بسم الله الرحمن الرحيم
السلام عليكم ورحمة الله وبركاته

مســـاء الخيرات والليرات ..

/،
أول شي كلكم صفوا طابور واحد وكل واحد يواسيني ويقول لي الحمدلله ع السلامة ومعوّض خير ..

هذا طال عمرك أخوكم في الله طالع مع هيز فاذر .. مع ابوي يعني ..
كنــا في المــكتب ، طلعنا بعد صلاة العشاء ؛ التفت ابوي التفاتة خطافية وقال شرايك نروح جيان .. قلت له مهيب بطالة طال عمرك ، رح لجيان .
دخلنا جيان ، وقفنا السيارة بالمواقف ونزلنا وسكرنا البيبان وقفلناها << بيطول السالفة ..
المهم ونـدخل وناخذ حاجتنا ونطلع .. ونروح للسيارة الي .. ايوة ما غيرها الي وقفناها بمواقف جيان وسكرنا بيبانها وقفلناها .
وفجأة .
الا القزاز مكسوووووووووووور
ياجماعة !!
القزاز مكسور ، ووين فيه .. في المواقف الداخلية لجيان
وليته القزاز الي راح ، جهاز لابتوب ماله شهرين او ثلاثة !!
/،
المصيبة ، أمن جيان يقولون الكاميرات ما تغطي المواقف .. فقط ع البوابات الرئيسية !!

يعني هالأمن فالحين ينشبون للشباب ووشو له داخل ووين أهلك وممنوع ، والأمن والسلامة معطينها اشششششششكل !!
،/
مالكم بالطويلة ، على طول بلاغ للدوريات الأمنية ، وتوصل الدورية وعلمناه بالسرقة ، وحولنا لمركز الروضة لابارك الله فيه من مركز ، وقال لنا انه مسلّم اثنين لشرطة الحمراء ..
والله ونروح لشرطة الروضة ونتلحط فيذاك لين يجي طويل العمر راعي البصمات ، ويرفع بصمة أربع أصابع !!
وكثر الله خيره يقول وراكم حاطين الجهاز بالسيارة ..
مادرينا طال عمرك اننا في تكساس ولانيويورك ..
/،
طلعنا من مركز الروضة على مركز الحمراء ، الضابط المناوب يقول ما جانا شي ، طيب يابن الحلال الدوريات يقولون انهم مسلمين لكم اثنين !!
يقول يعني بنكذب عليك حنا ..

مدري وين متعلمين فن التعامل ..
،/
القزاز تصليحه بمبلغ وقدره ، والتظليل بملبغ وقدره ، واللابتوب بمبلغ وقدره ..
خسائر تصل لاكثر من 6 آلاف ريال سعودي ..
إلى متى التسيّب ، وين تطبيق الحد !
والله بيني وبينكم الحد ما عاد ينفع للأسف ، القلوب قاسية ولا تأبه !
قبل أمس في الليل حصل قصاص خلف مركز ماكس .. المجاور لجيان خريص !
وفي اليوم التالي وفي وقت قريب من وقت القصاص تحدث سرقة بدون أي مبالاة !
أسأل الله أن لا يكون ما يحل بنا نوع من أنواع العذب من نزع للأمن !


..


طيب ياناس .. إلى متى الجرائم في السعودية !!
وخصوصاً في الرياض ، مدينة الجرائم والعمل ..
الجرائم والعمل .. كيف يجتمعون !!
الله أعلم !

..

اخوكم في الله مشتت ، ومنقهر حده ، قبل شهرين سرقة بيت .. وسيارة ..
وألحين كسر زجاج وسرقة لابتوب ..

حسبي الله ونعم الوكيل ..

..

ختـــاماً .. أخشى أن يمر يوم نرى فيه قانون جديد في المجلس العام يقضي بمنع وضع المواضيع التي تتحدث عن السرقة "لكثرتها" !
وقد يأتي يوم نرى فيه موضوع على غرار اسأل والمجلس يجيب ، يكون عنوانه علمنا سرقتك واحنا نواسيك ..


..