المنتديات الموقع العربي الموقع الانجليزي الهلال تيوب بلوتوث صوتيات الهلال اهداف الهلال صور الهلال
العودة   نادي الهلال السعودي - شبكة الزعيم - الموقع الرسمي > أرشيف شبكة الزعيم > أرشيف الأخبار والتغطيات والتقارير
   

أرشيف الأخبار والتغطيات والتقارير أرشيف الأخبار والتغطيات والتقارير الخاصه بالموقع الرسمي لنادي الهلال

 
   
 
LinkBack أدوات الموضوع طريقة عرض الموضوع
  #1  
قديم 01/10/2008, 03:39 PM
الصورة الرمزية الخاصة بـ هلالي ثنياني
مشرف سابق في منتدى الجمهور الهلالي
تاريخ التسجيل: 15/01/2002
المكان: جـــــ 15 ــــدة
مشاركات: 14,272
عيديتكم.. ذكريات النجم الهلالي وقائد منتخب الكويت السابق (بشار عبدالله) في لقاء حصري ومطول مع شبكة الزعيم


دخيل أيامك ومجدك.. تقبّل مننا التذكار ................. باسم نادي الهلال وموقعه.. وبإسم جمهوره
نشوف إنه قليلٍ مايعبّر عن غلا ( بشـار )...............ولكن العزا عند الهلالي صادق شعوره

بشار عبدالله.. أحد أبرز الأسماء في التاريخ الهلالي واسم لازالت الجماهير الزرقاء تتذكره بكثير من الحب والتقدير لمسيرته الإبداعية بالقميص الهلالي, وبرغم خروجه بدون أي بطولة زرقاء إلا أنه بقي في قلوب الجماهير كأهم بطولة حققها الهلال في موسم 1419هـ
تشرفنا وكما عودناكم في منتدى الزعيم (الموقع الرسمي لنادي الهلال) بربطكم بكل مايرتبط بالماضي الهلالي الجميل بالحصول على لحظات من حياة هذا النجم التاريخي أجرينا فيها لقاءا لا أقول أنه لقاء صحفي.. ولكنه لقاء حبي بين لاعب محبيه تحدث فيه بشار بكل أريحية عن الفترة التي قضاها مع الهلال بما تستحق من حب

البداية كانت منذ أن أعلنت قرعة بطولة أندية الخليج.. وحينما وضعت القرعة فريق بشار (السالمية الكويتي) في المجموعة التي سيستضيفها الأهلي السعودي في جدة.. وقتها عرض علي الغالي (وطن الهلال) فكرة استضافة بشار لنبدأ في لحظتها بتصور اللقاء بدون قيود وبدون رسميات مع النجم الهلالي السابق وذلك مايفسر تداخل الأسئلة وتعدد محاور الحديث وكثرة المداخلات دون ترتيب واضح حيث حاولنا بقدر الإمكان التقاط أي خيط يقودنا إلى ذاكرة بشار لنستكشف منها ذكريات موسم الإمتاع الهلالي فظهر اللقاء أقرب للحديث أو (السوالف) التي تمنينا ألا تنتهي

ومن ملعب نادي أرامكو السعودية تم التنسيق خلال آخر تمرين لنادي السالمية وفي مقر إقامة وفود الدورة فندق الراديسون ساس تم اللقاء الذي شملنا فيه بشار بكرمه وذوقه العالي وأدبه الجم الذي يخجلك أثناء حديثك معه وتواضعه الذي يشعرك بأنك تعرفه منذ سنين فكان لنا مع في الموقع الرسمي لنادي الهلال هذا اللقاء التاريخي مع أحد النجوم التاريخيين لنادي الهلال وأحد أشد المتابعين تعصبا وإلماما بأوضاع الهلال وكلنا أمل بأن يحوز اللقاء على إعجاب المتابعين الهلاليين وأن نقدم فيه الجديد لكم ونكشف فيه ماكان خافيا عليكم عن مسيرة بشار وذكرياته الهلالية والذي اخترنا له هذا التوقيت لطرحه ليكون أجمل معايدة منا لكم
فكل عام وأمتنا الاسلامية وهلالنا وجمهوره وموقعه الرسمي وضيفنا الغالي بشار عبدالله في أحسن حال



البداية كالعادة كابتن بشار.. كيف تم االتوقيع مع الهلال؟
لحد الحين؟؟ الموضوع وايد تكلمنا فيه...
التوقيع بالضبط أقول لك السالفة.. أول شي جاني خطاب من النصر للمشاركة في حفل اعتزال الللاعب صالح المطلق طبعا الخطاب مو طلب احتراف ولافيه أي كلام عن الاحتراف.بعدين ما صار الاحتفال لتأجيله فأرسلوا خطاب بالتأجيل.. بعدها صار كأس الخليج في البحرين وكنت في لوبي الفندق واقف مع الشيخ خالد اليوسف رئيس نادي السالمية فكلمني الأمير نواف بن محمد اللي كان موجود وقال (أنا ودي في بشار يكون معانا في الهلال) وأنا بصدق ما أخذتها بجدية لأنه خلال هذه الدورات تكثر المفاوضات ويصير الكل يبي الكل في فريقه.. وتسمع يمكن 20 عرض في اليوم,, لكن الظاهر ان الموضوع كان جدي وبدا بين الأمير نواف ورئيس السالمية الشيخ خالد وأنا ما أدري .. في نفس الوقت كان النصروايين يتكلمون مع عمي زكريا سالم اللي هو أمين سر النادي بخصوص انتقالي. فكانت مفاوضات سرية بين الأمير نواف بن محمد مع رئيس السالمية من ناحية وطلال الرشيد وعمي زكريا من ناحية ثانية
في ذيك الفترة تفاجأت بوصول مندوب الهلال ومندوب النصر في طيارة واحدة ووصلوا للنادي.. في النادي ودوني لغرفة لحالي.. وتركوا مندوبي الهلال والنصر في غرفتين منفصلة وكل مندوب طبعا عنده خبر أن مندوب النادي الثاني موجود لأنهم زي ماقلت جايين في طيارة واحدة
فجلست مع الاخوان في إدارة السالمية وعرضوا علي الموضوع وخيروني بين الناديين..

هل كان فيه اختلاف في العرض المادي؟؟
لالالا. العرض المادي بالضبط نفسه وكان 300 ألف دولار.. فجلست مع الإخوان الإداريين واستشرتهم بحكم صغر سني (كان عمري 20 سنة ) وبدينا في مقارنة بين الناديين وانتهيت باختياري للهلال وهذا القرار اعتبره أحسن قرار في حياتي الرياضية برغم الضجة اللي أثارها انتقالي في وقتها مع أن انتقالي كان نظامي 100% لأني لم أرتبط بأي من الناديين قبل هذه المفاوضات بأي شي رسمي

بعدما وقعت ووصلت.. تتذكر أول مباراة لك مع الهلال؟؟
أول مباراة كانت في المدينة المنورة ضد الأنصار ولعبت فيها عشر دقايق تقريبا

لعبت كورة (سباحي) بالراس من جنب العارضة
ماشاءالله عليك تذكر زين .. طبعا فزنا واحد صفر سجله سامي الجابر وبعدها لعبنا ضد هجر في الرياض انتهت 3-2
وسجلت فيها أول هدف لي بقميص الهلال

محتفظ في هالذكريات يابشار؟؟
أيه أكيد.. وعندي للآن فيديو وعندي شريط لأهدافي مع الهلال

يعني تتذكر هدفك ضد الطائي في مرمى الدعيع ؟؟
ايه كنا مهزومين واحد وقلبناها اربعة.. وهدفي لعبه نواف عرضية وكنت منفرد بالمرمى ولعبتها من لمسة وسجلت

كان فيه استغراب لأسلوب فرحتك بعد هالهدف لأنك رحت تأشر للجمهور على طول.. ؟؟
لأن كان فيه وفد من إدارة منتخب الكويت حضروا للرياض عشان يطلبون من إدارة الهلال مشاركتي في مباراة قريبة لمنتخب الكويت وكانوا حاظرين المباراة وكنت واعدهم بالتسجيل

بعد هالهدف.. هل أغظت الدعيع مثلا بأنك سجلت فيه؟؟
الدعيع لا.. لأن علاقتي فيه مو مثل علاقتي في الدوخي مثلا
يعني الدوخي أقدر اقول له أنا سجلت فيكم أو أنا سحبت فيك أو انك ماتقدر تعدي من الظهير الفلاني تخاف منه بحكم أني لعبت معاه بس الدعيع كان في هذيك الفترة منافس..
لكن مثل الدوخي ونواف التمياط علاقتي فيهم ممتازة إلى الآن

على سيرة علاقتك في اللاعبين.. كيف علاقتك في سامي لأني أتذكر اتصالك في كل الرياضة وكلامك أنه كان فيه ناس مخوفينك منه ؟؟
إيه كانوا مخوفيني من سامي واللي أكثر مخوفيني من فيصل أبو اثنين أنهم يهاجمون اللاعبين الجدد ويحاربونهم داخل وخارج الملعب..

اتهام سامي بهالاتهام استمر حتى في المواجهة مع بتال.. وسامي استشهد فيك
ايه بتال صاحبي .. فسامي قال له اسأل بشار مو هو صاحبك؟ فاستغرب بتال كيف سامي عرف اننا أصحاب

سامي وقف معاك في بداياتك طبعا..
أول شي سامي اتصل علي لما وصلت الفندق واعتذر لأنه ما استقبلني في المطار
ثاني يوم في التمرين نادى سوران (عامل غرفة الملابس في النادي) وطلب منه يفتح لي الدرج اللي بجنب درجه وقال هذا خله لبشار
وبعدها في الليل أرسل لي ولد عمه للفندق أخذني ووداني عندهم للبيت وجلسنا عندهم في الخيمة وهذا كان زي ماقلت في أول الأيام وهذا ساعدني كثير للتأقلم مع الوضع خصوصا إني كنت صغير وكانت تجربة جديدة علي


من اللي خوفوك منهم؟ يعني لاعبين والا إداريين والا جمهور؟؟
جمهور وكرويين وكل شي
سامي نوعا ما كان لي فيه معرفه من قبلها.. وأول ماوصلت كان هو استقبلني ووقف معاي من أول شي فكسر الحاجز
المشكلة فيصل ابو اثنين.. لأنه ماتمرن معانا في بداياتي لأنه كان مبتعد للاصابة وأول لقاء لي فيه كنا في التمرين وهو لأنه راجع من الاصابة فتمارينه كانت حول المضمار وأول ماشافني من بعيد ناداني من بعيد (هي ياكويتي) (قالها بشار مقلدا صوت ابو اثنين) وتبين لي ان الكلام اللي سمعته عنه كذب وفيصل لازالت علاقتي فيه مستمرة وزارني في الكويت قبل فترة

لازلت مصمم تزوج بنتك لولد سامي؟؟
بكيفه هو

ماشاءالله اش عندك بنات؟
عندي نور ودلال

الله يحفظهم لك ان شاءالله.. بس أيتهم لولد سامي؟؟
أنا قلت من أول بأعطيه دلال لأنها شيطانة

طيب كيف كانت علاقتك بيوسف الثنيان.. ومواقفك معاه؟
الثنيان له سالفة حلوة أول مباراة لي زي ماقلنا في المدينة يوسف ماسافر معانا لأنه مصاب.. واليوم الثاني تمرنا في الرياض الا يوسف يناديني رحت وسلمت عليه قال لي أنت ليش رحت معاهم للمدينة؟؟ قلت مايصير يابو ناصر لازم أروح مع الفريق..
قال لي.. لالا خلك بس في الرياض, بريدة والمدينة لاتروح لها تعب يا أخي

معليش بنطلع من سيرة الثنيان شوي وبنرجع له.. بس مادمت تكلمت عن بريدة تتذكر مواقفك ضد أندية القصيم؟ بلنتي التعاون وهدف النجمة؟
ايه ضد التعاون انطرد الثنيان.. وأحمد ضاري لعب مباراة ممتازة ووقف للهلال (طبعا قبل ماينتقل للهلال) وسامي ماكان يلعب والتيماوي وأبو اثنين مايلعبون اللي هم متخصصين البلنتيات..
فلما جا البلنتي.. عطوني الكرة في آخر دقيقة والحمدلله لعبته وتسجل
مع الهلال لعبت بلنتيين.. ضد التعاون وضد الأهلي في مربع الدوري والحمدلله كلها سجلتها وطبعا برضه في مباراة الأهلي ماكان الثنيان وسامي موجودين لأنهم توقفوا بعد كأس ولي العهد لكن التيماوي كان موجود ومع انه موجود أنا اللي لعبت البلنتي والحمدلله سجلته

ايقاف يوسف وسامي.. هل كنتم تشوفون داخل النادي أنه متعمد من أجل ابعاد الهلال عن الدوري؟؟
شوف.. أنا كنت اسمع ان التحكيم مع الهلال لكن للأمانة أنا ماشفت هالشي
بس ايقاف الثنيان بالفيديو كان أول مرة يصير وكنا نشعر بظلم كبير وقتها..
يعني ايقاف سامي كان بعد الطرد.. وتقول ممكن يكون الحكم كتب فيه تقرير لكن ايقاف الثنيان كان غريب وهو اللي أثر فينا أكثر

طيب ثاني أهم سؤال في مسيرة بشار مع الهلال.. ليه مالعبت نهائي كأس ولي العهد ضد الشباب؟
والله للحين ما أدري.. بس نظام البطولة كان مايسمح الابمشاركة لاعبين اثنين اجانب والثالث احتياط ولعبوا ليتانا والعيادي الحمروني أساسيين ولذلك حتى أنا يوم لعبت كنت نازل بديل للحمروني الشوط الثاني

يعني انت داخليا كنت متوقع تلعب؟
ايه.. لأني كنت داخل في جو البطولة ومسجل ضد التعاون في دور الـ16 وضد النجمة في دورة الثمانية هدف حلو وضد الأهلي في قبل النهائي

ضد الأهلي اللي مجهزه لك يوسف ؟
ايه.. كانت تمريرة خرافية
فيه سالفة ثانية ليوسف ضد الأهلي في مباراة افتتاح كأس المؤسس ناداني يوسف قال لي شوف لا مو شذي قال شِف (يقولها باللهجة السعودية مثل يوسف)
اذا جاتني الكرة اركض. معاك لاعبين معاك ثلاثة اركض مالك شغل.. بعدها جات ركنية انلعبت ليوسف وانا كنت قريب منه ركضت لعبها لي يوسف وتفاجأت بأنه وصل لي الكورة قدام المرمى مع اننا في كورنر وزحمة
لدرجة اني تفاجأت ولعبت الكرة واصطدمت في حارس الأهلي مع اني كنت قريب ..
فمن كم يوم سألوني بعض اللعيبة.. من هو أحسن لاعب لعبت معاه في حياتك؟ فقلت لهم يوسف الثنيان

حتى في منتخب الكويت؟؟
في حياتي كلها
وأنا ترا ما أقول هالكلام مجاملة لكم أو للهلاليين لأن هالسؤال سألوني اياه لاعبين في الكويت
أنا يوسف تمرنت معاه وشفت اش ممكن يسوي.. ويوسف في التمارين تشوف منه أشياء خرافية مايركز عليها ويلاحظها الا اللي يلعب معاه
وأنا اسمع الناس يقارنون سامي و ماجد.. لكن أنا بالنسبة لي مع احترامي للاثنين يوسف الثنيان هو أفضل لاعب في تاريخ الكرة السعودية

نرجع للمباراة القضية.. كيف كان شعورك يابشار على الدكة في مباراة الشباب؟ كيف استقبلت القرار أصلا؟
جاني نواف لما قالوا لي مابتلعب. ونواف علاقتي فيه قوية للحين يعني كان يكلمني ويسألني لأنه يمون علي
وكان الكل بصراحة مستغرب عدم لعبي.. لكن المدرب اختار يبدأ بالحمروني
بعد المباراة في أول يوم تمرين في النادي بعدما رجعنا للرياض كنت اركض أنا والدوخي قال لي تدري ان يوسف كان زعلان قبل المباارة ومعصب؟ قلت لا.. ليه يعني؟؟ قال عشان انت مالعبت..

زعلان لأنك مالعبت والا زعلان مايبيك تلعب؟
لالا زعلان لأني مالعبت
أنا علاقتي في يوسف كانت عادية بحكم فارق السن ومزاجه
فما بيني وبينه احتكاك كبير.. بس دايم اللاعبين يقولون أنه يحبك ويبيك تلعب على طول واذا مالعبت يزعل مع أنه ماكان يبين ولا يقول
حتى أذكر في مباراة النصر في الدوري اللي انتهت 2-2

اللي سجل فيها يوسف فاول؟
ايه سجل فاول حلو.. تعورت أنا في المباراة وطلبت التغيير الا وهو يصارخ علي في الملعب ليش تطلع؟ فقلت له أني مصاب فصرخ قال لاتطلع. حتى لو مصاب كمل المباراة يوم قلت له ما أقدر زعل وراح عني
فكانوا اللعيبة يقولون أنه دايم يحب يلعب معاك في الفريق
فأنا بصراحة استانست لما قال لي الدوخي هالكلام عن يوسف..

تعرف يابشار أن فيه رواية تقول أن يوسف وأبو اثنين ضغطوا عالمدرب عشان ماتلعب؟لالا مستحيل.. يوسف وفيصل مايسوونها.. وأصلا أبو ابراهيم مايرضى أحد يتدخل في شغله

السؤال اللي دايما يتكرر.. ليه طلع الهلال بدون بطولات في الموسم؟
ما أعتقد انه مر موسم عالهلال مثل هذا الموسم.. تدخل كلاعب للمباراة وانت شايف الفوز ومافيه مجال انك ماتفوز ولافيه أي منافس للهلال.. وكان الهلال ممتع جدا
وأنا ما أستمتعت في حياتي في اللعب زي ما استمتعت في الهلال هذاك الموسم.. كنت تشعر إنك فعلا لاعب كرة قدم لأنك تلعب كرة قدم حقيقية
كل شي تبغى تسويه تسويه في الملعب.. يعني تطالع بجنبك الثنيان قدامك سامي وراك التيماوي وابو اثنين والغشيان والتمياط (ونواف وفهد برغم مستواهم الكبير ماكانوا يلعبون باستمرار) وأحمد الدوخي وخميس يعني فريق أقوى من منتخب
لكن الله ماكتب لنا الفوز ببطولة

ممكن نقول أن الكابتن خليل الزياني ماكان المدرب المنشود في ذيك الفترة؟
فريق مثل هذا ماتحتاج لتكتيك كبير.. تعال وانت مغمض ولعب 11 لاعب قلهم العبوا.. فاللي صار سوء حظ لا أكثر ولا أقل
صحيح أني ندمان أني ماحصلت ولابطولة مع الهلال لكن زي ماقلت هذا قضاء الله

بس يابشار إلى الآن هذاك الموسم ومبارياته مضرب المثل في الأداء الهلالي الممتع وكثير للحين يرجعون لمباراة الأهلي في افتتاح كأس المؤسس.. فيها هدف حلو سجله يوسف ؟
ايه اللي أنا جليت له تمريرة سامي ويوسف ميل نفسه ولعبها بطريقة خيالية وغير متوقعة
تصدق تحس إنك تدخل الملعب بنفس ولك رغبة في اللعبة.. يعني أحيانا اللاعب قبل المباراة يشيل هم ويتعب ويتوتر ومايصدق المباراة تنتهي يبي يرتاح منها وأنا من النوع اللي أشيل هم المباراة من قبلها بيوم أو يومين أحيانا
لكن مع الهلال كنا ننتظر المبارايات ونتحمس لها لأنها أمتع بكثير من التمارين وفيها حضور جماهيري كبير الجمهور كان يحضر ضد أي فريق حتى لو فريق صغير كان الجمهور يحضر بكثافة.. تخيلوا حتى حضور التمارين كان كبير وهذا يفرحك ويحسسك ان الجمهور مهتم وحريص على فريقه وخايف عليه وهذا ينعكس علينا في الملعب

لك هدف في الاتفاق جهزه لك الحمروني؟؟
ايه أذكره.. جات عرضية وكسرت التسلل من ورا المدافعين.. ولعبتها بهدوء لوب من فوق الحارس

كيف كان الحمروني مع الفريق.. يعني هل كنتوا تشوفون انه يقدر يعطي ؟
الحمروني لاعب ممتاز جدا .. وكان عليه رجل يسار مو طبيعية وكان لاعب محترم وخلوق جدا

بشار مكن نشوفك إداري في الهلال؟؟
إداري في الهلال؟؟ لا لا

ولا السالمية؟
حتى السالمية.. الادارة يبي لها طولة بال

اش تفكر فيما بعد الاعتزال؟؟
ابتعد عن الكرة نهائيا.. واذا كان لي علاقة فبتكون في التحليل الرياضي

فكرت في الاعتزال؟ في حفل اعتزالك؟؟
أكيد.. يعني إن شاءالله بعد شهرين بيصير عمري 31 وبمجرد ما بأحس ان مستواي انخفض شوي بأعتزل مباشرة

الحفل فيه كلام عنه مع الادارة؟
فيه كلام بس مو رسمي.. لكن اذا ماصار الاعتزال بالشكل اللي ابيه فما راح أعمل

كيف الشكل اللي تبيه؟ أي نادي عالمي والا ناديك المفضل؟؟
مو شرط نادي المفضل المهم نادي عالمي .. لكن لو صار النادي المفضل يكون أحسن

وش هو ناديك المفضل؟؟
مانشستر يونايتد

ماحضرت حفل اعتزال يوسف ولاسامي؟ وهل وصلتك دعوات؟
لا اعتزال سامي كنت في لندن.. حتى كلموني اي ار تي عشان يكون لي مداخلة لكن للأسف ماقدرت, أما اعتزال الثنيان فكنت في معسكر مع منتخب الكويت في التشيك
والدعوات ما أدري اذا جات أو لا لأني زي ماقلت ما كنت الكويت

تتذكر يابشار شخص اسمه (أوكادا)؟
أوكادا؟

عصب شوي وبتذكر شخص ياباني اسمه أوكادا..
أهاا الحكم.. حكم الآسيوية الياباني حكم مباراة العين

هل كان عليكم ضغط قبل المباراة؟ ضغط اعلامي أو جماهيري؟
لا بس يمكن دخلنا البطولة بثقة فوق اللزوم.. كان معنا في المجموعة الاستقلال والعين وفريق اوزبكي
الاستقلال مالعبنا الا الشوط الثاني بس وسجلت هدف لكن خسرنا 2-1
الفريق الأوزبكي كان ضعيف وفزنا عليه واحنا مرتاحين
مباراة العين مالعبنا نهائيا لأن المباراة كانت مشدودة والعين كانوا يوقفون المباراة كثير ومشوا المباراة بالطريقة اللي يبونها.. سجل ومنعك انك تلعب ولذلك ماقدرنا نركز عالمباراة قد ماركزنا عالحكم والجو الخارجي ومشاكل اللعيبة

تحس الحكم كان سيء؟
ما أدري والله.. لأني ماشفت المباراة مرة ثانية
وأنا أصلا المباريات اللي أخسرها ما أشوفها مرة ثانية نهائيا
لكن المباراة ماكان فيها كرة قدم نهائيا

خلنا من الذكريات السيئة.. دعوتك لحفل تكريم يوسف الثنيان اللي صار في النادي قبل انتقالك للهلال.. من اللي كان وراها؟؟
اللي كلمني يوسف بنفسه انه في حفل تكريم بعد أسبوع في رمضان.. أنا في ذاك الوقت كنت موقع مع الهلال لكن ما بأجي الا مع بداية الفترة الثانية بعد رمضان فكلمني ان فيه حفل تكريم وأبيك تحضر.. فقلت أبشر
وبصراحة يعزمني يوسف.. مهما يكون عندي مشاغل لازم أحضر

لا بس واضح انك غالي على يوسف صدق.. يوسف ما يحتك بأحد عادة؟ لدرجة أن علاقته الحين بالوسط الرياضي منتهية وأخباره نادرة
حتى لما كان لاعب ماكان لي علاقة قوية فيه.. يعني علاقته قوية في سامي وابو اثنين والتيماوي مثلا

تعرف ان كان له مشكلة مع التيماوي؟؟
ايه بس قبل لا أجي.. يعني ممكن أيام كأس العرب للمنتخبات في الدوحة وخالد هو اللي قال لي انه كان بينهم خلاف لكنه انتهى من فترة وعلاقتهم بالعكس في أيام وجودي في النادي كانت ممتازة

عاد يوسف وخالد هم اللي سجلوا الأهداف في مباراة المنتخب ضد الكويت في كأس العرب
ايه صحيح

بأي مناسبة قال لك التيماوي عن الخلاف؟؟
كنت معاه في الغرفة.. وعادة خالد قبل لاينام يجلس يسولف يسولف الين ماتجي ساعة محددة وثابتة كل يوم ينام على طول
ومرتين صار لي هالموقف معاه يسولف الين مايجي نفس الوقت بالضبط ينام

قال لك أسباب الخلاف؟ لأنه في رواية متداولة ان سبب الخلاف كان انه فيه شخص وصل له كلام عن الثنيان..
ايه قال لي نفس السبب.. وكان خالد يقول انه هو الي يتحمل الخلاف وهو الغلطان لأنه سمع الكلام اللي نقل له عن الثنيان بدون مايتأكد.. وعلى فكرة التيماوي رجل وماعنده مشكلة يعترف بأخطاءه بكل جرأة ولا يهضم حق أحد حتى لو كان مايحبه مثلا
لكن في الوقت اللي كنت فيه موجود كانت علاقة الثنيان مع التيماوي ممتازة جدا
وكانت برضه علاقة خالد التيماوي بفيصل أبو اثنين ممتازة وعلاقتهم قوية جدا للحين حتى يوم الله رزق خالد بولد سماه فيصل على الأمير فيصل بن فهد الله يرحمه.. فأنا اتصلت أبارك له وقلت له بمزح (مسميه على أبو اثنين) قال لي (مابقى الا ذي).. وعموما فيصل أبو اثنين علاقته في الجميع في النادي ممتازة والكل يحبه وزارني في الكويت قبل فترة وقابل ربعي وماشاءالله انبهروا في أسلوبه وكلامه وشخصيا أنا أحب أتابعه في التحليل واللقاءات لأنه مثقف وفاهم ولايجامل لدرجة أنه لما جا الكويت تقابلوا معاه التلفزيون الكويتي وتكلم عن المحترفين الأجانب ومقالب السماسرة اللي يعرضون عالادارات اشرطة من أيام الحرب العالمية الثانية فزعلت عليه الصحافة الكويتية لكن هو ماقال الا الصدق وهو شخص زي ماقلت مايجامل


طيب بشار خلنا نروح لذكريات مع لاعبين الهلال قبل ماتلعب للهلال يعني أيام المنتخب.. أيام مالعبت ضد الهلال؟
يوسف مثلا كنت أتنرفز منه لأنه شديد في اللعب ومايضحك والكورة ماتنفك من رجله ضد المدافعين
لكن سامي كان يتكلم مع اللعيبة حتى في الفريق الثاني وفيه سالفة قالوها لي لاعبين القادسية الكويتي وهي انه في مباراة بين الهلال والقادسية صار شد بين نهير الشمري وأحمد الدوخي فراح لهم سامي وقال (أعقلوا لا أطلعكم الاثنين برا ) واحتراما لسامي الاثنين انهوا المشكلة مع أن نهير لاعب في الفريق الثاني.. لكن سامي ماشاءالله تشعر أنه كابتن للفريقين في الملعب ويفرض احترامه عالكل


بس كيف شفتهم في مباريات السعودية والكويت.. مثلا هدف الثنيان اللي من الزاوية واللي أحتسبه رجل الخط؟؟
الهدف صحيح بس احنا اللي خلانا نعترض أن حكم الراية ماركض جهة نص الملعب والا الهدف صحيح ومافيه كلام

هل كنت تتوقع أن يوسف يسويها ويلعبها مباشرة للمرمى؟
بصراحة لا.. لكن الثنيان ممكن يسوي أي شي وسواها في النصر قبل كذا من الجهة الثانية

كنت أنت مسجل هدف الكويت في الدقيقة 18..
أيه وهذا الهدف للحين أشوفه وأحبه كثير.. أول هدف لي في تصفيات كأس العالم وضد السعودية وعلى أرضهم وفي استاد الملك فهد وكان هدف التقدم وعلى الدعيع وتشوف الجمهور الكبير يعني أشياء كثيرة تخليني أحبه

وكأس العرب1998؟
برضه تقدمنا وانقلبت علينا.. وهي كثير تصير بين السعودية والكويت اللي يتقدم يخسر
بس ترا كان الجو رطوبة واحنا يادوب نمشي.. ودخل التيماوي الشوط الثاني نشيط وأصلا ماشاءالله خالد كان معروف بلياقته وكنا مسجلين هدف سجله عادل يوسف إدارينا الحين في السالمية ونزل يوسف سجل التعادل فاول كأنه راميه بيده .. وللحين أحنا نمزح مع الفضلي ونقول له كم هدف مسجله عليك الثنيان وبعده اخترق التيماوي وسجل الثاني في وقت متأخر

وكأس آسيا 2000؟
هذي أحلى مباراة.. سجل نواف وبعدين سجلت أنا وبعدي تقدمنا بهدف جاسم وبعدي سجل طلال المشعل بعدين نواف
وهالمباراة مثلا.. خلصت بهدف ذهبي راحوا اللاعبين وأذكر كنت متفق مع نواف قبل المباراة ااننا بنبدل الفنايل مع بعض لكن جا هدف ذهبي والفريق اللي فاز يحتفل والخاسر يجلسون مو زي يوم تنتهي المباراة بصفارة لكن سامي ماراح مع الفريق وجا يكلمنا ومسكني طلعني برا الملعب

فيه لقطة مشهورة وسامي ماسكك.. ماتتذكر اش كان يقول لك؟
لا والله مو متذكر لكن مثل هذه المواقف تظهر لك معدن سامي الحقيقي وإنه شخص خلوق ويقدر خصومه لأنه في عز الفرح مانسى يواسي الفريق الخاسر ونبقى بالتأكيد إخوان بغض النظر عن التنافس

ومباراة خليجي 15 في الرياض؟
هالمباراة تذكرون كان فيه أوبريت والاضاءة مطفية فقالوا لنا الاداريين ادخلوا في الظلام سخنوا عشان تدخلون جو المباراة واستغلوا ان الجمهور مايشوفكم في الظلام وبيصيح عليكم عشان لاتتوترون.. وفجأة واحنا في المضمار ولعت الأنوار وشافونا الجمهور الا وصاحوا مع بعض (أوووووووووه) وخربت اللعبة

بشار من اللاعب الهلالي اللي تمنيت انك أخذته معك للسالمية؟
يوسف وسامي أكيد.. لأنك كمهاجم لما تلعب مع مثل هاللاعبين تستمتع بشكل مو طبيعي يعني سامي ترتاح وانت تلعب كمهاجم بجنبه تبيه يصير هداف يصير, تبيه صانع ألعاب يصير, تبيه يفتح لك خانات يفتح, يعني المهاجم دايم يبي المهاجم اللي بجنبه زي سامي مهاجم يفهمك ويعرف وش تبي ويفكر في المهاجم اللي جنبه.. يفكر أنت وين تتحرك ومتى تتحرك مو يلعب لنفسه بس
أما الثنيان.. فمع احترامي لكل اللي يحبون الثنيان ولكل اللي تكلموا عن يوسف ومدحوه وتسمع يوسف يوسف يوسف لكن اللي مالعب مع يوسف مايعرف يوسف زين ولايدري شنو يوسف ولاشاف يوسف الحقيقي لأنه كل الكلام اللي ينقال عنه ولاشي بجنب يوسف الحقيقي, يوسف لما تلعب معاه تكتشفه وتكتشف انه لاعب مختلف عن كل اللاعبين وإنه لاعب خرافي


من اللاعب اللي تشوف فيه بشار عبدالله؟
السؤال ذا ما أحبه.. أنا مثلا يوم كنت صغير كان الكل يدري أني أحب علي مروي فكان اذا سألوا مروي هالسؤال يقول بشار لأنه يدري اني استانس.. فأنا أخاف اقول اسم لاعب ويطلع مايحبني هههه
لكن اللاعب اللي يعجبني كثير هو بدر المطوع

من اللاعب الحالي اللي تتمناه في السالمية؟
أكيد ياسر القحطاني ومحمد الشلهوب

ومن اللاعب الهلالي الحالي اللي تمنيت انه كان موجود في هلال 1419؟
ياسر القحطاني

كيف عاد بيلعب الهلال؟
خلاص كله هجوم
الهلال حاليا يمكن مافيه نفس الأسماء اللي في السابق.. لكن ماشاءالله مستمر في النتائج حتى لو اني اشوف الجمهور يتكلم عن الأداء
لكن كمشجع ما أبغى أداء بدون بطولات.

الأمير بندر بن محمد يقولها دايما.. يقول فريق 1419 كان يقدم أجمل كرة في تاريخ الهلال وخرج بدون بطولات
ايه يعني الفريق يطلع ببطولة بطولتين كل موسم أهم من الأداء الحلو بدون بطولة.. ولاأحد بيتذكر الأداء بقدر مايذكر البطولة
لكن المشكلة بصراحة في الهلال حاليا هي عدم ظهور مواهب جديدة, أنا أتكلم بصفتي محب للهلال ولاعب هلالي ومشجع هلالي وماهو مجرد متابع.. من كم سنة الهلال ماطلع لاعب جديد؟ ومتى آخر نجم هلالي طلع؟ أتكلم عن النجومية النجم الأبرز حاليا هو ياسر وهو جاي من القادسية
طبعا ما أتكلم عن لاعب متميز أتكلم عن نجم والا ممكن نقول خالد عزيز عزيز أهم لاعب في الفريق ولو قلت لي من تلعب عزيز والا الشلهوب في المباراة أقول عزيز أهم لكن أنا أتكلم عن نجم سوبر ستار مثلا في أيامنا أنا ويوسف وسامي والتيماوي لو شلنا من ورانا خميس العويران الفريق كله ينتهي ولكني أتكلم عن النجومية, فآخر نجم ظهر الشلهوب يعني خمس ست سنوات وانت ماطلعت نجم جديد وأنا أتكلم عن الهلال مو أي نادي المفترض يطلع عالأقل كل سنة نجم آسيوي مو نجم سعودي

تتذكر مباراة 3-2 بين الهلال والسالمية؟؟
أووه حق يوسف.. كان هدف رهيب

تتذكر أول شي حركتك بعدما سجلت هدفك؟
أنا ماسجلت كان الهدف الأول بالغلط سجله المدافع مشعل الناصر وجاسم سجل الثاني وراح جلس وانا جلست معاه بس الصورة جات علي وأتذكر الصحافة والجمهور زعلوا من الحركة مع أن مالها هدف ولاقصدنا فيها أحد والمشكلة جاسم هو اللي سوا الحركة والصجة صارت علي أنا

وانقلبت المباراة..
ايه سجل موني وبعدها سجل يوسف.. ماضبطت معه باليمين وجات بالشمال أحلى من اليمين

خلنا نرجع لمباراة كأس المؤسس لأنها تاريخ لحالها .. مشاكل الدوخي وحسين عبدالغني؟؟
ايه كنت دايم استانس على الدوخي قبل المباراة أقول له الحين يسحبك حسين في الملعب.. والا لو في التمارين قبل مباراة الأهلي بيومين ثلاثة يتعور أو شي أقول له ها بديت تتهرب خايف من حسين فيعصب الدوخي لأن المنافسة بينهم قوية وكل مباراة يكون بينهم مباراة ثانية حتى بعد اللعب كنت استانس لو حسين سوا حركة في أحمد عشان أضحك على الدوخي
عاد المباراة سببت فيها بلنتي وجهزت هدف لكن أحلى مافي المباراة كان هدف سامي الرابع
لو سامي مسجله مثلا باليمين كان أقول عادي لكن باليسار وفي الزاوية الصعبة وحطها في مكان صعب
هدف يوسف كان ملعوب ولعبة كروية كاملة بيني وبين سامي ويوسف لكن هدف سامي مو طبيعي

كيف علاقتك في الجمهور الهلالي؟؟
يا أخي جمهور الهلال بيني وبينه ارتباط غريب للحين.. أنا مشجع هلالي للحين وأعتبر نفسي منهم ومستحيل أنسى تقديرهم لي سواء أيام مالعبت للهلال أو حتى بعدها
أتذكر قبل سنتين لما لعبت ضد الهلال في البطولة الخليجية في الرياض إني سجلت في مرمى الهلال.. كان جمهور الهلال يصفق لي مع إني كنت مسجل في مرمى الهلال
لذلك فأنا أعتبر الهلال ناديي وإني لازلت هلالي وما أتحفظ في كلامي عن الهلال.. يعني أنا لعبت في أندية غير الهلال لكن ما أقدر أتكلم عنها أو أنتقدها أو أرتبط فيها لكن الهلال لا بالعكس.. حتى يوم أتكلم أعرف أن الجمهور والادارة واللاعبين يتقبلون مني لأنهم يشعرون إني واحد منهم

بصراحة اش سر اندماجك السريع في الهلال؟
يمكن لأني لما جيت كان الهلال فيه جيلين.. جيل يوسف وسامي والشريدة
وجيل خميس ونواف والدوخي والمسعري فكنت في مثل عمرهم ودخلنا في بعض بسرعة وصارت علاقتنا قوية

حتى المسعري صديقك؟
خلني أتكلم عن المسعري كلاعب. فيه نوعية من اللاعبين الجمهور ماينتبهون لمجهودهم لكن الفريق مايستغني عنهم زي المسعري وخميس مثلا في الهلال على وقتنا
يا أخي ماينفع يصير الفريق كله (يكعّب)
عاد على فكرة.. المسعري ترا دمه خفيف بشكل مو طبيعي.. فيه مباراة لنا ضد هجر سجلنا ثلاثة أهداف وبدا الفريق يتقدم زيادة وانفتح الدفاع فسجلوا هجر هدفين وفزنا 3-2
فمسكنا خليل الزياني بعد المباراة والقى علينا محاضرة وقال تدرون احنا اش يصير فينا؟ صايرين مثل جيش المسلمين في غزوة أحد الصحابة رضي الله عنهم يوم جيش الرماة شافوا الغنائم تركوا الجبل فانكشف الجيش وخسروا المعركة والحمدلله اللي ستر وماخرجنا متعادلين فياليت المحاور مايتقدمون عشان يغطون الدفاع (المحاور كانوا خميس والمسعري)
المباراة اللي بعدها ضد الاتفاق ونفس الشي سجلنا 3 وتحمسوا خميس والمسعري انهم يسجلون وتقدموا وانكشف الدفاع و سجل الاتفاق فينا 2 ونفس الشي فزنا 3-2 لكن برضه خرج ابو ابراهيم زعلان عالمحاور وقال أنا قلت لكم قصة الجبل ليه ماتسمعون الكلام.. فقال الله المسعري (يا ابو ابراهيم تعبنا.. مدري متى بتنزلنا من ذا الجبل)

ماشاءالله صداقاتك كثيرة في الهلال.
في الهلال تكون علاقاتك مع الكل حلوة ومميزة.. مو بس اللعيبة حتى علاقتنا في الاخوان اللي يشتغلون في النادي سوران حق غرفة الملابس ومرجان والعم عبده مصلح الله يرحمه

النادى الآن يبني غرفة ملابس غير اللي كانت على أيامك.
هو أصلا ماكانت غرفة ملابس متكاملة.. كان فيه غرفة برا لبعض اللاعبين وأنا كنت معاهم.. وفيه غرفة وراها حق الوناسة للي يجلسون يحشون

فيه سالفة لعبده مصلح أبو محمد الله يرحمه انه بعد فترة من رجوعي للسالمية ثلاث أو اربع سنوات تقريبا
لعبنا مع السالمية ضد الهلال في استاد الملك فهد وفاز الهلال ثلاثة واحد وضيعت أنا انفرادة ضد الدعيع
بعد المباراة كانوا الاخوان في نادي الهلال عازمين لاعبين واداريين السالمية في النادي عالمسبح فأنا داخل للمسبح معاي مجموعة من اللاعبين مايعرفون عبده وهو أول ماشافني قال ها يامعفن تبي تسجل هدف في الهلال؟ اللاعبين استغربوا بس أنا قلت لهم عادي عادي هذا يمون على اللعيبة كلهم

بعد وفاته توضف ولده في مكانه وتوفي الله يرحمه.. وبعدها برضه وضفوا ولده الثاني أحمد
مو غريب الوفاء عالهلاليين.. وبصراحة أبو محمد الله يرحمه يستاهل كل خير

كذا خلصنا يابشار كل اللي عندنا.. وتشرفنا بصراحة بهذه المقابلة معك ونشكرك باسم جميع أعضاء الموقع على وقتك اللي قضيته بيننا
أنا اللي تشرفت باللقاء مع موقع الهلال الرسمي ومع جمهور الهلال.. وسعيد جدا بالذكريات الجميلة اللي تكلمنا عنها












مقطع فيديو لبعض أهداف بشار مع الهلال



كل الشكر للأسطورة الكويتية بشار عبدالله ولكم.. ونتمنى أن تتقبلوا منا هذه العيدية
ونخص بالشكر الإخوة المساهمين في تنسيق الصور M~shari و قمر الهلال و RauL_ GirL
وللأخ MASHHOUR مصمم مقطع الفيديو

وكل عام والهلال وبشار وأنتم بخير
إخوانكم.. وطن الهلال و هلالي ثنياني
  #2  
قديم 01/10/2008, 03:43 PM
زعيــم مميــز
تاريخ التسجيل: 02/12/2007
المكان: ...؟
مشاركات: 2,219
إقتباس
الا يوسف يناديني رحت وسلمت عليه قال لي أنت ليش رحت معاهم للمدينة؟؟ قلت مايصير يابو ناصر لازم أروح مع الفريق..
قال لي.. لالا خلك بس في الرياض, بريدة والمدينة لاتروح لها تعب يا أخي



الله يهديك أبو يعقوب حركاتك ما تخليها

إقتباس
إخوانكم.. وطن الهلال و هلالي ثنياني



ألف شكر ع التغطيه،،


حوار كان أكثر من رائع..!!


مودتي



اخر تعديل كان بواسطة » مجن{الهلال}وون في يوم » 01/10/2008 عند الساعة » 05:26 PM
  #3  
قديم 01/10/2008, 03:44 PM
زعيــم مميــز
تاريخ التسجيل: 30/09/2005
المكان: أمريكا_ ولاية بقالة شكور ض1
مشاركات: 20,924
مقابلة راااااااااااااائعة وفيها كل شي

حقائق +ذكريات + ضحك + وفاء + تقدير


الف الف الف شكر لكم

ورايتكم بيضا



إقتباس
هل كنت تتوقع أن يوسف يسويها ويلعبها مباشرة للمرمى؟
بصراحة لا.. لكن الثنيان ممكن يسوي أي شي وسواها في النصر قبل كذا من الجهة الثانية


يالبى قلبك يابو يعقوووووووووووووب




إقتباس
فيه لقطة مشهورة وسامي ماسكك.. ماتتذكر اش كان يقول لك؟
لا والله مو متذكر لكن مثل هذه المواقف تظهر لك معدن سامي الحقيقي وإنه شخص خلوق ويقدر خصومه لأنه في عز الفرح مانسى يواسي الفريق الخاسر ونبقى بالتأكيد إخوان بغض النظر عن التنافس


ويلومناااا فيك ياااسااامي




إقتباس
بشار من اللاعب الهلالي اللي تمنيت انك أخذته معك للسالمية؟
يوسف وسامي أكيد.. لأنك كمهاجم لما تلعب مع مثل هاللاعبين تستمتع بشكل مو طبيعي يعني سامي ترتاح وانت تلعب كمهاجم بجنبه تبيه يصير هداف يصير, تبيه صانع ألعاب يصير, تبيه يفتح لك خانات يفتح, يعني المهاجم دايم يبي المهاجم اللي بجنبه زي سامي مهاجم يفهمك ويعرف وش تبي ويفكر في المهاجم اللي جنبه.. يفكر أنت وين تتحرك ومتى تتحرك مو يلعب لنفسه بس


شهاااادة من نجم لنجم

اخر تعديل كان بواسطة » حمـ(الهلالي)ــد في يوم » 01/10/2008 عند الساعة » 04:15 PM
  #4  
قديم 01/10/2008, 03:45 PM
زعيــم مميــز
تاريخ التسجيل: 10/02/2007
المكان: الدمــا مـــ
مشاركات: 1,920
مشكور يا الغالي ع التغطية والله يوفق الهلال والاعب والامير بندر بن محمد

تحياتيــــــــــــــــــ
  #5  
قديم 01/10/2008, 03:52 PM
الصورة الرمزية الخاصة بـ Cʜɑᴙᴉƨᴍɑ
اشراف المكتبة الفنية
تاريخ التسجيل: 27/10/2001
المكان: AlHilal.com
مشاركات: 5,975
يعطيكم الف عافيه اخواني /

[ وطن الهلال - هلالي ثنياني ]

عمل جبار ورائع ومايجي الا من الكبار فقط
ويستاهل بشار عبدالله

:::

الله يلوم اللي يلومك يا بشار
الثنيان لاقبله ولا بعده وبتجي اساطير وبتروح
واجيال و الثنيان متربع عالعرش

لكن للأسف ماتدوم

لو كانت تدوم مانبي غيركم

:::

شكراً لكم ,,
كل عام وانتم بخير

مساكم ورد

اخر تعديل كان بواسطة » Cʜɑᴙᴉƨᴍɑ في يوم » 01/10/2008 عند الساعة » 04:08 PM
  #6  
قديم 01/10/2008, 03:54 PM
الصورة الرمزية الخاصة بـ الموهوب الأزرق
زعيــم متألــق
تاريخ التسجيل: 24/12/2006
المكان: المدينة المنورة
مشاركات: 1,099
والله أيام كانت حلوة يوم ما احترف في الهلال
وياليت الزمن يرجع
.....تحياتي.....<الموهوب الأزرق>
  #7  
قديم 01/10/2008, 03:55 PM
زعيــم نشيــط
تاريخ التسجيل: 04/09/2006
المكان: عرعر
مشاركات: 654
لبى قلبك يا بشآر


ياخي والله اشتقنا لوقتكم ذاك

فترة لا تنسى من التآريخ الهلالي العطر


نحبك يا بشآر
  #8  
قديم 01/10/2008, 03:57 PM
موقوف
تاريخ التسجيل: 14/10/2007
المكان: {..آلمدرج آلهلآلي..~
مشاركات: 1,838
يعطيك العافيه اخوي هلالي ثنياني

حوار ممتع ولاعب مبدع

عوافي
  #9  
قديم 01/10/2008, 03:59 PM
زعيــم مميــز
تاريخ التسجيل: 11/02/2001
المكان: الرياض
مشاركات: 3,823
والله أيام كانت حلوة يوم ما احترف في الهلال
وياليت الزمن يرجع >ولك تحياتي .............................................................................
  #10  
قديم 01/10/2008, 04:07 PM
زعيــم فعــال
تاريخ التسجيل: 06/03/2008
مشاركات: 496
كل عان وانت بخير يا بشار


الف شكر على عالعيديه الرائعه

وذكريات بشار مع الهلال لاتنسى
  #11  
قديم 01/10/2008, 04:11 PM
زعيــم نشيــط
تاريخ التسجيل: 04/05/2007
المكان: الشرقـــيـــة
مشاركات: 773
الله على ايامكـ يابشـــآر والله العظيم ماتنسى

يعطيكم العافيــة عالمجهوود وعلى المقابله الحللوة مع بشــآر
  #12  
قديم 01/10/2008, 04:12 PM
زعيــم مميــز
تاريخ التسجيل: 03/11/2007
مشاركات: 3,633
يعطيك العافيه على المقابله مع هذا النجم الهلالي الكويتي.
إلى يومك هذا قاعد افكر في بشار و اقول كيف ما اخذ بطوله مع الهلال.
  #13  
قديم 01/10/2008, 04:13 PM
زعيــم فعــال
تاريخ التسجيل: 11/11/2006
مشاركات: 209





بشــار نجـــم كبير ومحبوب
وخلوووق وكل شي حلو
موجوده في انا مـــــــن
اشد الناس المعجبين
في هاذا الداهيه
  #14  
قديم 01/10/2008, 04:21 PM
الصورة الرمزية الخاصة بـ الجليد الازرق
زعيــم مميــز
تاريخ التسجيل: 10/07/2005
المكان: نـــــادي الذهـــــب
مشاركات: 15,305
هلالي ثنياني

يعطيك العافيه على المقابلة الرائعه

مع الاعب الرائع بشار عبدالله
  #15  
قديم 01/10/2008, 04:23 PM
الصورة الرمزية الخاصة بـ هلمجرا
عضو ادارة الموقع الرسمي لنادي الهلال
تاريخ التسجيل: 29/08/2001
المكان: الرياض
مشاركات: 10,841
من امتع المقابلات التي قراتها مؤخرا صحفيا ومنتدياتيا ..
وان شاء الله تتكرر مع نجوم اخريين قريبا ..وبنفس الشفافية

مقابلة تشعرك انك امام شريط سينمائي يعيدك سنوات للوراء بكل الذكريات الجميلة والموقف الرائعة والسوالف الحميمية بدون تحفظ من السائل ( هلالي ثنياني ) او المجيب ( بشار ) والتي من الصعب تخرج بسهولة للعامة ..
كانت الكرة ممتعة انذاك والفريق زاخر بالنجوم من الصعب نسيانهم وكان روح العائلة موجودة بين اللاعبين وكان هذا واضحا من اجابات بشار ولهفتة التي كانت حاضرة بالردود والمواقف الخاصة بينة وبين اللاعبين جميعا بدون استثناء ..ومن ثم انعكست على اداءة كلاعب وكمجموعة فريق

كان صريحا بدون دبلوماسية على كل الاسئلة والمواقف لانة كانت الاسئلة شفافة وغير تقليدية بعيدة عن العت والعجن والكليشيهات المعلبة الذي مللناة من بعض الصحفيين في مقابلاتهم .. فخرجنا بمقابلة جميلة تقراؤها بدون توقف واكاد اجزم حتى من الذين لم يعاصروا الفريق او اللاعب هذا الفترة عن قرب بسبب فارق الاجيال او العمر فانة خرج بمشهد ناصع وواضح لهذا الزمن الجميل

اشكر لك بشدة هذة المقابلة لسببين اساسيين ..
اولا لانه بالفعل مقابلة جميلة ومميزة من شخص مميز عرفت كيف تطلع بحصيلة وافية من الذكريات والاجابات والمواقف التي من الصعب استحضارها في مقابلة صحفية او منتدياتة اخرى

السبب الاخر ..
انها اخرجتنا من صدمة ايقاف التايب المزعجة ..

دمت بخير
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 06:04 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube