بسم الله الرحمن الرحيم
اول شي مبرووووك خسارة منتخبنا المجيد
اسباب الخسارة بوجهت نظري و بدون لف و دوران و تصاريح
1 - الحكم و الإصابات ,, الأخوان في القسم كفوا و وفوا في هالموضوع
2 - السبب الثاني و اللي بوجهة نظري هو الأكبر و الأبرز هو ضعف الثقافة التكتيكية للمدرب و اللاعبين ,, والله مدرب ما يدري وين الله حاطه و تشكيلته زي وجه و يحب يتفلسف عشان إذا فاز بالحظ قال انا السبب في الفوز لأني ابتكرت طريقة و تشكيلة جديدة و ماغير حاطينه فوق روسنا كل ما جت خسارة قلنا الاسباب كذا و كذا هذا مدرب وطني لازم ندعمه ..الخ ,, ياخوي الدوري توقف عشان حظرتك تجمع اللاعبين و رحت و جمعت اللاعبين في معسكر طويل "كعادة منتخبنا المجيد" ما قد سمعت ان منتخبات العالم اللي تجيب كاس العالم 3 و 4 و 5 مرات تعسكر اكثر من سبوعين حتى كاس العالم ,, و انت عشان مباراة وحدة 20 يوم ؟ يا رجال لو تعسكر سنة بس تأدي زي الناس اطلق شي المشكلة احسهم فالين والديها في المعسكر ما يدرون عن شي ,, اجل منتخب يبي يتأهل لكاس العالم لاعبيه ما يعرفون ابجديات كرة القدم " التمرير و التسليم " ؟؟؟؟ ههههههههههههههه و الله مصخرة صراحة والله عيب هاللي قاعد يصير يا رجال لو تدرب كل لاعب على التمرير لزميله في هالعشرين يوم مرة وحدة كل يوم كان صاروا مبدعين مقارنة بأدائهم بس الله يخلف ,, والله احس الكوريين إذا شافوا المباراة فطسوا ضحك لاعبين متأهلين كاس العالم ما يعرفون يناولون هع و الفلوس اللي تصرف على منتخبنا تسوى الفلوس اللي تصرف على اليابان و كوريا و استراليا مجتمعة و وش قال قال نتأهل للمرة الخامسة و الله انا نمشي على البركة لاعب موهوب و طق الكورة و الحقها و شوت و قووول و لا جا اللعب الصدق تفتحت الشوارع و اكيد الكل يذكر الفريق اللي سنتر 9 مرات في كاس العالم 3 - السبب الثالث هو الجهاز الفني + الإداري + الطبي و اللياقي ,, نبدا بالطبي و اللياقي اجل يجونك لاعبين في اتم الجاهزية البدنية "ياسر و حسين" يصابون ورى بعض ؟؟هذولي لاعبين محترفين يعرفون وش يسوون اكيد انك سويت تمارين اجسامهم ما تعودت عليها عشان كذا اصيبوا !! ,, الجهاز الإداري والله ان الجهاز الفني ماله قرار ان سلطان و ربعه هم اللي يحطون التشكيلة و الخطة و كل شي الجوهر و اللي قبله بس منظر نرجع بالزمن لسنة 2007 نتذكر يوم استدعى انجوس احمد البحري ليكون ظهير أيمن و اللاعب ما لعب مع النصر الا مباراة مدري مباراتين !! معقولة مدرب محترف يختار لاعب ما شافه الا مباراتين ؟ و اساسي ؟ مستحيل ,, الجهاز الفني و هو المصيبة الكبرى ما فيه تكتيك ماشي على البركة و الموهبة كأننا فريق حواري ما فيه تبادل مراكز مافيه خطط ما فيه ادوار لكل لاعب بس الحق الكورة و شفنا هجمة للسعودية على طول بعدها هجمة لكوريا صارت شبه انفراد بس ربك ستر ،، العالم تطوروا و خطط اللعب تطورت و هم يحسبونهم لين الحين على عهد ماجد عبد الله و صالح النعيمة و الثمانينات ياخوي خلاص هذاك ماضي الحين كل شي تغير ياخوي تغير زي الناس مهوب نفس الخطة مفس الأخطاء نفس التصاريح و الهياط .
4 - السبب الرابع هو الدفاع المهزوز او بالأحرى المعدوم ياشيخ قمنا نتذكر وليد عبدربه بالخير من بعد هالمصايب و الله الكوريين فتحوا مدينة رياضية في دفاعنا ( كباري و شوارع ) والله لولا الشنب وليد عبد الله اللي شايل الدفاع على ظهره ولا كان 3 بالراااحة و المهندس العبقري ناصر الجوهر يعرف يوزع المراكز صراحة اهنيه على عقله ما يستدعي منتشري و يستدعي اسامة المولد و يحطه ظهير ولا يستدعي حسن معاذ و السالفة حوسة في حوسة آخرتها شفتوا الفضايح و الحكم هو الشمّاعة . 5 - السبب الخامس و الأخير هو اللاعبين ,, ياخي بعض اللاعبين و ليس كلهم و خصوصاً المدافعين و بعض لاعبي الوسط ما عندهم روح قتالية ما يدري انه يمثل شعب من 25 مليون مشجع متحمس تقعد تسحب رجليك في الملعب و احر ما عندي ابرد ما عندك ياخوي قاتل على كل كورة انقض على الكورة مهوب يالله تمشيو إذا خسروا قالوا هاردلك للشعب السعودي همسة : يا سلطان وش يطلبك الاتحاد الآسيوي يوم يحيك "مؤامرة" ضدك ؟ انت اللي اخطيت انت اللي تحمل خطأك و صححه
انا كاتب هالأخطاء و انا داري انه بعد 10 سنوات نفس هالخطاء بتكون موجودة و أذكركم
للتوضيح : صحيح الحكم ظلم المنتخب لكن حتى لو صارت بلنتي بتصير ضربة جزاء و كرت اصفر للحارس لأن اللاعب ما كانت أمامة فرصة محققة الكورة بعيدة و لو سجل المنتخب نفس الأداء الغبي بيكون مستمر حتى لو كانوا كاملين و بيسجل الكوري هدفين يعني ما فرقت ضربة جزاء ولا لا الأخطاء داخلية في المنتخب
اعذروني على الإطالة و اتمنى ان اسمع آرائكم في اسباب الخسارة
تحياتي للجميع