بسـم اللـه الرحمـن الرحيـم
بعيد عن (( منتدى الجمهور )) و هواشهم (( الهلال أحسن فريق ,, يالله يا شباب لا زم كلنا نروح للملعب ,, قاطعوهم ,,, ومن هالحتسي )) قلت مالها ألا المجلس يا ولد .. قبل دقيقتين شاطفهم في الجمهور .. ألا واشوف القحماني مكلبش له موضوع و جارّه للمميزة والسلطاني أشوفه عاض(ن) ثوبه يلحق له واحد بيصكه بـ إنذار .. و عقال من هنا .. ونعلة (( الله يكرمكم )) من هنا .. و واحد يصارخ (( يا مندسسسس )) .. و حر و كتمة الله لا يوريكم .. و زحمة .. شي ما يوصف .. الوكاد .. أني ما لقيت مكان يضفني أنا وهالموضوع ألا المجلس .. لذلك خذت عفشي وجيت عندكم .. وتبون الصدز .. والله الفرق .. هنا ناس راكدة .. تعرف تحاتسيهم .. قهوة .. وسعة صدر اللهم لك الحمد .. << يامصري 
8 8 8 الدراسيع اللي فوق تسمى مجازاً (( مقدمة )) .. !! نيوتن .. وعزوز .. و الشغالة .. !!
نيوتن .. هالانسان معطيه ربي من الجمال شي ما يوصف .. مرات أحس انه مهوب من السعودية .. عيون زرق وشعر(ن) أشقر وخديداته حمر وفيه من البياض قومة و قعدة .. الصدز أنه حسوفة يحسب من أهل شقراء .. المفروض أنه من جنيف ولا القصيم 
.. لكن وللأسف أنه معاني من جماله .. عنده أخو اللهم لك الحمد معدل صفات الجمال في خشته (( صفر )) واذا صار توه قايم من النوم ينزل المعدل للسالب .. مسيكين هالاخو .. عندهم شغالة اندنوسية اسمها (( سريمة )) .. نيوتن مال(ن) منها وهي دايم تتميلح عنده .. ودايم .. اذا جت حزة قومة نيوتن تجي عند الباب وتمسح الأرضية وهي واقفة << أتوقع اني وفقت في شرح وضعية الشغالة 
.. بحيث اذا طلع نيوتن من غرفته ألا وهي في وجهه .. وأخوه فاتح باب غرفته شوي وقاعدن يطل عليها وهي تمسح الارضية . ولسان حاله يقول (( مدري وش معجبها في هالصتيمة نيوتن ... الله ياخذ ويعطي )) عاد هالاخو ماخذ(ن) في عمره مقلب أنه زين ودايم يكدد شعيراته هالضعيف على أساس أنه بيفتن الشغالة وهي ما جابت خبره .. ذاك اليوم .. دخل هالاخو للبيت (( سريمة .. سريمة .. صلحي اندومي ورقّيه فوق )) .. ميلّت خشتها ثم قالت بدون نفس (( طيب )) .. صلّحت الاندومي .. رقت فوق .. طقت الباب .. الخبيث ما فتح الباب .. (( سريمة .. ادخلي )) .. فتحت الباب ألا وابو الشباب مبتسم .. و طاقن الشورت ومنسدح على جنب على السرير ومشغل روتانا طرب و السبوت لايت احمر .. وهي شي طبيعي أن تسبدها تحوم .. حطت الاندومي عند الباب ومشت .. نزلت .. لقت الام قاعدة في الصالة (( ماما .. عزوز ما فيه كويس )) .. (( الا يالهيس .. وش هو مسوي ؟ )) .. عاد الشغالة مالها خلق على عزوز وسردت السالفة كلها وزودت شوي وقالت لها عن سوالفه قبل << مهبل بها هالضعيفة .. الام علطول رقت لعزوز .. طقت الباب .. (( مين ؟ )) .. (( افتح .. جعلي افتح دمجتك )) .. اختبص عزوز ولبس القميص .. وشغل النور .. وفتح الباب (( هلا يمة .. وش فيتس معصبة .. انا من يوم عرفتس وانتي تهوشين .. حسسيني مرة أنتس حنونة واضحكي الدنيا تضحك لك خخخخخخ )) .. (( حنّت عليك القرادة .. وش انت مسوي للشغالة ؟؟ )) .. (( ما سويت .. شي .. ليش ؟؟ )) .. (( اقول يا عزوز خل عنك حركات عيال الشوراع واركد .. لا أعلم ابوك .. بعدين شف اخوك نيوتن وش حليله وما عمره اشتكت الشغالة منه )) .. عزوز انقهر من نيوتن ولا حب أنه يوضح قهره لـ أمه .. وقال (( ان شالله يمه .. وما يكون خاطرتس ألا طيب )) .. وتمر الايام والحقد كل ما له يزود في قلب عزوز على نيوتن .. وهالـ نيوتن يا غافل(ن) لكم الله مايدري وش السالفة .. جا ذاك اليوم .. ودخل نيوتن البيت توه جاي من عند عامل الدش عشان يجي يزّينه .. لقى سريمة تمسح أرضية الصالة (( سريمة .. غسلتي ثوبي ؟؟ )) .. هي ما صدقت أن نيوتن كلّمها .. فكّت الكشرة (( ايوة .. أنا جيب ألحين )) وركضت للسطح تجيب الثوب ونيوتن راح لغرفته .. نزلت سريمة من السطح وبدون ما تطق الباب علطول دخلت على نيوتن في غرفته .. وفي هالوقت .. عزوز طلع من غرفته .. ولقى باب نيوتن مفتوح (( نيوتن .. نيوتن .. جبت عامل الدش ؟ )) .. (( اييه .. وألحين بيجي بسيارته )) .. عزوز سمع صوت في غرفة نيوتن .. راح للغرفة .. دخل .. لقى الشغالة فاطسة ضحك ونيوتن يمد لها ثياب عشان تغسلها .. وهي مستانسة .. قفلت معه عزوز .. (( يا خبيث .. يابن اللذينا .. ألحين ما تقول ليش طاقها سوالف مع الشغالة في غرفتك ... سبحان الله ما تحلى السوالف ألا في غرفتك .. سريمة .. يالله برا )) .. طلعت وهي خايفة .. كمل عزوز هواشه (( من زمان وانا شاك فيك .. وألحين كشفتك على حقيقتك ياوصخ )) .. (( هيه هيه .. انت وش سالفتك .. استح على وجهك أنا مالي بهالحركات .. الله اكبر .. نسينا .. نسينا حركاتك معها .. وحركات الإغراء اللي تسويها معها يالكربة .. وهي ما جابت خبرك )) في هالوقت .. جت الأم تركض على صراخ عيالها (( خير .. خير .. وش فيكم تهاوشون .. صوتكم واصل(ن) للشارع )) .. رد عزوز (( ولدتس .. اللي ماخذة(ن) فيه مقلب .. مدّخل(ن) الشغالة عنده بالغرفة وقاعد يسولف معها .. والحمد لله أني لحقت عليهم ... والا ان كان صارت علوم(ن) ثانية )) نيوتن قفلت معه .. (( لا تكذب .. انا قلت لها تجيب ثوبي وهي دخلت وعلّقت الثوب .. وانا مدّيت لها باقي الثياب .. وانت دخلت وقعدت تهوش .. ياخي انت مريض .. الله يشفيك )) .. الام افتر مخها .. ما تدري من تصدق .. (( خلاص .. انا اشوف الموضوع بعدين .. عزوز .. يالله ودني للسوق )) .. (( ونيوتن .. ليش ما يوديتس ؟ )) .. (( أنا أقول أنت .. يالله أنا بـ البس عباتي )) .. مشت الام .. وقبل ما يمشي عزوز ألتفت على نيوتن وقال (( نيوتن .. بيني وبينك الايام .. يا انا يا انت )) .. نيوتن ضاق صدره .. من كلام اخوه عزوز .. وكنه حس أنه بدا يفقد اخوه بسبة جماله .. ما أخفيكم أنه تمنى أنه يصير مثل أخوه عزوز شين ولا احد يجيب خبره .. لكن هذا المكتوب .. وفعلاً .. تمر الأيام وعزوز مستقعد لنيوتن .. وكل يوم هواش .. مسكين هالـ نيوتن .. وش ذنبه ؟؟ عشانه زين يعني ؟؟ الله يكون بعونه . جا ذاك اليوم و عزوز يتهاوش مع نيوتن . نيوتن تقدرون تقولون انه انضغط ... انضغط .. ثم انفجر وقال (( الله خلقني زين .. وش أسوي لك اذا صرت كربة )) .. ما أخفيكم أن هالكلمة أثرت على عزوز وبعدها اكتشف انه شين فعلاً .. وقال (( خلاص يا نيوتن .. الوجه من الوجه ابيض .. لا تعتبرني أخوك )) .. وألحين .. نيوتن حس أنه فقد اخوه فعلاَ .. نيوتن في (( الكوفي )) .. !!
ذاك اليوم .. وكان (( اليوم الوطني )) ..طلع نيوتن من البيت متجه لـ كوفي دايم هو واخوياه يجتمعون فيه . وصل لـ الكوفي . دخل .. (( السلام عليكم )) .. ردو عليه (( وعليكم السلام )) . جلس .. ألا والكوفي مليان اودام .. وحر .. ودخّان والشباب ما يدخنون .. وسواليف حتى نقز أمجد وقال (( يا عيال ما تلاحظون .. أن الكوفي ما تنفع الجلسة فيه .. أنا أذكر واحد من الشباب قد قال لي عن كوفي هادي بالحيل .. ولا فيه أحد .. وش رايكم نروح له ؟ )) .. رد .. نيوتن .. (( ايوالله أنك جبتها .. هاه يا عيال وش قلتوا ؟ )) .. كلهم وافقوا .. طلعوا من الكوفي .. ويدق أمجد على خويه (( هلا ابو راشد .. تذكر ذاك الكوفي اللي كلمتني عنه .. اللي تقول أن ما فيه أحد وهادي .. وصف لي اياه الله لا يهينك )) و ابو راشد بدوره وصف الكوفي لـ أمجد وأمجد هالصتيمة قاعد يكلم ابو راشد وياخذ منه الوصف . و جا للكوفي من ورا من عند الحواري .. وطلعّهم لـ نفس الكوفي اللي هم منحاشين منه قبل .. الشباب ما شرهو على امجد .. و أمجد كان راكب قدام على أساس انه يدلهّم .. ويوم صار هالكلام .. شرهوا على أعمارهم الشباب يوم انهم مخلين أمجد قدام .. وقف نيوتن .. وركبوا أمجد ورا في اخر مرتبة .. في هالوقت قال نيوتن (( يا شباب وش رايكم نروح للراشد ؟؟ )) .. الشباب وافقوا علطول .. وأمجد يدربي دمجته .. وصلوا للسوق .. وهم كانوا سبعة .. المهم يوم انهم دخلوا .. ويشوفون لهم ذاك الادمي اللي لاف(ن) على رقبته شال النصر .. والفنيلة مكتوب عليها (( فهد في قلوبنا )) .. ولابس شي الظاهر انه بنطلون مهوب أكيد .. وطينّها ابو الشباب وصار لابس(ن) له نعال رايحة في رجلها .. جا نيوتن وقال (( يا عيال شفتوا ذاك اللي لابس لبس النصر ؟ تدورن ليش مسوي كذا ؟؟ )) .. كلهم ردو (( لا )) .. (( هذا طول الله اعماركم .. أكيد انه حاطن اسمه بـ البلوتوث (( نصرواي )) او شي زي كذا عشان بيعلم البنات الموجودات بالسوق )) ويطلّع نيوتن جواله ويسوي بحث وفعلاً صار اسمه (( نصراوي كيوت )) >> خخخخخخخخ والله ما تجي : .. ضحكوا الشباب على هـ الابلة .. وبرضوه أمجد إلى ألحين وهو يدربي دمجته .. كان السوق ذاك اليوم زحمة .. وش زحمة .. شي ما يتصور .. الشباب ما أخفيكم ان منهم كم واحد مغزلجي .. وخذوا هالجيّة فرصة كودهم يلقون رزق .. وسبحان الله .. هالمغزلجية .. وجيهم نسخة طبق الأصل من عزوز أخو نيوتن .. طبعاً محد عطاهم وجه .. والبنات كب على نيوتن ونيوتن ما يعطيهم وجه بالمرة .. واخويا نيوتن مقفلة معهم .. لين مل صالح من نيوتن وقال (( ياخوي .. دبر لنا رقم وحدة وسلمني اياها ... وانت مالك شغل .. )) .. (( لا مستحيل .. وش شايفني .. اشتغل عندك جر... )) .. قبست بين نيوتن و صالح وصارت مشكلة بينهم كله بسبب هالبنات .. و أمجد إلى ألحين وهو يدربي دمجته مايدري وش السالفة .. قرروا الشباب أنهم يطلعون من السوق بسبة المشكلة اللي صارت بين نيوتن و صالح .. طلعوا من السوق و صالح ما اكتفى باللي قاله .. أبو الشباب كمّل هواشه (( ياخي أنت شايف نفسك .. على ايش .. الصدز انك رخمة ولا تستحي )) .. نيوتن تقدرون تقولون انه يترفع عن الرد عليه .. مشوا من السوق .. ونيوتن قفلت معه .. وراح للبيت .. وهو يردد (( ياربي .. ليش خلقتني زين .. كل يوم افقد لي واحد والسبب أني زين )) . وقطع حبل أفكاره جواله وهو يرن .. رفع الجوال ألا وهو امجد يدق عليه (( ألو .. هلا نيوتن .. بالله اذا طلعت من السوق وبـ اروح لبيتنا .. من وين اروح ؟ )) << أبو الشباب مضيع بيتهم .. نيوتن مهوب رايق له .. وسكر السماعة في وجهه . وقف عند بقالة .. دخل .. (( السلام عليكم )) رد عامل البقالة (( وعليكم السلام )) راح نيوتن للثلاجة بياخذ بيرة (( ما لقى بيرة )) رجع للعامل (( محمد فيه بيرة .. ما فيه مشكل حار )) .. (( لا ما فيه )) .. (( طيب فيه ببسي ؟؟ )) .. (( لا ما فيه )) .. (( طيب فيه موية ؟ )) .. (( لا مافيه )) .. (( عما وش فيه أجل .. كلّش مخلّص ؟ البقالة للتقبيل ؟؟ )) .. (( لا صديق .. هذا .. أهل رياز .. اشتري كل شي .. وألحين بقالة .. خلاس .. ما فيه شي )) . طلع نيوتن من البقالة .. رايح للبيت .. دخل البيت .. مر من عند غرفة اخوه عزوز .. ألا وصوت الزيلعي يرنع .. دخل غرفته ورقد والهموم فوق راسه . وقعد يدعي ربه متى تستقر حالته .. << الأستقرار المذكور لا يعني الزواج 
@@ بالملقــاط @@
** ألحين أبي واحد يقولي .. وش ذنبي اذا صرت زين .. كل العالم تهاوشت معهم والسبب أني زين .. ومسألة أني أفقد ناس بسبب جمالي فهذا الشي يضايقني كثير .. (( أيقونة وجه القحماني طاقن اللطمة وقاعدن يكحكح .. حايمة تسبده ))
** الشغالات (( شر لابد منه )) لذلك .. احرصوا على عيالكم وخصوصاً اللي من طقّة (( عزوز )) .. المشكلة اللي صاير ان الاهالي دايم يخافون على عيالهم الزيون من هالشغالات والبلى أن الخوف على الكرب ..
** (( المرافق العامة )) لازم يشوفون لهم حل مع المدخنين .. المفروض انهم يحطون غرف خاصة للمدخنين رأفة بحال الـ (( غير المدخنين )) .. وانا اتكلم عن كل المرافق .. سواء كانت أسواق أو مطارات.. إلخ .. وهالشيء أكيد انه رايح يضايق المدخنين وراح يحسسهم أنهم منبذوين من المجتمع وممكن انه يكون سبب في إقلاعهم عنه .
** (( الأسواق )) و ما أدراك ما الأسواق .. فيها من البلاوي مالله به عليم .. لذلك .. الواحد لازم يذكر الله قبل لايدخل السوق ويتخيل أن البنات اللي بالسوق أخواته (( وهن أخواته فعلاً )) . لكن البلى اذا جاني واحد وقال ان البنات هن اللي يلاحقون العيال . في هاللحظة أقدر أقول .. للبنات تخيلوا ان هالعيال أخوانكم << لا عاد تنصح الله يجزاك خير .. 
** التميلح .. في الاسواق .. وخصوصاً لما ودك تصير مميز .. عشان يعرفونك العالم (( مثل ذاك اللي لابس طقم النصر )) شي مضحك بصراحة . وأنا شخصياً شفت هالشيء ..
** أخواني الشباب اذا بغيتوا تروحون لـ مشوار .. حاولوا بقدر المستطاع أنكم ما تتكلون على واحد مثل أمجد .. في الوصف .. لإن هالشي راح يضيع وقتكم ..
** أهل الرياض .. والله يا أنكم افات .. البقالات .. قضيتوا عليها .. والمطاعم .. ما بقيتوا شي فيها .. ما عندكم ألا الشرقية .. روحوا للقصيم وفكونا من شركم .. والله صرنا .. نشيل هم اليوم الوطني .. اذا جا ..
** ألحين علموني .. العمالة عندنا ليش حتسيهم (( مكسّر )) ؟ .. للمعلومية .. ترى البلى فينا .. حنا اللي معطينهم وجه .. أنا رحت للكويت .. وشفت عمالتهم .. الصدز ان أحسن شي بالكويت ان عمالتهم كلهم يحتسون (( باللهجة الكويتية )) وحنا الله يخلف علينا .. نكسر حتسينا عشان يفهمون عمالتنا ..
.
.
" سبحانك اللهم وبحمدك ، أشهد أن لا إله إلا أنت أستغفرك وأتوب إليك "
.
.
.
انتهى
.
.
وتقبلوا خالص الود
.
.
نيوتن
.
وش تبيهم يسوون يبون يتونسون فنذب خششنا لمكم ولا لجدة .! 
الوضع العادي
