السلام عليكم ورحمة الله وبركاته ..

كيف حالكم وش أخباركم ....مشتاقين لكم ايها الزعماء

يسرني ويشرفني أن اسطر هذه المشاركة المتواضعة تأكيداً لحرصي على التواصل معكم رغم الظروف التي امر بها حاليا والتي تمنعني من المشاركة .

مشاركتي عبارة عن بعض المواقف التي تواجه اي شخص راجع من عمله وخاصة خلال هذه الايام الرائعة التي تحمل في نسيمها سموما وحرارة تلفح الوجوه

- الزمان : بعد الساعة 2 ظهرا
- المكان : طريق خريص في الرياض على سبيل المثال لا الحصر
- الوسيلة : اي موتر حتى لو دبابة

المشهد الأول :
(توقيع الانصراف )

وقعت عند المدير انصراف .

المدير :
اسمع بكرا لاتنسى تتابع المعاملة اللي بالادارة الفلانية .
ولاتنسى تتصل على البنك علشان يرسلون لنا صورة من الشيك .

أنت :
سم ان شاء الله ==> تقولها وأنت ودك تلفع المدير

تطلع من عند المدير وأنت شايل هم الزحمة والحر والسيارة اللي موقفها بعين الشمس .
ـــــــــــــــــــــــــــــــــ
المشهد الثاني :
( عند السيارة الملتهبة )

تحط يدك على عروة باب السيارة آآآآآآآآآآآوتش

تحلف من حرارة عروة السيارة أنك تسوي شاهي ونسيت تمسك البريق بالبيز .

تفتح السيارة بعد جهد جهيد ومعركة حامية مع العروة وأحمد ربك أنك تلبس شماغ لانه هو اللي انقذك من هالموقف فتحول الشماغ الى بيز .

ـــــــــــــــــــــــــــــــــ
المشهد الثالث :
( داخل السيارة )

تشغل السيارة ..
امبير الحرارة على النص على طول مافيه مجاملات ولا مقدمات .

تعشق الموتر وتوكل على الله بعد ماشغلت المكيف على اعلى شيء
ولسان حال المكيف يقول : مالك أمل بالهواء البارد الا عقب ساعتين .

المشهد الرابع :
( سعسكة باالسكك والحواري )

تحاول تبعد عن الزحمة بأي طريقه === ايه هين

تدور طريق مختصر علشان الاشارة اللي قدامك تذكرك بالنفرة من عرفات .

تحوس بالحواري والسكك وآخر شيء مالك الاخشمك ولو هو اعوج ترجع للإشارة وأنت رجال .

ـــــــــــــــــــــــــــــــ
المشهد الخامس :
( في طريق خريص )

تحاول تشق طريقك بكل يسر وسلاسة ==> ايه هين

توبييس البنات يحدك==> واتحداك تقول شيء ;) ;)

أجنبي برضه يحدك ==> مايغثك الا أردى حلالك

سيارة موديل صفر قدامك يفرمل فجأة وأنت ماانتبهت ==> طبيعي مايشتغلن اللمبات

سيارة ونيت مكتوب عليها جلي بلاط ==> هو وقت جلي بلاط الحين

بزر معه كامري مظلل ثلجي ومطول الأغاني ويزورق بين السيارات ولو تقوله شيء قالك وقف تبي تضارب ==> هالحين انا منضرب من الحر ناقص انضرب من بزر

وايت يخر مويه تنبسط تقول ياسلام هذا الاشياء اللي تفتح النفس ==> وإذا سقطت عليه لقيت انه وايت مجاري الله يعزكم



انتهى ........


على العموم هذي المشاركة اللي حبيت اطرحها لاني توي جاي من العمل ..

ارجو اني ماضيقت صدوركم
واللي ضايق صدره يحاول يتعود على ضيقة الصدر لانه صعبة يستاسع صدرك وأنت طالع من الدوام وخاصة بالصيف .


تحياتي القلبية الحارة كحرارة تانكي مجدوع بحراج ابن قاسم


اخوكم الملتهب / جمجوم بيك