ربما تكون الثمانية طريقنا الوحيد للوصول إلى الدور الثاني ... وياعيني عليك يانسرين
 

الانسان الحكيم هو اللي يجد في أسوأ الكوارث نواحي إيجابية ..

لو فيه عقليات فاهمة مع المنتخب .. أقول لو .. اللي صار ممكن يكون خيرة ..
خلَوكم معي شوي وتقتنعون ..

ترى كيف يفكَر الكاميرونيين الآن ؟ ..

مؤكد إن الكاميرون الآن مستهينين بالمنتخب السعودي كثيراً كثيراً كثيراً ..
وهمَهم الوحيد الآن هو كم يحتاجون من هدف ؟!! .. ثمانية ؟ .. لا لو حصل تسعة أو درزن بعد يكون أفضل علشان يفرقون ألمانيا ..
بعدين من يبي يلعب بالهجوم ؟ لازم يلعب مبوما .. عنده هدف ولازم يجيب أربعة على الأقل علشان يصير الهداف ..
وصامويل إيتو بعد لازم يجيب له كم هدف يستاهل مبدَع قدام ايرلندا ..
ممكن يلعب مهاجم ثالث بدل الحارس ( يعني بلاش حارس ) ؟ .. لا صعبة بدون حارس ..
كذا يفكَر لاعبين الكاميرون ومدربهم الآن .. هذا شيء مؤكد بعد الثمانية.. يعني موب أربعة .. أو بالكثير خمسة .. هذي ثمان أهداف يعني بنقلاديش ..

وهذي ناحية إيجابية تماما للمنتخب لو كانوا يعرفون يستغلون هالوضع ..

منتخبنا موب سيء للدرجة هذا مؤكد بعيداً عن نتيجة ألمانيا المباراة هذي لها اسباب كثيرة ..

لو فهم اللاعبين والجوهر هالشي وحسبوا حساب تهاون الكاميرون وتعاملوا معه بذكاء .. فأوهموا الكاميرونيين من خلال التصاريح وأمام الإعلاميين ان هدفهم الخروج بأقل نتيجة .. وأنهم في وضع متدهور ( نفس خدعة الألمان لنا طوال الشهور الماضية )
بينما درس الجوهر منتخب الكاميرون بكل ما يملك من قدرة ومعلومات وتعامل مع المباراة على أنها مسألة حياة أو موت .. أكون أو لا أكون ( و فعلاً هي كذلك بالنسبة له وللمنتخب )
واستوعب اللاعبون الوضع تماماً .. ووضعوا بحسابهم أنها فرصتهم الوحيدة في أن يعودوا مرفوعين الراس .. وعملوا للفريق .. وليس لأنفسهم ( ما بعد الثمانية درس )


وحينها تصوروا معي المنتخب الكاميروني منفوخ على الآخر ومستهين بالخصم على الآخر .. واللاعبين الكاميرونيين متوقعين أشباه لاعبين بلا روح .. وباغتهم منتخبنا بمستوى مغاير تماماً وخطة مغايرة ومحكمة .. و أراد الله وجاب المنتخب هدف في الكاميرون في ظل استهانتهم واستهتارهم بابو ثمانية وبعدها صكينا دفاع وعلى المرتدة وانتهت كما نشتهي .. بالفوز ..

لو صارت .. مؤكد المنتخب بيكون بالمركز الثاني والله أعلم .. لأن الالمان بيفوزون على ايرلندا أو يتعادلون في أقل الأحوال ..
وحينها نعود من جديد للصورة .. وتضيع مهزلة الثمانية ..
وبرايكم لو صار هالشي بيفرط اللاعبين في مباراة ايرلندا بعد اللي جرالهم ؟!! ..
خصوصاً وان هزيمتهم النكراء أعطتهم درس محترم جدَاً ..

ساعتها يكون المركز الثاني بأيدي لاعبي منتخبنا .. لو تعادلنا مع ايرلندا أو فزنا في آخر مباراة ..

يمكن تقولون وش هالمتفائل .. ناسي من هم الكاميرون ؟ .. وناسي الثمانية ؟ .. لهؤلاء أقول

ما على الله كايد ..

تفائلوا بالخير تجدوه ..
بعدين لا تنسون مباريات المنتخب العديدة قدام منتخبات أفريقيا المختلفة .. ( جنوب أفريقيا .. السنغال .. مصر .. المغرب ) ..
أقول للاعبين .. وللجوهر .. ولإدارة المنتخب ..

بهالطريقة فقط .. فقط .. فقط ممكن نسامح المنتخب على الثمانية اللي طيحت وجيهنا عند العالم ..

لكن هل يفكر الجوهر واللاعبين وإدارة المنتخب بهالمستوى ؟!! هذي اللي ماني متأكد منها ..

ياعيني عليك يانسرين


بعد مباراة ألمانيا في استديو البقر في art ..
بعد ما هزأ مجموعة البقر الموجودين بالاستديو في لاعبين المنتخب ..
انتقلوا للحديث عن الفارق الشاسع بين منتخبنا وكل المنتخبات الموجودة في كأس العالم ..
ثم انتقلوا للحديث عن ضرورة إنشاء مدارس لإعداد اللاعبين في السعودية .. وعن مشاريع أخرى لعل وعسى نوصل لمستوى كاس العالم ..
ثم انتقلوا للحديث عن خطأ الجوهر في عدم الاستعانة بمستشار أجنبي خلال كأس العالم ..
معنى كلامهم ضمنيَاً هو : اليأس من لاعبي المنتخب .. ومن قدرة المدرب في بقية المباريات ..
معناه انه خلاص مابقي فرصة لحفظ ماء الوجه بالنسبة للمنتخب ..
تصوروا وقع هالكلام على لاعبي المنتخب المنهارين بعد الكارثة الكروية ليلة أمس !!
في هذه الأثناء .. اتصلت امرأة مصرية اسمها نسرين ونبهت على خطأهم الكبير .. وقالت :
كلامكم رائع ولا غبار عليه .. التطوير مطلوب ومعلوماتكم اللي ذكرتوها حلوة وقيمة .. لكن حالياً حطوها في جيوبكم لين يخلص كاس العالم ( عضو على شحم يا بقر )
فيه لاعبين أملنا فيهم لا زال قائم يا جهله .. المفروض ما تقولون هالكلام في هالتوقيت بالذات ..
لكن برضه ما فهم الجهلة في مجلس ابو حمدان وواصلوا حديثم ومارسوا استاذيتهم على المدرب واللاعبين والمسؤلين في توقيت سيء للغاية ..
لكل مقام مقال يا بلهاء ..
لله درك يانسرين .. وألف شكر على مشاعرك الصادقة تجاه منتخبنا في وقت لم نلمس هذه المشاعر من متحللين سعوديين .. وجهلة على منابر فوق مستواهم ..

وتسلمونلي ..

يا عينى عليك يا ابو الشباب
ترا التفكير منطقى للغايه لو اخذنا بعين الاعتبار ما حصل فى مباراة الثمانيه انشاء الله يكون الاعبين هدفهم مسح الصورة الهزيله التى ظهروا بها لحفظ ماء الوجه ومن ثم الكاميرون داخليين يبون تسعه ولا عشرة وما دروا انهم قدام صقور اسيا وانشاء الله يحقق مراد المنتخب بالتاهل للدور الثانى اهم شى الجوهر يشد من عزيمة الاعبين ويؤكد على اننا لسنا اقل مستوى من الفرق العالميه واننا لو لعبنا بروح معنويه عاليه انشاء الله كل شى بيصير وبالتوفيق للاخضر فى مشواره للتاهل للدور الثانى

نتمنى ذلك و ان كان اشبه بالمستحيل