09/11/2008, 05:50 AM
|
| زعيــم نشيــط | | تاريخ التسجيل: 27/01/2005 المكان: في بيتنا وقدامنا هاللي يحفرون الله يصجهم
مشاركات: 551
| |
|
لفرشة قديمة والأثاث مكسر والبوية عدم (ووجه مستحي) موضوع يهم الشباب خاصة المتزوجين
السلام عليكم ورحمة الله وبركاته
سارة حملت وجابت ولد وكان اول فرحتها
بعدها جابت 3اولاد وكانت معاناتها كبيرة بسبب شقاوة العيال
كانت تؤثرهم على كل الناس وياويل من يقول لهم شي حتى لو اخوانها او خواتها
يوميا تقوم الصبح وتصحيهم وتفطرهم قبل مايروحون للمدارس
مرت عليها ايام تعب ومرض وهي ماكانت تهتم بنفسها اهم شي عندها عيالها
كانت تفرح من فرحهم وتزعل من زعلهم
دخلوا الجامعة وتخرجوا وتوظفوا وهي الآن تعتبر نفسها أسعد أم بعد ماتوظفوا واشتغلوا وحققوا أمنياتهم
تزوجوا اولادها وجلسوا عندها لانهم كل واحد يبي يكون نفسه اولا بدل انهم يتمرمطون بالاجار والمصاريف
الاب يصرف عليهم وعلى عيالهم
ويجيب الرز واللحم وادوات التنظيف وغيره
والام تشوف خاطرهم
الاولاد انجبوا والبيت صار حالته حالة
الفرشة صارت قديمة والافياش مكسرة والاثاث عتيق ودورات المياه تخر من الموية بسبب عدم الصيانه المستمرة
الاولاد كونوا انفسهم وكل واحد طلع بفلة وكل فلة لواحد منهم تقول انا احسن منك
فرشوا الاثاث الفخم لبيوتهم وعلى الموضة
تدخل بيوتهم تقول ماشاء الله ايش هالذوق وايش هالجمال
لكن تدخل بيت اهلهم تشوفه حالته حالة
الام تستقبل ضيوفها وهي محرجة بسبب انه بيتها مايواجه وخاصة من يدخل دورة المياه لانه متعب للضيوف الصيانه فيه منعدمة
الاب كبير بالسن واحتمال ماعنده قدرة مادية من أجل يحسن أوضاع منزله
وبعض الشياب مايهمه شكل البيت قديم او جديد
مايفكر الا بواجباته ولقمته ويشوف ان هالاشياء غير ضرورية
كل اسبوع يجون زوجات عيالها وعيالهم وينبسطون ويستانسون وبعد مايحوسون البيت كل واحد يروح لبيته
لو سألت عيال سارة هل انتم بارين بامكم بيقولك اكيد نزورها كل اسبوع ونبوس راسها
يسافرون مع عيالهم وزوجاتهم وينبسطون وبعد مايرجعون يجتمعون عند الام وكل واحد منهم يتكلم عن رحلته الرائعة وكيف انهم غيروا جو لانفسهم وزوجاتهم وعيالهم
الام تسمعهم وهي ساكته ماتشاركهم بالحديث لانها ماسافرت مثلهم
تجلس مع حريم عيالها وكل وحدة تتكلم عن سفرتها وعن الاسواق اللي راحوا لها والمطاعم اللي تعشوا فيها
وام الزوج تسمعهم وهي ساكته!!!
,,,,,
حريم العيال كل واحدة تجاكر الثانية ايش جاب لها زوجها وايش شرالها من ذهب وانها هي المدلله عند زوجها
والام تسمع هم والغيرة والحزن مالي قلبها
,,,
العيال يعزمون الناس وانسابهم وحريم العيال يعزمن اهلهن وصديقاتهن وينفقون المال الكثير على هالعزايم
والام لو تعزم احد قدمت الشي المتواضع لانه مالقت احد يرفع راسها قدام ضيوفها ويهتم بعزايمها
مع الاسف الابناء نسيوا تعب امهم وصبرها عليهم وعلى عياله
قعدوا سنين عايشين مع اهلهم ومافكروا يصرفون على البيت الي عايشين فيه خلاص ابوهم هو مسؤول عنهم وعن عيالهم
الابوا هو المسؤول عن أكلهم وشربهم ومصاريف الكهرب والتليفون وغيره والعيال ماسكين قروشهم عشان بيت المستقبل وعلى ترفيه عيالهم وزوجاتهم
بعض الاولاد يشوفون التجاعيد بوجه امهم ويرون انهاكبرت ويحسبون انها خلاص ماعاد ماتهتم للمظاهر
مايدرون ان اغلب الحريم يحبون يكون بيوتهم حلوة وفرشها حلو حتى لو كانت كبيرة بالسن
وبعض الاولاد اصلا مايفكر الا بنفسه وبطلبات زوجته وعياله
وبعض العيال فيه عدم نباهه ان قلت له جب جاب وان ماقلت له شي خلاص مايجيب
وبعضهم بخلاء الله يكفينا شر البخل ماعنده استعداد يطلع القرش حتى لو لأمه الى درجة وحدة تسولف علي من باب السواليف مو من باب الشرهه انها اعطت ولدها فلوس يشتري حلى عشان حمولة بنتها بيجون يزورونهم لأن بنتها بالنفاس!!!
مع ان الولد عايش مع اهله والمصاريف على ابوه ومع ذلك يحاسب امه (ياخزياه من ربي)
واذكر امي قالت لي ان واحد اشتكى عياله للمحكمة لانه فقير وعياله اغنياء ومايعطونه مصروف وصاروا يعطونه كل شهر مبلغ مالي حدده لهم القاضي !!!
وفيه اخوان يجتمعون عند امهم كل اسبوع طبعا بس العيال وفيه بالبيت مرة ولدها ,,مرة ولدها ماتطبخ لهم الغداء لانها تقول ليه انا اللي اطبخ والحريم الثانيات مايطبخون والام صارت هي اللي تطبخ لعيالها !!!مع انه فيه حلول كثيرة بامكانهم يخلون كل وحدة عليها الطبخ مرة واللي مو موجود بالبيت يجيبه معه أو انهم يجيبون من المطعم ويريحون أمهم
ووحدة قالت لي بالعيد نجتمع عند أم زوجي والطبخ عليها وحريم عيالها مثل الضيوف يدخلون ويسولفون ولاحتى يصبون القهوة مافيه وحدة منهن ذكرت زوجها أنه يدخل الذبيحة عند الطباخ ويرح أمه على آخر عمرها
،،،،،
بالمقابل هناك اولاد بارين بأهلهم
بعضهم اشتركوا مع بعض وجددوا بيوت اهلهم وبعضهم حطوا لابوهم مزرعة يوسع صدره فيها
وبعضهم ماخلوا على ابوهم وعياله قاصر مع انه متزوج زوجة ثانية وشايلين ابوهم وزوجة ابوهم على كفوف الراحة
والبعض سنويا يسفر أمه وأبوه لمكة وأحيانا لأبها همهم رضا والدينهم
الله يبارك لهم في رزقهم ويجعل أولادهم باارين بهم
,,,,,,,
قال تعالى : { وقضى ربك ألا تعبدوا إلا إياه وبالوالدين إحسانا إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولا كريما واخفض لهما جناح الذل من الرحمة وقل رب ارحمهما كما ربياني صغيرا }
وقال عليه الصلاة والسلام
(ففيهما فجاهد)
ياليت بعض الابناء يتمعنوا في الآية والحديث وجعلوارضا والدينهم مقدم على أمور الدنيا الفانية
اللهم أعنا على بر والدينا وارضى عنا وارضى والدينا عنا
ـــــــــــــــــــــــــــــــــــ
ـــــــــــــــــــــــــــــــــــ
الموضوع استئذنت من صاحبته انقله هنا ..
أعجبني جداً واحس انه يمس واقعنا بشكل كبير ..
وش رايكم بالموضوع ..؟
وليش الولد قبل مايعرس وهو يتوعد ويتهدد ان حرمته بيمشيها على السراط المستقيم و انها ماراح تنسيهم اهله ومن هالكلام
واللي نشوفه ان غالبية اللي يتزوجون ينسون اهلهم
لا يساهمون معهم في مصروف ولا يتغادون ولا يتعاشون
ان جو لقطوا لهم كم جريده قروها وقحنوا لهم كم فنيجيل قهوه وكم بيالة شاهي امهم الضعيفه مسويتهم وعقبها ان مالقوا عشا القوا السلام وقضبوا الباب ..
اشياء بسيطه تفرح الوالدين ليش نستكثرها ؟؟!!!
ليه نفكر نفاجيء ونهدي الزوجه او العيال والوالدين هم اخر الاهتمامات ؟؟
باتسر كل واحد منكم بيعرس وبيجيه عيال وبيكبرون ويعرسون هم بعد وبتعرفون قيمة هالكلام
تغانموا والديكم يامال الغنيمه قبل لا يفوت الفوت
الله يصلح الجميع
انتظر ارائكم |
الوضع الشجري
