نادي الهلال السعودي - شبكة الزعيم - الموقع الرسمي - (( مـا تستعبطشـي يا وائـل )) روايــة دراميـة .. !!

بســم اللــه الرحمــن الرحيــم

يالله حيهم .. يالله حي كل(ن) باسمه ..
البركة هالامطار .. والله يجعلها أمطار خير وبركة ..

** (( وائل )) .. شاب مصري .. دوب .. خبيث خبث الله لا يوريكم .. يدرس في ثالث ثانوي .. ساقط(ن) له كم سنة .. طرف بطنه دايم(ن) طالع لانه يحب يلبس تيشرتات تسنها بودي وهذي مشكلة لازم يحلها .. دايم(ن) يلبس بنطلون قطن لونه اخضر وفيه مغاط تحت عند رجوله .. يعاني من لحمية في خشمه .. شعره فلافل .. يلبس نظارات دواوير .. التيشرت اللي دايم يلبسه لونه ابيض وفيه خطوط بالعرض لونها كان ازرق و ألحين صار رصاصي من كثر الغسيل .. كثير ما يحكحك جنوبه وهالشيء يرّيحه .. عمره 23 سنة .. ما يحب الدراسة .. يدّخن .. معجب في ابو تريكة بشكل غريب مع انه مايدري وش الكورة .. الشي الوحيد الي يفتح النفس فيه هو أنه رسام .. لاااا .. ولا هوب أي رسام .. رسام مبدع الصدز .. ما أخفيكم أنه مبهذل بـ أميمته وأبيّه .. لأنه الوحيد اللي بين اخوانه داشر تسلاب ولاهوب راعي دراسة ..

** (( مخلد )) .. شاب سعودي .. عمره خمسة وعشرين سنة .. يعتبر من اخويا وائل .. اعصل .. طويل .. معه سبحة لونها أصفر وخيوطها لونها أحمر .. يحب يسكر القلاّب وهذا الشي يحسسّه أنه مرّسم .. برضوه يدّخن .. وأهله متوذين منه .. أبوه طاق(ن) الخمسة وتسعين سنة الله يعطيه طولة العمر .. وامّه ما تصدّقون اذا قلت لكم أن عمرها بس ستة و اربعين سنة .. قبل فترة .. راح لـ أمريكا بعثة لكنه انطرد ورجع للسعودية وصار محلل لسوق الاسهم في قناة مشهورة وسالفة طرده بـ أقولها لكم .. اهم شي عنده في الحياة هو الإستراحة حقته هو واخوياه .. له علاقة مع وائل راح تتضح في السالفة

** (( منيف )) .. شاب سعودي .. إستغلالي .. و يدرس مع وائل في نفس الفصل .. عمره 18 سنة .. وفي ثالث ثانوي .. مذّي ذيك المجلة .. كل يوم مرسل(ن) لهم قصيدة على أساس ينشرونها وهم ساحبين عليه .. لإن الصدز قصايده مهيب زي قصايد العالم .. لكن يحسب له إصراره وكفاحه في إرسال دراسيعه .. ماخذ مقلب في عمره أنه شاعر .. وكل يوم ماسك(ن) له قصيدة وينتقد .. ذاك اليوم قاعد(ن) يقرا قصيدة لياسر التويجري وفجأة فجرها ضحك (( لا ويقولون أن صبي عنزة شاعر .. بالله هذي قصيدة .. كلها كسور )) << عادي لا تشرهون عليه :) .. جا ذاك اليوم ..وأرسل (( خرابيطه )) لمجلة ما ودي اقول أسمها اخاف أشوّه سمعتها :d .. وهالمجلة بدورها نشرت قصيدته .. وبعدها صدق فعلاً انه شاعر .. وتوّسع نطاق عمله .. و صار يرسل لكل المجلات والجرايد .. وصار همّه الأول والأخير هالقصايد اللي يرسلهن .. صار له علاقة عمل مع وائل راح اقولها لكم ..

(( حيــاة وائـل ))

ذاك اليوم .. الساعة ست الصبح .. دخلت أم وائل على ولدها (( وائل .. وائل .. أوووم يبني .. بابا يستناك .. تحت )) .. (( يووووه .. مانيش رايح للمدرسة حتى تشترو لي عربية )) .. وينقلب على جنبه الثاني ويغطي راسه بالبطانية (( عربية أيه .. واحنا عندنا فلوس عشان نشتري ليك عربية .. ما تشوف اخواتك << تقصد اخوانك .. ولا واحد ال (( قال )) اشتروا لي عربية )) أبو الشباب ما عطاها وجه ورقد .. وهي الضعّيفة ما فيها حيل تجاكر هالتفخ .. المهم هي طلعت وهو رقد .. أذّن الظهر .. ويقوم ابو الشباب .. ويشوف جواله ألا ويشوف مخلد داق(ن) عليه عشر مرات .. اتصل على مخلد (( أهلا يا موخلد )) .. (( يالله حيّه .. وينك ياخي ما ترد على الجوال .. والله فاتك يابو مصير طلعة .. يحبها قلبك .. عاد هالايام مطر وفلة .. دزينا للنفود .. وخذ يا تطعيس .. ما نقصنا ألا انت )) .. (( خخخخ الله يخليك .. عموماً اليوم الليل الوعد .. اوكي ؟ )) .. (( أوكي ؟ ولا تنسى ابو الشباب )) .. (( ههههههه أكيد أكيد )) .. وينزل تحت ألا وابوه قاعد(ن) يقرا قران (( أهلا بابا )) أبوه كمّل الايه ثم ألتفت (( و ليش ماروحت للمدرسة اليوم يا وائل ؟ )) .. (( ما نيش رايح حتى تشتروا لي عربية )) .. (( يبني .. عربية أيه .. وايه دخل العربية بالمدرسة ؟؟ العلم يبني نور )) .. (( والقهل ظلام .. حفظناها دي في المدرسة )) .. (( أوسكت .. بترفع صوتك على ابوك ياللي ماترّبتش )) .. وائل نزل راسه وابوه قعد يهوش عليه .. لكن للاسف أقدر أقولكم ان ابو الشباب مايدري وش قال ابوه أصلاً .. خلص هواش الابو .. راح هالبليد للمطبخ (( ماما .. طبختوا ايه النهار ده ؟ )) .. عاد امه ميّلت خشتها ثم التفتت عليه على اساس انها زعلانة وقالت (( كبسة )) .. هو ما جاب خبرها .. وقبل ما يمشي قال (( انا فوأ .. اذا خيلص الغدا صيّحوا عليّا )) ورقى .. زان الغدا .. وصاحو عليه .. ونزل .. وتغدو .. ويوم خلصوا من الغدا قال ابو وائل (( وائل .. انا حـ امنعك من المصروف حتى ترقع للمدرسة )) .. (( ههههههههههههههههه مصروف أيه اللي انتا تتكلم عليه .. حـ تمعني من عشرة ريال .. امنعني يا سيدي .. ما تفرئش معايه )) .. الصدز أنه رده يقهر .. أنا ألحين منقهر منه وشلون أبوه أجل .. في هالوقت ابوه قاعد(ن) يهز راسه بشكل أفقي .. ويردد (( لا حول ولا قوة إلا بالله )) .. المهم ويرقى فوق هالدب .. ورقد مرة ثانية .. ولا صحى ألا الساعة عشر الليل .. أول ما صحى دق على واحد يقاله (( حنفي )) حنفي ذا صديق سوأ .. (( ألو .. اهلا يابو الحنف .. الرّقال .. قاهز ؟؟ )) .. (( أهلا وائل .. أيوة .. قاهز .. حـ تيجي تخدوه دي الوأتي ؟؟ )) .. (( ايوة ... انا قاي ... أنا قاي .. يالله باي )) .. ويطلع ابو الشباب من البيت .. متجه لحنفي .. وصل .. طق الباب .. طبعاً حنفي ساكن في بيت يحوّم التسبد في حارة وش أقولكم بس .. فتح الباب حنفي (( أهلا وائل .. ما أول تليش .. خارقي او داخلي ؟ )) .. (( لأة .. لأة يابو الحنف ... ما اتفئناش كده .. خارقي أكيد )) دخل البيت حنفي وطلع ومعه قوارير لافها بجرايد ومدّها لوائل و وائل بدوره يحاسبه .. ثم اتجه لـ إستراحة (( مخلد والشباب )) .. دخل عليهم .. (( السلام عليكو .. يا االله .. الحئيئة احمدوا ربكو اني لئيت ازايز النهار ده )) .. رد مخلد .. (( كفو .. كفو .. عز الله انك ذيب .. هاك هذي القطّة )) ويمد له فلوس جامعها من الشباب .. رد وائل (( لأه .. لأه .. يا موخلد .. الازايز سعرها مرتفع شوية اليومين دول )) .. (( كم أجل ؟ )) .. (( عطوني ... خمسمية زيادة )) وفعلاً مخلد عطاه خمسمية وقال (( تستاهل ... المهم لا تخلينا .. الاستراحة وتعرفها )) .. (( اكيد .. اكيد .. يالله باي انا ماشي )) .. (( وين وين .. اقعد خلنا ناخذ علومك )) .. (( لا لا معليش .. مشغول شوية .. يالله عن ازنكو )) وطلع وائل من الاستراحة .. متجه للبيت .. وبيع الشراب يصير يومياً على الشيخ مخلد وربعه .. كل يوم يروح وائل لحنفي ويودي قواريره لـ إستراحة مخلد والشباب ويرفع سعر الشراب عليهم وذولاك الله يخلف عليهم ما عندهم مشكلة أهم شي يقرقعون .. ومثل ما قال وائل (( مصروف ايه اللي انت تتكلم عليه )) وابو الشباب ما جاب خبر مصروف ابوه اللي انقطع .. المهم .. وتمر الأيام و ابو وائل يومياً عند ولده (( يبني .. ما تروح للمدرسة .. روح عشاني .. ياخي ما ليش خاطر عندك ؟؟ )) ومن هالحتسي .. ويجي ذاك اليوم .. ويقرر وائل انه يروح للمدرسة من كثر إزعاج ابوه .. وفعلاً راح .. وعطوه تعهد لكنهم ما فصلوه .. ويدخل الفصل ويقعد .. وكان جنبه (( منيف )) .. أول ما قعد أبو الشباب علطول منيف قال (( الحمد على السلامة يا وائل .. ياخي وينك .. عسى المانع خير ؟؟ )) وائل أصلاً ماله خلق للمدرسة .. المهم .. ألتفت على منيف وقال (( الله يسلمك .. شوية زروف << ظروف )) وتخلص الحصة .. وتمر الحصص اللي بعدها .. وأبشركم .. وائل واضب على المدرسة .. المهم .. وائل في المدرسة ماله خلق للشرح ولا للمدرسين .. وما غير قاعد(ن) يرسم في دفتره .. اللي أذكره انه يحب يرسم شخصيات كرتونية .. مثل كونان و سلفر و هالخرابيط .. جا ذاك اليوم .. ألا وكان مدرس الرياضيات يشرح ويشوف وائل لاهي في دفتره .. راح لمّه ولقاه يرسم .. خذ الدفتر .. وشيّك على كل الرسمات ثم قال (( ما شالله يا وائل .. رسام الصراحة .. لكن وش دخل هالرسمات في درسنا اليوم ؟؟ )) وائل سكت ولا رد لإن ماله وجه يرد .. كمل المدرس (( يا وائل .. انتبه للشرح .. وخل عنك هالرسمات اللي ما منها منفعة .. والله لو أنك تبيعهن وتستفيد منهم ان كان خليتك ترسم .. انتبه .. انتبه للشرح )) ثم راح المدرس يكمّل شرحه .. طبعاً وائل إنسان بليد ما تسن المدرس قايل شي .. وابو الشباب كّمل رسماته .. جت الفسحة .. ويجي (( منيف )) ويقعد عند (( وائل )) ومثل ما قلت لكم منيف خوي لوائل برا المدرسة .. ولا هوب راعي بلاوي .. لكن يعتبر زميل مدرسة لا أقل ولا أكثر .. سلّم .. وجلس كالعادة .. هالاثنين جالسين مع بعض يومياً .. ويخطم منيف خطمة على وائل مدري وش تبي (( الا ما شالله .. اجل رسام يا وائل ؟؟ )) .. (( أيوة )) .. (( طيب ليش ما تستغل هالشي ؟؟ )) .. (( يعني أيه .. ابيعهم مثل ما ال (( قال )) استاذ خالد ولا كيف ؟؟ )) .. (( شف )) ويطلّع منيف دفتر وائل من مخباته .. اثره ماخذه من الدرج وجايبه معه .. (( اسمعني يا وائل .. انت عندك موهبة الرسم .. و واضح أن رسماتك كاريكاتيرية )) .. (( لا ولعلمك .. انا عندي رسمات في البيت كتير وكلها على شكل كاريكاتير )) .. (( خلاص بكرة .. جبها ودّي أشوفها )) .. (( اوكي )) .. وتجي الحصة اللي بعد الفسحة .. ويقعد يرسم وائل .. وتمر الحصص ويوم خلّص الدوام .. ويروح منيف لـ وائل (( هاه .. رسمت شي يا وائل )) .. (( خود )) ويعطيه دفتره .. الا و دفتره فيه رسمات كاريكاتير كثير ومدري كم الصراحة .. منيف صارت نيته شينة .. علطول .. أول ما طلع من المدرسة ويشتري ذيك الجريدة .. وياخذ ايميل الجريدة .. ويرسل لهم اول كاريكاتير .. الصدز أنهم سحبوا عليه لكن ما علم وائل .. و وائل أصلا ما جاب خبرهم .. المهم .. وتمر الايام .. ومنيف قاعد يقرا الجريدة ألا ويشوف تعقيب (( الاخ منيف .. الكاريكاتير المرسل مميز .. نتمنى تواصلك )) ويقعد يقلّب الجريدة .. ألا وهم عارضين كاريكاتير وائل وصار يرسل لهم رسمات وائل على أساس أنها منه و وائل يا غافل(ن) لكم الله .. و بقى كم رسمة لـ وائل عند منيف .. وقرر أنه يرسلها لـ هالجريدة .. وبعدين يطلب من وائل و وائل أكيد انه راح يعطيه لأنه يحب الرسم .. وارسل الكاريكاتيرات .. والجريدة عرضتها .. وصار كل ما أرسل كاريكاتير الجريدة تعرضه بدون تردد .. ويجي ذاك اليوم ويقرا منيف تعقيب (( الاخ منيف نرجو التواصل على ايميل الصحيفة )).. ويشيك على الايميل الا وجايته رسالة مضمونها أن الجريدة يبونه كـ رسام كاريكاتير متعاقد مع المجلة .. وله راتبه الشهري .. منيف ما صدّق .. وصار منيف هو اللي يرسل للجريدة الرسمات .. والجريدة تعرضها .. وكل ما خلصت ياخذ من وائل .. وفعلاً صار منيف رساّم كاريكاتير على حساب وائل .. ولا .. صار له صيت .. لكن لو تدققون في رسماته .. الصدز أنها أي كلام .. وما شالله عليه .. ملحق على كلّش .. مرة رياضة ومرة سياسة ومرة إجتماعي .. ذاك اليوم رسم كاريكاتير يتكلم عن (( البطالة )) وأذكر الكاريكاتير مرسوم فيه شخصية (( القصيبي )) بالضبط .. وقاعد ينتقد البطالة .. وصار كل ما انتقد شي يرسم شخصية معروفة ويحملها هالشي .. والشعب طايرين به الصراحة .. ولا يشوفون ألا (( منيف )) وما أخفيكم ان مبيعات الجريدة زادت بعد منيف أو بالأصح وائل .. جا ذاك اليوم .. ويقرر وائل انه يخلي المدرسة لانه مل منها .. وهو جالس مع منيف في الفسحة (( أأول يا منيف .. انا خلاص راح أسيب المدرسة )) منيف ما أخفيكم انه ما له علاقة مع وائل برا المدرسة .. وضاق صدره من هالخبر لإنه راح يفقد مصدر رزقه .. (( وليش .. يا وائل .. الدراسة مهمة .. عموماً الراي في الاول والأخير لك .. ألا صح .. انا بـ أكلمك عن موضوع )) .. (( أيه هوّا )) .. (( شف يا وائل .. انا عمي مدير تحرير جريدة .. وكلّمته على أساس انه يعرض كاريكاتيراتك في الجريدة وهو وافق .. لكنه يعتقد اني أنا اللي أرسمها .. المهم .. انا ما ودي أني اهضم حقك .. وحبيت أكلمك .. واعرض عليك هالعرض .. انك تعطيني الكاريكاتير .. لكن يصير بـ اسمي .. ويجيك راتب كل شهر .. هاه وش قلت ؟؟ )) طبعاً منيف نصّاب وعمه مهوب مدير تحرير جريدة ولا شيء لكن مالقى مخرج ألا هالطريقة وعلى أساس أنه يعطي وائل جزأ من الراتب الصدقي وهو يسرق الباقي .. و وائل وافق لانه راح يجيه راتب كل شهر من رسمات هو يحب يرسمها وفعلاً خلاّ وائل المدرسة واتجه لرسم الكاريكاتير و بيع البلاوي عن طريق حنفي وصار رجال مطخطخ ولا ضرب لـ مصروف ابوه حساب .. وابوه الضعيّف كل يوم (( يا وائل حـ أأطع عنك المصروف )) وذا ما جاب له طاري .. طبعاً اهل وائل ما درو عن رسماته وهالحتسي ..

(( حيــاة مخلـد ))

مخلد ذا مدري وش يبي في الدنيا .. الصدز ان ماله سنع في هالحياة .. ولا أدري ليه قررت اني احطه بهالسالفة .. لكن أبو الشباب واسطة وعشان كذا حطّيته .. طبعاً مثل ما قلت لكم .. ابوه عمره خمسة و تسعين سنة ما شالله والله يعطيه طولة العمر .. وأمه عمرها ستة واربعين سنة .. الله يكون في عونها الضعّيفة .. زواجها كان بالغصب من أبو مخلد لإنه يوم يخطبها كان عمرها عشرين وهو عمره تسعة وستين .. وكان رجال تاجر .. وعائلتها كانت فقيرة وقبلت الزواج به على هالاساس .. وجابوا مخلد وياليتهم ما جابوه .. ولا عندهم ألا هـ المخلد .. ورح يا مخلد وتعال يا مخلد .. لكن مخلد للأسف كان إنسان عبيط .. ولا جاب طاري أهله .. أهم شي عنده بـ هالحياة الإستراحة وأزايز وائل .. الصدز أن ما فيه أحداث في بيتهم لإن مخلد أساساً ما يقعد في بيتهم .. خلوني أقولكم سالفته يوم كان طالب مبتعث .. ذاك اليوم .. تقرر سفر مخلد لـ أمريكا على أساس أنه طالب علم .. وفعلاً سافر .. وتمر الأيام هناك وابو الشباب صار مهيّت الدراسة .. لإنه عاش في عالم ما تعوّد عليه .. ودشر دشرة الله لا يورّيكم .. المهم .. هو في الأساس (( بليد )) فما بالكم بـ (( بليد و داشر )) وكنّه بدا يسحب على الدراسة .. وجاه ذاك اليوم إنذار .. لإنه ما حظر إختبار بحجة أنه مريض .. وفعلاً تقرر إعادة الإختبار له لإنه جاب إثبات انه مريض .. جاه واحد من زملاه وعطاه أسئلة إختبارهم .. وقال له (( مخلد .. هذي أسئلة إختبارنا .. يمكن يجي منها شي ذاكرها منتب خسران شي )) .. مخلد .. خذها وحطها عنده ولا جاب خبرها .. وراح للإختبار وهو ما فتح المنهج .. ويجيه الإختبار نفس إختبار أخوياه اللي قبل .. لكن .. الثور ثور .. ويسقط .. وبعدها .. انطرد ورجع للسعودية .. ما أخفيكم انه إنسان فاشل في حياته .. المهم ابوه متوهق الصدز .. وابو الشباب وصل لـ خمسة وعشرين وهو ما لقى وظيفة .. لكن يحمد ربه أنه أبو تاجر .. وصار مخلد ما يطلع من ذيك الاستراحة .. و وائل قايم بالواجب .. كل يوم يوّرد لهم .. ازايز .. عاد تدرون وش اللي قاهرني .. ألحين مخلد صار محلل أسهم في قناة مشهورة .. و صار يقاله (( استاذ مخلد )) وهو ما يطلّع وش الاسهم .. لكن الوسايط .. تسوي اللي ما يتسوى .. وصار دخله من هالقناة ..

(( حيــاة منيـف ))

هالانسان .. عنده ثقة بنفسه الله لا يوريكم .. إستغلالي بشكل كبير.. ويشوف في نفسه أنه شاعر مخضرم وخصوصاً لمّا ذيك المجلة عرضت له قصيدة وحرام تسمى قصيدة .. وابو الشباب ناشب للجرايد والمجلات .. وما أخفيكم أن بعض المجلات والجرايد صاروا يعرضون له قصايد .. وهذا الشي يعتبر أكبر حافز له في تقديم الجديد في عالم الشعر .. مثل ما قلت لكم كان له علاقة مع وائل .. وخصوصاً بعد ما فصل وائل من المدرسة .. صار منيف يقابل وائل كل يوم وياخذ منه ذيك الرسمات وهو يرسلها لذيك الجريدة .. ومن بكرة .. ينزل الكاريكاتير بـ اسم منيف .. والله شي يقهر بس هذي الدنيا .. وهذي هي حياة منيف .. ما غير يرسل للجرايد والمجلات قصايده السامجة .. ولا يرسل لذيك الجريدة الكاريكاتير ويتقاسم الفلوس مع وائل بدون علم وائل ..

وراحــو فيهــا

مرت الأيام .. و وائل يودي (( الشراب )) لـ إستراحة مخلد في الليل و في النهار يقابل منيف عشان يعطيه الرسمات .. ومخلد في الليل في هالاستراحة وفي النهار في ذيك القناة يحلل سوق الأسهم .. ومنيف في الليل والنهار .. يرسل للمجلات والجرايد قصايده وعايش أحلامه .. ويجي ذاك اليوم .. وتطب الحكومة على إستراحة مخلد .. وتسجنهم .. وقعدوا يحققون معهم .. ومن اللي جايب لهم هالشراب .. ويعترفون .. والحكومة بدورها راحت و مسكت وائل .. و حققت معه .. وهو اعترف أن حنفي هو اللي يعطيه هالشراب .. وبعدين راحو لحنفي .. ومسكوه و حققوا معه واعترف أن البنقالية اللي في البطحا هم اللي يعطونه هالبلاوي .. وإلى ألحين والحكومة تدور على البنقالي اللي يورد لـ حنفي ولا لقوه .. وألحين .. وائل صار بالسجن .. ومخلد برضوه بالسجن لإن الحكومة لقت في استراحتهم بلاوي غير الشراب .. و منيف توهق مع الجريدة ولا قدر يدبر لهم رسمات و سحب عليهم ..

@@ بالملقــاط @@

** سالفة مخلد و وائل والبلاوي اللي تنقل يومياً .. أتوقع انها تتكرر يومياً في مجتمعنا وبشكل كبير والله يحفظ شباب المسلمين ..

** مخلد إنسان فاشل في حياته والدليل أنه انطرد من دراسته .. كيف صار محلل للأسهم في ذيك القناة .. الله يخلي الواسطة ..

** أبو مخلد متزوج أم مخلد بفارق كبير في العمر وهالشي وتبون الصدز يضيق الصدر والله يقطع الحاجة اللي سوت كذا ..

** (( الكاريكاتير )) فن وقليل اللي يتقنونه .. ولكن من فنون الكاريكاتير انك تكوّن شخصياتك الخاصة مهوب (( ترسم )) شخصيات واقعية و تستخف دمك عليها .. كثير ما نشوف رسومات كاريكاتير فيها شخصيات (( مشهورة )) ونقدر نعرف الشخصية من خلال الرسمة وهذا أكبر غلط .. المفروض أنك انت يالمتابع تعرف الشخصية من خلال طريقة توصيل الفكرة .. مهوب عن طريق الملامح ..

** كثير ما نسمع عن طلاب سعوديين مبتعثين انطردوا من جامعات برا والسبب يا انهم ما يحظرون أو انهم مو مهتمين بالدراسة وهذا الشي يضيق الصدر الصراحة .. لأن مسألة إبتعاث طالب واحد تكلف الكثير .. والشي اللي يصير من (( بعض )) الطلاب من المحتمل أن راح يخرب على البقية اللي مأمّلين على الإبتعاث ..

** منيف يعتقد انه شاعر وهذي مشكلة .. لكن المشكلة الاكبر أن ذيك المجلة عرضت قصيدته وهذا الشي هو اللي دفعه على الاستمرار في الشعر .. واللي مثل منيف واجد .. وألحين الساحة الشعرية .. تعاني من (( دخلاء )) وهذي مشكلة .. والسبب في نظري أن بعض المجلات صارت منابر لناس ما يستاهلون ..

** حنفي ياخذ هالبلاوي من البنقالية بسعر وقدره .. ثم يبيعها على وائل بسعر أكثر و وائل يسوي نفس الحركة مع مخلد .. وهاللي يصير نسخة طبق الأصل من اللي يصير في المشاريع الميدانية وتلاعب (( شركات المقاولات )) فيها ..

.
.
.
وبقية الاهداف واضحة ولا تحتاج للتوضيح
.
.
" سبحانك اللهم وبحمدك ، أشهد أن لا إله إلا أنت أستغفرك وأتوب إليك "
.
.
إنتهــى
.
.
وتقبلوا خالص الود
.
.
نيوتن