نادي الهلال السعودي - شبكة الزعيم - الموقع الرسمي - :: || :: شُكر خاص للمُشرف السابق S U L A I M A N

السلام عليكم ورحمة الله وبركاته :rose: :smilie47:

أشكر إدارة الإشراف بداية على البادره الجميله .. وأشكر الجميع بلا استثناء على المشاعر النبيله .. ووالله الواحد يخجل من الإطراء الي مايستاهل نصفه :smilie47: شكرا لكم من الاعماق أحبتي :rose::smilie47:

قبل تقريبا 17 شهر .. تم تلوين يوزري باللون الاخضر .. وكُتب بالأسفل عبارة ( مشرف منتدى الرياضه العربية والعالمية ) .. ما اخفيكم اني بطبيعة الحال كان عندي خبر بهالتغيير .. الاخ الغالي والعزيز هلالي ومانشستراوي نزل الخبر في تلك الليله وتحديدا على ما أذكر في الساعه 1 صباحا .. ومن ذاك الوقت وانا كنت عارف انه تنتظرني مهمه مهب سهله .. لكن برضو مهب مستحيله .. مع العلم ان المشرفين المتواجدين ذيك الايام كانوا مميزين بوجود بدر جيرارد وحمد ذا دانجر مع ان دخلاته قليله .. لكن كان كل واحد يكمل الآخر .. لين ما انظم لنا أسير الزعيم وبدأت مسيرة النجاحات والتغيرات ..

وقت إشرافي كان جدا مميز في الحقيقة .. الحمد لله .. طبعا برشلونة كانوا دايخين للأسف :razz: .. لكن كـ منتدى ولله الحمد شهد نقلة نوعيه كبيره بتكاتف المشرفين الأفاضل احمد وعبدالله وابراهيم .. وتركي برضو .. بالإضافة إلى تغيير وتطوير الكثير والكثير من الامور .. سواء من منتدى استشاري أو من نقله كبير في منتدى الفيديو والصوتيات أو م خلال العمل الكبير في اللجنه الاعلاميه .. او من خلال القوانين الي يتم طرحها كل موسم في كل المنتديات .. والآليات الواضحه الي نعمل عليها باستمرار .. كل هذا ماكان راح يتم ويمشي بالطريقه الي كنا مخططين لها .. لولا توفق الله سبحانه .. ثم وقفت الأعضاء الكرام وتفهمهم لاعمالنا ..

في نفس توقيت إشرافي .. كانت بداية إفتتاح المنتدى الاستشاري .. المنتدى الاستشاري في بداياته وتحديدا في منتصف الموسم الماضي كنا نعاني فيه بشكل كبير .. كونك راح تحدث نقله نوعيه في المنتدى معناته يبغالك جهد ووقت كبيرين .. وهذا الي صار .. مع تكاتف الأعضاء في ذيك الأيام ومع تكاتف الاعضاء الحاليين برضو كل شي مشى بالسليم .. ريدزاوي ميلانيللو الزعيم الميلاني كتلوني أكبر فخر اني هلالي صقر البوادي لوفرفورايفر سكرو قريت انتر وبقية الأسماء الي عايشت المنتدى في بداياته والي ماتحظرني حاليا .. كانت أسماء طبعا مميزه في ذلك الوقت في منتدى العالميه وتم اختيارهم وفق أسس واضحه ومعينه .. لانك في مرحله حساسه وتحتاج إلى اعضاء يخدمونك بخبرتهم في هالمجال .. مشت الأيام واعتذر الي اعتذر واستمر الي استمر .. ونشكر الأعضاء المُعتذرين كل الشكر ونشد من أزر الاعضاء الباقين حتى الآن .. ونشكر الاعضاء الحاليين طبعا .. فـ المجهود الي يقدمونه الاخوان الاستشاريين مهب هين .. بالإضافة إلى عمل المشرفين الكبير طبعا في المنتدى الاستشاري ..

اما بالنسبه لمنتدى اللجنه الاعلاميه فـ انا جدا جدا مقصر في هذا الموسم .. لكن الشباب فيهم من الخير والبركه الشيء الكبير ان شاء الله .. سواء مع وجود سليمان او بدونه ..

كلمتين كان ودي أقولهم وأفضفض الي بداخلي .. لكن بالنسبه لموضوع التنحي عن الإشراف ماراح يخليني انسحب من المنتدى قطعا بإذن الله .. لكم وعد مني اني راح اتواجد يوميا بحيل الله قد ما أقدر .. وقت الاشراف كانت العيون تجاهي طبعا كـ مشرف ويُنتظر مني الكثير .. لكن كـ عضو عادي مايُنظر او مايُنتظر مني اني اقوم بأعمال إشرافيه مثلا .. ولو اني تحت امر الإداره في أي شي يطلبونه مني ..

اما بالنسبه للتنحي فـ بصراحة وبكل امانه .. كل مافي الموضوع اني شفت نفسي ماراح أعطي الإشراف حقه .. فـ فظلت الإبتعاد وإعطاء فرصه لغيري ومن هم احق مني بالمنصب .. في الفتره الأخيره اعمال الاشرافيه ماكانت تمثل المأمول من سليمان .. أو حتى نصفه بكل امانه .. تواجدي كان قليل ومحصور تقريبا في الصباح والظهر وشوي من العصر .. في حال اني دخلت طبعا .. وهي اوقات الدوام الرسمي عندي .. فـ الدوام عندي بكل امانه ياخذ من وقتي الشيء الكبير .. فـ استغل بين كل فتره والثانيه واوقات البريك في الدوام إلى الدخول إلى الشبكة ومتابعة كل جديد .. لكن بعد الدوام يالله الواحد يشوف أهله ويجلس معهم ويتابع اموره الشخصيه .. وبكل امانه لو ماكنت ادخل من خلال العمل ماكان شفتوا رقعة وجهي .. لكن الحمد لله على كل حال اهم شي اننا مستانسين : D ..

من خلال هذا المنبر اتمنى من كل قلبي اني ما أكون قسيت على احد في وقت إشرافي .. او ظلمت احد لاسمح الله .. احيانا الواحد يسوي أمور مايدري انها خطأ الا بعد ماينبهه احد .. وبكل امانه أيضا سبق سويت شغلات ماكنت اتوقع انها خطأ أو فيها شوية إجحاف للطرف الثاني .. لولا توفيق الله ثم تنبيهي من الزملاء المشرفين .. فـ من خلال ذلك .. أتمنى من كل واحد اخطيت عليه بأي حال من الأحوال انه يحللني ويبيحني ..

أتمنى اني كنت مشرف خفيف عليكم .. ويعلم الله مدى حبي للجميع هنا ومدى إحترامي للكل مهما كانت ميولهم ..

والصلاة والسلام على أشرف الأنبياء والمرسلين ..

سبحانك اللهم وبحمدك أشهد ان لا اله الا انت استغفرك واتوب اليك