(( الجـزر الأربـع والقرصـان نجيـب )) روايـة العصـر الحجـري المعاصـر .. !!
بســم اللــه الرحمــن الرحيــم
في ذاك الجزئ من المحيط الهندي يوجد أربع جزر بينهم إرتباطات سواء كانت هذه الإرتباطات معنوية أو حسيّة . كانوا سكان الأربع جزر يقدرون فن الشعر فالشعراء من الطبيعي أن توجهاتهم تختلف عن بعضهم البعض . فهناك من يتطرق لـ التفاخر وهناك من يحاول تحسين العلاقات مع الجزر المجاورة عن طريق شعره والبعض عدائي .. وهكذا ..
جزيرة (( الحوت )) .. !!
دحيّم إنسان وش حليله (( كلّه ملح و قبلة )) , مسالم لكن أياّني وأياك تاخذ حقه وهذا اللي يعجبني فيه . جا يوم وصار زعيم جزيرته . اللي هي جزيرة (( الحوت )) , هالانسان وش أقولكم بس , غيّر أشياء كثيرة في هالجزيرة , واللي معجبني فيه أنه ما مسك منصب الزعيم الا وهو مخطط له مهوب مثل جزيرة (( الأحلام )) اللي عنده اللي زعيمهم غاصب عمره على المنصب . المهم ومثل ما قلت لكم دحيّم ذا إنسان عملي , قيادي , رزين , ثقل مهوب كلمة توديه وكلمة تجيبه .. ما ودي امدح فيه أكثر أخاف تكذبوني . عادل بكل ما تعنيه الكلمة , وجزيرته أكبر جزيرة مساحة بين الجزر الثلاث اللي عنده , وشي طبيعي أن سكان جزيرته يكونون أكبر عدد من الجزر المجاورة , ما أخفيكم أن سكان الجزيرة مرتاحين لـ الاخر , واللي مزيّن الجزيرة أن فيها (( ذهب )) وهـ الذهب هو اللي مخلّي سكان الجزر الثلاث يهاجرون لـ (( الحوت )) , ما شاء الله ... تقريباً كل يوم يزودون سكان الحوت وتبون الصدز يحق لهم , أحد يشوف الذهب ويخليه , ولكن فيه أمر معجبني في سكان الحوت.. اللي هو أنهم شبه متفقين على (( حب )) الزعيم دحيّم وهو مبادلهم بـ نفس الشعور . خلوني أقولكم سالفته .. في ذاك اليوم تقاعد واحد من مساعدينه , وهالمساعد خدم تقريباً عشرين سنة الجزيرة . ما أمداه يتقاعد ألا و الزعيم دحيّم مسوي له تكريم كل(ن) يحتسي به . وغير كذا جاب هالمساعد مستشار عنده بعد تقاعده عشان يستفيد من خبرته . يعجبني هالادمي .. يعتمد على الكل ولا يقدح من راسه ولا يسوي شي ألا وهو متأكد منه . اللي أقدر أقوله أن دحيّم محظوظ يوم أنه تزّعم (( الحوت )) و (( الحوت )) برضوه محظوظه به , ويحسدون على عيشتهم ..
شعراء (( الحوت )) .. !!
شعراء الحوت كثار وفيهم ناس تتفاخر بجزيرتهم وممكن أن يتطرقون لـ هجاء الجزر المجاورة بسبب أنهم يتعرضون لهجاء من ذيك الجزر وهالكلام يعتبر ردة فعل طبيعية . وفيهم ناس لا لهم ولا عليهم لكنهم حقانيين ومستحيل انهم يتطرقون لبقية الجزر من هجاء أو غيره و قصايدهم تعبر عن الواقع . لكن شعراء الحوت فيهم ناس أنا أقدرهم وفي نظري أن قصايدهم أجزل القصايد في تاريخ الجزر الاربع كلها وهالحقيقة مستحيل يؤمن فيها سكان جزيرة الأحلام .
جزيرة (( الأحلام )) .. !!
هالجزيرة هي أقرب جزيرة لـ (( الحوت )) . جزيرة فقيرة وشعبها أرحمهم , ضعوف , لكن ياحبهم للشر . ما يهنا لهم بال ألا اذا تحرّشوا بالحوت . لكن سكان الحوت ما جابو لهم طاري . وهذا الشي يغيض سكان جزيرة الاحلام , سكان الأحلام ذولا معروف عنهم (( الكذب )) نصابين بشكل ما يتصور . مرة يقولون عندنا ذهب مثل ذهب (( الحوت )) وهم يخسون ويعقبون ما عندهم ما عند جدتي ومرة يقولون انهم أكثر عدد سكان في ذاك البحر وانهم أكثر من سكان الحوت وبرضوه يخسون ويعقبون لكن لو تلاحظون أن أي شي يكذبون فيه أهم شي عندهم انهم يصيرون أحسن من الحوت والأفضلية على الحوت هي أملهم الوحيد في هذي الحياة , بس تبون الجد هذولا ناس وش خف دمهم دايم أتكّي عندهم عشان أضحك . زعيمهم اسمه على ما أعتقد (( فاصل )) ويقال ان سبب تسميته بهذا الأسم لأن مخه فاصل لكن مهوب أكيد هالكلام . اللي معجبني في هالجزيرة أن سكانها ماخذين مقلب في جزيرتهم و حاطين في بالهم انهم أحسن ناس و جزيرتهم احسن جزيرة وهالشيء يحسدون عليه بصراحة لان هالكلام ولّد الثقة عندهم .. ما شاء الله عليهم بس .. لا يجيهم شي واتوهق بهم . المهم ذولا فيهم مشكلة وهي أنهم ما اتفقوا على (( حب )) زعيمهم وهذا الكلام راح يضرهم في المستقبل والغريب في الموضوع انهم شبه متفقين على وزير الجزيرة وتبون الصدز يستاهل هالوزير . عموماً هالجزيرة مسوية تحالف مع جزيرة ثانية يقالها (( البراميل )) وجزيرة البراميل بعيدة عنهم . لكن السر في التحالف هذا ان البراميل عندهم (( فضة )) وتجار شوي و عشان أكون صريح البراميل تعتبر منافسة للحوت وعشان كذا تحالفت جزيرة الأحلام مع جزيرة البراميل
شعراء (( الأحلام )) .. !!
غالبيتهم راعين هجاء وخصوصاً هجاء الحوت . ولكنهم نصابين لانهم يذكرون أحداث ما صارت وهالكلام يفقدهم مصداقيتهم كشعراء وفيهم شعراء لا لهم ولا عليهم لكنهم شويين . وتبون الصدز ما لهم حس هالفئة لان النصابين ماكلين الجو عليهم وخصوصاً لان سكان الجزيرة ما يهوون هالطرق . وفيه شاعر يسمونه عميد الشعراء هالانسان غريب . هدفه الوحيد من قصايده هو الحوت واذكر له ديوان أسمه (( كيف تدمر بنو الحوت )) .. ياحبه للشر هالانسان .
جزيرة (( البراميل )) .. !!
هالجزيرة بعيدة عن الحوت و الأحلام لكن لها علاقة بهم , عندهم مثل ما قلت (( فضّة )) و هذا سبب رئيسي في تجارة هالجزيرة , وللمعلومية ما اكتشفوا هالفضّة ألا من تالي يعني من كم سنة تقريباً . كان عندهم زعيم اسمه (( برميل )) وسبب تسميته بهالاسم أنه كان يشبه البرميل الله يذكره بالخير وتغير مسمى هالجزيرة لـ (( البراميل )) بسبب هذا الانسان واللي سواه للجزيرة . ويقال والعهدة على الراوي أن (( برميل )) هذا هو اللي اكتشف الفضة اللي في الجزيرة . والفضل راجع له بعد الله في تجارة جزيرته . لكن برميل للأسف كان نصاب . وخواله الظاهر أنهم من (( الأحلام )) لانه كان يكره الحوت كره بشكل ما يتصور . ويوم انه كان زعيم البراميل كان يحاول يدّمر الحوت لكن بدري عليه لان الحوت كانت جزيرة كبيرة و غنية مهوب بالسهل تدميرها . جا (( عمّار )) وصار زعيم البراميل بعد رحيل (( برميل )) وتبون الصدز (( عمّار )) مواريه زينة . لإنه إنسان لاهي في جزيرته وهدفه هو تطوير الجزيرة بحيث تكون الجزيرة أقوى جزيرة بجهده وتعبه مهوب مثل برميل كان هدفه تدمير الحوت عشان يصير زعيم أقوى جزيرة . وحالياً هالشيء راح يفيد الجزيرة مستقبلاً . سكان الجزيرة ما يواطنون جزيرة عندهم يقالها (( الأباطرة )) وتاريخ البراميل قريته انا شخصياً وقريت عن المعارك اللي صارت بين البراميل والاباطرة . ما أخفيكم ان اكثر المعارك انتصرت البراميل فيها . لكن الانتصارات ذي ما تمحي بطولات الأباطرة لأن الاباطرة كم مرة انتصروا على البراميل .سكان البراميل ناس شايفين أعمارهم , وعايشين في جو ثاني , دايم يدققون في جزيرة الحوت يبون يصيدون ادنى غلطة منهم ولا يقدرون . وهالشي خلاهم يلهون في الحوت وينسون اعمارهم والسبب الرئيسي في هالكلام هو (( برميل )) لانه هو اللي زرع فيهم هالشي .
شعراء (( البراميل )) .. !!
فيهم ناس (( عدائيين )) ويتفننون في التعدي على الحوت . والمشكلة أنهم نسو اعمارهم . ما عمري قريت قصيدة من هالفئة منهم تتكلم عن جزيرتهم لكن فيهم فئة لا لهم ولا عليهم ويحبون يتفاخرون بجزيرتهم وهالشيء لا باس فيه . لكن سكان الجزيرة يهوون الفئة العدائية وهذي مشكلة راح تضرهم مستقبلاً . فيه شاعر منهم عدائي بشكل غريب لكن اللي قاهره في حياته هو المساعد اللي كرّمه دحيم زعيم الحوت . مدري وش مسوي له هالمساعد .. الله لا يبلانا .
جزيرة (( الأباطرة )) .. !!
هالجزيرة تشتغل لحالها . لا لها ولا عليها . لكن مشكلتهم أن عندهم إعتقادات غريبة شوي .. منها أنهم يعتقدون أنهم الشعب الوحيد المظلوم . من قبل بقية الجزر وهالكلام غير صحيح . لكنهم يعجبوني شعب هالجزيرة لانهم في حالهم .. طبعاً كـ عدد سكان هم تقريباً رابع جزيرة يعني الاخيرة من بين الجزر الثلاث . ما عندهم لا ذهب ولا فضة ولكن عندهم إمكانيات مهيب سهلة وأنا أتوقع ان لهم مستقبل كبير أن شاء الله . قبل كم سنة عانوا من همجية (( برميل )) زعيم البراميل السابق . ويوم انه توّكل تحسنوا كثير . قبل العام ادهّروا وانتصروا في معركتين قدّام البراميل لكن العام مدري وش جاهم خسروا كل المعارك اللي خاضوها لإنهم طاحوا في مشاكل وهالسنة الظاهر انهم تخلصوا من كل مشاكلهم وهذا شي يسعدني بصراحة . فيه إشاعة تقول أن سكان الاباطرة مسوين حلف مع الحوت وهالكلام غير صحيح لإن هالإشاعة اللي مطلعها سكان الأحلام النصابين . وطبعاً هالكلام ما يمحي العلاقة الطيبة بين الحوت و الأباطرة . فيه علاقة متينة بين الحوت و الاباطرة لكن ما توصل لمسمى تحالف وفيه فرق كبير بين علاقة متينة شريفة و (( تحالف غير شرعي )) يعجبوني الأباطرة لأنهم شعب مسالم ويهمهم تطور جزيرتهم والجزر الباقية ما جابوا لهم طاري . وهذا شي إيجابي ومن صالح الجزيرة ككل . وجودهم بالقرب من البراميل تقريباً ضرّهم فعدد بسيط من سكانهم نقلوا للبراميل بسبب الفضة الموجودة هناك . عموماً .. يقال أن أراضي الاباطرة فيها (( معادن نفيسة )) وهالكلام مهوب أكيد لإنهم ما اكتشفوه إلى ألحين . لكن أنا اجزم أنهم بيلقونه قريب لأن مثل ما قلت لكم هم شعب مهتم بنفسه إهتمام كبير . وهالشيء صدقوني راح يفيدهم .
شعراء (( الأباطرة )) .. !!
أكثرهم شعراء يحبون الفخر بجزيرتهم وبرضوه يعجبوني أكثر شعراء هالجزيرة لانهم دايم يعرضون مشاكل الجزيرة من خلال قصايدهم وهالشي راح يفيد الجزيرة لإن مثل ما قلت فن الشعر تقريباً من أكثر الفنون تأثير أن ما كان أكثرها . ومن ضمن شعرائهم فيه شاعر مختلفين في إنتمائه فهو ساكن في الاباطرة وبعض قصايده عن الحوت . وشعب الجزيرة مستغربين منه . لكن قليل ما يتعرض للجزر المجاورة . وإزدواجية إنتمائيته هي اللي شهرته عند باقي الجزر .
القرصـان نجيـب .. !!
نجيب هذا شخص يحب الفلوس . سمع عن الذهب والفضة اللي عند الحوت و البراميل . لكن ما يدري وينهن بالضبط . هو يدري عنهن انهم في أحد الجزر الاربع .. المهم .. ذاك اليوم قرر انه يروح ويجمع سكان هالجزر الاربع ويسوي أمسية شعرية . لعلمه التام ان فن الشعر هو الفن المرغوب فيه . طبعاً هو ما همه الشعر لكن يهمه الحضور للأمسية الجالب للذهب و الفضة بحكم رسوم الدخول للأمسية . طبعاً هو فكر (( كيف يجذب الناس )) لقى ان الهجاء هو أكثر أنواع الشعر جذب للجمهور . لكن مسألة جمع أربع شعراء (( هجائيين )) من أربع جزر مسألة صعبة . لأن إختيار الشعراء صعب . وطبعاً هالشعراء بحكم تخصصهم . في الهجاء من المؤكد انهم راح (( يتعدون الخطوط الحمراء )) ويتعرضون للجزر نفسها . طبعاً الأمسية ما تلزم هالشعراء انهم يسبون الجزر . لكن بما انهم اجتمعوا اكيد انهم ماراح يصبرون .
(( الامسية الشعرية )) .. !!
وفعلاً .. اتجه نجيب لـ المنطقة اللي فيها الجزر الاربع وتعرف عليهم عاد الناس حبوه هـ النجيب لأنه جاي بسفينة زينة . وتبون الصدز سكان الجزر الاربع قد سمعوا عن فخامة سفينة نجيب . وما أمداه يتعرف عليهم ألا وماشالله عليه يعلن عن الأمسية . وفعلاً وتقرر موعد الامسية . ويوم أقيمت الامسية تفاجأ الحضور أن نجيب حايق الأمسية . لأن أبو الشباب جايب شاعر من الأحلام (( شاعر هجاء )) وجايب شاعر من البراميل (( شاعر هجاء )) و جايب شاعر من الحوت (( خلوق .. وماله ولا عليه )) وجايب ذاك الشاعر اللي من الاباطرة (( اللي مختلفين في إنتمائه اهل الاباطرة )) . أقيمت الأمسية . ويوم خلصت وشاف نجيب الحضور كثير طمع ابو الشباب وخلا الأمسية كل أسبوع . و ثّبت الشعراء الاربعة ذولا . اللي صار أن شاعر الاحلام وشاعر البراميل اغتنموا الفرصة ومسكوا الحوت سب . وشاعر الحوت تقدرون تقولون أنه يترفع عن اللي يقولونه . وشاعر الاباطرة قاعد يضحك عليهم .
الزعيم دحيّم.. و القرصان نجيب .. !!
توالت الامسيات وتوالت الأساءات من شعراء البراميل والاحلام . و الزعيم دحيّم ساكت وجا ذاك اليوم ويطلع دحيم على المسرح حق نجيب . وقال : (( بـ أسمي وبـ أسم جزيرة الحوت .. حنا نقاطع أمسيات نجيب لان الأمسية غير عادلة .. فـ مسألة انك يا نجيب تجيب شعراء هجاء أنا أحترم وجهة نظرك لكن تجيب شعراء هجاء من جزيرتين و تجيب شاعر ما له بالهجاء من جزيرتي فهذا الشيء أخالفه جملة وتفصيلاً )) طلع نجيب يتلاحق المصيبة اللي صارت لان جزيرة الحوت هي أكبر جزيرة و فقدان حضورها مشكلة وقال (( يعني يا زعيم دحّيم بترضى إذا جبنا شاعر هجاء من جزيرتك ؟؟ )) الزعيم دحيّم رد (( اذا كان هدفك من الامسية .. هجائي فمن باب أولى أنك تنصف الجزر الاربعة .. لذلك جب شاعر هجاء من جزيرتي )) . نجيب توهق ولا لقى ألا مفر واحد اللي هو أن الزعيم دحيّم قال (( جب شاعر هجاء من جزيرتي )) وفعلاً نجيب راح يدور على الجزر الاربع ويقول ان الزعيم دحيّم قال (( جب شاعر هجاء من جزيرتي )) وهذا الكلام مرفوض . وطبعاً .. الجزر الثلاث خذوا كلام نجيب على محمل الجد وفزعو معه ..
.
.
.
همسة
يا قرصان نجيب .. الأمسيات الشعرية اللي تتطرق لـ (( الهجاء )) منبوذة و مسألة أنك تجمع شعراء هجاء كانت من العصر الحجري القديم ولكنك أعدت العصر الحجري القديم للعصر الحديث الحالي بـ أمسياتك لطمعك بلفت الحضور بـ أسرع طريقة ممكنة. وبما أنك أحييت هالامسيات فهذا شي راجع لك .. لكن .. انك تجيب شاعرين (( هجاءيين )) من الاحلام والبراميل و وتجيب شاعر ماله بالهجاء من الحوت فهذا ظلم منك . والاسوء أنك تقول (( أنا مخالف لفكرة شعر الهجاء وجبت شعراء الاحلام والبراميل على أساس أنهم أفضل الشعراء )) هالكلام يضرك يا نجيب .. مهوب في صالحك .. وهالكلام يسيء لشعراء البراميل و الاحلام الفطاحلة .
.
.
.
إنتهى
.
.
.
وتقبلوا خالص الود
.
.
نيوتن
الوضع المتطور
