!! .. زمن صار فيه " الانسان " .. خروف .. !! - نادي الهلال السعودي - شبكة الزعيم

الهلالي 11 · #1 05/10/2008, 06:23 AM

السلام عليكم ورحمة الله وبركاته

انا جايكم ضيف من فصل 6 / أ اللي بجنبكم

عريف الفصل مرسلني قال سير عليهم شف وش يخططون عليه

<== حركات عيال العالميه

الموضوع باين من عنوانه !! ما ودي اطول وبخش دايركت لاني عادتي لو خشيت بسالفه الله يعينكم متى اخلص

قلتها سابقا وساقولها ... مواضوعي يبيله واحد مروق ويفضل تجيبون شاهي وحركات مزمزة وانتم تقرونه

... واسلوبي الفكاهي قد لا يروق البعض لذلك اللي يبي يذب بشويش لاني حساس

سبق ونزلت موضوع قلت لكم اعتبره عربون صداقه معكم

هالموضوع اعتبروه باقي القطه اللي علي عشان لا احد يناظرني بنص عين يقول هذا ما دفع

اللي خلاني اكتب هالموضوع عينات الشباب اللي صارت تطلع لنا هاليومين

+ حقيقة وضع الحياه هاليومين للاسف اثرت على كثير ناس وخلتهم يغيرون افكارهم

بعرض عليكم بعض انواع الخرفان ... وبعدها بقولكم وش تستفيدون من موضوعي

طبعا اكيد الكل يسمع الامثال اللي تشبه بعض صفات الانسان بالحيوان ...

مثلا يقولون ... فلان وفي كـ " الكلب " !!
ويقولون ... فلان حقود وما ينسى كـ " الجمل " ... ويقولون ويقولون ... والمشكله الواحد وهم يقولونها له يكون حاس بالاهانه وانهم لقو فرصه يسبونه لكنه يضحك ويسلك لهم لانه ما بيده شي

ليش انا اخترت الخروف ... يمكن من كثر ما اكلت لحم خرفان الايام اللي راحت

الله يديمها علينا من نعمه يا رب

صدقوني كثر ما صار عزايم ومناسبات تاثرت وقلت انزل لكم هالموضوع

نبدأ على بركة الله

بحط لكم بعض نماذج الخرفان ... ومدى تاثيرهم على الشباب هاليومين

( 1 )

خروف دلوع ... يصنف من فئة الذكور لكنه مايع ... اذا جيت تذبحه يقولك بشويش "لا تعورني"

وانت تاكل لحمه تحس بتانيب الضمير انك ذبحته ... ما يتروش الا بشامبو ريحته مثل ريحة "الفراوله"

الكريمات والسشوار وهالامور عنده يجيبها قبل "البرسيم" ... يكون ماشي وماخذ كل بث ابراج الجوال من اخوياه اللي حوله بسبة تسريحة شعره

لو ننظر لنفس الصورة من الناحية البشريه

فيه شباب تشك انهم من فئة "الرجال" ... اصبح همهم وشغلهم الشاغل ... كيف اسرح شعري

اذا خلصت علبة جل الشعر يسكر "باب" الغرفه على نفسه وما يفتح الا اذا جابو له وحده جديده ... لبسهم ... كلامهم ... طريقة تفكيرهم ... حتى هم ممكن يضيعون ارسال الجوال عن المنطقه بحجبهم للابراج بتسريحات "السبايكي" وغيرها واكثر مصطلح متدوال حاليا اللي هو "الكديش"

يتشبهون بالنساء باشياء كثيرة بلبسهم الاساور وغيرها من الحركات " البايخه " اذا صارت مضاربه مع واحد ... جاب كل اخوياه واجتمعو ... بعدين يعدون للثلاثه وكل واحد يطلع من سرواله عجرته اللي هي عبارة عن حبة " سنكرز " وكل واحد يضرب الثاني بسنكرز ويقوله ... يع انا ما "احبك"

ناس ما يماشيهم الا امثالهم ... لان الطيور على اشكالها تقع ... وبقية الناس كل ما شافوهم زاد ايمانهم بالله

واول كلمه يقولونها ... " يا الله لك الحمد على نعمة العقل "

( 2 )

خروف امه وابوه جابوه وهم "متهاوشين" مع بعض

... حتى ام زكي حقت الخرفان اللي جابوها وقت الولاده ما كانت كاسرة الصفرة ... الكل يحاول يقنعه يا ابن الحلال "ارضى" بشكلك اللي كاتبه الله لك ... وهو مستحيل الا يبي يوري كل الخرفان انه يا ارض اشتدي ... ما احد قدي

يسمع تعليقات من كل اللي حوله ... لكنه فاهم موضوع اذا اتتك "مذمتي" من ناقص فهم خاطئ

لو ننظر لنفس الصورة من الناحية البشريه

فيه شباب ... لو تشوفه ما تشتريه بـ "ريال"

على قولتهم لا منظر ولا محضر ... انا ما اتكلم عن طبية خلقته اللي الله خلقه عليها ... استغفر الله ما احد يقدر يتكلم بهالموضوع ...

لكن تلقاه ما هو بذاك "الزود" لكن يلعب بنفسه لعب لدرجة ان كل من حوله يضحكون عليه ... وهو ما همه يبي "يلفت" الانظار ... حتى لو ما احد اهتم للحركات اللي سواها بنفسه ...

يحاول يسوي تصرفات " قبيحه " ولو انا اقعد بيني وبين نفسي اسويها عشرين سنه مستحيل اقدر اسويها

يعني بالمختصر ... شخص ما له قيمه لانه " سخيف" يحاول ان يثبت نفسه لكن بطرق هي اقرب للوقاحه من انها اثبات للذات

هالنوعيه تجدها كثير باشخاص يحاولون الاحتكاك بمن هم "افضل" منهم ... ويشوفون هاللي احسن منهم شلون عايشين ويتصرفون ... لكن يا شين السرج على البقر

( 3 )

فحل والفحول قليلوووووو

هالنوعيه لا احد "يحارشها" ... تكون عايشه عيشة ملوك بين اللي حولها ... راعيها يهتم فيها كثير لانها مصدر "استثمار" له ... مسيومه بمبالغ خياليه ... تقف للحظه تتمنى انك تملكه بدل من بيتك او "سيارتك" او او او

عليه طلب ... ليلته ممكن تتجاوز "الخمسة" الاف

كلمته وحده ما يثنيها

ما ودي اكمل لا ينحذف موضوعي لان بصراحه مجلسكم زي القناة السعوديه يا حبهم للتشفير

لو ننظر لنفس الصورة من الناحية البشريه

ناس ربي منعم عليها ... عندهم فلوس و"مناصب" وكل شي ... مرات يستغلونها بالخير لكن مرات ثانيه بالشر ... مو كلهم لكن ناس وناس ... اغلب الاحيان الحق معهم حتى لو كان العكس ... بفلوسه ممكن يغير مبادئ ومواقف ناس و "رجال"

بفلوسه يصرف على اخوياه ويمشيهم تحت امره... حتى الناس يعاملهم انهم تحت يده لانه صاحب مال ... بـ "فلوسه" يطلع ويروح ويجي ما احد يساله ليه ... لان ببساطه ... هذا زمن "الكااااااااااااااااش"

يكون معتقد انه سعيد ويملك كل شيء ... لكنه "يصل" لنقطه ومرحله معينه ... يتمنى ان يدفع كل ما يملك من اجل الحصول على شيء معين

وسبحان "الله" ربك يعطي ناس ويحرم ناس ... هذي الدنيا

( 4 )

هالنوعيه تلقاها دايم ناشبه بجنب "الجدار" ... خوافه وكل اللي حولها ياكلون اكلها ... يهاوشونها وهي بس ساكته

... اذا صارت مضاربه اول من يفركها ... ما لها دخل بالناس ... الكل "يغلط" عليها وهي تقول عادي يمكن ما يقصدون

تاخذ كل شي بنيه حسنه ... الخرفان دايم يغلطون عليها وهي يا حرام ما تبي "مشاكل"

لو ننظر لنفس الصورة من الناحية البشريه

تلقى ناس فعلا محترمه جدا ... هاديه و "خلوقه" ... تتغاضى عن اشياء كثيره جدا لمجرد انها ما تبي مشاكل ووجع راس ... تغلط عليه يلعب على عمره ويقول ما يقصد ... تاكل حقه يقول "معليش" عادي تصير بكل مكان ... هو طيب جدا وهذا شي حلو

لكن للاسف بهالزمان صارو الناس اذا تكلمو عن هالنوعيات ما يقولون طيب وقلبه ابيض !! يقولون "اهبل" وعلى نياته وتضحك عليه بسرعه

ليش كذا ما ادري !!

( 5 )

نوعيه جدا "شريره"

... يشوف نفسه اقوى واحد ... بعدي طبعا

ما يعجبه احد ... دايم مشاكل مع اللي حوله ... يسب ويغلط ... "متكبر" ومغرور لابعد الحدود

لو ننظر لنفس الصورة من الناحية البشريه

ناس ما همها الا نفسها

يشوف نفسه قد الدنيا ... كل اللي حوله "زلايب" وهو اللي عنده شخصيه قياديه يقدر يتحكم بكل اللي حوله ... اذا جيته بالطيب قال عنك " خواف " لا ويستغل هالنقطه يقول هذا زلابه دافور

ما يفكر ابدا انك محترم وما تحب مشاكل ... وان جيته بالقوة قال هذا "مهايطي" ويحسب انه اقوى مني ...

على طول يبدا معه سب وضرب ... واخرتها بالشرطه ... وكثير من هالناس اساله وش "سبب" المضاربه

يقولك جت عيني بعينه وما رضى ينزل عينه ... انا "اعاند" وهو يعاند ضربته

طيب ما فكرت شلون انت عرفت انه "يناظرك" الا لانك انت تناظره وناشب لامه بعد

( 6 )

مستانسين

... اوه سوري قصدي مستغربين

اكيد منتظرين صورة خروف ... لا هالمرة الموضوع اكبر من كذا بكثير

هالايام صارو الناس يقولون عن الاشخاص خرفان

صار الواحد يقولون له يا خروف ... لا تتخرفن ... خل عنك الخرفنه ... وتصاريف الكلمه تطول وبقوة

كل هالموضوع بكوم وهالنوع من الخرفان بكوم ثاني ... ما ودي اتكلم كثير لاني بصراحه اشوف ان طبيعة نظرة المجتمع وتفكير الكثير وعقلياتهم هي اللي وصلت الموضوع الى ان الواحد كل ما شاف بنت او اي شي فيه تاء التانيث مستعد انه يصير خروف

هالنوعيه للاسف اكتشفت ان الكثير يتهمني بها

الكثير اعتقد ان دخول عبدالرحمن للمجلس هدفه منه ان يتعلم كيف ممكن ان يصبح خروف بس خروف خروف يعني

هالنوعيه للاسف ما فكرو ان عبدالرحمن ممكن تكون نيته طيبه وسليمه ...

وانه اخر من يفكر يتخرفن لانه يعلم انه بامكانه بدون خرفنه ان يصل لما يريد وباماكن كثيره غير هالمكان ... لكن الافكار المترسخه منذ زمن ... وبعض المواقف و طبيعة الحياة التي نعيشها هالايام ... اثرت على كثير من النفوس والعقليات ... حتى اصبح الشخص يشك في كل من حوله انه له اهداف سيئه

يعلم الله ان هدفي اولا واخيرا ان يبقى يوزر الهلالي 11 يذكر بكل خير

وصدقوني سعادتي لا توصف عندما اعلم اني سبب في ادخال الابتسامة لشخص متنكد والا ضايق صدره

اللي خلاني اكتب هالكلمات اللي ممكن يستغربها البعض ويزعل منها البعض الاخر ... هو اني كنت متوقع ناس تاخذ عني هالفكره ... لكني صدمت بان هالناس يا كثرهم

حقيقة كان ودي اجيب لكم نوعيات زياده وبامكاني ... لاني قلت لكم اسهل شي عندي السوالف

باقي نوعيات وشخصيات ناس وخرفان كثيييير ... اللي ما ذكرتهم يحتاجون موضوع ثاني لحاله

لكن لازم انام ... الاثنين اول يوم دوام عندي ولازم اتعود على النوم بدري

اتمنى ان الجميع وصلت له الصورة والهدف من الموضوع ... صدقوني لا احد ينغر بالمظاهر وظاهر الناس ... فيه منهم الحقير لكن تراه كالبدر في السماء ...وفيه منهم من تحتقر منظره لكنه جوهرة نادرة.... وفيه منهم الطيب والخبيث وكل الانواع تجدها ...

والله حصل لي موقف وانا صغير اعتقد بالابتدائي ... شخص لحيته ومظهره تعطيه امام مسجد ... كنت وقتها بمعرض للكتاب مع المدرسه ... وكان يلاحقني انا واخوياي ويلمح لنا تلميحات جنسيه وقحه مثل نفسه الدنيئه

بالمقابل صديق لي ملتزم يقول وقفنا عند بقاله دخل واحد شكله جدا فاسق ومن شباب هاليومين وشعره وكل شي ... يقول تكلمنا على شكله وقلنا الله يهديه ... دخلنا نشتري اغراض شاف معنا غرض معين قال الله يجزاكم خير هذا دنماركي واعطانا انواع ثانيه بديله له

يقول خويي ناظرنا بعض انا واللي معي ودنا نقول شي ما عرفنا سكتنا وطلعنا

سبحان الله ... المظاهر جدا خادعه هالايام ... لكن للاسف الاكثر يحكم بالمظاهر

شكرا مقدما لكل من مر وشارك بالموضوع

لي عودات باذن الله

ما اتمناه فعلا ... ان كل واحد يستخدم عقله واخلاقه في تعامله مع الاخرين ... صدقوني لن يكون هناك مشاكل ولا حساسيه ولا اي مواقف ممكن تكون سبب بزعل بين اثنين

شكرا لكم

تقبلو مروري الثقيل والطويل على مجلسكم ورده

اخوكم عبدالرحمن ورده

الـسـلـطـان · #2 05/10/2008, 06:53 AM

أجل انا اول واحد راد

حركات والله يا أنا

يا مرحبا عدد قطرات المطر

وعدد الطير الذي طار في الجو

المهم

موضوعك فله

وفطست ضحك

يعني استانس انك خليت واحد يفرفش

نتكلم بالموضوع

الحين همنا صار كله الظاهر وبس , مثال / يكون شخص ثوبه تحت الكعب , ويجي لك كم واحد ويقعد يسب فيه , والإسبال مو شرط لشخصية الرجل , فيه شاب جاء فيه برنامج 99 في أحد الحلقات , والله ما أذكر الحلقة بالضبط , المهم إن ذا الشاب لو تشوف ملابسه وشعره تقول ذا من النوعيه ذي

إقتباس

الرسالة الأصلية كتبت بواسطة الهلالي 11


	( 2 ) خروف امه وابوه جابوه وهم "متهاوشين" مع بعض ... حتى ام زكي حقت الخرفان اللي جابوها وقت الولاده ما كانت كاسرة الصفرة ... الكل يحاول يقنعه يا ابن الحلال "ارضى" بشكلك اللي كاتبه الله لك ... وهو مستحيل الا يبي يوري كل الخرفان انه يا ارض اشتدي ... ما احد قدي يسمع تعليقات من كل اللي حوله ... لكنه فاهم موضوع اذا اتتك "مذمتي" من ناقص فهم خاطئ لو ننظر لنفس الصورة من الناحية البشريه فيه شباب ... لو تشوفه ما تشتريه بـ "ريال" على قولتهم لا منظر ولا محضر ... انا ما اتكلم عن طبية خلقته اللي الله خلقه عليها ... استغفر الله ما احد يقدر يتكلم بهالموضوع ... لكن تلقاه ما هو بذاك "الزود" لكن يلعب بنفسه لعب لدرجة ان كل من حوله يضحكون عليه ... وهو ما همه يبي "يلفت" الانظار ... حتى لو ما احد اهتم للحركات اللي سواها بنفسه ... يحاول يسوي تصرفات " قبيحه " ولو انا اقعد بيني وبين نفسي اسويها عشرين سنه مستحيل اقدر اسويها يعني بالمختصر ... شخص ما له قيمه لانه " سخيف" يحاول ان يثبت نفسه لكن بطرق هي اقرب للوقاحه من انها اثبات للذات هالنوعيه تجدها كثير باشخاص يحاولون الاحتكاك بمن هم "افضل" منهم ... ويشوفون هاللي احسن منهم شلون عايشين ويتصرفون ... لكن يا شين السرج على البقر

لكن الشاب طلع ولله الحمد سبب في دخول أشخاص للإسلام , الظاهر إنه كان سبب في دخول 3 للإسلام , يعني المظهر يختلف إختلاف تام عن شخصيته .

وفي ذا الوقت صرنا حنا نشوف الشخص ع مظهره الخارجي فقط , يعني كيف لابس بتعرف شخصيته , وهذا غلط , الواحد يلبس بالشيء اللي يريحه , ومو لازم يرضي خلق الله , عشان يصير محترم في عيونهم , هو عارف نفسه وعارف الصح من الغلط .

أتمنى ردي ما يكون ثقل عليك الصفحه

وبس

أحلـى هلاليه · #3 05/10/2008, 06:58 AM

خلصت المزمزيه وانا اختك

موضوع مهم لان بداء الامر يسوء من سيء الى اسواء
كتبت حال المجتمع هذه الايام وابدعت بطرحه
على ان الموضوع طويل بس حس الفكاهه اللي فيه يخلي الواحد يقراء بدون مايحس

الله يعطيك العافيه وكثر من جيتك وانا ختك على مجلسنا
وعجبتني بصراحه كانكم القناة السعوديه

Mr.Scrub · #4 05/10/2008, 07:03 AM

هــلا الهلالي 11

لاتقط تدري وشلون تعال خــذ مكاني .. وانا أروح بدالكـ .. ~

بعــدين علمنا قبل تنزل موضوع علشان أسوي لي برييق شاهي .. ~ {

}

بعــدين موضوع طويــل منزلــه الصبــح ليــه .. ؟ ~

قسم بالله أني أقر شوي وأنام شوي .. ~

.. الى الخــروف الخـواف ... ~ 4 ~

بعــدين قررت أني أنقزل لي كم سطر وأذا بي أنقز خروفين ويخلص المــوضوع .. ؟ ~

والله الخرفــان كثيــرهـ ... وأنت ماقصرت .. ~

ماخليت ولا خــروف في حالــه ... ~

إقتباس


	ما اتمناه فعلا ... ان كل واحد يستخدم عقله واخلاقه في تعامله مع الاخرين ... صدقوني لن يكون هناك مشاكل ولا حساسيه ولا اي مواقف ممكن تكون سبب بزعل بين اثنين

يعطيكـ العافيــه وماقصــرت ... ~

إقتباس


	اخوكم عبدالرحمن ورده

سميي .. ~

< وش يسوي لكـ .. ~

مشكــور ولي عــودهـ بصراحــه ما أقــدر أركــز ... ~

تقبل مروري السريــع .. ~ {

}

الـــــــــــوان · #5 05/10/2008, 07:17 AM

وش هالزيــن والحركـات

الا صدق من وين جبت صور ذا الخرفان

توسع الصدر

**
موضوعك كووم وسالفه الخرفنه كوووم ثـــاني

لأني بصراااحه ماعرفت هالمصطلح الا من هنــــا بالمجلس

ومن شخص واحــد بالتحديد دايم يرددها والله كنت حاسه ان معناها كذا

اثري ذكيه وانا مدري

الهلالي 11
على اني مو راعيـه المواضيع الطويله مرره

بس مواضيعك حاله خاصه وتفتح النفس

ماشاء الله عليك دووم هالمواضيع الحللوه والأفكار الغريبه مثل تشبيه الانسان بالخروف كيف جت لك

!!

الهلالي 11
يعطيك الف العافيه ورده

وجــدان · #6 05/10/2008, 08:13 AM

..

وعليكم السلام ورحمة الله وبركاته ورده

(1)

إقتباس


	اذا خلصت علبة جل الشعر يسكر "باب" الغرفه على نفسه وما يفتح الا اذا جابو له وحده جديده

هههههههههههههه الله يرج ابليسك هذي غير

(2)

إقتباس


	انا ما اتكلم عن طبية خلقته اللي الله خلقه عليها ... استغفر الله ما احد يقدر يتكلم بهالموضوع

اكثر خروووف يقهرني خرفان هالنوع اللي تحس انه مدري وش يبي بحياته

لا وزود على السخافه عليه حركات غبيه مثل ماانت ذكرت اثبات الذات بطريقه وقحه

وتلقاه يقلدك بأتفه شي بس عشان شخصيتك حلووه وليته يقلد بالأشياء الزينه بعد

(3)

إقتباس


	كلمته وحده ما يثنيها

شكلين مابحكي (( للخروووف ابو شهـاب ))

(4)

إقتباس


	تاكل حقه يقول "معليش" عادي تصير بكل مكان

هالخروووف ودك تحرق به .. وش اللي محترم وعلى نياته لا والله انا اشوفها ضعف شخصيه

لأن الناس لو ماسكتهم من اول مره بياكلووونك .. انا مااحب هالنوع من الخرفان

(5)

إقتباس


	نوعيه جدا "شريره" ... يشوف نفسه اقوى واحد ... بعدي طبعا

اختصرت علي لأني كنت ابسألك بـ أي نوع من هذه الانواع ترى نفسك

وهالنوع بووه منهم كثير هنا

اخيرا الف شكر لك اخووي عبدالرحمن ورده

جهد رائع واسلووب اروع ماشاء الله عليك عيني عليك بارده .. احس انك ماتبلش وش تقوول

وان شاء الله محد يفهمك غلط بس لاتقطع ورده

..

f*y*d · #7 05/10/2008, 08:16 AM

تصنف نفسك مع أي فئة خرفان ؟؟ أو تعتبر نفسك ذئب

..!

ما أقول إلا امباااااع

وما أكثر الخرفان في المجلس

منورنا تي في ملون

معرف ليه بس حبيتك من أول رد

HOoLiGaN · #8 05/10/2008, 08:34 AM

سلآإأآأإمـ

<<وراك وراك ياحليلكـ

الصراحه كتبت رد طول عرض لكن ملعون الـ****** قطع الاتصال وراح كل ابو شي

لكن موضوع رايق وجهد اروع ......

شطـــــــــححححه اليييييمهـ....>>>

هذا من الخرفان النوع نمبر واحد الله يعزكمــ

طبعا اهله موظفينه مظله متنقلهـــ

اخيرأآأآأ........

حيأآأ‘كم معايا.....

أبوشلاخ الهلالي · #9 05/10/2008, 10:04 AM

ياهلا والله أخوي هلالي ..

بصراحه كل خرفانك ما ضبطوا معي مدري ليه يمكن لأني غير عنكم يامعشر الخرفان .. .

وبعدين ماعرفنا لكم الشبابخرفان ولا تماسيح

هذا انت ..!!
أول ماقريت صفة الخروف اللي فوق

تذكرت هياطك قبل مباراة الثلاثه خخ ..!!

على فكرة في هذا الوقت كثرة الألقاب اللي تجر المشاكل وتثير الفتن بين
الناس وكأن صحائفنا فارغة من الذنوب .. الله المستعان }

قال تعالى { ولا تنابزوا بالألقاب } ..!!

ابو طـــــلال · #10 05/10/2008, 11:55 AM

والله يابو داحم موضوعك حلوو .. وهادف .. واعجبني أبشرك

>> منتب عاقل ياسعود الفيصل

تصدق ياعبد الرحمن .. ان كلمة ( خاروف ) و ( خرفنة ) بمعناها ولفظها المعروف في هالمنتدى ماعرفتها إلا في المجلس العام .. يعني مااعرف ان كلمة خرفنة تعني الشخص اللى همة ملاحق ( كيف الحال )

( ولقد كرمنا إبن آدم ) الله سبحانه وتعالى مكرم إبن آدم .. والآدمي نفسه ماكرم روحه .. يبحث عن الشي اللى ينقص من قدرة ...

الخرفنة على قولتكم .. يسمونها أول ( مخفة ) أو بأسلوب افضل ( راعي حريم ) بس خرفنة !! جديدة

لاتبطي علينا .. مواضيعك حلوه .. وأبشرك تعجبني

أخوك الصغير ابو طلال

[ رحــال ] · #11 05/10/2008, 01:44 PM

و عليكم السلام و رحمة الله و بركاته

انا نائب العريف جاي اساعده

للأسف , في هذا الزمان صار هم الشباب " شكلي حلو " .. ؟
و يستدلون بـ ( إن الله جميل يحب الجمال ) ..
اوكي ما فيها شي .. لكن التميَّع و كأنه بنت .. هذا البلى

و في نقطة قمت افكَّر فيها كثير ,
الحين لا طلعت مُحترم و أخلاق .. قالوا مخفة .. و لا بعد خكري !
و ان طلعت له بقوة .. قالوا مهايطي ..
ما عرفت الحل والله

..
بس يبين المحترم من المهايطي ..

عبدالرحمن أبدعت في الطرح

.
.

الـمـشـاغـب · #12 05/10/2008, 01:52 PM

الخروف وما أدراك ما الخروف .. كائن حي جميل المواصفات دمث الأخلاق كريم السجايا عظيم الصفات

يا لبى الخرفان .. بالله من دون الخرفان وش نقدر نسوي؟ ..! من دون الخرفان ينتهي الكرم العربي ..! من دون الخرفان كيف نعيش؟

أما بالنسبة للخرفنة .. فالله يكفينا شر المتخرفنين والمتخرفنات

يا هلالي11 .. ترى عادي لو يقولون انك خروف , وش بيضرّك يعني؟ الكلام ما يضر

أكيد اللي يتكلم بهالكلام هم الحالميين ربعك يا حبهم للاشاعات والغيرة

ابو طـــــلال · #13 05/10/2008, 01:58 PM

بإنتظار إبداعك اخوي المشاغب

ღ Lover Barca ღ · #14 07/10/2008, 10:39 AM

هلا بالدحمي

..

وش علومك ؟ ان شاء الله بصحة وسلامة

والله أنا اشهد على كل حرف كتبته

كلك صح على ما يقولون

في هذا الزمن الكل أدرى بنفسه ويهايط

بقوة مو زيك مهايط على خفيف

وهـ النوعية :

زادت في الوقت الحاضر والكل يشوف نفسه حتى بعض الأحيان توصل أنه يغلط على رجال كبير في السن ووالله بعضهم توصل أنه يهايط على أبوه ! ويتمشى في الشارع واذا شاف بزر عطاه كف على الطاير

والثاني كفين يسوي نفسه قوي بأي طريقه وما يدري أن الناس يدعون عليه !

الله يعطيك العافية الدحمي على هـ الموضوع النقآشي

تقبل مروري

فيــ ص ــل ورده

كان هنا · #15 07/10/2008, 11:40 AM

TV molawan
رديــت عليك رد أطـول منك ، لكـن يوم ضغطت إضـافة رد سـريع طلع لي لقد حددت رابط موضوع خاطئ .
يعنـي إعتــبرني رديــت عليك وانا بعتــبرك عقبت على تعقيبي ^.^