الغيره نعمه ام نقمه ؟ ( يوجد ضحيه بالداخل ) - نادي الهلال السعودي - شبكة الزعيم

5هلاليه5 · #1 28/01/2009, 03:55 AM

بسم الله الرحمن الرحيم

والصلاة والسلام على من لانبي بعده

في مجتمعنا السعودي هناك صفه منتشره كثير وهي شينه مره اذا تعددت حدودها وشينه اكثر اذا انفقدت
صفه كنت احبها

بس الحين اكرهها جدا

كلمه يطلقها السعودي اذا بغى يتحكم

الا وهي

الغيره

مو عارفه اعبر عن الي شفته وعائشته
بنفسي

لكن راح اطرح عليكم نموذجين من البنات وانتو قارنوا بانفسكم طبعا نموذج (2) هم الفئه المقصوده وهم المضطهده عندنا

السوق

نموذج (1)

تروح مع امها واختها واحيانا اخوها الصغير

ابو عشر سنوات يوديها ابوها او اخوها

الكبير للسوق يخلونها مع امها عشان تشتري

على راحتها واذا خلصت تدق عليهم
ياخذونها

ترجع وهي مقضيه وخالصه ماشاء الله

نموذج (2)

لازم اخوانها الكبار معها حتى لو امها

واخوها الصغير معها لا لازم مع اخوانها

الكبار ومحذرينها تطلب السوق من ابوها

لان ابوها الله يهديه يوديها السوق ويخليها مع امها وهذي جريمه وما يتجرؤن يقولون لابوها لا يحطون الحره فيها المسكينه

طبعا عذرهم (حنا واثقين فيك ثقه عمياء بس الزمان يخوف)

اذا لهت مع الملابس وبعدت (وهي بنفس المحل) 3 امتار (بدون مبالغه) ياويلها وهي مهدده انهم ماعاد يطلعونها للاماكن الجميله الي بذكرها تحت من البيت

الجوال

نموذج (1)

تكلم خطيبها <<<<<<<هذي صراحه مو مؤيدتها فيها

واخوها يدري مع انه لسه ما صار شئ بس عادي عنده ولد عمها وما فيها شئ(بوجهة نظره)

استوديو الجوال

حاطه صور لاعبين واخوها شافها بس بس قالها امسحيها

نموذج (2)

مره هاوشها اخوها وهزئها وزعل عليها

لانها

لانها

دقت عالمطعم <<<<<<يقولها انا موجود ليه تدقين

<<<<<المسكينه تحسبه طالع

استوديو الجوال

يااناشيد ياصور كرتون

ومره شافها داخله منتدى هلالي وهاوشها قالت بكل برائه ابي اشوف المباراه متى

قال حتى المباراه ماله داعي تتابعين

<<<المسكينه تدخل المنتديات باسم ولد من الخوف

نموذج (2)تبي تطلع

شلونك فلان (اخوها)

هلا هلا

ابي اطلع من زمان ماطلعت

تامرين امر وين تبين

مدينة العاب

هاه لا انا اسف صراحه كرهتها اختي تلعب قدام الناس لا

امممممممممممممم طيب ابي الكورنيش

هاه اسف زحمممممممه والنور قوي البعيد والقريب يشوفكم لا آسف

طيب اممممممممم السوق الفلاني

بنفس خائسه نعم السوق بس اذا تبين شئ من متى صار السوق للتمشيه

لا قصدي بس عشان فيه عرس قريب ابي تكون عندي خلفيه عن الاسواق هالسنه قبل الاجازه

لا يعني لا تفهمين

ايه خلاص ودني المطعم

ههههههههههههههههههههههه

مطعم خلاص قولي وش تبين عشاء وانا اجيب لك

الاخت:خلاص انت اختار وين توديني

الاخو :عندي لك مكان ما فيه احلى منه
فاضي حتى لو تكشفين وجهك مااحد يشوفك

الاخت:وين

الاخو:البر

الاخت:روح لحالك

الاخو:احسن هذا جزاي ابغالك الراحه وماابيك تنكتمين بالعباءه

الاخت:عادي اهم شئ اماكن حلوه

الاخو:انثبري تبين البر ولا لا

للمعلوميه: مو بر عادي الي يوديها لا مكان بسم الله مافيه احد فاضي عشان العالم ما يشوفون خواته

احلام نموذج (2)

مسكينه تقول من كثر مااخوها لاحقها بكل مكان حتى الاحلام معي

تسولف بكل براءه

المظلومه:باركي لي

صديقتها:على ايش

المظلومه:امس تحلمت حلم واخوي مو معي

صديقتها:ههههههههه

من كثر ماتحلم باخوها سئلت مفسر احلام عن السبب

قالو لها صديقاتها ما يبيلها سؤال من كثر ماهو غاثك

فيه حادثه صارت لاخوها الي ما يغار مره يعني اهون تقول اول مره ركب فيها الطائره اول مااقلعت الطائره يقول الناس نشوفهم واضحين يوم اننا قريب من الارض ويقول وانا بين السماء والارض محترق من داخلي اقول اخخخخخ يالقهر

وانا كنت اخلي خواتي يكشفن عن الطائرات <<<<<<<<صراحه لاتعليق

الاسئله

وش رايكم بالنموذج الاول والثاني ومن الافضل برايكم ؟

ماهو الرادع والحل للاخوان الي بالشكل هذا نموذج(2) ؟

للبنات

انتي من نموذج (1) ولا (2)؟

للاولاد

انت مع خواتك زي(1)ولا (2)؟

واتمنى اكون طلعت بعض من هموم البنات

والظلم الي يواجهونه من قبل اخوانهم

وآسفه على الاطاله

بس اعذروني من الحره الي فيني

حكمه

قال ابن تيمية : مَـن أراد اللـــذة الأبــدية فليزم عتــــبة العبـــــودية

طوق الحمام · #2 28/01/2009, 04:33 AM

الله يسعدك شكلك واجد محتره
حبيتي انا عن نفسي افضل النموذج المتوسط اللي مبني على اساس الثقة بين الاخوان والحب والمودة

مو انا اتحكم عشان ولد وبا كيفي وكل اللي اسويه صح وانتي بس اسمعي الكلام ولا تعارضين <<<<< ويبرر ها الكلام والتحكم اللي ما له دعي با خوفه على اختها ...

اذا عن الطلعه اصلا يحمد ربه اذا طلعت معه ارزه
والجوال اكسر يده اذا لمسه بدون اذني

انا اخوني مودبين بس في الموضيع هذي اكون متحفزه من كثر ما اسمع من البنات عن اخونهم التحف
واساسا هذي الحركات تسمى تسلط عبوديه مو غيرة اسمحيلي
وفيه مشكلة ترا بعد في البنات احيانا هي تكون السبب في ممارسة العبوديه عليها لانها تحس انها اقل من اخوه وما تدافع عن حقها وترد الظلم عن نفسها اسمحولي على كلمة ظلم في اخون ما يخافون الله في خواتهم والمشكله الام والاب معطينا الصلاحية وكأن ها البنت ما راح تحمي نفسها الا اذا اخوها يمارس عليها التزمت ما يدرون ان مافيه احد با يصلح احد واعرف بنات عايشين طوال اعمارهم بدون اخوان او اباء ومافيه احسن منهم وفيها بنات عندها ابو واخوان بس تعال شف كيف اطلع الكبت الممارس عليها ...

اسمحيلي طولت كلام ......
وبا التوفيق

الضحى · #3 29/01/2009, 12:04 AM

السلام عليكم ورحمة الله وبركاته.

عزيزتي ديننا دين الوسطية وجعل لكل أنسان حقوق وعليه واجبات .ومن الواجب على الأبوين أن يوضحا

لأولادهما ذكور وإناث حق كل شخص على الأخر .لا أفراط ولا تفريط .أنا أعرف فتيات اللهم أهديهن أستغلوا ثقة الأهل

وصرن على كيفهن في اللبس والخروج والدخول والله يستر .وعندما لام أحد الأشخاص أخوهم وهو أكبر منهن

قال وش أسوي والداي يقولان لا تتدخل ؟؟؟؟!!!!

وآخر يتحكم في كل شيء .....

لا .لا. أنا مع التوسط في الأمور البنت أنسانه ولها مشاعر وأحاسيس ورغبات وميول يجب تحقيقها

في حدود شرع الله .لا بأس أن تذهب للمطعم مع أخوها وهي متمسكة بدينها .وتذهب للسوق مع والدتها .

أو مع أخوها .عزيزتي لا تلومين الشباب إذا حرصوا على أخواتهم من كثر ما يسمعون من القصص التي

يشيب لها الولدان .

أكرر الوسط مطلوب لا تزمت ولا أنفلات .اللهم أحفظ الجميع آمين .

فيصل2007 · #4 29/01/2009, 03:12 AM

مهما كان الغيره مطلب اساسي والرجل الي مايغار على اهله مااسميه رجال

BEST_01 · #5 29/01/2009, 03:56 AM

انا مع الوسطية

لا افراط ولا تفريط ....

صح الغيرة لا زم تكون موجودة ... بس مو فوق اللزوم
ترا الشي اذا زاد عن حده انقلب ضده

اذكر قصص كثيرة ... لفتيات وقعوا في الحرام
بسبب الغيرة الزائدة من ازواجهن

وتقبلي مروري المكركب