اللي اتكلم عنه .. ولو إني اول مرة ادري ان هذا لقبي . س / هل انت مصاب بحمى { رونالدينو } فعلاً . ج / والله حلوة حمى رونالدينهو .. تعبير حلو يعبّر عن شعوري تجاه السّااحر .. اعتبر نفسي مصاب فعلن .. ! ** س / منذُ متى بدأ هذا المرض ؟ ج / كنت معجب فيه اعجاب عادي يوم استلم اول جائزة لافضل لاعب بالعالم .. وتقريبن بديت يعني ابالغ فيه واقارنه بلاعبين كبار .. في موسم 2006 ( قبل كاس العالم ) .. [ يوم يصفقون له جمهور الريال ] س / اعتراف ضمني وموثق انك تبالغ فيه وتقارنه بلاعبين كبار ؟ زيدان مثلاً ؟ ج / قصدي بلاعبين كبار .. اللي هم معتزلين .. مثل مردونا أما زيدان فانا فضّلته عليه .. ! ** س / قمة التهكم ؟ مقارنة لاعب سكير ! بـ اسطوره ؟ ج / روني سكّير !؟ .. طيب شايف انجازاته بجانب انجازات زيدان !؟ س / نعم والاثباتات موجوده ؟ آخر آيامه مع برشلونه ؟ كان نجمك المفضل يتأخر عن التدريبات و يسهر في الحواني ؟ والصور كثيره ؟ ج / عزيزي أي لاعب فيه جانب سلبي .. الولد مهب ملاك كل شي فيه صح او كويس . س / عندما قلت بأنّ روني سكير ؟ وكأن ملامح الاستغراب بدت على محياك ؟ والان تقر فيها ؟ معليش لماذا هذا التناقض ؟ ج / ما نسلّط النظر على شغله السلبي .. نشوف انجازاته !؟ .. نشوف ابداعاته !؟ .. نشوف الكورة واللعبة اللي يقدّمها .. !؟موب كلّه استغراب بقدر ماهي مالها علاقة بالمقارنة .. يعني سكّير لكن له انجازاته وله اشياء تشفع له وتخلّيه يتقارن بزيدان . س / انت بذلك تريد الضحك على عقولنا ! لاعب عمره الابداعي ما تعدى ثلاث سنوات ! تقارنه بلاعب من يوم عرفته كرة القدم وهو اسطوره ؟ ج / بس معليش .. هذا بثلاث سنوات جاب انجازات اللي من يوم عرفته كرة القدم وهو اسطورة .. ! س / مثل ماذا ؟ مثلاً ؟ ج / افضل لاعب بالعالم مرتين متتاليتين .. س / زيدان افضل لاعب بالعالم ثلاث مرات ؟ وبغض النظر عن جوائزه الشخصيه ! قاد فرنسا في سنتين فقط لتحقيق اقوى بطولتين بالعالم ؟ ج / زيدان بالنسبة لفرنسا شي خورافي .. لكن بالنسبة للاعبين الآخرين !؟ .. وش ذنب روني اذا صار منتخبه قوي من زمان !؟ س / منتخب البرازيل قوي من زمان ! ومر عليه رونالدو و ريفالدو و روماريو وحققوا انجازات اكبر من رونالدينو ! ماذا تقول ؟ ج / ريفالدو وروماريو على مااعتقد مهب اكبر من انجازات روني .. ولا لا !؟ س / روماريو الاعلى تسجيل اهدافا بتاريخ البرازيل ! اقل من روني كيف تجي؟؟ رونالدو سجل هدفا حسم لقب مونديال 2002 امام اوليفر كان ؟ ج / روماريو الاعلى تسجيل اهدافا بتاريخ البرازيل ! اقل من روني وشلون تجي ! << جبتني بالانجازات الشخصيّة .. اقولك روني اخذ افضل لاعب بالعالم مررتين . س / رونالدو لم ياخذها مرتين فقط ! انما حصل عليها ثلاث مرات ! ورونالدينو عندما حقق افضل لاعب بالعالم لعامين متتاليين ! ماهي الفائده التي حققتها للبرازيل هاتين الجائزتين .؟ ج / معليش ماكنت اظن انك تبي انجازات اللاعب مع منتخبه ..طيب روني مركزه مهب مركز واحد يأهله إنه يصير هداف .. وكاس العالم الاخيره ما يحتاج نتكلم عنها .. البرازيل عمومن كانت داجّه .. والسبب الرئيسي وكلنا نعرفه عباطة ألبيرتو [ مدربهم وقتها ] .. ! س / ليس من الواجب أن يكون هدافاً ! صانع العاب مثلاً ؟ ج / آخر مررة البرازيل اخذت كاس العالم كانت بـ 2002 وروني هو السبب الرئيسي بتأهل منتخبه لنصف النهائي .. كانت المباراة قدام انجلترا .. سجل هدف وصنع الثاني ..وبارضه بدري الحكم على ابو الرون .. الولد عمره 28 .. لا وصل 40 ( عمر روماريو ) يصير خير نقول ليش ما يصير صانع العاب . س / هل تقصد هدف الغفله !؟ امام ديفيد سيمان ؟ ج / معليش الهدف هذاك ما يقدره الا اللي يفهم كورة .. س / ربما الحب يعمي أحياناً عن الحقيقه ! لكن لننتقل لجانب آخر ! زيدان ـ رونالدينو ! من الافضل ؟ فليعذرني زيدان وعشاقه ! عن وضع رونالدينو بجانبه في مقارنه واحده !؟ ج / احب روني اكثر وبس .. ! س / رونالدينو في تصريح له شهير ! بعد اعتزال الزين ! يقول ان زيدان قدوته بالملاعب ويتمنى يصل لمكانه؟ تواضع من الساحر مثلاً ؟ ج / شي حلو إن ابو الرون يقول مثل هالتصاريح .. لأنه معروف عنه التواضع .. وغير تسذا هو يشوف نفسه إنه اقل من زيدان .. ! س / منتدى العالميه ! في تطور يوم عن الاخر ! برأيك ماهي { مميزات ـ عيوب } قسم العالميه ؟ ج / والله بشكل عام الاحظ إن مافيه تفاعل بالاستديّوهات وهذا شي يضيّق الصدر صراحة .. ودك تشوف تفاعل وحماس وهياط .. الشي الثاني كثرة الأعضاء الغير مُلهمين بالرياضة العالمية إلهام كافي .. كثرة الدرعمة والحكم على الأندية بالفشل بسرعة .. اما بالنسبة للمميزات .. انا صراحة من تالي اقرى بموضوع الكالتشيو .. أشوف فيه الاعضاء بينهم حب ويربطهم شي كبير بينهم .. ولافيه شي اسمه زعل .. وهذا الحمد لله شي كويس وحلو وودك إنه يستمر صراحة . س / يعني مثلاً ! هل ترى بأنّ المشرفين نجحوا في ازالة المشاحنات بين الاعضاء وما شابهها ؟ ج / والله إيه .. اشوف انهم نجحوا الله يعطيهم العافية . س / مشاركتك برابطة عشاق الميلان ! نادرة جداً ؟ ما الاسباب ؟ ج / مشاركاتي بالمنتديات كاملة قالّة بكثير .. السبب تقريبن مادري وشو .. لكن سبب عدم مشاركتي براطبتنا الحين هو إن مافيه مباريات تتكلم عنها لميلان .. لأننا بإجازة ولو إنها قرربت تخلص .. الشي الثاني مااشوف فيه شي يشدّن للرد .. نقاش او شي مثل هيك .. ! س / هل تريد اخفاء خلافك مع أحد مثلاً ؟ ج / لا ابد ما تهاوشت مع احد ولا فكرت اصلن .. ولا فيه احد مضايقن من الاساس .. ابد لا يجي ببالك إن فيه هوشة او مثل هيك .. ومير ذكّرتن .. كان فيه أحد من الاعضاء غلطان عليه انا او شي .. اتمنى منه إنه يسامحن .. أحيانن الواحد يزل لسانه ويقول كلام ما يقيسه ..! س / لكن هناك خلاف كبير بينك وبين فواز الخالدي رئيس رابطة الميلان ؟ ج / بيني وبينه مافيه أي خلاف .. لكن كان فيه خلاف بينه وبين عضو ثاني ماادري .. لكن باسم وفواز !؟ .. عن نفسي مااتوقع ان فيه خلاف .. واساسن ما شلت شي بقلبي عليه .. ! حتى اذكر آخر محادثة بيني وبينه كانت جماعية معنا واحد ثالث .. كان فيه ضحك واستهبال .. !؟ س / هل راودتك الفكره بأن ترأس رابطة عشاق ميلان ؟ ج / اقترح علي واحد من الشباب لكن قلت لا وبقوّة .. لأني مالي بالترجمة ولا أحب احط نفسي بمسؤوليّة .. ! س / يعني عضوية اللجنة الاعلاميه ليست مسؤوليه ؟ ج / مااتوقع مسؤولية .. قدّم الجولة وتوكل على الله ! .. << عن نفسي !! س / لكن مشاركتك في رابطة عشاق ميلان ! كانت كثيره ! في أثناء رئاسة العضو مينيلستا الله يذكره بالخير ؟ ج / مثل ما قلت لك .. كانت مشاركاتي بالمنتديات عامّة كثيرة .. لكني الحين امر بفترة إني اقرى وبس .. بدون ماارد .. قليل جدن أرد .. مافيه سبب معيّن يعني !! س / لا يكاد يخلوا رد لك في رابطة الميلان ! الا و تشنُ هجوماً كاسحاً على انشيلوتي ؟ مالسبب ؟ ج / فيه بعض المطشات تحس إنه هو اللي يضيّعها بتكتيكه البايخ .. حتى يقولون عنه إنه عقيم تكتيكيّاً .. ولا اتوقع إن فيها كذبه ..الشي الثاني انشي يعتبر سبب رئيسي بلعبنا الحين بكاس الاتحاد .. ! س / برأيي أن عقلية و تكتيك و منهجية انشيلوتي تصلح لمباريات خروج مغلوب ! لا مباريات النفس الطويل ؟ ج / بالضبط يا عزيزي .. وبارضه ينفع بنافس على بطولة وحدة .. يعني حطه لمنتخب وخله ينافس على كاس العالم .. ياشيخ حلف إن يجيبه بالراحة . س / بظنك عزيزي ـ مالسبب في ذلك ؟ ج / والله عن نفسي مااتوقع فيه سبب معيّن .. الشخص كذا تفكيره وكذا طريقته .. ولو نلتفت ونناظر لمدربين غيره .. نشوف الدون كابيلّو .. ما يدررب نادي إلا وجايب له بطولة الدوري له .. ! إنها العقلية والتكتيك يا عزيزي . س / عضو يسحرك بقلمه ؟ ج / أخاف انسى احد .. لكن ابقول اللي جاء ببالي اول ما شفت السؤال .. فيه [ جالاردو ] معجبني صراحة .. س / عضو تبحث عن مشاركاته ؟ وتتمنى أن يكتب دوماً ؟ ج / امممممممممممم !!الاعضاء فيهم الخير والبركة الحمد لله .. يعني انا مثلن افتح الحين قهوة الكالتشيو .. ألقى فيه كتابات واعضاء يعجبوني كثير صراحة .. أروح اقرى لهم واوسع صدري .. يعني تقريبن اعضاء الكالتشيو القديرين . س / ما رأيك في هؤلاء ؟ الثعبان الأزرق شخص عزيز وغالي واحترمه كشخص .. ولو إن صدري ضاق يوم شفته فاتح رابطة زيدان ههههه ! النينو توريس قليل اقرى له مشاركات .. ولا اعرفه زين .. لكن مررة نقدت عليه لنه تهجم على الكالتشيو يسلم راسك معجب كثير باسمه صراحة واهنيه عليه .. عضو تقرى ردوده وتضحك لكن لا تحرص على إنك تناقشه هههههههههه دنيدل والله للأسف قليل جدن اشوف له ردود ومن زمان عنها .. له مني معزة وتحية من قلب سكرو معجبني كثير صراحة .. وغالبن اذا مرريت من رد له أجلس أقرى فيه واتابعه بقدر مااقدر هتلر الرياض عضو ارتبطت معه .. وصار بيننا مواقف كثار .. عضو غالي علي وله محبة بقلبي الحقيقة يزيد من الاعضاء القريبين لي من بين اعضاء الزعيم س / رأيك في المقارنات التاليه ؟ ابرا ـ فيا ابرا ايكر ـ بوفون بوفون ميسي ـ كريستيانو كريستيانو دروجبا ـ ايتو ايتو لامبارد ـ جيرارد جيرارد راموس ـ الفيس الفيس مورينهو ـ السير السير كاكا ـ روي كوستا ما أقدر اقول كلهم ؟ طيب كاكا بس مب من قلب توتي ـ ديل بييرو توتي بيرلو ـ فابريجاس فابري شيفا ـ واين روني شيفا الرود ـ هنري هنري تيري ـ فيرديناند فيرديناند النينو ـ راؤول توريس س / فريق الميلان حالياً يضم اسماء رنّانه ! ما تشكيلتك لهم ؟ ابياتي يانلكو - كلادزه - باولو ( بونيرا ) - زامبروتا بيرلو ( سيدورف ) - جاتوزو ( فلاميني ) روني - كاكا باتو - شيفا س / هل تقر بأنّ صفقة بيكام ! اعلاميه ماديه بحته ؟ ج / تقريبن + ورقة رابحة س / لو قلنا بأنّ ميلان خرج هذا الموسم خالي الوفاض ! من تود بأن يذهب بالصيف ومن تود أن يأتي ؟ ج / يجي مدافعين أمثال ميكسيس وآقير وأليكس .. وباكات يمين ويسار ( ما يحضرني شي حاليّن ) .. وصفقة بينانت اللي قرربت للميلان إضافة كويسه .. ومهاجم بين الـ 23 والـ 27 .. واحد مثل توريس يعني .. ! مالديني اللي يعطيه العافية كفى ووفى .. إيمرسون .. شيفا فزعته فزعة رجال لكن تخلص الإعارة ويروح لناديه س / لكن سياسة النادي منذُ فتره طويله ! التعاقد مع المستهلكين وكبار السن ؟ ج / هذي المشكلة يا عزيزي !؟ .. لكن بالصيف اللي راح شفنا فيه صفقات حلوة .. ! فلاميني وروني والشلة لكن هذا ما يمنع إني اخاف يجي واحد مثل كن كن . س / | إقتباس | | | | | | | | |
واضح من نبرة صوتي إني كاتبن هالهرج مزح .. وتجي تناقش !!؟ | | | | | |
هذا الرد كان في احدى المواضيع ! بكل صراحه عندما قرأته ! أحسستُ بالشفقه عليك ؟ ماذا تقول ؟ ج / المطلوب من القارئ هو إنه يحس بالمعاناة . وصلنا للنهايه ! وأودُ أن أنوه على أخلاق باسم العاليه ! أثناء اللقاء و خارجه ! وهو بصراحه مثال يُحتذى به في أرجاء المنتدى ! واختير في هذا المكان لـ اخلاقه الجمّه ـ و تعامله الممتاز مع زملائه الاعضاء . ونتمنى أن كنا نليق بذائقتكم الساميه .. وانتظرونا في اعداد مقبله من الاتجاه المعاكس . لكم مني كل الود المدريدي المرهف Z I D A N E مع كامل الشكر والتقدير للمصمم |