03/11/2008, 04:34 AM
|
 | عضو تحرير مجلة الزعيم | | تاريخ التسجيل: 15/05/2008 المكان: وسط الحروف ...
مشاركات: 4,740
| |
|
قصة جد صديق جدي مع آكلة لحوم البشر !!!!
بسم الله الرحمن الرحيم
أخواني
اليوم انا جايبه لكم قصة حصلت مع جد صديق جدي لوالدي
يقولكم مرت منطقة نجد و القصيم بالذات بمرحلة قحط و مجاعه الله لا يردها
كانوا الناس ياكلون الفيران و السحالي و الثعابين إلى الجيفه ياكلونها من الجوع
و للأسف الشديد إن فيه ناس وصلوا لأكل الأوادم و الحمد لله على النعمه اللي احنا فيها الحين
و ناس كثير راحوا العراق لان العراق في ذاك الوقت في نعمه و خير و مثل ما قال الرسول
صلى الله عليه و سلم ( بيت لا تمر فيه جياع ٌ أهله ) فكانت العراق إلى يومنا هذا
غنيه بالنخيل و التمر و هذا اللي مخليها بنعمه لان فيها دجله و الفرات
المهم القصه حصلت في مدينة عنيزه
يقولك صاحب القصه وصلنا مرحلة جوع الله بها عليم ما عندنا اللي ناكله
الارض ما تنبت من القحط و لا عندنا القدره نجيب من برا نجد شي
يقول عيالي ضيقوا صدري بس يتباكون عندي و يتصاوون من الجوع
وين اروح و ش اسوي ما ادري
و كان ذاك الوقت برد صلف يكسر العظام يقول و الله روّحت و مشيت لين وصلت
العوشزيه ( حي او منطقه بعنيزه ) يقول و انا ارقى احد طعوسها
ما دريت إلا الحرمه اللي قدامي جبره هذا طولها هذا عرضها حاطه صرة ٍ حمرا فوق راسها
و بيدها فاس يقول انا يوم شفت الفاس تروعت
المهم قالت تعال معي انحطب قالها انا جوعان و هلكان ما فيني حيل
قالت اجل تعال معي و هو متروع قال لا انا بروح قالت اقول تعال معي
يقول و انا اروح اتليها و جينا في محل يقول قالت مراحنا هنا الليله
لانه شوي تظلم الدنيا يقول و انا بس عيني نوبن على هالصره الحمرا اللي معها
و نوبن على الفاس
يقول و هي تشب نارها و تشعلها يقول نارن يشوفها المسافر
يقول و انا خفت لا تاكلني هي معها فاس و انا حيلي مهدود و ميت
يقول يوم شعللت النار و هي تفك الصره و لا فيها ورع صغير ميت
شكله يا هو ضايع يا ذابحه الجوع و العطش و آخذته
يقول و انا تسبدي تلوع و قلبي انفضخ نصين و هي تقطعه بالفاس
و تكسر عظامه
يقول و هي تشويه على النار تشويه تشويه و يوم تشوّا و نضج يقول و هي تقوم تاكله
قالت اقرب اكل يقول و انا اقول لا يقول و الله مابي قو باس و قلب زيها
يقول يوم اكلت وشبعت يقول و هي تقوم تحفر حفرة طويله و عميقه
يقول و انا طايره عيوني وش تبي بهالحفره !!! 
المهم يقول إلا و الله يوم حطت بوسط الحفره مله و جت وحطت الرمل عليها
و تفرشتها و نامت ( عشان كذا كثرت من الحطب يوم تشب نارها )
المهم يقول يوم اصبح الصبح إلا و ربي فكني منها
المهم يقول عقب سنه او سنتين يوم ربي انعم علينا
و انفكت الضيقه يقول رحت لسوق ٍ عندنا يقول و انا ادور ادور
شفت لي حريم باسطات إلا و اناظر زول حرمه كني كني اعرفه
يقول ما دريت إلا هي تسألني انت فلان اللي كيت وكيت
قال ايه قالت انا هذيك الحرمه يقول و انا قمت اناظرها
قالت تكفى لا تعلم احد عني في هذيك السالفه
قال ابشري
و بالأخير أقولكم
تخيلوا آدمي ياكل آدمي بسبب جوع و الجوع كافر
اللهم لك الحمد على النعمه اللي احنا فيها
ناس اكلت الآوادم و الحشرات و الكلاب و الخيول
و كل ذي لحم بسبب الجوع
الله لا يبتلينا
اللهم لك الحمد عدد خلقك و زنة عرشك و مداد كلماتك
اللهم لك الحمد كما ينبغي لجلال و جهك و عظيم سلطانك
أختكم
الوفا دين
|
الوضع الشجري
