العيد بالنسبه لي { طفش !! - نادي الهلال السعودي - شبكة الزعيم

الـسـلـطـان · #1 01/10/2008, 01:38 AM

السلام عليكم ورحمة الله وبركاته ورده وكل عام وانتم بخير ورده ومن العايدين ورده

بما أني فاضي

قلت بنزل لكم أول يوم لي في العيد

وطبعا كغير المعتاد أول يوم أصبح ممل ع عكس الأعياد الماضيه

وهذا الشيء بالنسبة لي

اما انتم وش دخلني فيكم

يبدأ يومي بعد ما رجعنا من صلاة الفجر

ونلبس الثياب الجديده

وننطلق إلى صلاة العيد بعد جهد وعناء

لأن اخوي الله يصلحه بطيء الحركة جدا جدا جدا

المهم إننا صلينا خارج المسجد

المهم وأنا أسمع الخطبه

جاء واحد جنبي ع ما أعتقد إنه من الشام

المهم سلم علي وكل عام وانت بخير ومن ذا الكلام

وشكله إنه معصب لأنه جاي من حي بعيد عن حينا ومالحق الصلاة

وقاعد يسولف معي شوي وقال

(( نحن عندنا في بلدنا - هو قال لي بس نسيتها - اي مسجد يصلي الجمعه ويصلي العيد , لكن عندكم هنا مساجد معينه

وسألني ليه ؟؟؟ ))

أنا طبعا تفلسفت شوي وجاوبته

المهم خلصت الخطبه رحت جبت الأهل الله يحفظهم ووصلتهم للبيت

ورحنا عند كبير العائلة

اجتماع للرجال فقط

وجلسنا من الساعه 7 إلى 8:30 ووصلنا البيت الساعه 9:10

وعندما رجعنا غيرنا ملابسنا وكلينا ذاك اللحم اللي يحبه قلبك

وجلسنا شوي إلى 10:10 وبعدين فتحت النت إلى 10:20 وخشيت ع السرير الساعه 10:30

ولأني مواصل نمت سريع بدون هواجيس

<< مواصل ولا فياض

نرجع لمحور حديثنا

وصحينا ع الساعه 6:10 المغرب

وفتحت جوالي والقى 3 رسائل

2 من واحد سافر الشرقيه وناشب لي في بلعومي

يبي يقهرني إنه سافر

لكن بعد الرياض لا تدور

وثالث رساله من واحد يعيد علي

عاد فيه واحد مرسل لي قبل العيد بـ3 ايام رساله وقبل العيد بيوم رساله ويوم العيد رساله

الظاهر معه رصيد زايد وما يبيه

وشكله يبيني أرسل له 3 رسائل

لكن والله يبطي

نرجع لموضوعنا

بعد ما شيكت ع الرسائل قمت وصحصحت وسلمت ع أخواتي بس ما عطوني عيديه

عطوا للصغار بس

وانا يقولون لي دزها

المهم / جلسنا في البيت إلى بعد صلاة العشاء

وبعد العشاء رحنا عيدنا ع أقاربنا

وخلصنا الساعه 11

ونحن راجعين نوصل أخوي للبيت لأنه بيطلع مع خويانه وبيسحب علينا

جاء له اتصال من خويه

ويخبره إن واحد من خويانهم زوجه أخوه توفت وهم راجعين من المدينه

تخيلوا عيالهم كيف بيعيدون

ادعوا لها بالرحمة وادعوا للعيال إنهم يخرجون من المستشفى

ووصلنا أخوي للبيت

بعدين خذينا دورة في شوارع الرياض

بدون ما ننزل من السيارة طبعا

من ثم رحنا إلى دومينوز اللي في شارع الستين وجبنا العشاء

ووصلنا للبيت

وأنا رحت لبيت الجيران أأكل سمكهم

لأنهم سافروا الغربيه وخلو مفتاح بيتهم معي

المهم أكلتهم ورحعت للبيت وغيرت ملابسي وتعشيت والحين قاعد أكتب الموضوع

طبعا كما شاهدتوا إن يومي طفش

ومما زاد الطين بله

إن (( الزكام )) مبهذلني

وأول يوم في العيد ولا كأنه عيد

يعني ماحسينا بطعم العيد اللي كل سنة نحس فيه

فأستنتجت إن /
(( اللي يبي العيد يصنعه بنفسه , ولا ينتظر الغير يصنعونه له )) <<

يعني اللي يبي يعيد زي الناس

يسوي كل اللي يستطيع عليه حتى يفرح بالعيد

الحين خلصت

يمديكم ترجعون للصفحه الرئيسيه أو تنزلون تحت وتردون

والخيار لكم

ورده في أمان الله ورده